Bomoi na ye Yesu, mpe mosala na ye

Balongi ata moke te mpo na kokweisa Yesu

YESU auti koteya kati na tempelo, esika oyo autaki koloba epai na banguna na ye, bakonzi na mangomba, masese misato oyo ezalaki komonisa polele bokosi na bango. Lokola basilikaki, Bafalisai bayokani ete bamema ye na mayele mabe mpo na koloba likambo moko oyo ekopesa bango nzela mpo na kokanga ye. Nsima na koyangisa mwango na bango, batindi bayekoli na bango mpe mwa ndambo na bato ya Hérode mpo na komeka Yesu.

“Bato yango babandi, Molakisi toyebi ete yo ozali solo mpe ete olakisaka nzela na Nzambe solo mpe otiaka moto moko liboso na mosusu te, okotalaka mpe bilongi na bato te. Boye loba na biso, okanisi nini? Ebongi kofutela Kaisala mpako soko te?”

Yesu amitiki kokosama epai na bango te. Ayebi ete soki ayanoli: ‘Te, epesami nzela te na kofuta mpako’, akotalelama lokola moto oyo azali kokamba bato na botomboki liboso na Rome. Nzokande, soki alobi ete: ‘Ee, esengeli kofuta mpako’, Bayuda, baoyo bazali kotyola boombo na bango liboso na Rome. bakoyina ye. Na bongo ayanoli bango: ’’Mpo na nini bozali komeka ngai, bino bakosi? Monisa ngai mosolo na mpako.”

Bayeli ye na lopata, mpe alobi na bango ete: “Elilingi oyo mpe makomi ezali ya nani?”

Balobi ete, ya “Kaisala”. “Pesa epai na Kaisala yango ezali ya Kaisala mpe na Nzambe yango ezali na Nzambe.”

Na bongo, na ntango eyokaki bango eyano wana ya mayele, mibali wana bakamwaki. Batikaki ye mpe balongwaki.

Komonaka ete Bafalisai; bazwi ata likambo moko te epai na Yesu, Basadukai. oyo balobaka ete lisekwa ezali te. bakei epai na ye mpe batuni ye motuna oyo: ”Molakisi, Moïse alobaki ete: ‘Soko moto akufi nde atiki bana te, ekoki ete ndeko na ye abala mwasi na ye mpo na kobotela ndeko na ye bana.’ Bandeko nsambo bazalaki kati na biso. Oyo na liboso abali mpe akufi nde azali na bana te mpe atiki mwasi na ye epai na ndeko na ye. Bongo oyo na mibale mpe oyo na misato kino oyo na nsambo. Nsima na bango nyonso mwasi akufi. Kati na lisekwa akozala nde mwasi na nani? Mpo ete bango nyonso bakamati ye.”

Mpo na kopesa bango eyano Yesu alobi boye: “Ntina wana bobungi te? Mpo ete bino boyebi likomi te mpe boyebi nguya na Nzambe te. Mpamba te ekosekwa bango na kufa, bakobalana te mpe bakopesama na libala te, kasi bazali pelamoko baanzelu na likolo. Mpo na likambo na kosekwa na kufa, bino bosili kotanga buku na Moïse te na likambo na nzete moke, na motindo Nzambe alobi na ye ete, Ngai nazali Nzambe na Abrahame mpe Nzambe na Yisaka mpe Nzambe na Yakobo? Ye Nzambe na bakufi te kasi na bato na bomoi; bino bozali kobunga mingi.”

Wana lisusu, bato bakamwi mpo na eyano ya Yesu. Ata bamoko na bakomeli balobaki boye ete: “Molakisi, olobi malamu.”

Komonaka ete Yesu akangisi monoko ya Basadukai, Bafalisai bayei epai na ye na etuluku. Mpo na komeka ye lisusu, moko na bango atuni motuna oyo: ”Molakisi, mobeko nini eleki monene kati na Mibeko nyonso?”

Yesu ayanoli: “Oyo na liboso na nyonso ete, Yoka Yisraele, Jéhovah Nzambe na biso, ye azali Jéhovah moko. Olinga mpe Jéhovah Nzambe na yo na motema na yo mobimba mpe na molimo na yo mobimba mpe na makasi na yo mobimba. Oyo na mibale ezali mpe boye ete, Olinga mozalani na yo lokola yo moko. Lilako na koleka oyo na ntina ezali te.’’ Mpe abakisaki: “Mibeko nyonso mpe masakoli ekakemi na mibeko oyo mibale.”

“Mokomeli moko alobi na ye ete, Na malamu. Molakisi, olobi solo ete moko azali mpe mosusu lokola ye azali te, mpe kolinga ye na motema mobimba mpe na mayele mobimba mpe na makasi mobimba, mpe kolinga mozalani lokola yo moko eleki malamu na mbeka na kotumba nyonso mpe miboma.”

Yesu, komonaka ete mokomeli wana ayanolaki na mayele malamu, alobi na ye: “Yo ozali mosika na Bokonzi na Nzambe te.”

Yango eleki sikawa mikolo misato Dimanche, Lundi mpe Mardi-nde Yesu azali koteya kati na tempelo. Bato bayokaki ye na esengo nyonso. nzokande bakonzi na mangomba basiliki, balingi koboma ye. Matai 22:15-4o; Malako 12:13-34; Luka 20:20-40.

◆ Motambo nini Bafalisai batielaki Yesu? Kondima mpe koboya ekobimisa likambo nini?

◆ Ndenge nini Yesu apengoli mpe mitambo na Basadukai?

◆ Likambo nini Bafalisai bayei lisusu komeka kosala mpo na komeka Yesu, mpe esukaki ndenge nini?

◆ Na boumeli ya mosala na ye ya nsuka na Yelusaleme, mikolo boni Yesu alekisaki kati na tempelo mpo na koteya, mpe litomba nini yango ebimisaki?