Muekelesia

10 Sina linzi zeshwile halitahisa kuli oli ya mulukisi wa minunkiso isinyehe mi inunke, ni bukuba bobunyinyani businya butali ni likute.+

2 Pilu ya mutu yabutali imulibisa mwa nzila yelukile,* kono pilu ya sitoto isilibisa mwa nzila yefosahalile.*+ 3 Mwa nzila kaufela mosizamaya sikuba, sibonisa kuli hasina ngana,*+ mi sitahisa kuli batu kaufela bazibe kuli ki sikuba.+

4 Haiba buhali* bwa mubusi bukutukela, usike wazwa mwa sibaka sahao,+ kakuli kukuza kuombalisa libi zetuna.+

5 Kunani taba yeziyeza yeniboni mwatasaa lizazi, ona mafosisa aezwa ki bababusa:+ 6 Likuba libeilwe mwa libaka zeñata zepahami, kono babafumile* basiyala mwa libaka za kwatasi.

7 Niboni batanga inze bapahami lipizi kono manduna inze bazamaya ka mahutu sina batanga.+

8 Yayepa mukoti ukona kuwela mwateñi;+ mi yapunya limota la macwe ukona kulumiwa ki noha.

9 Yakata macwe ukona kuholofazwa ki ona, mi yapazula likota, likota zeo likona kumutahiseza kozi.*

10 Haiba sisebeliso sa sipi sinani buzwa mi mutu haasishemuni, ukatokwa kuitusisa hahulu maata. Kono butali butusa mutu kukondisa.

11 Noha hailuma isika ambelelwa kale, muambeleli yacuukile* haasatusa sesiñwi.

12 Manzwi aazwa mwa mulomo wa yabutali amushemubisa,+ kono milomo ya sitoto ika sitahiseza kozi.+ 13 Manzwi a makalelo aazwa mwa mulomo wasona ki a bukuba,+ mi manzwi asona a mafelelezo ki a bupulumuki bobuziyeza. 14 Kono sikuba sizwelapili kubulela.+

Mutu hazibi zekaezahala; ki mañi yaka mubulelela zekaezahala mwamulaho wahae?+

15 Kusebeza ka taata kwa mutu wa sitoto kwamukatalisa, kakuli hazibi nihaiba mwakuyela kwa muleneñi.

16 Naha yaziyeleha haibusiwa ki mulena yali mushimani,+ ni manduna habakala mikiti yabona kakusasana! 17 Kono naha yataba haiba mulena yabusa ki mwana wa babakutekeha, ni manduna habaca ka nako yeswanela kuli babe ni maata, isiñi kuli bakolwe!+

18 Mutu hanani buzwa hahulu, situwa siwela mwahali, mi mazoho ahae haitepeleza, ndu yanela.+

19 Sinkwa* sitahisa kuli mutu asehe, mi waine itahisa kuli bupilo butabise;+ kono masheleñi amufumanisa nto kaufela yatokwa.+

20 Nihaiba mwa mihupulo yahao,* usike wakuta* mulena,+ mi usike wakuta bafumi hauli mwa musiyo wahao; kakuli nyunywani* ikasuhana yafitisa mulumo* wo, kamba sibupiwa sesinani mafufa sikasuhana sakutela kubulela litaba zenebulezwi.