Mituna ya Batángi

Nkomá ya liboso ya Yoane 4:18 eyebisi biso ete: “[Bobángi, NW] ekozalaka kati na bolingo te, kasi bolingo oyo esili kokoka ekobwaka [bobángi, NW] libandá.” Kasi Petelo akomaki ete: “Bólinga lisangani mobimba ya bandeko, bóbanga Nzambe.” (1 Petelo 2:17, NW) Lolenge nini tokoki koyokanisa mikapo oyo mibale?

Bango nyonso mibale, Petelo mpe Yoane bazalaki bantoma oyo bateyamaki mpenza na Yesu. Na yango, tokoki kondimisama ete makambo oyo bakomaki mazali mpenza na boyokani. Mpo na mikapo oyo mizongelami awa, likambo ya ntina ezali ete bantoma wana mibale balobelaki mitindo mibale mikeseni ya bobángi.

Tiká tótalela liboso toli ya Petelo. Lokola zingazinga ya makambo ezali komonisa yango, Petelo azalaki kopesa baninga na ye baklisto batoli oyo epemami na ntina na ezaleli na bango liboso na baoyo bazali na bokonzi. Na elobeli mosusu, azalaki kopesa ndimbola na ntina na lolenge lobongi ya komonisa botosi na makambo mosusu. Na yango, apesaki baklisto toli ete bátosa bato oyo bazali na bokonzi kati na biyangeli ya bato, lokola mikonzi mpe bayangeli. (1 Petelo 2:13, 14) Petelo akomaki lisusu ete: “Bókumisa mitindo nyonso na bato, bólinga lisangani mobimba ya bandeko, bóbanga Nzambe, bókumisa mokonzi.”​—1 Petelo 2:17, NW.

Na kotalela zingazinga ya makambo, ezali polele ete na ntango Petelo alobaki ete Baklisto basengeli “kobanga Nzambe,” alingaki koloba ete basengeli kozala na botosi mozindo epai na Nzambe, bobángi ya kozanga kosepelisa mokonzi aleki monene.​—Kokanisá na Baebele 11:7.

Ezali boni mpo na bandimbola ya ntoma Yoane? Na ebandeli ya 1 Yoane mokapo 4, ntoma alobelaki ntina ya kotalela malamu “[maloba mapemami, NW]” oyo eutaka epai na basakoli ya lokuta. Ntembe ezali soko moke te ete maloba motindo wana mauti na Yehova Nzambe te; mauti to mazali komonisa mokili ya mabe.

Na bokeseni, baklisto bapakolami “bauti na Nzambe.” (1 Yoane 4:1-6) Mpo na yango, Yoane alobaki ete: “Balingami, tólingana, moto [na] moninga na ye, mpo ete bolingo euti na Nzambe.” Nzambe nde abandaki komonisa bolingo​—“atindaki Mwana na ye lokola mbondi mpo na masumu na biso.” (1 Yoane 4:7-10) Lolenge nini tokoki koyanola?

Emonani polele ete, tosengeli kozala na bomoko elongo na Nzambe na biso ya bolingo. Tosengeli te kozala na nsɔ́mɔ to kolɛngalɛnga wana tolingi kobɛlɛma epai na ye kati na libondeli. Yoane apesaki liboso toli oyo ete: “Soko mitema na biso mikokweisaka biso te, tozali na molende liboso na Nzambe mpe soko tokolɔ́mba eloko nini, tokozwa yango epai na ye mpo ete tokokokisa malako na ye.” (1 Yoane 3:21, 22) Ee, lisosoli malamu ezali kopesa biso bonsomi ya kobɛlɛma liboso na Nzambe kozanga kolɛmbisama to kopekisama mpo na bobángi. Mpo na bolingo, tozali na nkaka te mpo na kotinda mabondeli na biso epai na Nzambe, to kobɛlɛma epai na ye kati na mabondeli. Na lolenge yango, “[Bobángi, NW] ekozalaka kati na bolingo te.”

Bongo, tiká sikawa tókangisa makanisi wana mibale. Moklisto asengeli kozala ntango nyonso na bobángi mozindo epai na Yehova, bobángi oyo euti na botosi mozindo mpo na etɛlɛmɛlo na ye, nguya na ye, mpe bosembo na ye. Kasi, lisusu tolingaka Nzambe lokola Tata na biso, mpe tomiyokaka mpenza pene na ye, mpe tozali kokakatana te mpo na kobɛlɛma epai na ye. Na esika ete nsɔ́mɔ epekisa biso, tozali na elikya ete tokoki kobɛlɛma epai na ye, lokola mwana oyo azali kobɛlɛma epai na tata na ye ya bolingo kozanga kokakatana.​—Yakobo 4:8.