Ndenge oyo lisangá ya bakristo ya solo ebongisami

Yehova azali Nzambe oyo asalaka makambo na molɔngɔ. (1 Bakorinti 14:33) Yango wana basaleli na ye basengeli kozala bato oyo babongisami malamu. Ndenge nini lisangá ya bakristo ya solo ebongisami? Tosengeli kosala nini mpo ekende liboso?

1. Nani azali mokonzi ya lisangá?

Biblia elobi: ‘Kristo azali mokonzi ya lisangá.’ (Baefese 5:23) Uta na likoló, azali kotambwisa mosala ya Batatoli ya Yehova na mokili mobimba. Yesu atyá “moombo ya sembo mpe ya mayele,” elingi koloba, mwa etuluku ya bankulutu oyo bakɔmɛli, babengaka bango mpe Lisangani ya Mikóló-Bakambi. (Tángá Matai 24:45-47.) Ndenge kaka bantoma ná bankulutu oyo bazalaki na Yerusaleme bazalaki kotambwisa lisangá na siɛklɛ ya liboso, lelo oyo mpe Lisangani ya Mikóló-Bakambi etambwisaka lisangá na mokili mobimba. (Misala 15:2) Kasi mibali yango bazali te bakonzi ya ebongiseli na biso. Batángaka Biblia mpo na koyeba makambo oyo Yehova asɛngi bango básala mpe batikaka Yesu atambwisa bango.

2. Bankulutu bazali banani mpe basalaka nini?

Bankulutu bazali mibali oyo bakɔmɛli na elimo; bateyaka basaleli ya Yehova makambo oyo euti na Biblia, basalisaka bango mpe balendisaka bango. Bafutamaka te mpo na mosala oyo basalaka. Kutu, basalaka nde ‘na motema moko liboso ya Nzambe; ezali te na bolingo ya litomba oyo ezwami na ndenge ya mabe, kasi na motema ya esengo.’ (1 Petro 5:1, 2) Basaleli na misala bazali bandeko oyo basalisaka bankulutu na kati ya lisangá. Nsima ya mwa ntango, bakoki kokokisa makambo oyo Biblia esɛngi mpo na kokóma bankulutu.

Lisangani ya Mikóló-Bakambi eponaka bankulutu mosusu mpo bákóma bakɛngɛli ya zongazonga. Bakendaka kotala masangá ndenge na ndenge mpo na kopesa bandeko malako mpe kolendisa bango. Bandeko mibali oyo bakokisi makambo oyo Biblia esɛngi, bakɛngɛli ya zongazonga batyaka bango bankulutu to basaleli na misala.​—1 Timote 3:1-10, 12; Tito 1:5-9.

3. Motatoli ya Yehova mokomoko azali na mokumba nini?

Bato nyonso na lisangá ‘basanzolaka nkombo ya Yehova’ na ndenge bapesaka biyano na makita ya lisangá, basalaka badiskur, bilakiseli, bayembaka mpe basakolaka nsango malamu na kotalela makoki na bango.​—Tángá Nzembo 148:12, 13.

KƆTÁ NA MOZINDO

4. Yesu azali mokonzi ya boboto

Yesu abengi biso epai na ye. Tángá Matai 11:28-30, mpe na nsima yanolá na motuna oyo:

• Yesu azali mokonzi ya ndenge nini, mpe alingaka tómiyoka ndenge nini?

VIDEO: Bankulutu bazali kosalisa bandeko na Nepal nsima ya koningana ya mabele (4:56)

Biblia emonisi polele ndenge oyo bankulutu basengeli kosala mosala na bango.

Tángá Yisaya 32:2 mpe 1 Petro 5:1-3, mpe na nsima yanolá na mituna oyo:

• Koyeba ete bankulutu basalaka makasi ya komekola Yesu na likambo etali kolendisa basusu, etindi yo omiyoka ndenge nini?

• Na makambo nini mosusu bankulutu bamekolaka Yesu?

5. Bankulutu basalelaka makambo oyo bateyaka

VIDEO: Bankulutu, bópesa ndakisa! (7:39)

Yesu atiká ndakisa epai ya baoyo bakambaka lisangá. Tángá Matai 23:8-12, mpe na nsima yanolá na motuna oyo:

• Bokeseni oyo ezali kati na makambo oyo Biblia esɛngi bankulutu mpe makambo oyo omonaka bakonzi ya mangomba basalaka, ekamwisi yo na nini?

1. Bankulutu babatelaka boyokani na bango ná Yehova mpe basalisaka mabota na bango ezala na boyokani malamu ná Yehova

2. Bankulutu basalisaka lisangá mobimba

3. Bankulutu basakolaka nsango malamu mbala na mbala

4. Bankulutu bateyaka, bapɛtolaka Ndako ya Bokonzi mpe basalaka misala mosusu

6. Tokoki kosala elongo na bankulutu

Biblia eyebisi biso ntina oyo tosengeli kosala elongo na bankulutu. Tángá Baebre 13:17, mpe na nsima yanolá na mituna oyo:

• Mpo na nini Biblia esɛngi biso tótosa mpe tómikitisa liboso ya bato oyo bazali kotambwisa biso? Okanisi nini mpo na yango?

Tángá Luka 16:10, mpe na nsima yanolá na motuna oyo:

• Mpo na nini ezali malamu tótosaka bankulutu ata na makambo ya mikemike?

NA MOKUSE

Yesu azali mokonzi ya lisangá. Tozalaka na esengo ya kosala elongo na bankulutu oyo Yesu azali kotambwisa, mpo balendisaka biso mpe basalelaka makambo oyo bateyaka.

Bozongeli

• Nani azali mokonzi ya lisangá?

• Ndenge nini bankulutu basalisaka lisangá?

• Mokumba nini mosaleli ya Yehova mokomoko azali na yango?

MAKANISI MOSUSU

Talá makambo oyo emonisi ete Lisangani ya Mikóló-bakambi mpe bankulutu bamitungisaka mingi mpo na bakristo lelo oyo.

Kosalisa bandeko na ntango ya epekiseli (4:22)

Luká koyeba makambo mingi oyo bakɛngɛli ya zongazonga basalaka.

Bomoi ya mokɛngɛli ya zongazonga moko na mboka mosika (4:51)

Talá ndenge basi bazali na ntina na lisangá.

“Batatoli ya Yehova bazalaka na basi oyo bateyaka?” (Linɔ́ngi ya Mosɛnzɛli ya 01/09/2012)

Talá ndenge bankulutu basalaka makasi mpo na kolendisa bandeko na bango bakristo.

“Bankulutu: ‘Baninga ya mosala mpo na esengo na biso’” (Linɔ́ngi ya Mosɛnzɛli ya 15/01/2013)