Lobɔkɔ ya mwasi na likoló: Marek M. Berezowski/Anadolu Agency via Getty Images; lobɔkɔ ya mwasi na nse: Halfpoint Images/Moment via Getty Images; na katikati: Zhai Yujia/China News Service/VCG via Getty Images; lobɔkɔ ya mobali na likoló: Ismail Sen/Anadolu Agency via Getty Images; lobɔkɔ ya mobali na nse: E+/taseffski/via Getty Images
BÓSƐNZƐLAKA!
2023: Mbula ya makambo—Biblia elobi nini?
Makambo minene oyo esalemi na mokili mobimba na 2023 emonisi ete tozali mpenza kobika na ntango oyo Biblia ebengi “mikolo ya nsuka.” (2 Timote 3:1) Talá ndenge makambo oyo ezali kosalema na mokili eyokani mpenza na oyo Biblia elobaki ete ekosalema na ntango na biso.
Biblia mpe makambo oyo ezali kosalema
“Bitumba mpe bansango ya bitumba.”—Matai 24:6.
“Bitumba ya makasi ezali se kobima na bisika mingi na mokili.”a
Talá masolo “Nani akobatela bana-mboka?” mpe “Baguvɛrnema ya mokili mobimba ebimisi dolare koleka miliare 2 000 mpo na kosomba bibundeli.”
“Koningana ya mabele ekosalema na bisika ndenge na ndenge.”—Marko 13:8.
“Banda na ebandeli ya 2023, koningana ya mabele ya makasi (magnitude 7) esalemi mbala 13 na mokili, ezali mbala ya liboso mabele eningana mbala 13 na mbula moko.”b
Talá lisolo “Koningana monene ya mabele esalemi na Turquie mpe na Syrie.”
“Makambo ya nsɔmɔ.”—Luka 21:11.
“Ntango ya molunge makasi esili; tokɔti sikoyo na ntango ya mɔtɔ makasi.”—António Guterres, Secrétaire générale ya ONU.c
Talá lisolo “Mɔtɔ makasi na eleko ya molunge ya 2023.”
“Nzala.”—Matai 24:7.
“2023: Mobu moko ya mpasi mingi mpo na mabota oyo enyokwamaka mpo na kozwa bilei.”d
Talá lisolo “Kozanga ya bilei oyo euti na bitumba mpe kobongwama ya klima.”
“Ntango moko ya mpasi mpenza mpe ya mikakatano.”—2 Timote 3:1.
“Moto moko kati na bato mwambe na mokili abɛlaka maladi ya makanisi.”e
Talá lisolo “Bilenge mingi bakómi kobɛla na makanisi lelo oyo.”
Nini ezali kozela biso na 2024?
Moto moko te ayebi malamu makambo oyo ekosalema na 2024. Kasi makambo oyo ezali kosalema na mokili emonisi ete Bokonzi ya Nzambe, to guvernɛma ya likoló, ekozwa esika ya baguvernɛma ya bato mpe ekosukisa makambo nyonso oyo ebimisaka mpasi mpe mitungisi.—Danyele 2:44; Emoniseli 21:4.
Wana tozali kozela Bokonzi yango, tokoki koluka lisalisi epai ya Nzambe ntango tozali na mitungisi. Biblia elobi:
“Ntango nazali kobanga natyelaka yo motema.”—Nzembo 56:3.
Ndenge nini tokoki komonisa ete totyelaka Nzambe motema? Tosɛngi yo oyekola makambo mosusu oyo Biblia elobi mpo na mikolo ezali koya mpe bampasi. Soki olingi, ndimá koyekola Biblia ná biso mpo omona ndenge oyo yo ná libota na yo bokozwa matomba na makambo oyo Biblia elaki.
a Foreign Affairs, “A World at War: What Is Behind the Global Explosion of Violent Conflict?” Emma Beals mpe Peter Salisbury, 30/10/2023.
b Earthquake News, “Year 2023: Number of Major Earthquakes on Course for Record,” 05/2023.
c ONU, “Secretary-General’s Opening Remarks at Press Conference on Climate,” 27/07/2023.
d Programme alimentaire mondial, “Kozanga bilei na mokili mobimba.”
e OMS, “Journée mondiale de la santé mentale 2023,” 10/10/2023.