Moluswalisanezi Kueza Tato ya Jehova

MWA lifasi kaufela, kunani likopano zeñata za bulapeli, za bupolitiki, za lipisinisi, ni likopano zetusa batu, ili zenani misebezi, milelo, mibonelo, ni lituto zeshutana-shutana. Kono kunani kopano iliñwi yeshutana hahulu ni likopano zeñwi kaufela. Linzwi la Mulimu libonisa hande kuli kopano yeo ki kopano ya Lipaki za Jehova.

² Kwatabisa kuziba kuli mukalile kuswalisana ni kopano ya Jehova. Mi bakeñisa kuli mulemuhile tato ya Mulimu, semueza tato yahae. (Samu 143:10; Maro. 12:2) Mu sikombwa yatukufalezwi, yasebelisana ni mizwale babalilato ba mwa lifasi kaufela. (2 Makor. 6:4; 1 Pit. 2:17; 5:9) Sina molisepiseza Linzwi la Mulimu, zemueza limitahiseza limbuyoti zeñata ni tabo yetuna. (Liprov. 10:22; Mare. 10:30) Hamueza tato ya Jehova ka busepahali cwale, muitukiseza nako yende ya kwapili, ya kuya kuile.—1 Tim. 6:18, 19; 1 Joa. 2:17.

³ Mubupi waluna Yomutuna unani kopano yeipitezi ya mwa lifasi kaufela ye mwatasaa puso yahae. Taba ye italusa kuli kopano yeo izamaiswa ki Jehova, yena Toho wa lika kaufela. Lumusepile ka kutala. Ki yena Muatuli waluna, Mutomi wa Mulao waluna, ni Mulenaa luna. (Isa. 33:22) Ka kuba Mulimu yaeza lika ka swanelo, uonga-ongile hande lika zeelutusa ‘kusebeza hamoho ni yena’ halunze lueza tato yahae.—2 Makor. 6:1, 2.

⁴ Mafelelezo a lifasi la cwale hanzaa atumela, luzwelapili kuetelelwa ki Mulena yaketilwe, yena Kreste Jesu. (Isa. 55:4; Sin. 6:2; 11:15) Jesu naapolofitile kuli balateleli bahae nebaka eza misebezi yemituna kufita yanaaezize yena mwa bukombwa bwahae bwa fa lifasi. (Joa. 14:12) Nekukaba cwalo kakuli balateleli ba Jesu nebaka kutaleza mwa likalulo zeñata ka nako yetelele mi palo yabona neika ekezeha. Nebaka shaela taba yende ya Mubuso kuyo fita kwa mafelelezo a lifasi.—Mat. 24:14; 28:19, 20; Lik. 1:8.

⁵ Taba yeo isweli yaezahala luli. Nihakulicwalo, Jesu naabonisize hande kuli musebezi wa kushaela taba yende ukafela ka nako yetomilwe ki Jehova. Bupolofita bobu mwa Linzwi la Mulimu bubonisa kuli lizazi lelituna la Jehova lelisabisa li fakaufi.—Joe. 2:31; Zef. 1:14-18; 2:2, 3; 1 Pit. 4:7.

⁶ Halunze lulemuha tato ya Jehova mwa nako ye ya mafelelezo, lutokwa kuikataza hahulu kueza zatokwa Mulimu. Kuli lueze cwalo, lutokwa kuziba hande moisebeleza kopano ya Mulimu ni kuswalisana ni yona ka kutala. Zeezwa mwa kopano ye litomile fa likuka za mwa Mañolo, kukopanyeleza cwalo ni litaelo, milao, ni lituto ze mwa Linzwi la Mulimu leliñozwi ka kususumezwa ki moya wahae.—Samu 19:7-9.

⁷ Batu ba Jehova habalatelela ketelelo ya mwa Bibele yeo, bapila ni kusebeza hamoho ka kozo ni buñwi. (Samu 133:1; Isa. 60:17; Maro. 14:19) Ki sika mañi sesitahisa kuli mizwale mwa lifasi kaufela baswalisane hahulu? Ki lilato. Lususuezwa ki lilato, lona leluapezi. (Joa. 13:34, 35; Makolo. 3:14) Lufuyaulwa ki Mulimu halunze lueza cwalo, mi luzamaelela hamoho ni kalulo ya kwa lihalimu ya kopano ya Jehova.

⁸ Bapolofita babacwale ka Isaya, Ezekiele, ni Daniele, nebaiponezi lipono za kalulo ya kwa lihalimu ya kopano ya Jehova. (Isa., kauha. 6; Ezek., kauha. 1; Dan. 7:9, 10) Muapositola Joani ni yena naaboni pono ya kalulo ya kwa lihalimu ya kopano ya Jehova, mi ulutaluseza hanyinyani ka za teñi mwa buka ya Sinulo. Naaboni Jehova ainzi mwa lubona lolutezi kanya inze apotolohilwe ki mangeloi aashaela kuli: “Ki yakenile, ki yakenile, ki yakenile Jehova Mulimu, Yamaata Kaufela, yena yanaali teñi ni yaliteñi ni yataha.” (Sin. 4:8) Joani hape naaboni kuli “mwahalaa lubona” nekuyemi “ngunyana,” yena Ngunyana wa Mulimu, Jesu Kreste.—Sin. 5:6, 13, 14; Joa. 1:29.

⁹ Pono yeo yebonisa Jehova inze ainzi mwa lubona ibonisa kuli ki yena Toho, kamba yena yazamaisa kopano ye. Liñolo la 1 Makolonika 29:11, 12 libulela cwana ka za butuna bwahae: “Butuna ni maata ni bunde ni kanya ni bulena ki zahao, wena Jehova, kakuli lika kaufela mwa mahalimu ni mwa lifasi ki zahao. Mubuso ki wahao, wena Jehova. Ki wena yaipahamisa kuba toho ya batu kaufela. Bufumu ni kanya lizwa ku wena, mi ubusa lika kaufela, mi maata a mwa lizoho lahao, mi lizoho lahao lakona kupahamisa mutu ni kutiisa batu kaufela.”

¹⁰ Bakeñisa kuli Jesu Kreste usebeza hamoho ni Jehova, unani mayemo apahami mwa lihalimu mi ufilwe maata amatuna. Kaniti, Mulimu “naabeile lika kaufela kwatasaa mahutu ahae mi amufa kuli abe yena toho fahalimwaa lika kaufela mwa puteho.” (Maef. 1:22) Muapositola Paulusi naabulezi ka za Jesu kuli: “Mulimu amupahamisa hahulu nikufita mi ka sishemo amufa libizo lelifita mabizo amañwi kaufela, kuli ka libizo la Jesu mañwele kaufela akubame—a baba mwa lihalimu ni baba mwa lifasi ni baba mwatasaa lifasi—mi malimi kaufela abulele patalaza kuli Jesu Kreste ki Mulena ilikuli Mulimu Ndate akanyiswe.” (Mafil. 2:9-11) Kacwalo, lwakona kusepa kuli ketelelo ya Jesu Kreste ilukile.

¹¹ Mupolofita Daniele mwa pono naaboni Yomuhulu wa Mazazi ainzi mwa lubona lwahae kwa lihalimu, mi mangeloi aeza “likiti-kiti [naazwelapili] kumusebeleza, mi [aeza] likiti zemashumi halitaimiswa ka likiti zemashumi [naayemi] fapilaa hae.” (Dan. 7:10) Bibele italusa mpi ya mangeloi yeo kuli ki “mioya yeeza sebelezo yekenile, yelumilwe kusebeleza babaka amuhela puluso.” (Maheb. 1:14) Libupiwa za moya zeo kaufela libeilwe mwa ‘mabona, bulena, mibuso, ni maata.’—Makolo. 1:16.

¹² Halunahanisisa litaba zeo zetalusa kalulo ya kwa lihalimu ya kopano ya Jehova, lwakona kuutwisisa mwanaaikutwezi Isaya hanaaboni pono, ili mo naaboni “Jehova ainzi mwa lubona lolupahami hahulu,” ni “liserafimi [zeneyemi] fahalimwaa hae.” Isaya naaize: “Ninani bumai! Nishwile, kakuli ni mutu wa milomo yesika kena, mi nipila mwahalaa batu ba milomo yesika kena; kakuli meeto aka aboni Mulena, yena Jehova wa limpi!” Kaniti luli, Isaya naakakamalile ni kukokobezwa hanaaboni butuna bwa kopano ya Jehova. Pono yeo nei mutiisize hahulu kuli mane hanaautwile linzwi lelizwa kwa lihalimu la kukupa mutu yanaaka itakaleza kueza musebezi oipitezi wa kushaela likatulo za Jehova, Isaya naaize: “Ki na yo! Haku nilume!”—Isa. 6:1-5, 8.

¹³ Kuziba kopano ya Jehova ni kuitebuha moisebeleza, kutusa batu bahae kubonisa moya oswana. Kopano hainze izwelapili, lulika ka molukonela kaufela kuzamaelela ni yona. Lulika ka taata kubonisa kuli lusepile kopano ya Jehova kacenu.

¹⁴ Mwa kauhanyo 1 ya bupolofita bwa Ezekiele, Jehova ubonwa mwa pono sina muzamaisi wa koloi yetuna hahulu ya kwa lihalimu. Koloi yekanya yeo iswaniseza kalulo yesabonahali ya kopano ya Jehova. Mulimu uzamaisa koloi yeo ka lilato mi uitusisa yona ka kuya ka mulelo wahae.—Samu 103:20.

¹⁵ Liwili ni liwili la koloi yeo nelinani liwili mwahali—liwili leo nelifita fahalaa liwili leliñwi mi mawili ao naalikanelela kwa butuna. Ki lona libaka mawili ao haakona “kuya kwa lineku lifi kamba lifi mwa maneku kaufela amane.” (Ezek. 1:17) Mawili ao akona kufetuha ka bubebe. Nihakulicwalo, koloi yeo haizamai feela kusina ketelelo yebutali. Jehova haatuheleli kopano yahae kuikela kai ni kai koibata kuya kaufela. Ezekiele 1:20 ili: “Neliliba kone ulilibisa moya.” Kacwalo, ki Jehova yaetelela kopano yahae, kuilibisa kai ni kai ka moya wahae. Puzo yeluswanela kuipuza ki ya kuli, ‘Kana nazamaelela ni yona?’

¹⁶ Kuzamaelela ni kopano ya Jehova hakutalusi feela kufumanehanga kwa mikopano ni kuyanga mwa bukombwa bwa mwa simu. Kuzamaelela ni kopano sihulu kuama kueza zwelopili ya kwa moya. Lutokwa “kulemuha lika za butokwa hahulu nikufita” ni kuzamaelela ni lituto zenca zeelutusa kwa moya. (Mafil. 1:10; 4:8, 9; Joa. 17:3) Hape luswanela kuhupula kuli, kuli kube ni swalisano, lika liswanela kuzamaiswa hande mi batu baswanela kusebeza hamoho. Kacwalo, lulukela kulemuha butokwa bwa kuitusisa hande lika za kwa moya ni za kwa mubili zalufile Jehova kuli lupete musebezi wahae. Halunze luzamaelela ni koloi ya Jehova ya kwa lihalimu, lubonisa kuli lupila ka kulumelelana ni lushango lolukutaza.

¹⁷ Ka tuso ya kopano ya Jehova, luzwelapili kueza tato ya Mulimu. Muhupule kuli Muzamaisi wa koloi ye ya kwa lihalimu ki Jehova. Kacwalo, kuzamaelela ni koloi yahae kubonisa kuli lwakuteka Jehova mi lumusepile ka kuba yena Licwe laluna. (Samu 18:31) Bibele isepisa kuli: “Jehova ukafa batu bahae maata. Jehova ukafuyola batu bahae ka kubafa kozo.” (Samu 29:11) Ka kuba mwa kopano ya Jehova kacenu, kaufelaa luna lutusiwa ki yena mi luikola kozo yafa kwa batu bahae babaswalisani. Kaniti luli, lukazwelapili kufuyolwa hahulu halunze lueza tato ya Jehova cwale ni kuya kuile.