Mɔtɔ makasi na eleko ya molunge ya 2023​—Biblia elobi nini?

Na mokili mobimba, bato bazali konyokwama na molunge makasi oyo ezali kobɛta mpe makama mosusu oyo yango ezali kobimisa. Talá balapolo oyo elandi:

• “Esali sikoyo mbula 175 kobanda bato bakómá kolandela makambo etali klima na mokili, kasi molunge oyo ezalaki na sanza 06/2023 elekaki makasi.”​—Agence américaine d’observation océanique et atmosphérique, États-Unis, département du Commerce, 13/06/2023.

• “Italie, Espagne, France, Allemagne mpe Pologne, bamboka yango nyonso bazali na molunge makasi ya mɔtɔ oyo ekoki kokóma tii na 48°C na bisanga ya Sicile mpe ya Sardaigne – ekoki kozala mbala ya liboso molunge ya bongo emonana na Europe.”​—Agence spatiale européenne, 13/06/2023.

• “Lokola planɛti ezali kokóma na molunge makasi koleka, tozali komizela na komona bambula ya makasi oyo ekomema bampela ya nsɔmɔ.”​—Stefan Uhlenbrook, directeur de l’hydrologie, de l’eau et de la cryosphère à l’Organisation météorologique mondiale, 17/07/2023.

Ndenge balapolo ya boye ezali kobakisama, yango ezali kobangisa yo? Talá oyo Biblia elobi mpo na makambo ya boye.

Ɛɛ. Molunge makasi oyo ezali kobɛta na mokili mobimba mpe makambo mosusu ya ndenge wana eyokani na makambo oyo Biblia esakolá mpo na ntango na biso. Na ndakisa, Yesu asakolaki ete tokomona “makambo ya nsɔmɔ.” (Luka 21:11) Ndenge molunge ezali kokangala na mokili mobimba, yango etindi bato mingi bákanisa ete bato bakobebisa mokili nyɛɛ.

Te. Nzambe akelaki mabele mpo tófanda wana libela na libela; akotika nzela te ete bato bábebisa yango nyɛɛ. (Nzembo 115:16; Mosakoli 1:4) Kutu, alaki ete ‘akobebisa baoyo bazali kobebisa mabele.’​—Emoniseli 11:18.

Biblia emonisi ete Nzambe azali na likoki ya kobatela mabele na makama nyonso mpe akosala yango.

• “[Nzambe] akómisaka mopɛpɛ makasi kimya, bambonge ya mbu efandaka nyɛɛ.” (Nzembo 107:29) Nzambe azali na likoki ya kokamba banguya ya biloko nyonso oyo akelá. Azali na nguya ya kobongisa mikakatano oyo kobebisama ya klima ezali komemela biso.

• “Otyeli mabele likebi na yo, mpo opesa yango biloko ebele;ozali kokómisa yango na bozwi mingi mpenza.” (Nzembo 65:9) Na lipamboli ya Yehova, mabele ekokóma paradiso.

Mpo na koyeba makambo mosusu oyo etali elaka oyo Biblia epesi ya kobongisa mokili, talá lisolo “Qui sauvera la terre?”