Kwa Maheberu

1 Kwakale Mulimu naabulezi ku bo kuku waluna hañata ni ka kuitusisa linzila zeñata ka bapolofita.+ 2 Cwale kwa mafelelezo a mazazi a, ubulezi ku luna ka Mwana,+ yanaaketile kuba shwana wa lika kaufela,+ ni yo ka yena naaezize lika ze mwa lihalimu ni fa lifasi.+ 3 Ki yena yabonahaza kanya ya Mulimu+ mi ki siswaniso luli sa seo Mulimu ali sona,+ mi utamahanya lika kaufela ka linzwi la maata ahae. Mi hasakenisize libi zaluna,+ aina ku la bulyo la Bulena kwa lihalimu.+ 4 Ka mukwa ocwalo, ufetuhile yamaata kufita mangeloi,+ kuli mane uyolisizwe libizo lelikutekeha hahulu kufita mabizo aona.+

5 Ka mutala, ki lifi kwa mangeloi lakile abulelela Mulimu kuli: “Ki wena mwanaka; kacenu nibile ndataho”?+ Ni kuli: “Nikaba ndatahe, mi yena ukaba mwanaka”?+ 6 Kono hape hatisa Mweli wahae+ mwa lifasi, uli: “Mi mangeloi a Mulimu kamukana amukubamele.”

7 Hape ubulela ka za mangeloi, uli: “Ueza mangeloi ahae kuba mioya, ni likombwa*+ zahae kuba lulimi lwa mulilo.”+ 8 Kono ka za Mwana, uli: “Mulimu ki lubona lwahao+ kamita ni kuya kuile, mi mulamu wa bulena wa Mubuso wahao ki mulamu wa kuluka.* 9 Neulatile kuluka, mi neutoile bumaswe. Ki lona libaka Mulimu, yena Mulimu wahao, hanaa kutozize+ ka oli ni kukufa tabo yetuna kufita balikani bahao.”+ 10 Mi uli: “Kwa makalelo, wena Mulena, neutomile mitomo ya lifasi, mi mahalimu ki musebezi wa mazoho ahao. 11 Likayunda, kono wena ukaba teñi; mi sina siapalo, kaufelaa zona likafela, 12 mi uka liputa sina kubo, sina siapalo, mi likacinciwa. Kono wena haucinci, mi lilimo zahao halina kufela.”+

13 Kono ki lifi kwa mangeloi lakile abulelela kuli: “Ina kwa lizoho laka la bulyo, kufitela nibeya lila zahao sina sipula foahata mahutu ahao”?+ 14 Kana kaufelaa ona haki mioya yeeza sebelezo yekenile,*+ yelumilwe kusebeleza babaka amuhela puluso?