1 Timotea

6 Ba ba kwa coko ya butanga ba zwelepili ku talima malenaa bona kuli ba lukela ku kutekiwa ku feleleza, kuli libizo la Mulimu ni tuto ya hae li si ke za bulelwa maswe. 2 Hape batanga ba ba luwilwe ki malena ba ba li balumeli, ba si ke ba ba shwaula, kabakala kuli malenaa bona ki mizwale. Kono mane ba swanela ku ba sebeleza ka ku itatela, kakuli ba ba tusiwa ki musebezi wa bona o munde ki balumeli ni balatiwa ba bona.

U zwelepili ku luta litaba ze, ni ku fa likelezo ze. 3 Haiba mutu a luta tuto i sili, a sa yi ka litaelo za niti, ze zwa ku Mulenaa luna Jesu Kreste, ni ka tuto ye lumelelana ni busepahali bwa luna ku Mulimu, 4 ya cwalo u itundumuna ka buikuhumuso mi ha ku na sa utwisisa. U tabela hahulu likañi ni lipihisano za manzwi. Lika zeo li zwala muna, mikwangalakanyi, lipulelo ze maswe, ku hupulela ba bañwi bumaswe, 5 lifapahano ze sa feli mwa litaba ze nyinyani za batu ba ba silafezi mwa munahano ni ba ba si na niti, ka ku nahana kuli ku sepahala ku Mulimu kwa fumisa. 6 Ki niti, ku sepahala ku Mulimu kwa fumisa, haiba lu kolwa ka ze lu na ni zona. 7 Kakuli ha ku na se lu tisize mwa lifasi, mi ha lu koni ku lwala se siñwi ku zwa ku lona. 8 Hakulicwalo, ha lu na ni lico ni liapalo, lu ka kolwa ka lika zeo.

9 Kono ba ba tukufalezwi ku fuma ba wela mwa miliko ni mwa malaba ni litakazo ze ñata ze si na tuso ni ze holofaza, ze lwelisa batu mwa ku yo sinyeha ni ku yunda. 10 Kakuli lilato la masheleñi ki mubisi wa ze maswe za mufuta kaufela, mi ka ku ndongwama lilato leo ba bañwi ba keluhile mwa tumelo mi ba itabakile ka lika ze ñata ze utwisa butuku.

11 Kono wena, mutu wa Mulimu, u sabe kwa lika zeo. Kono u ndongwame ku luka, busepahali ku Mulimu, tumelo, lilato, buitiiso, ni bunolo mwa lika. 12 U lwane ndwa ye nde ya tumelo, u swale ka taata bupilo bo bu sa feli bo ne u bizelizwe ni bo ne u bulezi hande za bona fapilaa lipaki ze ñata.

13 Fapilaa Mulimu, ya bukeleza bupilo bwa ze pila kaufela, ni fapilaa Kreste Jesu, ili yo ka ku ba paki naa ipulelezi hande fapilaa Ponse Pilato, na ku laela 14 ni li, u mamele mulao ka mukwa o si na litiba ni se si nyazahala ku fitela fa ka bonahalela Mulenaa luna Jesu Kreste. 15 Ka nako ya teñi ye tomilwe, Ya Maata a nosi ni ya tabile, u ka bonahala, yena Mulena wa ba ba busa sina malena ni Mubusi wa ba ba busa sina babusi, 16 yena a nosi ya sa shwi, ya yahile mwa liseli le li sa sutelelwi, ye ku si na mutu ya kile a mu bona kamba ya kona ku mu bona. Ku yena ku be likute ni maata a sa feli. Amen.

17 U laele ba ba fumile mwa nako ya cwale kuli ba si ke ba ikutwisisa, ni kuli ba si ke ba beya sepo ya bona mwa bufumu bo bu sa swalehi, kono ba sepe Mulimu, ya lu fanga ka buñata linto kaufela ze lu tabela. 18 U ba bulelele kuli ba sebeze ze nde, ba fume mwa misebezi ye minde, ba be ni bufani, ba tabele ku ikabela ni ba bañwi, 19 mi kamukwawo ba ipulukele mutomo o munde wa za kwapili, ilikuli ba kone ku swala ka taata bupilo sakata.

20 Wena Timotea, u buluke se si beilwe mwa pabalelo ya hao, u pime lipulelo ze si na tuso ze silafaza lika ze kenile ni ku pima mihupulo ye lwanisana ya se ba tumana kuli ki “zibo.” 21 Ka ku iponahaza ku ba ni zibo ya mufuta wo, ba bañwi ba keluhile mwa tumelo.

Haike sishemo sa Mulimu si be ni mina.