Makolose

3 Kono haiba ne mu zusizwe hamoho ni Kreste, mu zwelepili ku bata ze kwahalimu, ko Kreste a inzi ku la bulyo la Mulimu. 2 Mu ise minahano ya mina ku ze kwahalimu, isiñi ku ze mwa lifasi. 3 Kakuli ne mu shwile, mi bupilo bwa mina bu patilwe ni Kreste ku likana ni tato ya Mulimu. 4 Kreste, yena bupilo bwa luna, ha ka bonahala, fohe ni mina mu ka bonahala ni yena mwa kanya.

5 Hakulicwalo, mu bulaye lilama za mubili wa mina ze mwa lifasi kwa neku la buhule, masila, litakazo za buozwa, litakazo ze maswe, ni mukwañuli, ili nto ye talusa ku lapela milimu ya maswaniso. 6 Ki ka zona lika zeo buhali bwa Mulimu ha bu taha. 7 Ni mina ki mo ne mu zamaela mwa mupilelo wa mina wa kale. 8 Kono cwale mu lukela ku tuhela lika zeo kaufela, ili mabifi, buhali, bumaswe, lipulelo ze maswe, ni manzwi a swabisa mwa mulomo wa mina. 9 Mu si ke mwa pumana. Mu tubule butu bwa kale ni likezo za bona, 10 mi mu apale butu bo bunca, ili bo bu sweli ku uncafazwa ka zibo ye nepahezi ku likana ni siswaniso sa Yena ya naa bu bupile. 11 Fo, ha ku na Mugerike kamba Mujuda, ya keni mwa mupato kamba ya si ka kena mwa mupato, muzwahule, Mu-kwa-Sitia,* mutanga, kamba ya lukuluhile, kono Kreste ki linto kamukana mi u mwa linto kamukana.

12 Cwale, ka ku ba baketiwa ba Mulimu, ba ba kenile ni ba ba latwa, mu apale lilato ni mukekecima, sishemo, buikokobezo, bunolo, ni pilu-telele. 13 Mu zwelepili ku tuhelelana ni ku swalelana ka pilu kaufela mutu ni kwa na ni libaka la ku tongoka yo muñwi. Sina Jehova ha mi swalezi ka pilu kaufela, ni mina mu lukela ku eza cwalo. 14 Kono kwandaa zeo kaufela, mu zwelepili ku apala lilato, kakuli lilato ki tamo ye tamahanya batu ka ku petahala.

15 Hape, haike kozo ya Kreste i buse mwa lipilu za mina, kakuli mane ne mu bizelizwe kwa kozo yeo kuli mu be mubili u li muñwi. Mi mu bonise buitumelo. 16 Haike linzwi la Kreste li yahe ku mina ka butali kaufela. Mu zwelepili ku lutana yo muñwi ni yo muñwi ni ku susuezana ka lisamu, ka milumbeko ku Mulimu, ni ka lipina za kwa moya ze opelwa ka tabo, mu nze mu opelela Jehova mwa lipilu za mina. 17 Mi ze mu eza kaufela ka manzwi kamba ka likezo, kaufelaa zona mu li eze ka libizo la Mulena Jesu, mu nze mu itumela ka yena ku Mulimu yena Ndate.

18 Mina basali, mu ipeye kwatasaa baana ba mina, ka mo ku swanehela ku Mulena. 19 Mina baana, mu zwelepili ku lata basali ba mina mi mu si ke mwa ba ni buhali bo butuna ku bona. 20 Mina bana, mu utwe bashemi ba mina mwa lika kaufela, kakuli ku eza cwalo ki nto ye tabisa Mulena. 21 Mina bo ndate-bana, mu si ke mwa halifisa bana ba mina, kuli ba si ke ba nyefa. 22 Mina batanga, mu ipeye ku utwa mwa lika kaufela kwa malenaa mina ba butu, isiñi feela ha ba mi talimezi, inge kuli mu bata ku tabisa batu, kono ka pilu ye sepahala, mu eze cwalo ka ku saba Jehova. 23 Se mu eza kaufela, mu si eze ka moyo kaufela inge kuli mu ezeza Jehova, isiñi batu, 24 kakuli mwa ziba kuli ki ku Jehova ko mu ka amuhela saanda sina mupuzo. Mu sebeleze Mulena, yena Kreste. 25 Kaniti ya fosa u ka kutisezwa ka ku ya ka bufosi bwa naa ezize, mi ha ku na sishweka.