Pusaná penepene na Nzambe

Okoki kozwa “boyebi ya Nzambe”

YEHOVA NZAMBE apesi biso likoki ya kozwa eloko moko ya motuya mpenza mpe azali na mposa ete tózwa yango. Eloko yango ememelaka moto bomɛngo ya mokili te, kasi epesaka kimya mpe esengo, oyo moto akoki kosomba na mbongo te. Eloko yango ezali nini? Maloba ya Mokonzi Salomo oyo ezali na Masese 2:1-6 elimboli yango.

Salomo abengaki yango “boyebi ya Nzambe,” elingi koloba solo na ntina na Nzambe mpe mikano na ye ndenge emonisami na Biblia. (Vɛrsɛ 5) Eloko yango ya motuya ezali na makambo mingi.

Mateya ya solo. Biblia eyanolaka na mituna lokola oyo: Nkombo ya Nzambe nani? (Nzembo 83:18) Nini ekómelaka moto soki akufi? (Nzembo 146:3, 4) Mpo na nini tozali awa na mabele? (Ebandeli 1:26-28; Nzembo 115:16) Ya solo, biyano na mituna oyo ezali mpenza na ntina mingi.

Toli ya bwanya. Biblia elakisaka biso ndenge ya malamu ya kotambwisa bomoi na biso. Okoki kosala nini mpo libala eumela? (Baefese 5:28, 29, 33) Ndenge nini okoki kobɔkɔla bana na yo malamu? (Kolimbola Mibeko 6:5-7; Baefese 6:4) Okoki kosala nini mpo ozala na bomoi ya esengo? (Matai 5:3; Luka 11:28) Okanisi nini, batoli na makambo yango ezali na valɛrɛ nini?

Koyeba Nzambe mpe bizaleli na ye. Biblia ezali mokanda ya libosoliboso oyo eyebisaka biso makambo ya solo mpo na Nzambe. Azalaka ndenge nini? (Yoane 1:18; 4:24) Akipaka biso? (1 Petro 5:6, 7) Bizaleli na ye ya minene ezali nini? (Kobima 34:6, 7; 1 Yoane 4:8) Okanisi boni, koyeba makambo ya solo mpo na Mozalisi na biso ezali na valɛrɛ nini?

“Boyebi ya Nzambe” ezali mpenza eloko ya motuya. Ndenge nini okoki kozwa yango? Tokoki kozwa likanisi na Masese mokapo 2, vɛrsɛ 4, epai Salomo akokanisi boyebi yango na “biloko ya motuya oyo ebombani.” Kanisá naino: Eloko ya motuya ekoki koya epai ya moto yango moko? Te, esɛngaka kosala makasi mpo na kozwa yango. Ezali mpe bongo mpo na kozwa boyebi ya Nzambe. Boyebi yango ezali na kati ya Biblia. Mpo na kozwa yango, tosengeli mpenza kosala makasi.

Mokonzi Salomo amonisi oyo tosengeli kosala mpo tózwa “boyebi ya Nzambe.” Maloba ‘yambá maloba na ngai’ mpe ‘balusá motema na yo’ emonisi ete tosengeli kondima maloba ya Yehova. (Vɛrsɛ 1, 2) Maloba ‘kobelela,’ ‘kokoba koluka,’ mpe ‘kokoba kolukaluka’ emonisi ete tosengeli kosala makasi, kokanga mabɔkɔ te. (Vɛrsɛ 3, 4) Na yango, mpo na kozwa boyebi ya Nzambe, tosengeli koyekola Liloba ya Nzambe na molende mpe kosala yango na motema moko.​—Luka 8:15.

Soki tokangi mabɔkɔ te, Yehova akosalisa biso tózwa boyebi. Vɛrsɛ ya 6 elobi ete “Yehova apesaka bwanya.” Tokoki kososola makambo oyo ezali na Biblia kaka soki Nzambe asalisi biso. (Yoane 6:44; Misala 16:14) Okoki mpenza kondima likambo oyo: Soki olukiluki na kati ya Biblia, okozwa “boyebi ya Nzambe,” eloko ya motuya oyo ekobongisa mpenza bomoi na yo.​—Masese 2:10-21.a

Botángi ya Biblia mpo na Ɔkɔtɔbɛ:

◼ Masese 1-21

[Maloba na nse ya lokasa]