Numere

35 Jehova hape abulelela Mushe mwa lihalaupa la mwa naha ya Moabi kwatuko ni Jordani,+ kwa Jeriko, ali: 2 “Ulaele Maisilaele kuli kwa saanda sebaka luwa, bafe kwateñi Malivi mileneñi yebaka yaha ku yona,+ mi baswanela kufa Malivi mafulisezo apotolohile mileneñi yeo.+ 3 Bakayaha mwa mileneñi yeo, mi mafulisezo ao akaba a limunanu zabona, lika zabona, ni lifolofolo zabona zeñwi kaufela. 4 Mafulisezo a mileneñi yeo, emuka fa Malivi, akaeza liñokolwa* ze 1,000 kuzwa kwa limota la muleneñi, mi akapotoloha muleneñi kaufela. 5 Mukalikanyeza liñokolwa ze 2,000 kwande a muleneñi kwa neku la upa, ze 2,000 kwa neku la mboela, ze 2,000 kwa neku la wiko, ni ze 2,000 kwa neku la mutulo, mi muleneñi ukabeiwa mwahali. Ao ki ona akaba mafulisezo a mileneñi yabona.

6 “Mukafa Malivi mileneñi ye 6 kuli ibe mileneñi ya masabelo,+ muka bafa yona kuli mutu yabulaile yomuñwi asabele kwateñi,+ mi muka bafa ni mileneñi yemiñwi ye 42. 7 Palo hamoho ya mileneñi yemuka fa Malivi ikaba 48, kukopanyeleza cwalo ni mafulisezo ayona.+ 8 Mileneñi yemuka bafa, muka izwisa kwa saanda sa Maisilaele.+ Kwa sikwata sesituna mukaanga kwateñi mileneñi yemiñata, mi kwa sikwata sesinyinyani mukaanga kwateñi mileneñi yeminyinyani.+ Sikwata ni sikwata sikafa yemiñwi ya mileneñi yasona kwa Malivi, kulikana ni saanda sesifilwe kwa sikwata seo.”

9 Jehova azwelapili kubulelela Mushe, ali: 10 “Bulelela Maisilaele mi ubataluseze, uli: ‘Mukasila Jordani ni kukena mwa naha ya Kanana.+ 11 Muswanela kuketa mileneñi yeli bukaufi kuli ibe mileneñi ya masabelo, kwakasabela mutu yabulaya yomuñwi* ka kusalela.+ 12 Mileneñi yeo ikaba masabelo amina kwakasabela mutu yasaba mulifisi wa mali,*+ kuli mutu yabulaile yomuñwi yo asike ashwa kufitela aatulwa fapilaa sicaba.+ 13 Mileneñi ya masabelo ye 6 yemuketa ikapeta mulelo wo. 14 Mukaketa mileneñi yemilaalu mwabuse bwa kwanu bwa Jordani+ ni mileneñi yemilaalu mwa naha ya Kanana+ kuli ibe mileneñi ya masabelo. 15 Mileneñi ye 6 yeo ikaba mileneñi ya masabelo a Maisilaele, a muzwahule,+ ni a mutu yatilo yaha mwahalaa bona, kuli mutu yabulaya yomuñwi* ka kusalela asabele ku yona.+

16 “‘Kono haiba naamunatile ka sipi mi ashwa, mutu yo ki mubulai. Mubulai yo uswanela kubulaiwa luli.+ 17 Mi haiba naamunatile ka licwe lelikona kubulaya mutu, mi ashwa, mutu yo ki mubulai. Mubulai yo uswanela kubulaiwa luli. 18 Mi haiba naamunatile ka kota yekona kubulaya mutu, mi ashwa, mutu yo ki mubulai. Mubulai yo uswanela kubulaiwa luli.

19 “‘Mulifisi wa mali ki yena yaswanela kubulaya mubulai yo. Haka mufumana, uka mubulaya. 20 Haiba mutu ashwa bakeñisa kuli mubulai umukashize kabakala kumutoya kamba umuposize nto yeñwi ka mulelo wa kumueza maswe,*+ 21 kamba umunatile ka lizoho lahae kabakala kumutoya, mi ashwa, yamunatile yo uswanela kubulaiwa luli. Ki mubulai. Mulifisi wa mali ukabulaya mubulai yo haka mufumana.

22 “‘Kono haiba naamukashize ka kusalela, mi isi kabakala kuli umutoile, kamba naamuposize nto yeñwi isi ka mulelo wa kumueza maswe,*+ 23 kamba haiba naasika mubona mi amuwiseza licwe, mi naasi mutu yali sila sahae kamba yanaabata kumuholofaza, mi mutu yo ashwa, 24 fohe kopano iswanela kuatula mwahalaa mutu yo yamunatile ni mulifisi wa mali, kulikana ni likatulo ze.+ 25 Mi cwale kopano iswanela kulamulela mutu yabulaile yomuñwi yo ku mulifisi wa mali ni kumukutisa kwa muleneñi wa masabelo kwa naasabezi, mi ulukela kupila mwa muleneñi wo kufitela lifu la muprisita yapahami yanaatozizwe ka oli yekenile.+

26 “‘Kono haiba mutu yabulaile yomuñwi yo atula mululwani wa muleneñi wa masabelo kwa sabezi, 27 mi mulifisi wa mali amufumana kwande a mululwani wa muleneñi wa masabelo kwa sabezi mi amubulaya, mulifisi wa mali yo hana mulatu wa mali. 28 Kakuli ulukela kuina mwa muleneñi wa masabelo kufitela muprisita yapahami ashwa. Kono muprisita yapahami hasashwile, mutu yo yabulaile yomuñwi wakona kukutela kwa naha yahabo.+ 29 Yeo ikaba yona milao yemuka latelela hamuatula, mwa masika amina kaufela ni mwa libaka momuyahile kaufela.

30 “‘Mutu kaufela yabulaya yomuñwi uswanela kubulaiwa ka mulatu wa bubulai,+ hakunani* lipaki;+ kono mutu haana kubulaiwa ka bupaki bwa mutu alimuñwi feela. 31 Musike mwaamuhela tifo ya kuliulula bupilo* bwa mubulai ya lukela kubulaiwa, kakuli uswanela kubulaiwa luli.+ 32 Mi musike mwaamuhela tifo ya kuliulula mutu yasabezi kwa muleneñi wa masabelo, kumulumeleza kuyo yaha hape mwa naha yahabo, muprisita yapahami asika shwa kale.

33 “‘Musike mwasilafaza naha yemupila ku yona kakuli mali asilafaza naha,+ mi naha haina kuswalelwa kabakala mali asuluzwi, konji hakuka sululwa mali a mutu yaasuluzi.+ 34 Musike mwasilafaza naha yemupila ku yona, mona moniyahile; kakuli na Jehova, niyahile mwahalaa sicaba sa Isilaele.’”+