Libanda ekoki kozimbisa

Richard Sheridan, mokomi na ba drames, ye moto ya lrlande, alobaki ete: “Ebongi te kotalela bobele libanda ya eloko.” Likambo yango lizali komonana epai na banzeté mpe epai na bato lokola.

Mokolo moko na nsuka ya sanza ya mars na mobu 33, wana autaki Bethania mpo na kokende na Yelusaleme elongo na bayekoli na ye, Yesu Klisto amonaki nzeté moko ya mosuke. Nzeté yango ezalaki na nkasa mingi, nzokande botaleli ya penepene emonisaki ete ezalaki na mbuma ata moko te. Bongo Yesu alobaki na yango: “Tika ete moto moko te alya mbuma na yo!”​—Malako 11:12-14.

Mpo na nini Yesu alakelaki nzeté wana mabe, nzokande, lokola Malako alobi yango, “ezalaki eleko ya misuke te”? (Malako 11:13) Mpo ete, na ndenge eyebani, wana nzeté ya mosuke ezali na nkasa mingi, esengeli mpe kobota mbuma ya liboso. Ezalaki likambo ya kokamwa ete nzete ya mosuke ezala na nkasa na eleko wana. Kasi lokola esalemaki bongo, Yesu amizelaki na kozwa mbuma kati na yango. (Tala foto oyo ezali awa na likoló.) Likambo oyo ete nzeté ezalaki bobele na nkasa mpamba elimbolaki ete nzeté wana ezalaki kobota mbuma te. Libanda na yango ezalaki kokosa bato. Lokola nzeté ezalaki kofutelama mpako, nzeté oyo ekobotaka mbuma te ezalaki mokumba ya mpamba mpe esengelaki kokatama.

Yesu asalelaki nzeté ya mosuke wana ezangi kobota mbuma mpo na kolimbola liteya monene litali kondima. Mokolo molandaki, bayekoli bakamwaki na komona ete nzeté yango ekaukaki, mpe Yesu alimbwelaki bango ete: “Bondimela Nzambe. . . . Oyo nyonso bokosenga kati na libondeli, bondima ete bosili kozwa yango, mpe bokozwa yango.” (Malako 11:22-24) Kokaukisama ya nzeté ya mosuke emonisaki te bobele ntina ya kobondela na kondima, kasi emonisaki polele oyo esengelaki kokomela libota oyo lizangaki kondima.

Mwa basanza liboso, Yesu akokanisaki libota ya Bayuda na nzeté ya mosuke oyo ezangaki kobota mbuma na boumeli ya bambula misato na ndambo mpe elingaki kokatama soki etikalaki bobele bongo. (Luka 13:6-9) Na kolakelaká nzeté ya mosuke mabe, mikolo minei liboso ya kufa na ye, Yesu amonisaki ete libota ya Bayuda ebotaki te mbuma oyo ebongi na kobongola motema, mpe na yango, ebongaki na libebi. Atako libota yango, lolenge moko na nzeté ya mosuke, emonanaki lokola ete ezali malamu, kasi botaleli ya penepene emonisaki kozanga kondima oyo etindaki yango na koboya Masiya.​—Luka 3:8, 9.

Kati na Lisolo na ye likoló ya ngomba, Yesu akebisi biso na ntina na “basakoli ya lokuta” na kolobaka ete: “Bokoyeba bango na mbuma na bango. Bakozwa mbuma ya miwiti epai ya nzube soko mbuma ya mosuke epai ya matiti mpamba? Bongo nzeté malamu na nzete malamu ekobotaka mbuma malamu, kasi nzeté mabe na nzete mabe ekobotaka mbuma ezangi ntina; nzeté malamu ekoki kobota mbuma mabe te mpe nzeté mabe ekoki kobota mbuma malamu te. Nzeté na nzeté oyo ekobotaka mbuma malamu te ekokatama mpe ekobwakama na móto. Bongo, bokososola bango na mbuma na bango.” (Matai 7:15-20) Maloba oyo ya Yesu mpe lisoló litali nzeté ya mosuke oyo elakelamaki mabe, ezali komonisa polele ete tosengeli kokengela kati na elimo, mpo ete, na likambo litali losambo mpe, oyo emonani libanda ekoki kozala na bokosi.