Tótambola na kondima
1 Bamilió ya bato bazali kotonga bomoi na bango likoló na biloko ya mosuni, kotyáká na bozoba nyonso elikya na bango kati na nguya ya bokosi ya bozwi. (Mat. 13:22) Makambo makómaka mpenza bololo ntango bozwi na bango ebungi, eyibami, to emonani ete ezali na litomba moke. Tolendisami makasi na kolanda nzela eleki mayele, na kolukáká na mposa nyonso bozwi ya elimo. (Mat. 6:19, 20) Yango esɛngi na biso ete ‘tótambola na kondima.’—2 Kol. 5:7.
2 Liloba “kondima” ebongoli liloba moko ya Greke oyo epesi likanisi ya kotya motema, ya endimeli makasi. Kotambola na kondima elimboli kolónga mikakatano na kotyáká motema epai na Nzambe, na kondimáká likoki azali na yango ya kokamba matambe na biso mpe na mokano azali na yango ya kokokisa bamposa na biso. Yesu azali ndakisa ya kokoka mpo na likambo yango; atyaki likebi na ye mobimba na makambo oyo mazalaki mpenza na ntina mingi. (Ebe. 12:2) Bobele bongo, tosengeli kotya motema na biso likoló na makambo ya elimo, makambo oyo mazali komonana te. (2 Kol. 4:18) Tóyeba ete bomoi ya lelo ezali mpenza na ntina te, mpe tóndima kotalela Nzambe na makambo nyonso.
3 Tosengeli mpe kondima makasi ete Yehova azali kokamba biso na nzela ya lisangá na ye oyo ezali komonana, na nsé ya litambwisi ya “moombo ya sembo mpe ya mayele.” (Mat. 24:45-47) Tozali komonisa kondima na biso na ‘kotosáká baoyo bazali kokamba’ lisangá. (Ebe. 13:17) Kosala na komikitisa nyonso na boyokani na bibongiseli ya Teokrasi ezali komonisa ete totye motema epai na Yehova. (1 Pet. 5:6) Tosengeli komiyoka ete topusami na kosunga na motema moko mosala oyo lisangá ezali kokokisa. Na bongo, lokola tokangami makasi na bolingo mpe na bomoko, tokomibɛlɛmisa na bandeko na biso.—1 Kol. 1:10.
4 Lolenge ya kokembisa kondima na biso: Tópesa nzela te ete kondima na biso etika kosala. Mpo ete yango ekóla, tosengeli kobunda etumba makasi. Koyekola mokolo na mokolo, kobondela ntango nyonso mpe koyangana na makita pɔ́sɔ na pɔ́sɔ ekosalisa biso na kokembisa kondima na biso, na boye ete na lisungi ya Yehova, yango ekoka kotɛmɛla komekama ata ya lolenge nini. (Ef. 6:16) Tosilá komisalela manáka ya malamu mpo na botángi ya Biblia mokolo na mokolo mpe kobongisa makita? Tomanyolaka mbala mingi likoló na makambo oyo tozali koyekola, mpe tomibɛlɛmisaka epai na Yehova na nzela ya libondeli? Tozalaka na momeseno ya koyangana na makita nyonso mpe kopesa biyano ntango likoki epesameli biso?—Ebe. 10:23-25.
5 Kondima ya makasi emonanaka na misala ya malamu. (Yak. 2:26) Moko na myango malamu mpo na komonisa kondima na biso ezali ya kolobela elikya na biso epai na bazalani. Tosalelaka mabaku nyonso mpo na koyebisa nsango malamu? Mwa mbongwana kati na ezalela na biso ekopesa biso nzela na kosala mingi kati na mosala ya kosakola? Tolandaka malako oyo tozali kozwa mpo na kobongisa malamu lolenge ya mosala na biso? Tomityelaka biso moko mikano ya elimo mpe tosalaka makasi na kokokisa yango?
6 Yesu akebisaki biso na ntina na likámá ya komitika kozindisama na makambo ya bomoi ya mokolo na mokolo mpe ya kopesa nzela na matomba ya mosuni to ya moimi ete ebebisa lolenge na biso ya kotalela makambo na elimo. (Luka 21:34-36) Tosengeli kosɛnzɛla na lolenge tozali kotambola, mpo na kopɛngola ete tópɛngwa nzela te mpo na oyo etali kondima na biso. (Ef. 5:15; 1 Tim. 1:19) Mokomoko kati na biso azali kolikya koloba mokolo mosusu ete: “Nasili kobunda etumba malamu, nasilisi nzela na kotambola, nasili kobatela kondima.”—2 Tim. 4:7.