Epai wapi bolamu ya solosolo ekoki kozwama?

BATO mingi bazali na likanisi ete bolamu ya solosolo ekoki kozwama na kondukáká biloko mingi ya mosuni. Ezali boni mpo na yo? Atako biloko ya mosuni bikoki kosalisa biso ete tózwa bolamu, bikoki te kobatela bolamu yango; lolenge moko mpe kozala na nzoto kolɔngɔ́nɔ́ ekoki te kotonga kondima to mpe kokokisa mposa ya elimo.

Kati na Lisoló na ye likoló na Ngomba, Yesu Klisto alobaki ete: “Mapamboli epai na babólá na [e]limo, zambi Bokonzi ya likoló ezali na bango.” (Matai 5:3) Yesu alobaki lisusu ete: “Sɛnzɛlá na ntina na lokoso nyonso, mpo ete bomoi na moto ezali kati na motuya ya biloko bizali na ye te.”​—Luka 12:15.

Mingi bazali koluka bolamu na komipesáká na kosangisa nzoto na lolenge ya mbindo mpe na lolenge mosusu ya “misala ya nzoto.” (Bagalatia 5:19-21) Nzokande, kotika nzela na mposa ya nzoto ememaka te bolamu ya solosolo mpe ya koumela. Kútu, baoyo bazali kosala makambo motindo wana bakosangola Bokonzi ya Nzambe te.​—1 Bakolinti 6:9, 10.

Basusu bamipesi mobimba na koluka kozwa bolamu na kosaláká makasi ete bámizwela lokumu mpo na bango moko. Babibliotɛkɛ mpe bandako ya kotɛkisa mikanda etondi na babúku oyo ezali kolobela lolenge moto akoki komisalela lokumu, kasi mikanda wana mimemeli mpenza bato bolamu ya koumela te. Na yango, epai wapi tokoki kozwa bolamu ya solosolo?

Mpo na kozala na esengo ya solosolo, tosengeli kondima ete tozali na mposa ya makambo ya elimo uta kobotama na biso. Yesu alobaki ete: “Mapamboli epai na babólá na [e]limo.” Ya solo, ekozala na biso mpenza litomba te soki tosuki bobele na koyeba mposa yango kozanga ete tósala eloko moko mpo na yango. Tózwa ndakisa: Ekozala boni soki mopoti mbangu akoboya komela mai, oyo nzoto na ye ezali na mposa na yango nsima ya kopota mbangu? Akosila mai na nzoto mpe akolukela bokolɔngɔ́nú ya nzoto na ye mikakatano, boye te? Lolenge moko, soki tozangi kokokisa mposa na biso ya komileisa na elimo, tokokauka na elimo. Yango ekomema na kobungisa esengo mpe bosepeli.

Yesu ayebaki malamu mposa na ye ya elimo, azalaki ntango nyonso koyekola Liloba ya Nzambe mpe komanyola likoló na yango. Azalaki na likoki ya koluka nokinoki mpe kotánga biteni ya Makomami Mosantu kozanga kokakatana, mpe ateyaki bato mosusu ete básala lolenge yango. (Luka 4:16-21; kokanisá na Baefese 4:20, 21.) Yesu akokanisaki mpe kosala mokano ya Tata na ye ya likoló na bilei. Kosala mokano ya Nzambe ememelaki ye bolamu mingi.​—Yoane 4:34.

Ya solo, bolamu ya solosolo ekoki kozwama te na kondukáká biloko ya mosuni; ekoki mpe kozwama te na kokokisa mposa mabe ya nzoto oyo esilá kobeba. Bolamu ya solosolo ezali ezalela ya motema, oyo etongami likoló na kondima ya solosolo mpe na boyokani malamu elongo na Yehova Nzambe. Na yango, mokomi na Nzembo ayembaki na lolenge lobongi mpenza ete: “Esengo ezali na bato oyo [Yehova] azali Nzambe na bango.”​—Nzembo 144:15b.

[Elilingi na lokasa 23]

Kondima mpe boyokani malamu elongo na Nzambe ekomemela yo bolamu ya solosolo