“Lisekwa ya liboso” ezali kosalema sikoyo!
“Baoyo bakufá na kati ya bomoko elongo na Klisto bakosekwa liboso.”—1 BATESALONIKI 4:16.
1, 2. (a) Elikya nini ezali mpo na bato oyo bakufá? (b) Nini mpenza etindaka yo ondima ete lisekwa ekozala? (Talá maloba na nse ya lokasa.)
“BATO ya bomoi bayebi ete bakokufa.” Likambo yango ezali bongo banda Adama asalá lisumu. Na bileko nyonso, moto nyonso ayebaka ete nsukansuka akokufa, mpe mingi batunaka boye: ‘Nini ekómaka na nsima? Bakufi bazalaka ndenge nini?’ Biblia eyanoli ete: “Bakufi bayebi likambo te.”—Mosakoli 9:5.
2 Kasi, elikya ezali mpenza mpo na bato oyo bakufá? Ee. Soki mokano ya Nzambe ya ebandeli mpo na bato ekokokisama, elikya ezali mpo na bakufi. Na boumeli ya bikeke, basaleli ya sembo ya Nzambe bazalaki kondima ete Momboto oyo Yehova alakaki, akoboma Satana mpe akolongola mabe oyo asalá. (Genese 3:15) Ebele bakufá. Mpo bámona kokokisama ya elaka yango mpe bilaka mosusu oyo Yehova alakaki, basengeli kosekwisama. (Baebele 11:13) Likambo motindo wana ekoki kosalema? Ee. Ntoma Paulo alobaki ete: “Ekozala na lisekwa moko ya bayengebene mpe ya bato oyo bazangi boyengebene.” (Misala 24:15) Mokolo moko, Paulo asekwisaki elenge mobali moko na nkombo Etikɛ, oyo akweaki banda na etazi ya misato mpe “balɔkɔtaki ye asili kokufa.” Elenge mobali wana azali moto ya nsuka na kati ya bato libwa oyo Biblia elobi ete basekwaki.—Misala 20:7-12.a
3. Ndenge nini maloba ya Yesu oyo ezali na Yoane 5:28, 29 ebɔndisi yo moko, mpe mpo na nini?
3 Lisekwa ya bato libwa wana ezali kosalisa biso tóndima maloba ya Paulo. Esalisi tóndima maloba ya Yesu oyo: “Ngonga ezali koya wana baoyo nyonso bazali na kati ya malita ya kokanisama bakoyoka mongongo [ya Yesu] mpe bakobima.” (Yoane 5:28, 29) Oyo nde maloba ya kolendisa! Mpe ezali mpenza kobɔndisa bamilio ya bato oyo babungisá bato oyo bazalaki kolinga mingi!
4, 5. Wapi lolenge ekeseni ya lisekwa oyo Biblia elobeli, mpe oyo wapi tokolobela na lisolo oyo?
4 Ebele ya bato oyo bakosekwa bakozonga na mabelé oyo ekokóma kimya mpe ekoyangelama na Bokonzi ya Nzambe. (Nzembo 37:10, 11, 29; Yisaya 11:6-9; 35:5, 6; 65:21-23) Nzokande, bato mosusu basengelaki kosekwa liboso ya lisekwa ya baoyo bakofanda na mabelé. Ya liboso, Yesu Klisto asengelaki kosekwa mpo na komonisa motuya ya mbeka na ye epai ya Nzambe mpo na biso. Yesu akufaki mpe asekwaki na mobu 33 ya ntango na biso (T.B.).
5 Ya mibale, baklisto bapakolami ya “Yisalaele ya Nzambe” basengeli kosangana na Nkolo Yesu Klisto na nkembo na ye na likoló, epai bakozala “ntango nyonso elongo na Nkolo.” (Bagalatia 6:16; 1 Batesaloniki 4:17) Likambo yango ebengami “lisekwa ya liboso.” (Bafilipi 3:10, 11; Emoniseli 20:6) Ntango lisekwa yango ekosila, ekokóma ngala ya bamilio ya bato oyo bakosekwa na elikya ya kozala na bomoi ya seko na paladiso. Na yango, ezala tozali na elikya ya likoló to ya mabelé, tozali mpenza na mposa ya koyeba soki “lisekwa ya liboso” ezali nini. Lisekwa yango ezali ya ndenge nini? Ekosalema ntango nini?
“Na nzoto ya ndenge nini?”
6, 7. (a) Nini esengeli kosalema liboso baklisto bapakolami bákende na likoló? (b) Bakosekwa na nzoto ya motindo nini?
6 Na mokanda na ye ya liboso epai ya Bakolinti, Paulo abimisaki motuna moko na ntina na lisekwa ya liboso: “Ndenge nini bakufi basengeli kolamuka? Ɛɛ, bakoya na nzoto ya ndenge nini?” Na nsima ayanolaki boye: “Eloko oyo olonaka ezongaka na bomoi te soki ekufi naino te liboso . . . kasi, Nzambe apesaka yango nzoto ndenge ye moko asepeli . . . Nkembo ya biloko ya likoló ezali na ndenge na yango, mpe oyo ya mabelé ezali na ndenge na yango mosusu.”—1 Bakolinti 15:35-40.
7 Maloba ya Paulo emonisi ete baklisto bapakolami na elimo santu basengeli kokufa liboso bázwa libula na bango ya likoló. Ntango bakufaka, nzoto na bango ya mabelé ezongaka na mputulu. (Genese 3:19) Na ntango oyo Nzambe abongisi, basekwaka na nzoto na oyo ebongi mpo na bomoi na likoló. (1 Yoane 3:2) Nzambe apesaka bango mpe nzoto oyo ekufaka te. Babotamaka na nzoto yango te, mpe yango ezali te molimo moko boye oyo ekufaka te oyo batyá kati na nzoto na bango. Paulo alobi ete: “Oyo ezali ya kopɔla esengeli kolata motindo ya kozanga kopɔla.” Nzoto oyo ekufaka te ezali likabo ya Nzambe, mpe baoyo bazali kosekwa na lisekwa ya liboso nde ‘balataka yango.’—1 Bakolinti 15:50, 53; Genese 2:7; 2 Bakolinti 5:1, 2, 8.
8. Ndenge nini toyebi ete Nzambe aponaka bato 144 000 na mangomba nyonso te?
8 Kaka bato 144 000 nde bazali kosekwa na lisekwa ya liboso. Yehova abandaki kopona bango na pantekote ya mobu 33 T.B., mwa moke nsima ya kosekwisa Yesu. “Nkombo [ya Yesu] mpe nkombo ya Tata na ye ekomamá na bilongi na bango” nyonso. (Emoniseli 14:1, 3) Kasi, bato yango baponamaka na mangomba nyonso te. Bango nyonso bazali bayekoli ya Klisto mpe bazali komema nkombo ya Tata na bango, Yehova. Ntango bazali kosekwa, bazali kozwa mokumba ya kosala na likoló. Elikya ya kosalela Nzambe na likoló epesaka bango esengo mingi.
Ezali kosalema?
9. Ndenge nini Emoniseli 12:7 mpe 17:14 ezali kosalisa biso tózala na mwa likanisi mpo na ntango oyo lisekwa ya liboso ebandaki?
9 Lisekwa ya liboso ekosalema ntango nini? Ezali mpenza na bilembeteli oyo emonisi ete ezali kosalema sikoyo. Na ndakisa, tótalela makambo oyo ezali na mikapo mibale ya Emoniseli. Ya liboso, tótala na Emoniseli mokapo 12. Kuna, totángaka ete Yesu Klisto, mokonzi oyo auti kotyama ná baanzelu na ye mosantu, bazali kobunda na Satana ná bademo na ye. (Emoniseli 12:7-9) Ndenge Linɔ́ngi ya Mosɛnzɛli esilá komonisa yango mbala na mbala, etumba yango ebandaki na 1914.b Kasi, tósimba ete lisolo yango emonisi ete ata moyekoli mopakolami moko te ya Klisto azalaki na ye na etumba yango. Sikoyo, talá na Emoniseli mokapo 17. Kuna, tozali kotánga ete nsima ya kobomama ya “Babilone Monene,” Mwana-Mpate akolonga bikólo. Na nsima, ebakisi ete: “Lisusu, baoyo babengami mpe baponami mpe bato ya sembo elongo na ye bakosala bongo.” (Emoniseli 17:5, 14) Soki “babengami mpe baponami mpe bato ya sembo” bakozala elongo na Yesu mpo na kobebisa libela mokili ya Satana, yango elingi koloba ete bakosekwa liboso. Yango emonisi ete bapakolami oyo bazali kokufa liboso ya Armagedona basengelaki kosekwa nsima ya 1914 mpe liboso ya Armagedona.
10, 11. (a) Bankulutu 24 bazali banani, mpe moko na bango ayebisaki Yoane likambo nini? (b) Na yango tokoki mpenza koloba nini?
10 Tokoki mpenza koloba na bosikisiki ntango oyo lisekwa ya liboso ebandaki? Elembeteli moko ya sikisiki ezali na Emoniseli 7:9-15, epai ntoma Yoane alobeli emonaneli oyo amonaki ya “ebele ya bato, oyo ata moto moko te akokaki kotánga.” Moko ya bankulutu 24 nde ayebisaki Yoane soki ebele ya bato yango bazali banani, mpe bankulutu yango ezali bato 144 000 oyo bakozwa libula elongo na Klisto, na nkembo na bango kuna na likoló.c (Luka 22:28-30; Emoniseli 4:4) Yoane mpe azalaki na elikya ya likoló, kasi lokola azalaki naino awa na mabelé ntango nkulutu wana asololaki na ye, yango emonisi ete na emonaneli wana Yoane azalaki momonisi ya bapakolami awa na mabelé oyo bazwi naino te likabo na bango na likoló.
11 Na bongo, tokoki koloba nini na ndenge moko ya bankulutu 24 ayebisaki Yoane soki ebele ya bato ezali banani? Emonani ete baoyo basilá kosekwa na kati ya bankulutu 24 bazali mpe koyebisa biso mateya ya Nzambe lelo oyo. Mpo na nini likambo yango ezali na ntina? Mpamba te baklisto bapakolami ya Nzambe bayebaki soki ebele ya bato ezali banani na 1935. Soki moko ya bankulutu 24 ayebisaki nsango wana ya ntina mingi, ntembe ezali te ete na mbula wana asilaki kosekwa mpe azalaki kuna na likoló. Yango emonisi ete mbala mosusu lisekwa ya liboso ebandaki na kati ya 1914 mpe 1935. Bilembeteli ezali mpenza mpo na yango?
12. Limbolá ntina oyo tokoki koloba ete lisekwa ya liboso ebandaki na prɛnta ya 1918.
12 Sikoyo, tótalela bilembetele mosusu oyo euti mpenza na Biblia te. Yesu Klisto apakolamaki na elimo santu mpo na kokóma mokonzi ya Bokonzi ya Nzambe na ɔtɔne ya 29 T.B. Mbula misato na ndambo na nsima, na prɛnta ya mobu 33 T.B., asekwaki lokola ekelamu ya elimo ya nguya. Na yango, tokoki mpenza kokanisa ete lokola Yesu akómaki mokonzi na ɔtɔne ya 1914, lisekwa ya bayekoli na ye bapakolami ya sembo ebandaki mbula misato na ndambo na nsima, elingi koloba na prɛnta ya 1918? Ekoki mpenza kozala bongo. Atako vɛrsɛ moko te na Biblia emonisi mbala moko likambo yango, kasi ezali na boyokani na bavɛrsɛ mosusu oyo emonisi ete lisekwa ya liboso ebandaki mwa moke nsima, mwa moke nsima ya ntango oyo kozala ya Klisto ebandaki.
13. Ndenge nini 1 Batesaloniki 4:15-17 emonisi ete lisekwa ya liboso mwa moke nsima ya ntango oyo kozala ya Klisto ebandaki?
13 Na ndakisa, Paulo akomaki ete: “Biso bato ya bomoi oyo tozali kotikala tii na kozala ya Nkolo [kasi, na nsuka ya kozala na ye te] tokoleka soki moke te liboso ya baoyo balali na kati ya liwa; mpamba te Nkolo ye moko akokita uta na likoló na mbela ya komandema, na mongongo ya anzelu-mokonzi mpe na kelelo ya Nzambe, mpe baoyo bakufá na kati ya bomoko elongo na Klisto bakosekwa liboso. Na nsima biso bato ya bomoi oyo totikali tokomemama, elongo na bango, na kati ya mapata mpo na kokutana na Nkolo na kati ya mopɛpɛ; mpe na ndenge yango tokozala ntango nyonso elongo na Nkolo.” (1 Batesaloniki 4:15-17) Na yango, baklisto bapakolami oyo bakufaki liboso ya kozala ya Klisto basekwaki mpo na bomoi na likoló liboso ya baoyo batikali naino na bomoi na boumeli ya kozala ya Klisto. Yango emonisi ete lisekwa ya liboso ebandaki mwa moke nsima ya ntango oyo kozala ya Klisto ebandaki, mpe ezali kokoba “na ntango ya kozala na ye.” (1 Bakolinti 15:23) Na esika bango nyonso básekwa mbala moko, lisekwa ya liboso ezali kosalema na boumeli ya ntango.
“Bapesaki mokomoko na bango zambala moko ya mpɛmbɛ”
14. (a) Ntango nini bimonaneli oyo ezali na Emoniseli mokapo 6 ekokisamaki? (b) Makambo oyo Emoniseli 6:9 elobeli ezali elilingi ya nini?
14 Tótalela mpe makambo mosusu oyo ezali na Emoniseli mokapo ya 6. Kuna, Yoane amonaki Yesu afandi likoló ya Mpunda lokola mokonzi oyo azali kolonga. (Emoniseli 6:2) Kobunda ezali mingi kati na bikólo. (Emoniseli 6:4) Nzala ezali bipai nyonso. (Emoniseli 6:5, 6) Bolɔzi ya liwa ezali mpenza kosasa bato. (Emoniseli 6:8) Bisakweli oyo nyonso ezali mpenza na boyokani na makambo oyo ezali koleka na mokili banda na 1914. Kasi, likambo mosusu mpe ezali kosalema. Tólobela sikoyo etumbelo ya mbeka. Na nse na yango ezali na “milimo ya baoyo babomamaki mpo na liloba ya Nzambe mpe mpo na mosala ya kotatola oyo bazalaki na yango.” (Emoniseli 6:9) Lokola molimo to “bomoi ya mosuni ezali kati na makila,” milimo oyo Yoane amonaki na nse ya etumbelo ezali makila ya basaleli ya Yesu ya sembo oyo babomamaki mpo na molende mpe mpiko na bango ya kotatola.—Levitike 17:11.
15, 16. Limbolá mpo na nini maloba ya Emoniseli 6:10, 11 emonisi lisekwa ya liboso.
15 Ndenge kaka makila ya mosembwi Abele ezalaki koganga, oyo ya bamartiru baklisto wana ezali mpe kobelela Nzambe mpo akata likambo na bango. (Genese 4:10) “Bagangaki na mongongo makasi, kolobáká ete: ‘Nkolo Mokonzi-Aleki-Nyonso oyo azali mosantu mpe oyo alobaka solo, tii ntango nini okokanga motema mpo na kosambisa mpe kozongisa mabe mpo na makila na biso epai ya baoyo bafandaka na mabelé?’” Nini esalemaki na nsima? “Bapesaki mokomoko na bango zambala moko ya mpɛmbɛ; mpe bayebisaki bango ete bápema mwa moke lisusu, tii ntango oyo motángo ya baninga na bango baombo mpe ya bandeko na bango oyo bazalaki pene ya kobomama ndenge bango mpe babomamaki ekokoka.”—Emoniseli 6:10, 11.
16 Bazambala epesamaki nde na makila oyo ezalaki na nse ya etumbelo? Te! Bapesaki yango nde epai ya bato oyo makila na bango esopanaki, na etumbelo na ndenge ya elilingi. Bakabaki bomoi na bango mpo na nkombo ya Yesu mpe sikoyo basekwi lokola bikelamu ya elimo. Ndenge nini toyebi yango? Mwa liboso, kaka na Mokanda ya Emoniseli, totángaka ete: “Oyo alongi akolatisama na bilamba ya likoló ya mpɛmbɛ; mpe nakoboma nkombo na ye soki moke te na buku ya bomoi.” Tóbosana mpe te ete bankulutu 24 ‘balataki bilamba ya likoló ya mpɛmbɛ, mpe na mitó na bango [bazalaki na] mitole ya wolo.’ (Emoniseli 3:5; 4:4) Na yango, ntango etumba, nzala mpe maladi mabe ebandaki koboma bato awa na mabelé, bapakolami oyo bakufaki, oyo bamonisami na makila oyo ezali na nse ya etumbelo, basekwaki mpe bamataki na likoló, mpe na ndenge ya elilingi, balatisaki bango bazambala ya mpɛmbɛ.
17. Na ndenge nini baoyo bazali kozwa bazambala ya mpɛmbɛ bazali ‘kopema’?
17 Baoyo basekwi sika basengeli ‘kopema.’ Basengeli kozela na motema molai mokolo ya nkanda ya Nzambe. “Baninga na bango baombo,” elingi koloba baklisto bapakolami oyo bazali naino awa na mabelé, basengeli komonisa bosembo na bango na kati ya mikakatano. Ntango, ngonga ya Nzambe ya kopesa bitumbu ekoya, ‘bopemi’ na bango ekosila. (Emoniseli 7:3) Na ntango wana, bapakolami yango oyo basekwaki bakosangana na Nkolo Yesu Klisto mpo na koboma bato mabe, ná baoyo bazali kosopa makila ya baklisto oyo basali eloko te.—2 Batesaloniki 1:7-10.
Ndimbola mpo na biso
18, 19. (a) Wapi ntina oyo okoki koloba ete lisekwa ya liboso ezali kosalema sikoyo? (b) Ozali koyoka ndenge nini na makambo oyo oyebi sikoyo mpo na lisekwa ya liboso?
18 Liloba ya Nzambe elobi te ete lisekwa ya liboso ekosalema mokolo boye to boye, kasi emonisi ete ezali kosalema na boumeli ya ntango, elingi koloba na ntango ya kozala ya Klisto. Bato ya liboso oyo basekwaki ezali baklisto bapakolami oyo bakufaki liboso ntango ya kozala ya Klisto ebanda. Lokola ntango ya kozala ya Klisto ezali kokoba, baklisto bapakolami oyo bazali kokufa bazali kobongwana “kobɛta ya liso” mpo na kokóma bikelamu ya elimo ya nguya. (1 Bakolinti 15:52) Bapakolami nyonso bakozwa mbano na bango na likoló liboso ya etumba ya Armagedona? Toyebi te. Kasi, toyebi ete na ntango oyo Nzambe abongisi, bato 144 000 nyonso bakozala na Ngomba Siona ya likoló.
19 Toyebi mpe ete mingi kati na bato 144 000 bazali elongo na Klisto. Kaka mwa ndambo nde bazali naino awa na mabelé. Nyonso wana ezali komonisa ete ntango oyo Nzambe akosambisa bato ezali lisusu mosika te. Mosika te, mokili mobimba ya Satana ekobomama. Ye moko Satana akobwakama na libulu. Na nsima, lisekwa ya bato nyonso ekobanda, mpe na nzela ya mbeka ya lisiko ya Yesu, bato ya sembo bakosekwa mpe bakokóma na bomoi ya kokoka lokola oyo Adama abungisaki. Esakweli ya Yehova oyo ezali na Genese 3:15 ezali kokokisama na ndenge ya kokamwa. Oyo nde libaku malamu ya kozala na bomoi na ntango oyo!
[Maloba na nse ya lokasa]
a Mpo na bato mosusu mwambe oyo basekwaki, talá 1 Mikonzi 17:21-23; 2 Mikonzi 4:32-37; 13:21; Malako 5:35, 41-43; Luka 7:11-17; 24:34; Yoane 11:43-45; Misala 9:36-42.
b Mpo na koyeba makambo oyo Makomami emonisi ete kozala ya Klisto ebandaki na 1914, talá na buku Biblia eteyaka mpenza nini? nkasa 215-218, ebimisami na Batatoli ya Yehova.
c Mpo na koyeba nini esalisi biso tóyeba ete bankulutu 24 ezali baklisto bapakolami oyo bamonani kuna na likoló, talá Emoniseli: kokokana na yango monene ebelemi! lokasa 77, ebimisami na Batatoli ya Yehova.
Okoki kolimbola?
Ndenge nini bavɛrsɛ oyo elandi ezali kosalisa biso tóyeba ntango oyo “lisekwa ya liboso” esengelaki kosalema?
• 1 Bakolinti 15:23; 1 Batesaloniki 4:15-17
[Bililingi na lokasa 26]
Lisekwa nini ezali kosalema liboso bato nyonso básekwa?
[Elilingi na lokasa 29]
Ndenge nini bapesaki bato mosusu oyo bakufaki bazambala ya mpɛmbɛ?