666​—Ezali te kaka lisano ya koyeba libombami moko

‘Moto te akoki kosomba to kotɛka longola kaka moto oyo azali na elembo yango, nkombo ya nyama mabe yango to motángo ya nkombo na ye. Awa nde esengeli bwanya: Moto oyo azali na mayele atánga motángo ya nyama mabe yango, mpo ezali motángo ya moto; mpe motángo na ye ezali nkama motoba na ntuku motoba na motoba.’​—Emoniseli 13:17, 18.

EZALI na makambo mingi te na kati ya Biblia oyo ebendá likebi ya bato lokola esakweli oyo elobeli motángo 666, oyo ezali elembo to nkombo ya “nyama mabe.” Na televizyo, na Internet, na bafilme, na babuku, mpe na bazulunalo, bato bazali kolɛmba te kopesa makanisi ndenge na ndenge mpo na kolimbola elembo yango.

Bato mosusu balobi ete motángo 666 ezali elembo ya moto oyo Biblia ebengi motɛmɛli ya Klisto. Bamosusu bazali koloba ete ezali elembo oyo bakosɛngisa bato na makasi bázala na yango mpo na komonisa ete bazali basaleli ya nyama; ekoki kozala nzɔlɔkɔ oyo bakokata bato to mpe mwa eloko moke mpenza oyo ezali na nimero (puce électronique) oyo bakotya yango bato na nzoto. Bato mosusu mpe balobi ete motángo 666 ezali elembo ya pápa. Soki bazwi maloba Vicarius Filii Dei (Mokitani ya Mwana ya Nzambe), oyo ezali titre ya pápa, babongoli balɛtrɛ na yango na mituya ya romains (chiffres romains), na nsima, basangisi mituya yango bakozwa motángo 666. Bato mosusu bazali koloba mpe ete motángo yango ekoki kozwama soki basali kaka ndenge yango na balɛtrɛ ya nkombo ya Amperɛrɛ Dioclétien na Latin mpe nkombo ya Néron César na Liebele.a

Kasi, ndenge lisolo oyo elandi ekomonisa yango, ndimbola wana oyo bato bakanisi na ndenge na bango, eyokani ata moke te na oyo Biblia elobi mpo na elembo ya nyama. Biblia emonisi ete Nzambe akoboma bato oyo bazali na elembo yango nzela moko na ebongiseli ya makambo ya ntango oyo. (Emoniseli 14:9-11; 19:20) Yango wana, koyeba ndimbola ya motángo 666 ezali kaka te koyeba libombami moko. Likambo ya malamu ezali ete Yehova Nzambe, ye oyo atondi na bolingo mpe Mopesi ya pole ya elimo, atiki basaleli na ye na molili te na likambo yango ya ntina mingi.​—2 Timote 3:16; 1 Yoane 1:5; 4:8.

[Maloba na nse ya lokasa]