Luka

20 Zazi le liñwi Jesu ha naa luta batu mwa tempele ni ku shaela taba ye nde, baprisita ba bahulu ni bañoli ba Mulao ni ba bahulu ba sicaba ba taha bukaufi, 2 mi ba li ku yena: “Ha ku lu bulelele maata e u eza ka ona lika ze, kamba ya ku file maata ao.” 3 Jesu a ba alaba, a li: “Ni na, ni ka mi buza puzo i liñwi, mi mu ni alabe: 4 Kana kolobezo ya Joani ne i zwa kwa lihalimu kamba kwa batu?” 5 Cwale ba ikambota mwahalaa bona, ba li: “Ha lu ka li, ‘Ne i zwa kwa lihalimu,’ yena u ka li, ‘Ki kabakalañi ha ne mu si ka mu lumela?’ 6 Kono ha lu ka li, ‘Ne i zwa kwa batu,’ sicaba kaufela si ka lu pobaula ka macwe, kakuli si kozwi kuli Joani ne li mupolofita.” 7 Kiha ba alaba kuli ne ba sa zibi ko ne i zwa. 8 Jesu kihaa li ku bona: “Kanti ni na, ha ni na ku mi bulelela maata e ni eza ka ona lika ze.”

9 Cwale a kala ku bulelela batu swanisezo ye: “Mutu yo muñwi naa cezi simu ya likota za veine mi a siyela balimi simu yeo, kihona a ya kwa naha ya kwahule, a yo ina kwateñi nako ye telele. 10 Kono nako ya ku kutula ha i fitile, a luma mutanga kwa balimi kuli ba yo mu fa kwa litolwana za mwa simu ya likota za veine. Kono balimi ba mu kutisa mazoho-zoho, ba mano mu nata. 11 Kono hape a luma mutanga u sili. Yo ni yena ba nata, ba mu shubula, ni ku mu kutisa mazoho-zoho. 12 Niteñi a luma hape wa bulaalu; yo ni yena ba holofaza ni ku mu lelekisa. 13 Muñaa simu ya likota za veine kihaa li, ‘Ni ka ezañi? Ni ka luma mwanaka ya latwa. Mwendi yena ba ka mu kuteka.’ 14 Balimi ha ba bona mwanaa hae, ba lelisana mwahalaa bona, ba li, ‘Esi ki yena shwana yo; ha lu mu bulayeñi kuli saanda ibe sa luna.’ 15 Kiha ba mu nepela kwande a simu ya likota za veine mi ba mu bulaya. Cwale ki sifi sa ka eza muñaa simu ya likota za veine kwa balimi bao? 16 U ka taha ku to timeza balimi bao mi u ka fa simu ya likota za veine ku ba bañwi.”

Ha ba utwa cwalo, ba li: “Yeo ha i konahali!” 17 Kono Jesu a ba talima mi a li ku bona: “Cwale i talusañi taba ye ñozwi ye, ye li: ‘Licwe le ba hanile bayahi ki lona le li fetuhile licwe la butokwa la mwa kokozo’? 18 Mutu kaufela ya ka wela fa licwe leo u ka lobakeha. Haili mutu kaufela ye li ka wela, li ka mu tubaka.”

19 Bañoli ba Mulao ni baprisita ba bahulu kiha ba bata ku mu swala ka yona nako yeo, kono ba saba batu, kakuli ne ba lemuhile kuli naa talusa bona mwa swanisezo yeo. 20 Mi ha se ba mu kelyekile, ba luma matwela ku yo ikeza inge ki ba ba lukile, kuli ba swase Jesu mwa lipulelo za hae ilikuli ba mu fe mwa mazoho a mulonga ni mwa maata a mubusisi. 21 Mi ba mu buza, ba li: “Muluti, lwa ziba kuli u bulela ni ku luta batu ka ku nepahala mi ha u na sishweka, kono u luta nzila ya Mulimu ka ku ya ka niti: 22 Kana ku lukile kuli lu life mutelo ku Sesare kamba kutokwa?” 23 Kono a lemuha mano a bona a bupumi mi a li ku bona: 24 “Ha mu ni bonise dinari.* Siswaniso ni lilumbatina ze fateñi ki za mañi?” Ba li: “Ki za Sesare.” 25 A li ku bona: “Hakulicwalohe, mu kutiseze Sesare ze li za Sesare kono mu kutiseze Mulimu ze li za Mulimu.” 26 Mi cwale ba palelwa ku mu swasa mwa lipulelo za hae fapilaa batu, kono ka ku komokiswa ki kalabo ya hae, ba kuza feela.

27 Kono ba bañwi ba Basaduki*—bona ba ba li ha ku na zuho ya bafu—ba taha ku yena mi ba mu buza, 28 ba li: “Muluti, Mushe naa lu ñolezi kuli: ‘Haiba muhulwanaa mutu a shwa mi a siya musali, kono musali yo naa si ka pepa ni yena mwana, munyanaa mutu u lukela ku nyala musali wa mbelwa yo ni ku tahiseza muhulwanaa hae lusika.’ 29 Cwale ne ku na ni bana ba mba ba supile, mi wa pili a nyala musali mi a timela a si na mwana ni yena. 30 Ni wa bubeli 31 ni wa bulaalu a mu nyala. Mane kwa ba cwalo ku ba supile kaufelaa bona; ne ba si ka pepa bana ni yena kono ba fela ku shwa. 32 Kwa mafelelezo, musali ni yena a timela. 33 Cwale bafu ha ba ka zuha, musali yo u ka ba wa mañi? Kakuli kaufelaa bona ba supile ba kile ba mu nyala.”

34 Jesu a li ku bona: “Bana ba lifasi le baa nyala ni ku nyalwa, 35 kono ba ba filwe tukelo ya ku fumana bupilo mwa lifasi le li taha ni ku zuha kwa bafu ha ba na ku nyala kamba ku nyalwa. 36 Mane ha ba sa kona ku shwa, kakuli ba swana sina mangeloi, mi ki bana ba Mulimu kakuli ki bana ba zuho. 37 Kono haili ka za kuli ba ba shwile ba ka zuha, nihaiba Mushe naa patuluzi cwalo, mwa taba ya sicacani sa miutwa, ha naa bizize Jehova kuli ‘ki Mulimu wa Abrahama ni Mulimu wa Isaka ni Mulimu wa Jakobo.’ 38 Hasi Mulimu wa ba ba shwile, kono ki wa ba ba pila, kakuli ku yena, kaufelaa bona ba pila.” 39 Ba bañwi ba bañoli ba Mulao ba mu alaba, ba li: “Muluti, u bulezi hande.” 40 Kakuli ne ba si na bundume hape bwa ku mu buza puzo ni ye kana.

41 Yena kihaa li ku bona: “Ba bulela cwañi kuli Kreste ki mwanaa Davida? 42 Hailifo Davida yena ka sibili, mwa buka ya Lisamu, u li: ‘Jehova naa ize ku Mulenaa ka: “Ina kwa lizoho la ka la bulyo 43 ku fitela ni beya lila za hao sina sipula fo a hata mahutu a hao.”’ 44 Davida hakulicwalo u mu biza kuli ‘Mulena’; cwale u ba cwañi mwanaa hae hape?”

45 Jesu kihaa li kwa balutiwa ba hae, batu kaufela ba nze ba teeleza: 46 “Mu tokomele bañoli ba Mulao ba ba lakaza ku zamaya-zamaya mwa mikanjo mi ba lata ku lumeliswa ka likute mwa misika ni ku ina mwa lipula za kwapili mwa masinagoge ni mwa libaka ze kutekeha hahulu kwa milalelo 47 mi ba miza mandu a limbelwa ni ku lapela litapelo ze telele kuli ba bonwe ki batu. Bao ba ka fiwa katulo ye buima luli.”