Joani

19 Cwale ka nako yeo, Pilato a nga Jesu ni ku mu shapaka. 2 Mi masole ba tata kuwani ya bulena ya miutwa mi ba mu yaweka yona kwa toho ni ku mu apesa siapalo sa fahalimu sa mubala wa pulipela;* 3 mi ba kala ku taha ku yena, ba li: “U yoye, wena Mulena wa Majuda!” Hape, ba mu bakaula mwa pata. 4 Mi Pilato a zwela kwande hape mi a yo li ku bona: “Ha mu bone! Ni mi tiseza yena kwande kuli mu zibe kuli ha ni fumani mulatu ku yena.” 5 Mi Jesu a zwela kwande, a apezi kuwani ya bulena ya miutwa ni siapalo sa fahalimu sa mubala wa pulipela. Mi Pilato a li ku bona: “Ha mu bone! Mutu ki yo!” 6 Kono baprisita ba bahulu ni mapolisa ha ba mu bona, ba huwa, ba li: “U mu kokotele! U mu kokotele!” Pilato a li ku bona: “Ha mu mu nge mina mu yo mu kokotela, kakuli na ha ni fumani mulatu ku yena.” 7 Majuda ba mu alaba, ba li: “Lu na ni mulao, mi ka mulao wo u lukela ku shwa, kakuli u ipile ku ba mwanaa Mulimu.”

8 Cwale Pilato ha utwile ze ne ba bulela, a saba hahulu; 9 mi a kena hape mwa ndu ya mubusisi mi a li ku Jesu: “U zwa kai?” Kono Jesu naa si ka mu alaba. 10 Pilato kihaa li ku yena: “Kikuli ha u lati ku bulela ni na? Ha u zibi kuli ni na ni maata a ku ku lukulula ni maata a ku ku kokotela?” 11 Jesu a mu alaba, a li: “Ne u si ke wa ba ni maata a ku ni eza se siñwi ni kamuta konji haiba ne u a filwe ku zwa kwahalimu. Ki lona libaka mutu ya ni tisize ku wena u na ni sibi se situna ni ku fita.”

12 Kabakaleo Pilato a lika ka taata ku bata mwa ku mu lukululela. Kono Majuda ba huwa, ba li: “Haiba u lukulula mutu yo, ha u mulikanaa Sesare. Mutu kaufela ya ikeza mulena u lwanisa Sesare.” 13 Hakulicwalo, Pilato ha mano utwa manzwi ao, a tisa Jesu kwande, mi a ina mwa sipula sa katulo mwa sibaka se si bizwa Patelo ya Bulilo Bwa Macwe, kono ka Siheberu ki Gabata. 14 Cwale ne li lizazi la buitukiso bwa Paseka; ne se li ka hora ya bu 6* cwalo. Mi a li kwa Majuda: “Ha mu bone! Mulenaa mina ki yo!” 15 Kono ba huwa, ba li: “U mu bulaye! U mu bulaye! Mu kokotele!” Pilato a li ku bona: “Ni kokotele mulenaa mina?” Baprisita ba bahulu ba alaba, ba li: “Ha lu na mulena yo muñwi kwandaa Sesare.” 16 Kamukwaocwalo, ka yona nako yeo, a ba fa yena kuli ba mu kokotele.

Kiha ba nga Jesu ni ku ya ni yena. 17 Mi a ya a itwalezi kota ya hae ya linyando, kwa sibaka se ne si twi ki Sibaka sa Katendele, se si bizwa Gologota ka Siheberu; 18 mi ba mu kokotela teñi ko, hamoho ni ba bañwi ba babeli, yo muñwi kafa ni yo muñwi kafa, kono Jesu a li mwahalaa bona. 19 Pilato hape a ñola zibiso mi a i beya fa kota ya linyando. Ne i ñozwi kuli: “Jesu wa Munazareta Mulena wa Majuda.” 20 Kamukwaocwalo buñata bwa Majuda ba bala zibiso yeo, kakuli sibaka fa naa kokotelezwi Jesu ne si li bukaufi ni muleneñi; mi zibiso yeo ne i ñozwi mwa Siheberu, mwa Silatini, ni mwa Sigerike. 21 Kono baprisita ba bahulu ba Majuda ba kala ku bulelela Pilato, ba li: “U si ñoli kuli ‘Mulena wa Majuda,’ kono u ñole kuli yena naa ize, ‘Ki na Mulena wa Majuda.’” 22 Pilato a alaba, a li: “Se ni ñozi, ni ñozi.”

23 Cwale masole ha se ba kokotezi Jesu, ba nga liapalo za hae za fahalimu ni ku li alula mwa likalulo zee ne, kuli lisole ni lisole li be ni kalulo, mi hape ba nga ni siapalo sa mwahali. Kono siapalo sa mwahali sona ne si si na muluko, kakuli kaufelaa sona ne si lukilwe feela sina lisila li li liñwi. 24 Kiha ba bulelisana, ba li: “Lu si ke lwa si pazula, kono lu pose loto* kuli lu zibe kuli si ka ba sa mañi.” Ne ku ezahezi cwalo kuli ku talelezwe liñolo le li li: “Ba ikabezi liapalo za ka za fahalimu mwahalaa bona, mi siapalo sa ka ba si poselize loto.” Zeo ki zona ze ne ba ezize masole luli.

25 Kono bukaufi ni kota ya linyando ya Jesu, ne ku yemi mahe, munyanaa mahe wa musali, Maria musalaa Klopa, ni Maria Magdalena. 26 Hakulicwalo, Jesu ha bona mahe ni mulutiwa ya naa lata ba yemi bukaufi ni yena, a li ku mahe: “Musali, bona! Mwanaa hao ki yo!” 27 Kihona a li ku mulutiwa yo: “Bona! Maho ki yo!” Mi ku zwa yona nako yeo, mulutiwa yo a isa Maria kwa ndu ya hae.

28 Ha ku felile zeo, Jesu ha zibile kuli cwale lika kamukana ne se li petilwe, kuli liñolo li talelezwe, kihaa li: “Ni utwa linyolwa.” 29 Ne ku na ni piza ye tezi waine ye wawata hona fo. Kiha ba comeka siponji se si kusi waine ye wawata kwa tupa ya hisopa ni ku mu swalela sona kwa mulomo wa hae. 30 Cwale Jesu ha saa amuhezi waine ye wawata, a li: “Ku petahalile!” mi a inamisa toho ya hae, ni ku felelwa ki moya.

31 Cwale bakeñisa kuli ne li lizazi la Buitukiso,* mi kuli litupu li si ke za siyala fa kota ya linyando ka la Sabata, (kakuli lizazi la Sabata yeo, ne li le lituna,) Majuda ba kupa Pilato kuli a laele kuli mahutu a bona a lobakiwe mi litupu za bona li pahululwe. 32 Masole kiha ba taha ni ku to lobaka mahutu a wa pili ni a yo muñwi ya naa pahekilwe hamoho ni yena. 33 Kono ha ba fita ku Jesu, ka ku bona kuli na saa shwile kale, ne ba si ka lobaka mahutu a hae. 34 Niteñi yo muñwi wa masole a mu taba mwa lubaci ka lilumo, mi kapili-pili kwa suluha mali ni mezi. 35 Mi ya boni zeo u file bupaki, mi bupaki bwa hae ki bwa niti, mi mutu yo u ziba kuli za bulela ki za niti, ilikuli ni mina mu kone ku lumela. 36 Mane zeo ne li ezahezi kuli ku talelezwe liñolo le li li: “Ha ku na lisapo la hae le li ka lobiwa.” 37 Mi hape, liñolo le liñwi li li: “Ba ka talimela ku yena ye ne ba tabile.”

38 Cwale ha ku felile zeo, Josefa wa kwa Arimatea, ya naa li mulutiwa wa Jesu kono ili ka ku ipata kabakala ku saba Majuda kwa hae, a kupa Pilato kuli a mu lumeleze ku nga situpu sa Jesu; mi Pilato a mu lumeleza. Kamukwaocwalo a taha ni ku to nga situpu sa hae. 39 Nekudema, yena ya naa tile lwa pili ku Jesu busihu, ni yena a taha mi a tisa milyani ye zwakilwe ya mira ni aloe, ye ne bata ku eza lipondo ze mwanda.* 40 Kiha ba nga situpu sa Jesu mi ba si putela mwa masila a line hamoho ni milyani ye nunka hande, ku likana ni sizo se ne ba latelela Majuda ha ba itukiseza ku yo buluka. 41 Mi kanti bukaufi ni sibaka fa naa kokotelezwi ne ku na ni simu, mi mwa simu mo ne ku na ni libita le linca, mo ne ku si ka bulukwa kale mutu. 42 Bakeñisa kuli ne li Buitukiso bwa Majuda mi libita leo ne li li fakaufi, ba buluka Jesu mo.