Mituna ya batángi
Paulo alingaki koloba nini ntango alobaki ete mwasi oyo akufelá mobali asengeli kozala “mwasi ya mobali kaka moko” mpo lisangá ekoka kosalisa ye?—1 Timote 5:9.
Lokola ntoma Paulo azalaki kolobela mwasi oyo akufelá mobali, ezali polele ete maloba “mwasi ya mobali kaka moko” ezali kolobela bomoi oyo mwasi yango azalaki na yango liboso mobali na ye akufa. Elingi nde koloba ete mwasi yango asengelaki kobala kaka mbala moko na bomoi na ye? Maloba ya Paulo ezalaki nde na ndimbola mosusu?a
Bato mosusu balobaka ete Paulo alobelaki basi-bakufelá mibali oyo babalaki kaka mbala moko na bomoi na bango. Toboyi te, na bisika mingi, soki mwasi akufeli mobali mpe abali lisusu te, bazalaki kotalela ye lokola mwasi malamu mpenza. Kasi, likanisi wana eyokani te na makambo oyo Paulo akomaki na mikanda na ye mosusu. Na ndakisa, ayebisaki baklisto ya Kolinti polele ete ye azalaki kokanisa ete mwasi oyo akufelá mobali akozala na esengo koleka soki abali lisusu te. Kasi, abakisaki ete mwasi ya ndenge wana “azali na bonsomi ya kobalana ná mobali oyo ye alingi, nde na kati ya Nkolo kaka.” (1 Bakolinti 7:39, 40; Baloma 7:2, 3) Lisusu, na mokanda oyo akomelaki Timote, Paulo alobaki boye: “Nalingi ete bilenge basi oyo bakufelá mibali bábala.” (1 Timote 5:14) Yango emonisi ete bazalaki komona mabe te soki mwasi oyo akufelá mobali asepeli kobala lisusu.
Kasi, Paulo alingaki koloba na Timote mpenza nini? Na Biblia mobimba, maloba “mwasi ya mobali kaka moko” ezali kaka na vɛrsɛ moko wana. Likambo ezali kobenda likebi ezali ete maloba yango ekokani mpenza na maloba mosusu ya monɔkɔ ya Grɛki oyo Paulo asalelaki mbala mingi na mikanda na ye: “Mobali ya mwasi kaka moko.” (1 Timote 3:2, 12; Tito 1:6) Paulo asalelaki maloba wana ntango azalaki kotánga masɛngami oyo bato oyo balingi kokóma bakɛngɛli mpe basaleli na misala basengeli kokokisa. Na esika wana, maloba yango elimboli ete mpo na kozwa mikumba na lisangá, mobali oyo abalá asengeli kozala sembo epai ya mwasi na ye mpe kozala na mbeba moko te.b Na yango, ekoki kozala ete na 1 Timote 5:9, Paulo azalaki kolobela kaka likambo yango: Mpo mwasi oyo akufelá mobali azwa lisalisi na lisangá, esengelaki azala mwasi ya sembo, oyo akangamaki kaka na mobali na ye ntango azalaki na bomoi, mpe asengelaki kozala na mbeba moko te. Masɛngami mosusu oyo Paulo atángaki ezalaki kolobela kaka mwasi ya ndenge wana.—1 Timote 5:10.
[Maloba na nse ya lokasa]
a Libala ya mwasi moko mibali ebele endimamaki te epai ya Bagrɛki ná Baloma na ntango ya bantoma. Yango wana, tokoki kokanisa te ete Paulo azalaki kolobela libala motindo wana to basi oyo bazalaki na mabala ya ndenge wana.
b Mpo na koyeba makambo mosusu na ntina na likambo yango, talá Linɔ́ngi ya Mosɛnzɛli ya 15 Ɔkɔtɔbɛ 1996, lokasa 17, mpe “Mituna ya batángi,” na Linɔ́ngi ya Mosɛnzɛli ya 1 Yanuali 1982, lokasa 31 (na Lifalanse).