Ozali “eloko ya kotala”!

¹ Ntoma Paulo akomaki boye: “Tokómi eloko ya kotala epai ya mokili, mpe epai ya baanzelu, mpe epai ya bato.” (1 Kol. 4:9, NW) Yango elingi koloba nini, mpe ndenge nini likambo yango ekoki kosalisa biso na mosala na biso ya kosakola?

² Maloba “eloko ya kotala” ezalaki kotinda moto ya Kolinti, oyo ayoki yango, akanisa ndenge etumba ya bilombe Baloma (gladiateurs romains) ezalaki kosuka: bato oyo bazalaki kokatelama etumbu bazalaki kosala defile liboso ete báboma bango na ndenge moko ya nsɔmɔ; defile yango ezalaki kosalama liboso ya bato ebele oyo bazalaki kotala na libándá ya masano. Ndenge moko mpe mpo na baklisto ya ekeke ya liboso: miso ebele​—ya bato mpe ya baanzelu​—ezalaki kotala bango ndenge bazalaki komona bampasi mpo na mosala na bango ya kotatola Bokonzi ya Nzambe. (Ebe. 10:32, 33) Bosembo na bango ezalaki kokamwisa bato mingi oyo bazalaki kotala, ndenge mpe ezaleli na biso ya koyika mpiko ekamwisaka bato ebele na libándá ya masano ya lelo, elingi koloba mokili oyo. Kasi tozali eloko ya kotala mpo na banani?

³ Epai ya mokili mpe epai ya bato: Na bantango mosusu, bapanzi-nsango balobelaka misala oyo basaleli ya Yehova basalaka. Atako tosepelaka mingi ntango balobeli likambo moko ya solo mpe ya malamu oyo etali mosala na biso, toyebi mpe ete, na bantango mosusu, bato oyo basepelaka na biso te bakopanza biso nsango ya mabe. Kasi, biso tokotika te komilakisa lokola baministre ya Nzambe “na nzela ya lokumu ya mabe mpe lokumu ya malamu.” (2 Kol. 6:4, 8, NW) Na kati ya bato oyo bazali kotala biso, baoyo bazali mpenza na motema ya sembo bakozanga te komona ete tozali bayekoli ya solosolo ya Yesu Klisto.

⁴ Epai ya baanzelu: Bikelamu ya elimo mpe bazali kotala biso. Zabolo na bademo na ye bazali kotala​—mpe “na nkanda makasi,” bazali kosala nyonso mpo “mosala ya kopesa litatoli na ntina etali Yesu” esalama lisusu te. (Emon. 12:9, 12, 17, NW) Baanzelu ya sembo ya Nzambe mpe bazali kotala mpe bazali kosepela ntango mosumuki ata moko abongoli motema. (Luka 15:10) Lokola toyebi ete baanzelu batalelaka mosala na biso ya kosakola ete ezali mosala moko kaka oyo ebongi kosalema nokinoki koleka misala nyonso mpe ete yango moko kaka nde epesaka bolamu koleka misala nyonso awa na mabelé, tiká tósepela!​—Emon. 14:6, 7.

⁵ Ntango okutani na botɛmɛli to soki okómi komona lokola ete mosala na yo ya kosakola ezali kobota mbuma te, kanisá kaka likambo oyo: miso nyonso na likoló mpe na nse ezali kotala yo. Awa nde esika ezaleli na yo ya koyika mpiko makasi esengeli komonana. Mpe nsukansuka, ‘etumba malamu ya kondima,’ oyo ozali kobunda, ekosalisa yo ‘osimba makasi bomoi ya seko.’​—1 Tim. 6:12, NW.