Kozanga ya bilei oyo euti na bitumba mpe kobongwama ya klima​—Biblia elobi nini?

Etumba na Ukraine mpe mbongwana ya klima, ezali kokoba kosala ete bilei ezanga na mokili mobimba. Yango ezali kosalema mingimingi na mokili ya bozwi epai esɛngaka kosala makasi mpenza mpo na kozwa bilei mingi.

• “Bitumba, kobongwana ya klima, ntalo ya kura mpe makambo mosusu esali ete kolona bilei mpe kozwa yango ekóma mpasi mingi.”​—António Guterres, secrétaire général ya ONU, 17/07/2023.

• “Bato ya mayele balobi ete ndenge ekólo Russie eboyi kotosa boyokani na likambo etali kotinda blé, ɔrge, loso mpe bongo na bongo, yango ekosala ete bilei ekóma mpasi mpe ntalo na bikólo oyo ezalaka na mosolo mingi te, mingimingi na nɔrdi ya Afrika mpe na Moyen-Orient.”​—Atalayar.com, 23/07/2023.

Tótalela oyo Biblia elobi mpo na kozanga bilei mpe makambo oyo ekosalema na mikolo ezali koya.

• Yesu asakolaki ete: “Ekólo ekobunda na ekólo mpe bokonzi ekobunda na bokonzi, mpe nzala ekozala.”​—Matai 24:7.

• Mokanda ya Biblia ya Emoniseli elobeli batambwisi mpunda minei ya elilingi. Moko ya batambwisi mpunda yango azali komonisa bitumba. Na nsima na ye, ezali na mosusu oyo azali komonisa nzala, ntango moko oyo bilei ekozala mingi te mpe ekotekama na ntalo mingi. “Namoni mpunda ya mwindu. Moto oyo amati yango asimbi eloko ya komekela kilo. Nayoki lokola mongongo moko euti na . . . Elobi: ‘Lifuta ya mokolo moko ya mosala ekozala bobele mpo na kopo moko ya blé, to bakopo misato ya orje.’”​—Emoniseli 6:5, 6, Bible na Lingala ya lelo oyo.

Bisakweli yango oyo elobeli kozanga ya bilei ezali kokokisama lelo oyo na mikolo oyo Biblia ebengi “mikolo ya nsuka.” (2 Timote 3:1) Mpo na koyeba makambo mosusu oyo etali mikolo ya nsuka mpe batambwisi mpunda minei oyo mokanda ya Emoniseli elobeli, talá video Mokili ebongwani banda na mobu 1914 mpe tángá lisolo “Batambwisi-mpunda minei yango bazali banani?”

• Biblia ezali na batoli ya ntina mingi oyo ekoki kosalisa biso tólonga mikakatano lokola komata ntalo ya biloko ya kolya ata mpe kozanga ya bilei. Talá bandakisa mosusu na lisolo “Okosala nini soki ozali lisusu na mbongo mingi te?.”

• Biblia epesi biso mpe elikya ete makambo ekokóma malamu koleka. Elaki ntango oyo “mbuma ekozala beboo na mabele” mpe moto nyonso akozala na biloko mingi ya kolya. (Nzembo 72:16) Mpo na koyeba makambo mosusu oyo etali elikya yango mpo na mikolo ezali koya mpe ntina oyo osengeli kotyela yango motema, tángá lisolo “Elikya ya solosolo mpo na mikolo ezali koya.”