Lisamu

37 Usike wafilikana kabakala batu babamaswe

Kamba kushwela muna babaeza zemaswe.+

 2 Bakaletuka kapili-pili sina bucwañi+

Mi bakanyana sina bucwañi bobunca bobutala.

 3 Usepe Jehova mi ueze zende;+

Uine mwa lifasi,* mi ueze ka busepahali.+

 4 Utabe hahulu* kabakala Jehova,

Mi uka kufa zeilakaza pilu yahao.

 5 Ufe Jehova nzila yahao;+

Uitinge ku yena, mi uka kutusa.+

 6 Ukabenyisa kuluka kwahao sina mokubenyezanga halipazula,

Ni katulo yahao yelukile sina molibenyezanga lizazi fahalaa musihali.

 7 Uikuzeze fapilaa Jehova+

Mi umulibelele ka pilu-telele.

Usike wafilikana kabakala mutu

Yakondisa milelo yahae yemaswe.+

 8 Lisela buhali mi utuhele mabifi;+

Usike wafilikana ni kukala kueza zemaswe.*

 9 Kakuli babaeza zemaswe bakayundiswa,+

Kono babasepile Jehova bakaluwa lifasi.+

10 Kusiyezi feela nakonyana, mi babamaswe habasana kubateñi;+

Ukatalima fone bainzi,

Kono habana kufumaneha fateñi.+

11 Kono babaishuwa bakaluwa lifasi,+

Mi bakataba hahulu kabakala kozo yetuna.+

12 Mutu yamaswe ulela kueza maswe yalukile;+

Umukweceza meeno.

13 Kono Jehova uka museha,

Kakuli waziba kuli lizazi la mutu yo likataha.+

14 Babamaswe bacomola mikwale yabona ni kuhoha buta bwabona

Kuli bawise babanyandile ni babotana,

Kuli babulaye babanani niti.

15 Kono mikwale yabona ikataba bona beñi kwa lipilu;+

Buta bwabona bukalobeha.

16 Zenyinyani zaluwile mutu yalukile

Lifita zeñata zebaluwile batu babamaswe babañata.+

17 Kakuli mazoho a babamaswe akalobeha,

Kono Jehova ukatiisa babalukile.

18 Jehova waziba zebakopana ni zona babasa nyazahali,*

Mi saanda sabona sika ina kuya kuile.+

19 Habana kuswaba ka nako ya kozi;

Bakaba ni lico zeñata ka nako ya lukupwe.

20 Kono babamaswe bakashwa;+

Lila za Jehova likafela sina mafulisezo amande;

Likafela sina musi.

21 Yamaswe wakolota kono hakutisi,

Kono yalukile unani sishemo* mi wafana.+

22 Babafuyozwi ki Yena bakaluwa lifasi,

Kono babakutilwe ki Yena bakayundiswa.+

23 Jehova uetelela* mihato ya mutu,+

Haatabela nzila ya mutu yo.+

24 Nihaka wa, haana kuwa muwelela fafasi,+

Kakuli Jehova umuswalelezi kwa lizoho.*+

25 Nikile naba mwanana kono cwale nihulile,

Kono hanisika bona kale mutu yalukile hayubekwa,+

Kamba kubona bana bahae habaikupela sico.*+

26 Kamita ukolotisa babañwi asabati kekelezo,+

Mi bana bahae bakafiwa mbuyoti.

27 Utuhele kueza zemaswe mi ueze zende,+

Mi ukapila kuya kuile.

28 Kakuli Jehova ulata katulo yelukile,+

Mi haana kuyubeka babasepahala bahae.

Bakasilelezwa kamita;+

Kono bana ba babamaswe bakayundiswa.+

29 Babalukile bakaluwa lifasi,+

Mi bakapila ku lona kuya kuile.+

30 Mulomo wa mutu yalukile ubulela manzwi a butali,

Mi lulimi lwahae lubulela za katulo yelukile.+

31 Mulao wa Mulimu wahae u mwa pilu yahae;+

Mahutu ahae haana kusitatala.+

32 Yamaswe ulisa ka meeto mutu yalukile,

Kuli amubulaye.

33 Kono Jehova haana kumufa mwa lizoho la mutu yamaswe yo+

Kamba kumufumana ni mulatu haaka atulwa.+

34 Usepe Jehova mi ulatelele nzila yahae,

Mi uka kupahamisa kuli uluwe lifasi.

35 Niboni mutu yanani lunya, yamaswe

Haahula sina kota ya matali amañata yecezwi mwa mubu wayona.+

36 Kono atimela ka sipundumukela mi abasiyo;+

Namubata-bata kono napalelwa kumufumana.+

37 Ulemuhe mutu yasanyazahali,*

Mi utalime mutu yanani niti,+

Kakuli mutu yo ukaba mwa kozo kwapili.+

38 Kono babatula mulao kaufela bakayundiswa;

Babamaswe bakatimezwa.+

39 Kupiliswa kwa babalukile kuzwa ku Jehova;+

Ki yena musilelezi wabona mwa nako ya ziyezi.+

Uka balamulela ku babamaswe mi uka bapilisa,

Kakuli basabela ku yena.+