Bósepela mpo na elikya ya Bokonzi!

MOKOLO ya 10 Marsi 2001 ezalaki mpenza mokolo ya esengo, mpo na mokolo yango bato 5 784 bayanganaki na ndako monene ya biteni misato ya libota ya Betele ya New York. Ezalaki mokolo ya kopesa badiplome na kelasi ya mbala ya 110 ya Gileadi, eteyelo mpo na bamisionɛrɛ.

Ndeko Carey Barber, oyo azali na Lisangani ya Mikóló-Bakambi ya Batatoli ya Yehova, atombelaki bayangani nyonso boyei malamu mpe abandaki programɛ yango na maloba oyo: “Tozali na esengo ya koyeba ete sikoyo, bayekoli ya kelasi ya mbala ya 110 ya Gileadi, basili kobongisama lokola bamisionɛrɛ mpe batindami na bateritware ya bipai nyonso na mokili mobimba.”

Ndenge ya kobatela esengo

Nsima ya maloba ya ebandeli ya Ndeko Barber, Don Adams asalaki lisolo mpo na bayangani mpe bayekoli 48 oyo bazwaki badiplome; lisolo yango ezalaki na motó ya likambo “Lipamboli ya Yehova ekómisaka biso bazwi.” Na lisukulu na ye oyo etongamaki na Masese 10:​22, akundwelaki bayangani ete Yehova abatelaka mpe apambolaka basaleli na ye ntango batyaka matomba ya Bokonzi na esika ya liboso na bomoi na bango. Alendisaki bayekoli ete bándima bateritware ya sika oyo batindi bango, na elimo ya komipesa, ndenge moko na elimo oyo ntoma Paulo amonisaki ntango basɛngaki ye ete ‘akende na Makedonia mpo na kosunga.’ (Misala 16:9) Atako ezalaki na mikakatano oyo asengelaki kolonga, mposa oyo Paulo azalaki na yango ya kosakola na esika oyo batindaki ye ebimiselaki ye matomba mingi oyo epesaki ye esengo.

Bana-kelasi oyo bazwaki badiplome bautaki kosilisa koyekola Biblia mpe kobongisama mpo na mosala ya misionɛrɛ na boumeli ya sanza mitano. Na nsima, Daniel Sydlik, oyo azali na Lisangani ya Mikóló-Bakambi ya Batatoli ya Yehova, alendisaki bango ete bákoba koyekolaka. Ntango azalaki kosala lisolo oyo ezalaki na motó ya likambo ete “Bózala bayekoli ya solosolo,” amonisaki ete: “Kozala moyekoli elimboli kotosa ntango nyonso maloba ya Yesu. Yango elakisi mposa na biso ya koyoka ntango nyonso maloba na ye, nsango na ye mpe mateya na ye.” Amonisaki ete bayekoli ya Klisto bakoki te kozwa bikateli kozanga ete báyoka mongongo ya Nkolo na bango; mpo bayebi ete bomoi ya Klisto eyokani mpenza na bwanya ya Nzambe. (Bakolose 2:3, NW) Moto moko te kati na biso akoki koyoka maloba ya Yesu mpe kokanisa mbala moko ete toyebi makambo nyonso na ntina na ye. Na yango, Ndeko Sydlik alendisaki bayekoli oyo bazwaki badiplome ete bákoba koyekola, kosalela, mpe koteya solo ya boklisto, oyo esikolaka bato.​—Yoane 8:31, 32.

Mpo na kobatela esengo na mosala ya Nzambe, esengeli moto azala pene ya kondima disipilini mpe kosembolama. Ndeko Lawrence Bowen, oyo azali molakisi na eteyelo ya Gileadi, atunaki motuna oyo: “Bangɛi na yo ekosembola yo?” Amonisaki ete kati na Biblia, bangɛi ya elilingi ezali mpenza na boyokani ya penepene na makanisi mpe na mayoki ya moto. Ekoki kosalisa moto na komisembola soki mpenza toli epemami ya Liloba ya Nzambe ekɔteli biteni nyonso ya bomoto na ye. (Nzembo 16:7; Yilimia 17:10) Soki moto azali na etamboli ya malamu mpenza, yango ekoki kosepelisa Yehova makasi. Nsima ya kotánga Masese 23:15, 16 (NW), molobi atunaki boye: “Bangɛi na yo ekosembola yo?” Abakisaki ete: “Tozali kobondela ete bangɛi na bino esembola bino, mpe ntango bokosala bongo, bokosepelisa mpenza motema ya Yehova. Bokolamwisa mayoki mozindo oyo azali na yango. Ɛɛ, bokosepelisa bangɛi ya Nzambe ntango bokokangama na bosembo mpenza na bisika oyo bakotinda bino.”

Lisukulu ya nsuka na eteni oyo ya programɛ yango epesamaki na Mark Noumair, oyo azalaki misionɛrɛ na Kenya liboso ete akóma molakisi na eteyelo ya Gileadi. Lisukulu na ye oyo ezalaki na motó ya likambo: “Komona na miso eleki malamu,” emonisaki ntina ya kolona ezaleli ya kosepela na mosala oyo ozali kosala. Na boyokani na Mosakoli 6:9, Ndeko Noumair apesaki etinda oyo: “Bóndima makambo oyo bokokutana na yango. Elingi koloba ‘oyo bokomona na miso.’ Na esika ya kolɔta kosala makambo oyo bolingi kosala, kasi bozali kosala yango te, bótya nde makanisi na bino na kosala makambo oyo bokutani na yango na ntango wana. Kozala lokola na kati ya ndɔtɔ, kozala na bilikya na makambo ya mindɔndɔ, to kotya likebi mingi na makambo mabe ya teritware oyo batindi yo ekoki kolongola bosepeli na yo.” Na ntembe te, ezala likambo nini tokutani na yango to makambo oyo tozwami na yango, soki toloni bosepeli oyo euti na boyokani na biso na Nzambe, makambo oyo tokokutana na yango ekopesa biso elimo ya esengo, wana tozali kosalela Mozalisi na biso Monene.

Makambo ya esengo oyo bakutanaki na yango na mosala ya Bokonzi mpe na Gileadi

Nsima ya toli oyo epesamaki na nzela ya masukulu yango, bayekoli bayebisaki mwa makambo oyo bakutanaki na yango ntango basanganaki na mosala ya kosakola na boumeli ya sanza mitano ya mateya. Na lisolo oyo etambwisamaki na Ndeko Wallace Liverance, oyo azali sekrɛtɛrɛ ya Eteyelo ya Gileadi, bayekoli oyo bazwaki badiplome bayebisaki ndenge basalaki mpenza makasi mpo na komikómisa baministre ya Nzambe. (2 Bakolinti 4:2, NW) Bazwaki lisosoli oyo euti epai ya Nzambe. Kati na makambo ya esengo oyo bayekoli bakutanaki na yango, bayebisaki ndenge oyo babandaki koyekola Biblia na bato ya motema sembo oyo bakutanaki na bango na babalabala, na mosala ya ndako na ndako, mpe na bisika mosusu. Na mabaku mosusu, bato oyo basepelaki koyoka nsango malamu balobaki ete mikanda ya kolimbola Biblia oyo ebongiseli ya Yehova ebimisaka, ezali mpenza na mateya ya solo. Moto moko asepelaki mpenza koyoka biso, ntango totángelaki ye vɛrsɛ ya Biblia oyo elobelaki mpenza likambo oyo toyebisaki ye. Azali sikoyo koyekola Biblia na Batatoli ya Yehova.

Na nsima, Joel Adams atunaki bayekoli ya Gileadi oyo bazwá badiplome na bakelasi ya liboso. Motó ya lisolo na ye ezalaki: “Bótika te koyekola, bótika te kosalela Yehova.” Bandeko oyo batunaki bango mituna bazalaki na toli oyo ebongi mpenza mpo na bamisionɛrɛ ya sika. Harry Johnson akanisaki ntango oyo azalaki moyekoli na kelasi ya mbala ya 26 ya Gileadi, ntango alobaki ete: “Bateyaki biso ete Yehova azalaki ntango nyonso kotambwisa bato na ye mpe azali kokoba kotambwisa bango. Elikya wana elendisaki biso na boumeli ya bambula.” William Nonkes, oyo azalaki moyekoli na kelasi ya mbala ya 53 na Eteyelo ya Gileadi, apesaki bana-kelasi oyo bazwaki badiplome toli oyo: “Likambo eleki ntina ezali ya kobatela na malako ya Biblia na elimo na bino, mpe kosalela yango na bikateli nyonso oyo bosengeli kozwa na bomoi, sikoyo mpe mpo na libela. Yango ekosala ete bótikala na bisika oyo batindi bino, mpe bokozwa mapamboli ya Yehova.”

Ndeko Richard Rian aponaki mpo na programɛ yango lisolo oyo ezalaki na motó ya likambo: “Bózwa makasi ya kokokisa mokano ya Yehova.” Moko ya bato oyo atunaki mituna ezalaki Ndeko John Kurtz, oyo azwaki diplome na kelasi ya mbala ya 30, mpe alekisaki mbula koleka 41 na Espagne na mosala ya misionɛrɛ. Ntango batunaki ye soki programɛ nini ya mateya epesamaka na Gileadi, Ndeko Kurtz alobaki ete: “Buku ya liboso oyo tosalelaka ezali Biblia. Tozali mpe na mikanda ya boyekoli ya Biblia oyo esalisaka biso na kososola Biblia. Mikanda yango ezali kaka oyo Batatoli nyonso basalelaka. Na Gileadi, bateyaka ata likambo moko ya sɛkɛlɛ te. Nalobaka likambo yango mbala na mbala, mpo na komonisa ete Batatoli nyonso bazali na lotomo ya koyeba mateya oyo epesamaka na Gileadi.”

Ndeko Gerrit Lösch, oyo azali na Lisangani ya Mikóló-Bakambi ya Batatoli ya Yehova, asukisaki programɛ yango ya elimo na lisolo oyo ezalaki na motó ya likambo: “Na likoló mpe na nse ya mapapu ya Yehova.” Alimbolaki ete Biblia ekokanisi lolenge oyo Nzambe abatelaka mpe asungaka basaleli na ye ya sembo na mapapu ya mpongo. (Deteronome 32:11, 12; Nzembo 91:4) Mbala mingi, mpongo afungolaka mapapu na ye ntango molai mpenza mpo na kobatela bana na ye. Ntango mosusu, mpongo akoki ata kokitisa mapapu na ye zingazinga ya bana na ye, mpo na kobatela bango na ntango ya mopɛpɛ ya malili. Ndenge moko, na boyokani na mokano na ye, Yehova akoki kosunga basaleli na ye ya sembo, mingimingi ntango bakutani na komekama ya elimo. Yehova akoki kopesa nzela te ete basaleli na ye bámekama na koleka nguya na bango, kasi abongisaka ekimelo ete bákoka koyika mpiko. (1 Bakolinti 10:13) Ndeko Lösch asukisaki na maloba oyo: “Soki tolingi kobatelama na elimo ntango nyonso, tosengeli kotikala na nse ya mapapu ya Yehova. Yango elimboli ete tosengeli te kokolisa elimo ya lipanda. Tiká ete tókangama ntango nyonso na Yehova, mpe na ebongiseli na ye oyo ezali lokola mama ya mpongo, tómitangola te na litambwisi mpe na toli na bango ya bolingo.”

Prezida atángaki batelegramɛ mpe bambote oyo eutaki bipai na bipai na mokili. Na nsima ekómaki ntango ya kopesa badiplome. Ntango Eteyelo ya Gileadi esalemaki, emonanaki ete ekokaki kobongisa kaka mwa motango moke ya bakelasi na boumeli ya mbula mitano. Kasi na boumeli ya mbula 58, Yehova Nzambe apesaki nzela ete eteyelo yango elanda kosala. Ndenge Ndeko Barber alobaki yango na maloba na ye ya ebandeli: “Kobanda na 1943, mbula oyo eteyelo ya Gileadi efungwamaki, baoyo bazwaki badiplome na eteyelo yango bakómi ebele mpenza! Milende oyo bango bazali kosala na bomoko esali ete bankama ya bankóto ya bato ya motema sembo oyo bazwami awa na mabele, bábakisama na ebongiseli ya nkembo ya Yehova.” Ya solo, eteyelo yango ya bamisionɛrɛ esalisi bamilio ya bato na kozala na esengo mpo na elikya ya Bokonzi.

[Etanda na lokasa 24]

MAKAMBO MATALI BANA-KELASI

Bauti na bikólo: 8

Batindami na bikólo: 18

Bana-kelasi bazalaki: 48

Mwayene ya mbula ya kobotama: 34

Mwayene ya mbula balekisi kati na solo: 18

Mwayene ya mbula balekisi na mosala ya ntango nyonso: 13

[Elilingi na lokasa 25]

Kelasi ya mbala ya 110 ya Gileadi, Eteyelo ya la Société Watchtower mpo na mateya ya Biblia

Bankombo na bango ekomami awa na nse na kolanda ndenge batɛlɛmi na fɔtɔ; banda na moto ya liboso na lobɔkɔ ya mwasi; mpe banda na molɔngɔ ya liboso tii na molɔngɔ ya nsuka.

(1) Vacek, E.; Madelin, L.; Evans, G.; Watanabe, K. (2) Trafford, P.; Turfa, J.; Wilson, P.; Williams, R.; Weber, A. (3) Johnson, T.; Hanau, K.; Mourlhou, F.; Charpentier, F.; Peckham, R.; Androsoff, P. (4) Seegers, T.; Seegers, D.; Bailey, P.; Bailey, M.; Madelin, K.; Lippold, E.; Lippold, T. (5) Evans, N.; Gold, R.; Bollmann, I.; Vacek, R.; Oundjian, J.; Wilson, N. (6) Turfa, J.; Zuidema, L.; Zuidema, R.; Bengtsson, C.; Bengtsson, J.; Galano, M.; Galano, L. (7) Peckham, T.; Mourlhou, J.; Charpentier, C.; Gold, M.; Bollmann, R.; Oundjian, F. (8) Weber, R.; Johnson, B.; Hanau, D.; Watanabe, Y.; Williams, R.; Trafford, G.; Androsoff, T.