Mpo na nini tosengeli kolobaka solo?

MANFRED, oyo azalaki na mbula 18, azalaki koyekola mosala na kompanyi moko.a Kompanyi yango ezwaki bibongiseli mpo ye ná baninga na ye mosusu bálandaka mateya mikolo mibale na pɔsɔ na eteyelo moko ya monene. Mokolo moko, kelasi ebimaki liboso ya ngonga. Mibeko ya kompanyi ezalaki kosɛnga ete soki babimi liboso, basengeli kozonga na mosala. Na esika básala bongo, bango nyonso, longolá kaka Manfred, bakendaki kozwa mopɛpɛ. Nzokande, mokolo wana mokonzi ya kompanyi yango oyo atalelaka makambo ya bato oyo bazali koyekola mosala ayaki. Ntango amonaki Manfred, atunaki ye: “Mpo na nini okei kelasi lelo te? Mpe wapi baninga na yo? Eyano nini Manfred asengelaki kopesa?

Manfred akómaki mpenza na nsuka. Asengelaki nde koloba solo to kokosa mpo na kobatela baninga na ye? Soki alobi solo, akotya baninga na ye na mpasi, mpe bakoyina ye. Ezali malamu kokosa na makambo ya ndenge wana? Soki ezalaka yo, olingaki kosala nini? Tokozongela lisolo ya Manfred nsima, kasi, tiká tótalela naino makambo oyo tosengeli kobosanaka te soki esɛngi tópona koloba solo to te.

Solo ná lokuta ebandi kowelana lelo te

Ntango Nzambe akelaki mokili, solo nde ezalaki kotambwisa makambo nyonso. Moto moko te azalaki kobalola makambo to kokosa. Yehova, Mozalisi na biso, azali “Nzambe ya sembo.” Liloba na ye ezali solo; akoki kokosa te mpe aboyaka lokuta mpe bato ya lokuta.​—Nzembo 31:5; Yoane 17:17; Tito 1:2.

Soki ezali bongo, lokuta eutá wapi? Yesu apesaki eyano ya sikisiki na motuna wana ntango alobaki na banguna na ye oyo bazalaki koluka koboma ye ete: “Bino bouti na tata na bino Zabolo, mpe bolingi kokokisa bamposa ya tata na bino. Ye azalaki mobomi-bato ntango abandaki, mpe atɛlɛmaki makasi te na kati ya solo, mpo solo ezali na kati na ye te. Ntango alobaka lokuta, alobaka engebene makanisi na ye moko, mpamba te azali moto ya lokuta mpe tata ya lokuta.” (Yoane 8:44) Awa, Yesu azalaki kolobela likambo oyo esalemaki na Elanga ya Edene, ntango Satana atindaki mwasi ná mobali ya liboso báboya kotosa Nzambe, mpe na ndenge yango bakweaki na lisumu mpe na liwa.​—Genese 3:1-5; Baloma 5:12.

Yesu amonisi polele ete Satana azali “tata ya lokuta,” to mobandisi na yango. Tii lelo oyo, Satana azali kaka kotinda bato bákosa, mpe na ndenge yango, azali “kobungisa mabelé mobimba oyo efandami nzela.” Na yango, mpasi nyonso oyo lokuta ezali komonisa bato bipai nyonso ezali na motó na ye.​—Emoniseli 12:9.

Tii lelo oyo, kowelana monene oyo Satana abimisá na kati ya solo ná lokuta ezali kokoba kosala mosala na yango. Epalangani na bisika nyonso mpe epai ya bato nyonso. Lolenge ya bomoi ya moto emonisaka ete azali moto ya Nzambe to ya Satana. Bato ya Nzambe balandaka solo ya Biblia, Liloba ya Nzambe, na bomoi na bango. Moto nyonso oyo alandaka nzela ya solo te, ezala ayebi yango to te, amityaka na mabɔkɔ ya Satana, mpamba te “mokili mobimba ezali kolala na kati ya nguya ya moto mabe.”​—1 Yoane 5:19; Matai 7:13, 14.

Mpo na nini bato balingaka kokosa?

Koyeba ete “mokili mobimba” ezali koyangelama na Satana esalisi biso tóyeba ntina oyo bato mingi bakosaka. Kasi, tokoki komituna boye: ‘Mpo na nini Satana, “tata ya lokuta,” akosaki?’ Satana ayebaki ete Yehova abongi kozala Moyangeli ya bikelamo na ye nyonso, ezala ata mwasi ná mobali ya liboso. Kasi, lokoso mpe koluka kaka matomba na ye moko nde etindaki ye akóma kolula esika ya Yehova, atako yango ebongi na ye te. Mpo na kokokisa mokano na ye, Satana asalelaki lokuta mpe mayele mabe.​—1 Timote 3:6.

Ezali boni lelo oyo? Omoni te ete ata lelo oyo bato mingi bazali kokosa mpo bazali na lokoso mpe mpo bazali koluka kaka matomba na bango moko? Mimbongo, politiki mpe mangomba etondi na lokuta. Mpo na nini? Ezali solo te ete mbala mingi bato bakosaka mpo na lokoso to mpo bazali koluka lokumu, bozwi to bokonzi oyo ebongi na bango te? Salomo, mokonzi ya bwanya na Yisalaele ya kala, alobaki boye: “Oyo azali koluka ete akóma na bozwi nokinoki akozanga likambo te.” (Masese 28:20, NW) Ntoma Paulo mpe akomaki boye: “Bolingo ya mbongo ezali mosisa ya makambo mabe ya ndenge nyonso.” (1 Timote 6:10) Tokoki mpe koloba bongo mpo na mposa makasi ya bokonzi to ya lokumu.

Bato mosusu bakosaka mpo babangaka ete soki balobi solo ekomemela bango mindondo to bato mosusu bakosepela na bango lisusu te. Koluka ete bato bálinga to bándima yo, ezali mabe te. Kasi, mposa wana ekoki kotinda moto abalola solo, ata mwa moke, mpo na kobomba mabunga na ye to makambo oyo amoni ete ezali mpenza malamu te, to kaka mpo na koluka bato básepela na ye to bákumisa ye. Yango wana, Salomo alobaki mpenza solo ntango akomaki ete: “Kobanga bato ekoyeisa motambo; nde oyo akotalela Yehova akotombolama.”​—Masese 29:25.

Tózala sembo epai ya Nzambe ya solo

Manfred apesaki mokonzi wana ya kompayi eyano nini? Manfred alobaki solo. Alobaki boye: “Lelo, molakisi azongisi biso liboso ya ngonga, yango wana nazongi na mosala. Kasi, mpo na baninga na ngai, nakoki koyanola yo na esika na bango te. Ekozala malamu otuna bango moko.”

Manfred akokaki kokosa mokonzi yango mpo na kobatela baninga na ye, mpe mpo baninga na ye básepela na ye. Kasi, ezali na bantina oyo asengelaki koloba kaka solo. Manfred azali Motatoli ya Yehova. Bosembo na ye esalisaki ye abebisa lisosoli na ye te. Esalaki mpe ete patrɔ na ye akóma kotyela ye motema. Batyaki ye asalaka na esika ya mayaka ya ntalo, epai bakoki te kotya bato oyo bazali naino koyekola. Mbula soki 15 na nsima, ntango bamatisaki Manfred mpɛtɛ na kompanyi yango, mokonzi wana abengaki ye na telefone, apesaki ye longonya mpe akundwelaki ye likambo wana oyo emonisaki ete azali moto ya bosembo.

Lokola Yehova azali Nzambe ya solo, moto nyonso oyo alingi kokóma moninga na ye asengeli ‘kolongola lokuta’ mpe ‘kolobaka solo.’ Mosaleli ya Nzambe asengeli kolinga solo. Salomo akomaki boye: “Motatoli ya sembo akolobaka lokuta te.” Kasi, lokuta ezali nini?​—Baefese 4:25; Masese 14:5.

Lokuta ezali nini?

Mbala nyonso oyo moto akosi, alobaka solo te; nzokande mbala mosusu moto akoki koloba solo te kozanga ete akosa. Mpo na nini? Koloba lokuta elimboli koloba likambo oyo oyebi ete ezali solo te, na likanisi ya kokosa.” Nzokande, komikosa, na ndakisa koyebisa moto likambo oyo ezali solo te kozanga koyeba, ekeseni na koloba lokuta.

Lisusu, tosengeli kotala soki moto oyo azali kotuna biso likambo azali na lotomo ya koyeba yango. Na ndakisa, kanisá ete mokonzi ya kompanyi mosusu nde atunaki Manfred motuna wana. Manfred asengelaki kaka koyebisa ye makambo nyonso? Te. Lokola mokonzi wana ya kompanyi mosusu azali na lotomo te ya koyeba likambo yango, eloko moko te ekokaki kosɛngisa Manfred ayebisa ye yango. Kasi, ata ndenge wana, asengelaki te kokosa.

Ndakisa nini Yesu apesaki na likambo yango? Mokolo moko, Yesu azalaki kosolola na bato oyo, atako bazalaki bayekoli na ye te, balingaki koyeba ntango nini akokende na Yelusaleme. Balobaki na ye ete: “Longwá awa mpe kende na Yudea.” Yesu ayanolaki bango nini? “Bino bómata na fɛti [na Yelusaleme]; ngai nakomata naino na fɛti yango te, mpamba te ntango na ngai ekoki naino mpenza te.” Mwa moke na nsima, Yesu akendaki na fɛti yango. Mpo na nini ayanolaki bango bongo? Mpo bazalaki na lotomo te ya koyeba makambo na ye nyonso. Na yango, atako Yesu akosaki bango te, ayebisaki bango mpe makambo nyonso te, mpo bákoka te kosala ye to bayekoli na ye mabe. Klisto akosaki te, mpamba te ntoma Petelo akomaki mpo na ye ete: “Asalaki lisumu te, mpe lokuta ezwamaki na monɔkɔ na ye te.”​—Yoane 7:1-13; 1 Petelo 2:22.

Ezali boni mpo na Petelo ye moko? Na butu oyo bakangaki Yesu, Petelo akosaki mpe awanganaki Yesu mbala misato. Ɛɛ, Petelo abangaki bato mpe akosaki. Kasi, na mbala moko “alelaki na mawa makasi,” abongolaki motema, mpe lisumu na ye elimbisamaki. Longola yango, azwaki liteya na libunga na ye. Mwa mikolo na nsima, ateyaki makambo ya Yesu liboso ya ebele ya bato, mpe atako bakonzi ya Bayuda na Yelusaleme bapekisaki ye makasi kosakola, aboyaki na motema moko kotika. Na ntembe te, libunga ya Petelo mpe mbongwana oyo asalaki kozanga kozela, esengeli mpenza kolendisa biso bato oyo toumelaka te kobɛta libaku na maloba mpe na misala, soki mwa bolɛmbu eyeli biso.​—Matai 26:69-75; Misala 4:18-20; 5:27-32; Yakobo 3:2.

Solo ekoumela libela

Masese 12:19 (NW) elobi boye: “Mbɛbu oyo elobaka solo ekoumela libela, kasi lolemo ya lokuta ezali kaka mpo na mwa ntango moke.” Ɛɛ, solo ebongwanaka te. Mpe bato bayokanaka malamu mpenza mpe bazalaka na esengo soki bazali koloba solo. Kutu, koloba solo ezali na matomba ebele: epesaka lisosoli ya pɛto, epesaka nzoto kilo, esalisaka moto ayokanaka malamu na molongani na ye, na bato ya libota na ye, na baninga na ye, ata mpe na baninga ya mosala to na patrɔ.

Nzokande, lokuta etikalaka libela te. Lolemo oyo elobaka lokuta ekoki kokosa na boumeli ya mwa ntango, kasi nsukansuka lokuta eyebanaka kaka. Longola yango, Yehova, Nzambe ya solo, atyá mokolo moko oyo akosukisa lokuta mpe baoyo babukaka lokuta. Biblia elaki ete Yehova akolongola makambo nyonso ya Satana Zabolo, tata ya lokuta, oyo azali kobungisa mabelé mobimba nzela. Mosika te, Yehova akosukisa lokuta mpe bato nyonso ya lokuta.​—Emoniseli 21:8.

Tokosikolama mpenza ntango “mbɛbu oyo elobaka solo” ekoumela libela!

[Maloba na nse ya lokasa]

[Likanisi ya paragrafe na lokasa 5]

Bato mingi bazali kokosa mpo bazali na lokoso mpe mpo bazali koluka kaka matomba na bango moko

[Likanisi ya paragrafe na lokasa 6]

Mbala nyonso oyo moto akosi, alobaka solo te; nzokande mbala mosusu moto akoki koloba solo te kozanga ete akosa

[Elilingi na lokasa 6]

Liteya nini tozwi na ndenge Petelo awanganaki Klisto?

[Elilingi na lokasa 7]

Bato bayokanaka malamu mpenza mpe bazalaka na esengo soki bazali koloba solo