Joani

18 Jesu ha saa bulezi litaba zeo, a ya ni balutiwa ba hae mwa buse bwa Musindi wa Kedroni mwa sibaka mo ne ku na ni simu, mi a kena mwateñi ni balutiwa ba hae. 2 Cwale Judasi, ya naa ka mu beteka, ni yena naa ziba sibaka seo, kakuli Jesu naa kopanezi mwateñi hañata ni balutiwa ba hae. 3 Kamukwaocwalo Judasi a nga sitopa sa masole ni mapolisa ba baprisita ba bahulu ni ba Bafalisi mi ba taha kwa sibaka seo ba lwezi maboni ni lilambi ni lilwaniso. 4 Cwale Jesu, ka ku ziba lika kaufela ze ne ka mu tahela, a ba sutelela mi a li ku bona: “Mu bata mañi?” 5 Ba mu alaba, ba li: “Jesu wa Munazareta.” A li ku bona: “Ki na yo.” Mi Judasi, ya naa mu beteka, ni yena naa yemi ni bona.

6 Kono a sino ba bulelela kuli: “Ki na yo,” ba kuta ngombemongo ni ku wela fafasi. 7 Kabakaleo a kutela ku ba buza, a li: “Mu bata mañi?” Ba li ku yena: “Jesu wa Munazareta.” 8 Jesu a ba alaba, a li: “Ni mi bulelezi kuli ki na yo. Cwale haiba ki na ye mu bata, mu tuhele ba, ba ikele.” 9 Fo ne li kuli ku talelezwe za naa bulezi ha naa ize: “Ku bo u ni file, ha ku na nihaiba a li muñwi ye ni latehezwi ki yena.”

10 Cwale Simoni Pitrosi, ya naa na ni mukwale, a u comola mi a lema mutangaa muprisita ya pahami ni ku wencula zebe ya hae ya kwa bulyo. Libizo la mutanga yo ne li Malko. 11 Kono Jesu a li ku Pitrosi: “Beya mukwale mwa sipusu sa ona. Kikuli ni si ke na nwa ni hanyinyani mwa komoki* ya ni file Ndate?”

12 Cwale masole ni muzamaisi wa mpi ya masole ni mapolisa ba Majuda kiha ba swala Jesu ni ku mu tama. 13 Ba mu isa pili ku Annasi; kakuli Annasi ne li mukwenyanaa Kayafa, ya naa li muprisita ya pahami silimo seo. 14 Kayafa mane ki yena ya naa elelize Majuda kuli se sinde ku bona kikuli mutu a li muñwi a shwele sicaba.

15 Cwale Simoni Pitrosi hamoho ni mulutiwa yo muñwi ne ba latelela Jesu mwamulaho. Mulutiwa yo naa zibwa ki muprisita ya pahami, mi a ya ni Jesu mwa patelo ye mwahalaa mandu a muprisita ya pahami, 16 kono Pitrosi naa yemi kwande, fa munyako. Kabakaleo mulutiwa yo, ya naa zibwa ki muprisita ya pahami, a zwela kwande ni ku yo ambola ni mulibeleli wa fa munyako mi a kenya Pitrosi mwahali. 17 Mi mutanga yo wa musizana ya naa libelela fa munyako kihaa li ku Pitrosi: “Kuli ni wena ha u yo muñwi wa balutiwa ba mutu yo?” Pitrosi a li: “Batili, ha ni yo muñwi wa bona.” 18 Cwale batanga ni mapolisa ne ba yemi fo. Ne ba tumbuzi mulilo wa mashala, kakuli ne ku batile, mi ne ba ola mulilo. Pitrosi ni yena naa yemi ni bona a nzaa ola mulilo.

19 Zeo ha li li cwalo, muprisita yo muhulu a buza Jesu za balutiwa ba hae ni za tuto ya hae. 20 Jesu a mu alaba, a li: “Ni bulezi patalaza kwa lifasi. Ne ni lutanga batu nako kaufela mwa sinagoge ni mwa tempele, mo ne ba to kopanelanga Majuda kaufela; mi ne ni si ka bulela se siñwi kwa mukunda. 21 U ni buzezañi? U buze ba ne ba utwile ze ne ni ba bulelela. Bao ba ziba ze ne ni bulezi.” 22 A sino bulela zeo, yo muñwi wa mapolisa ba ne ba yemi bukaufi a mu bakula mwa pata mi a li: “Ki mona mo u alabela muprisita yo muhulu cwalo?” 23 Jesu a mu alaba, a li: “Haiba ku na ni se ni fosize ku ze ni bulezi, ha ku fe bupaki; kono haiba ze ni bulezi li nepahezi, u ni natelañi?” 24 Annasi kihaa lumela Jesu ku Kayafa muprisita ya pahami, inzaa tamilwe.

25 Cwale Simoni Pitrosi naa yemi a nzaa ola mulilo. Kiha ba li ku yena: “Kuli ni wena ha u yo muñwi wa balutiwa ba hae wena?” Yena a latula, a li: “Batili, ha ni yo muñwi wa bona.” 26 Yo muñwi wa batanga ba muprisita ya pahami, ka ku ba wahabo mutu yani ya naa pumilwe zebe ki Pitrosi, a li: “Kikuli ne ni si ka ku bona mwa simu ni yena wena?” 27 Kono Pitrosi a latula hape, mi honafo, mukombwe wa lila.

28 Kiha ba zwisa Jesu ku Kayafa mi ba mu isa kwa ndu ya mubusisi. Cwale ne se li kakusasana. Kono Majuda bona ne ba si ka kena mwa ndu ya mubusisi, kuli ba si ke ba isilafaza mi ba kone ku ca Paseka. 29 Kabakaleo Pilato a zwela ku bona kwande, mi a li: “Mutu yo mu mu tama lifi?” 30 Ba mu alaba, ba li: “Kabe mutu yo haki sifosi, kabe ha lu si ka mu tisa ku wena.” 31 Pilato kihaa li ku bona: “Mu mu nge mina beñi mi mu yo mu atula ku likana ni mulao wa mina.” Majuda kiha ba li ku yena: “Mulao ha u lu lumelezi kuli lu bulaye mutu.” 32 Fo ne li kuli ku talelezwe manzwi a naa bulezi Jesu ha naa talusa mufuta wa lifu la naa tuha a shwa ka lona.

33 Pilato kihaa kutela mwa ndu ya mubusisi mi a biza Jesu ni ku mu buza kuli: “Kana ki wena Mulena wa Majuda?” 34 Jesu a alaba, a li: “Kana zeo u ipulelela zona feela, kamba ku na ni ba ba ku bulelezi za ka?” 35 Pilato a alaba, a li: “U li ni Mujuda nji? Sicaba sa henu ni baprisita ba bahulu ki bona ba ba ku tisize ku na. Kiñi so ezize?” 36 Jesu a alaba, a li: “Mubuso wa ka hasi wa lifasi le. Kabe mubuso wa ka ki wa lifasi le, kabe likombwa za ka li ni lwanezi kuli ni si ke na fiwa kwa Majuda. Kono cwale, sina mo ku inezi, Mubuso wa ka ha u zwi mwa lifasi le.” 37 Pilato kihaa li ku yena: “Hakulicwalohe, kana u Mulena?” Jesu a alaba, a li: “U bulezi wena muñi kuli ni Mulena. Kakuli se ni pepezwi, ni se ni tezi mwa lifasi, kikuli ni pake niti. Mutu kaufela ya kwa lineku la niti u teeleza kwa linzwi la ka.” 38 Pilato a li ku yena: “Niti ki ñi?”

Mi a sino bulela cwalo, a zwela hape kwande kwa Majuda, mi a li ku bona: “Ha ni fumani mulatu ku yena. 39 Mi mu na ni sizo sa kuli ni mi lukululele mutu ka lizazi la Paseka. Cwale kana mu bata kuli ni mi lukululele mulena wa Majuda?” 40 Kiha ba huwa hape ba li: “Isiñi yo, kono Barabasi!” Cwale Barabasi yo ne li sikebenga.