Mituna ya batángi

Banzete oyo bazalaki komema na yango sanduku ya kondimana etalaki na ngámbo nini, mpamba te 1 Mikonzi 8:8 elobi ete ezalaki komonana soki ozali na Esika Mosantu?

Ntango Yehova alakisaki Mose ndenge ya kosala mongombo na esobe, eloko ya ntina mingi ezalaki sanduku ya kondimana. Bitando ya mabanga oyo bakomaki Mibeko mpe mwa biloko mosusu ezalaki na kati ya sanduku yango, oyo ezalaki wolo na wolo likolólikoló na yango. Bazalaki kobomba sanduku yango na kati mpenza ya mongombo, na Esika Eleki Bosantu. Likoló ya ezipeli ya sanduku yango, ezalaki na bikeko mibale ya bakeluba oyo mapapu na yango efungwama; bikeko yango esalemaki na wolo. Na mopanzi mokomoko ya sanduku yango, ezalaki na madusu mpo na kotya banzete mibale oyo basalaki yango na mabaya ya akasia mpe bazipaki yango na wolo. Banzete yango ezalaki kokɔta na madusu yango na mipanzi ya sanduku, na ngámbo ya bolai ya sanduku yango. Na bongo, lokola bazalaki kotya sanduku yango na kati ya Esika Eleki Bosantu ya mongombo oyo ezalaki kotala na ɛsti, banzete ezalaki kotala na ngámbo ya nɔrdi mpe ya sudi. Ezalaki mpe ndenge moko na nsima ntango Sanduku yango ezalaki na tempelo oyo Salomo atongaki.​—Exode 25:10-22; 37:4-9; 40:17-21.a

Rido moko ezalaki kokabola Esika Eleki Bosantu na Esika Mosantu (eteni mosusu oyo ezalaki liboso). Banganga oyo bazalaki kokɔta na Esika Mosantu bakokaki te kotala na kati ya Esika Eleki Bosantu mpe komona Sanduku yango, oyo likoló na yango, na maloba ya elilingi, Nzambe azalaki wana. (Baebele 9:1-7) Boye, mokapo ya 1 Mikonzi 8:8 (NW) ekoki komonana lokola ete ezali kobulunganisa: “Banzete yango ezalaki milai, yango wana bansɔngɛ ya banzete yango ezalaki komonana longwa na Esika Mosantu liboso ya eteni ya ndako ya kati, kasi ezalaki komonana libándá te.” Likambo yango elobelami mpe na 2 Ntango 5:9. Ndenge nini banzete yango ekokaki komonana na moto oyo azali na Esika Mosantu ya tempelo?

Bato mosusu bakanisaki ete banzete yango ezalaki kotuta rido, mpe kovimbisa yango moke na libándá. Kasi ekokaki kozala bongo te soki batyaki banzete yango na boye ete euta na ngámbo ya nɔrdi mpe etala na ngámbo ya sudi, mpamba te rido mpe banzete yango elingaki kozala mopanzi moko. (Mituya 3:38) Ezali na ndimbola mosusu ya malamu na likambo yango. Ekoki kozala ete banzete yango ezalaki komonana soki ezalaki ata na mwa esika moko oyo etikalaki polele banda na esika oyo rido ebandi tii na etutu ya tempelo, to na ntango nganga monene asengelaki kokɔta na Esika Eleki Bosantu. Rido ezalaki kopekisa ete Sanduku emonana ata moke te, kasi banzete oyo batyaki ngámbo na ngámbo mpo na kosimba yango ekokaki komonana soki rido efungwami moke. Tokanisi ete ndimbola wana ebongi mpenza, kasi tolobi te ete ezalaki mpenza bongo.

Tomoni polele ete ezali na makambo mingi oyo tokoki naino koyekola. Ntoma Paulo alobelaki mwa ndambo na yango na mokanda oyo akomelaki Baebele. Na nsima alobaki boye: “Oyo ezali ntango te ya kolobela mwa likambo mokomoko oyo etali yango.” (Baebele 9:5, NW) Lisekwa ya bato ya sembo oyo ezali koya ekopesa biso mabaku malamu ya kotuna bato lokola Mose, Alona, Besalele mpe bamosusu oyo bayebaki malamu ndenge oyo mongombo ebongisamaki mpe ndenge oyo bazalaki kosalela yango.​—Exode 36:1.

[Maloba na nse ya lokasa]