Mituna ya batángi

Mpo na nini Moize asilikelaki bana ya Arona, Eleazare ná Itamare, nsima ya liwa ya bandeko na bango Nadabe ná Abihu, mpe nkanda na ye ekitaki ndenge nini?​—Lev. 10:16-20.

Mwa moke nsima ya kotyama ya banganga-nzambe, Yehova abomaki Nadabe ná Abihu, bana ya Arona, mpo bapesaki Ye mɔtɔ oyo endimamaki na mobeko te. (Lev. 10:1, 2) Moize apesaki bana ya Arona oyo batikalaki na bomoi mitindo ete bálela bandeko na bango te. Mwa moke na nsima, Moize asilikelaki Eleazare ná Itamare mpo balyaki te ntaba-mobali ya likabo mpo na lisumu. (Lev. 9:3) Mpo na nini Moize asilikaki?

Mibeko oyo Yehova apesaki Moize elobaki polele ete nganga-nzambe oyo apesi likabo mpo na lisumu asengeli kolya ndambo na yango na kati ya lopango ya hema ya kokutana. Kosala bongo ezalaki lokola kozongisa monɔkɔ mpo na masumu ya baoyo bapesaki mbeka yango. Kasi, soki mwa ndambo ya makila ya mbeka yango ememami na Esika Mosantu, eteni ya liboso ya tabernakle, likabo yango esengelaki kolyama te. Esengelaki nde kozikisama.​—Lev. 6:24-26, 30.

Emonani ete nsima ya likama ya mokolo wana, Moize amonaki ete asengeli kofungola miso mpo mibeko nyonso ya Yehova etosama. Ntango amonaki ete ntaba-mobali ya likabo mpo na lisumu ezikisami, atunaki Eleazare ná Itamare na nkanda ntina oyo balyaki yango te ndenge mibeko esɛngaki, mpo makila na yango ememamaki te liboso ya Yehova na Esika Mosantu.​—Lev. 10:17, 18.

Arona ayanolaki motuna ya Moize, mpo emonani ete banganga-nzambe oyo bakufaki te balyaki te mpo ye Arona nde andimaki ete bálya te. Lokola bana na ye mibale bakufaki, mbala mosusu Arona amitunaki soki nganga-nzambe moko akokaki kolya likabo mpo na lisumu mokolo wana, na lisosoli ya malamu. Mbala mosusu amonaki ete soki balei yango bakosepelisa Yehova te, atako bazalaki mpenzampenza na ngambo te mpo na libunga oyo Nadabe ná Abihu basalaki.​—Lev. 10:19.

Ekoki mingimingi kozala ete Arona akanisaki ete na mokolo wana oyo bato ya libota na ye babandaki kosala mosala na bango ya bonganga-nzambe, basengelaki kosala mpenza nyonso mpo básepelisa Nzambe ata na makambo ya mikemike. Nzokande, Nadabe ná Abihu bafingisaki nkombo ya Yehova, mpe nkanda ya Nzambe engalelaki bango. Na yango, mbala mosusu Arona amonaki ete bato oyo bazali na libota ya banganga-nzambe epai lisumu ya ndenge wana esalemaki basengelaki te kolya likabo mosantu.

Emonani ete Moize andimaki eyano ya ndeko na ye Arona, mpo mokapo yango esukisi boye: “Ntango Moize ayokaki yango, likambo yango emonanaki bongo malamu na miso na ye.” (Lev. 10:20) Emonani ete Yehova mpe andimaki eyano ya Arona.