3. Yehova alingi baninga na ye básala nini?

Yehova alingaka bato ya ndenge nyonso, “Kasi azali moninga ya motema ya bato ya kolongobana [sembo].” (Masese 3:32) Yehova alingi ete baninga na ye básala makasi ya kotosa makambo oyo alobi ete ezali malamu mpe báboya makambo oyo alobi ete ezali mabe. Bato mosusu bakanisaka ete bakokoka te kotosa mibeko ya Nzambe na oyo etali mabe ná malamu. Nzokande, Yehova azali na motema mawa. Andimaka moto nyonso oyo alingaka ye mpenza mpe oyo asalaka makasi mpo na kosepelisa ye.​—Nzembo 147:11; Misala 10:34, 35.

Moto nyonso alingaka baninga na ye bázala sembo. Yehova mpe alingaka baninga na ye bázala sembo. Kasi yango ezali pɛtɛɛ te na mokili oyo bato mingi bazangi bosembo. Bolamu nini tokozwa soki tozali sembo na makambo nyonso?

1. Mpo na ntina nini tosengeli libosoliboso kozala sembo?

Soki tozali sembo epai ya basusu, tokomonisa Yehova ete tolingaka ye mpe totosaka ye. Tóbosana te ete Yehova ayebi makambo nyonso oyo tokanisaka mpe oyo tosalaka. (Baebre 4:13) Amonaka ntango toponaka kozala sembo, mpe yango esepelisaka ye. Liloba na ye elobi ete: “Yehova ayinaka moto ya mbilingambilinga, kasi azali moninga ya motema ya bato ya kolongobana [sembo].” ​—Masese 3:32.

2. Tokoki kozala sembo na makambo nini?

Yehova alingi ete ‘tólobanaka solo.’ (Zekaria 8:16, 17) Yango elingi koloba nini? Ntango tozali kosolola na bato ya libota na biso, baninga ya mosala, baninga na biso mpe bandeko na biso bakristo, to bakonzi ya Leta, tosengeli te kokosa to koloba makambo ya lokuta. Bato ya sembo bayibaka to babubaka basusu te. (Tángá Masese 24:28 mpe Baefese 4:28.) Mpe bafutaka mpako nyonso oyo basengeli kofuta. (Baroma 13:5-7) Tosalaka bongo “mpo tolingi kozala sembo na makambo nyonso.”​—Baebre 13:18.

3. Bolamu nini tokozwa soki tozali sembo?

Soki bato bayebi ete tozalaka sembo, bakotyela biso motema. Bandeko ya lisangá bakobanga te ntango bazali elongo na biso, ndenge kaka ezalaka na libota oyo bato balinganaka. Tokozala na lisosoli ya pɛto. Soki tozali sembo, yango ekoki kosala ete ‘tókómisa kitoko mpenza mateya ya Mobikisi na biso, Nzambe’ mpe ekoki kotinda basusu básambela Yehova.​—Tito 2: 10.

KƆTÁ NA MOZINDO

4. Bosembo esepelisaka Yehova

Tángá Nzembo 44:21 mpe Malaki 3:16, mpe na nsima yanolá na mituna oyo:

• Okanisi nini, mpo na nini ezali bozoba kokanisa ete tokoki kobombela Yehova likambo?

• Yehova ayokaka ndenge nini ntango tolobi solo, ata ntango ezali mpasi kosala yango?

5. Zalá sembo ntango nyonso

VIDEO: Makambo oyo epesaka mpenza esengo​—Lisosoli ya pɛto (2:32)

Tángá Baebre 13:18, mpe na nsima lobelá ndenge oyo tokoki kozala sembo . . .

• na libota.

• na mosala to na kelasi.

• na makambo mosusu.

6. Bosembo ememelaka biso bolamu

Mbala mosusu emonanaka ete bosembo ememaka mikakatano. Kasi soki otali mosika, okomona ete yango nde likambo oyo eleki malamu ya kosala. Tángá Nzembo 34:12-16, mpe na nsima yanolá na motuna oyo:

• Ndenge nini bosembo esalaka ete bomoi na biso ezala malamu koleka?

1. Basi ná mibali ya sembo bayokanaka malamu na libala na bango

2. Bapatrɔ batyelaka basali ya sembo motema

3. Bato ya sembo batosaka mibeko ya mboka mpe bazalaka na lokumu na miso ya bakonzi ya Leta

NA MOKUSE

Yehova alingaka ete baninga na ye nyonso bázala sembo na makambo nyonso oyo balobaka mpe oyo basalaka.

Bozongeli

• Na makambo nini tokoki kozala sembo?

• Okanisi nini, mpo na nini koluka kobomba solo ezali kozanga mayele?

• Mpo na nini osengeli kozala ntango nyonso sembo?

AKANISI MOSUSU

Ndenge nini baboti bakoki koteya bana na bango bázala sembo?

Lobáká solo (1:44)

Mpo na nini ezali malamu tókokisa makambo oyo tolaki?

Tosá maloba na yo, mpe okozwa mapamboli (9:09)

Talá soki tosengeli kofuta mpako atako ezali kosalelama na ndenge ya mabe.

“Osengeli kofuta mpako?” (Linɔ́ngi ya Mosɛnzɛli ya 01/09/2011)

Nini etindaki moto moko oyo azalaki sembo te abongola bomoi na ye mpe akóma kosala mosala na bosembo?

“Nayekolaki ete Yehova azali motema mawa mpe alimbisaka” (Linɔ́ngi ya Mosɛnzɛli ya 01/05/2015)

2. Yehova ayokaka ndenge nini ntango toponaka baninga?

Yehova aponaka malamu baninga na ye. Biblia elobi: “Azali moninga ya motema ya bato ya kolongobana.” (Masese 3:32) Yehova ayokaka ndenge nini ntango toponaka baninga oyo balingaka ye te? Ayokaka motema mpasi! (Tángá Yakobo 4:4.) Kasi, soki toboyi baninga mabe mpe tokangami na Yehova mpe na bato oyo balingaka ye, Yehova akosepela mingi mpe akondima tózala baninga na ye.​—Nzembo 15:1-4.