Jesu Kreste Mwan’a Mulimu Ya Latiwa

“Mi kwa utwahala linzwi le li zwa kwa lihalimu, le li li: ‘Yo ki Mwan’a ka ya latiwa, ye ni katelwa.’”—MATEU 3:17.

 1, 2. (a) Ki tuto ifi ye bunolo yeo Bibele i luta ka za Mulimu ya m’ata ote ni Jesu Kreste? (b) Ki sifi seo bulapeli bwa Krestendomu bu si luta?

JESU KRESTE ha n’a li wa lilimo ze 30 n’a kolobelizwe ka ku nweliswa mwa mezi. Ha n’a zwile mwa mezi, linzwi le ne li zwa kwa lihalimu la li: “Yo ki Mwan’a ka ya latiwa, ye ni katelwa.” (Mateu 3:17) Linzwi leo ne li linzwi la Mulimu. Muta o muñwi, mwa tapelo ku Mulimu, Jesu n’a bulezi kuli: “Ndate, u lumbe libizo la hao.” Mi Jesu ha s’a bulezi seo, “linzwi [la Mulimu] le li zwa kwa lihalimu, [la] li: ‘Ni se ni li lumbile, mi ni ka li lumba hape.’”—Joani 12:28.

² Ku zwelela ku zona litaba ze, nihaiba mwanana w’a kona ku utwisisa kuli swalisano ye mwahal’a Mulimu ya m’ata ote ni Jesu Kreste ne li ya ndate ni mwan’a hae ya latiwa, batu ba babeli ba ba fapahana. Niteñi, yona niti ye fa nalela ye i haniwa ki bulapeli bwa Krestendomu. Ba tundamena kuli Jesu Kreste ki yena ka sibili Mulimu Ya M’ata Ote, yena mutu wa bubeli wa Silalu, mi mutu wa bulalu ki moya o kenile.

 3. Ku lyangana ka za tuto ya Silalu ku bonisizwe kamukwaufi?

³ Tuto yeo i se i tisize ku lyangana ko ku tuna mwahal’a batu ba bulapeli bwa Krestendomu, ili le li ñwi la mabaka New Catholic Encyclopedia ha i biza Silalu kuli ki kunutu. Ee luli, i tahisa ku lyangana nihaiba mwahal’a bahulu ba bulapeli, kakuli yona encyclopedia yeo hape i talusa kuli: “Ku na ni baluti ba sikai fela ba tuto ya bulapeli ya Silalu mwa likolo za bulapeli za Roma Katolika ba ba si ka nyemiswa ka nako ye ñwi kamba linako ze ñwi ki puzo, ‘Kono mutu u kutaza cwañi ka za Silalu?’ Mi haiba puzo ki ye bonisa ku lyangana kwa neku la baituti, mwendi ki ye bonisa ku lyangana ko ku si ko ku nyinyani kwa neku la bocaziba ba bona.”

 4. Ki ifi tuto ya likeleke ya ka mulao ka ku ama fa Silalu?

⁴ Yona tuto yeo ye lyanganisa ki mutomo wa tumelo ya bulapeli bwa Katolika ni bwa Protesitanti. The Catholic Encyclopedia i talusa kuli: “Silalu ki pulelo ye itusiswa ili ku bonisa tuto fo ku tomile tumelo ya bulapeli bwa Sikreste . . . Kacwalo, mwa manzwi a Katulo ya Athanasius: ‘Ndate ki Mulimu, Mwana ki Mulimu, ni Moya o Kenile ki Mulimu, mi niteñi haki Milimu ye milalu kono ki Mulimu a li muñwi.’” Ka ku swana, mwa taba ya mwa kuta ye ne i ama Lipaki za Jehova mwa Greece, Keleke ya Greek Orthodox ne i bulezi kuli: “Tuto fo ku tomile tumelo ya Sikreste, ili yeo Bakreste kaufela ba i lumela . . . ku si na taba ni sikwata sa bulapeli kamba tuto, ki . . . Silalu, kuli Mulimu ki A Li Muñwi mwa batu ba balalu.” Keleke ya Greek Orthodox hape ne i talusize kuli: “Bakreste ki bao ba ba amuhela Kreste sina Mulimu.” Ya talusa kuli bao ba ba sa amuheli Silalu haki Bakreste kono ki balwanisi ba tumelo.

 5, 6. Ki kabakalañi ha ku li kwa butokwa ku ziba niti ka za taba ye?

⁵ Niteñi, haiba yona “tuto fo ku tomile tumelo” yeo ya Silalu ya Krestendomu haki y’a niti, haiba ki ya lishano, kacwalohe nto ye fapahana ni seo ki yona ye ka ba teñi. Bakreste ba niti ne ba ka i hana. Bao ba ba kwenuhile ka ku zwa kwa Bukreste ne ba ka i ndondwela. Ki sifi se si ka kutulwa ki sikwata seo sa mafelelezo? Mwa buka ya mafelelezo ya Bibele, “sinulo ya Jesu Kreste, y’a mu file Mulimu,” ka ku ama ku bao ba ba si ke ba fiwa bupilo bo bu sa feli mwa Mubuso wa Mulimu lu bala kuli: “Kono kwa nde ku ka siyala linja, ni baloi, ni mahule, ni babulai, ni ba ba lapela milimu, ni ba ba lata lishano kaufela, ni ba ba li eza.”—Sinulo 1:1; 22:15.

⁶ Bakeñisa kuli ki nto ye tuna, lu swanela ku zibiswa ka za ko u simuluhile muhupulo wo wa Silalu ni libaka ha ne u simuluhile. Ki mañi luli ya u fuzelela? Ki sifi seo baituti ba Bibele ba mwa lizazi la cwale ba si bulela ka za teñi? Kono pili lu si ka buisana litaba ze, ha lu nyakisiseñi ka ku zwelapili seo Linzwi la Mulimu ka sibili le li buyelezwi li si talusa.—2 Timotea 3:16, 17.

Isiñi ‘Mulimu Mwana’ kono “Mwan’a Mulimu”

 7. Tuto ye si na kaiñole ya Bibele i sinula nto mañi ka za Jesu?

⁷ Ni kamuta Jesu n’a si ka ipabaza ku ba yena Mulimu ya m’ata ote ka sibili. Ku bala Bibele ku si na kaiñole ni ka ku tokwa mihupulo ye biukile ka za Silalu ku kona ku fa bupaki ka za buniti bwa seo. Sina ka mutala, kwa Joani 3:16, Jesu n’a bulezi kuli: “Kakuli Mulimu u latile lifasi hahulu, mane u li file Mwan’a hae wa libanda.” Hamulaho a litimana ze peli fela, Jesu hape n’a bulezi kuli n’a li “Mwan’a Mulimu, wa libanda.” (Joani 3:18) Majuda ha ne ba tamilikelize Jesu kuli n’a nyefuzi Mulimu, n’a alabile kuli: “Mu ka ni bulelela cwañi, na, ya ezizwe ya kenile ki Ndate, ni ku lumwa mwa lifasi, kuli, ‘U nyefuzi,’ kakuli ni ize, ki na Mwan’a Mulimu?” (Joani 10:36) Jesu n’a si ka bulela kuli n’a li ‘Mulimu Mwana’ kono n’a bulezi kuli n’a li “Mwan’a Mulimu.”

 8. Ki bupaki mañi bo ne bu filwe ki nduna wa masole ni bao ba ne ba li ni yena?

⁸ Jesu ha n’a shwile, nihaiba masole ba Siroma ba ne ba yemi kwatuko ne ba zibile kuli Jesu n’a si Mulimu: “Mulauli wa mwanda wa masole, ni b’a n’a libelela Jesu ni bona, ha ba bona zikinyeho ya lifasi ni ze tahile, ba saba Mulimu, ba li: ‘Luli, yo, ne li Mwan’a Mulimu.’” (Mateu 27:54) Ne ba si ka bulela kuli, ‘yo ne li Mulimu’ kamba ‘yo ne li Mulimu Mwana,’ kakuli Jesu ni balutiwa ba hae ne ba lutile kuli Jesu n’a li Mwan’a Mulimu, isiñi Mulimu Ya M’ata Ote mwa sibupeho sa mutu wa fa lifasi.

 9, 10. Ki bupaki mañi bo bu m’ata bo bu filwe mwa Libuka za evangeli ka za swalisano ye mwahal’a Mulimu ni Jesu?

⁹ Mulimu yena ka sibili n’a file bupaki bwa kuli Jesu n’a li Mwan’a hae ya latiwa, sina muñoli wa Bibele Mateu ha n’a lemuhile cwalo Jesu ha n’a kolobelizwe. (Mateu 3:17) Bañoli ba bañwi ba Bibele ne ba lemuhile nto ye swana. Mareka n’a ñozi kuli: “Mi kwa utwahala linzwi le li zwa kwa lihalimu, le li li: ‘Ki yena Mwan’a ka ya latwa, ye ni katelwa hahulu.’” (Mareka 1:11) Luka n’a bulezi kuli: “Linzwi la zwa kwa lihalimu, la li: ‘Ki wena Mwan’a ka ya latwa, ye ni katelwa.’” (Luka 3:22) Mi Joani Mukolobezi, ya n’a kolobelize Jesu, n’a pakile kuli: “Mi ni boni, mi ni pakile kuli [Jesu] ki yena Mwan’a Mulimu.” (Joani 1:34) Kacwalo Mulimu yena ka sibili, bañoli kaufela ba Libuka z’ene za evangeli, ni Joani Mukolobezi ba talusa fo ku sweu kuli Jesu n’a li Mwan’a Mulimu. Mi hamulaho a f’o, fa ku fetuha kwa Jesu, nto ye swana ne i ezahezi: “Linzwi [la Mulimu] la zwa mwa lilu la li: ‘Yo ki Mwan’a ka ye ni ketile; mu mu utwe.’”—Luka 9:35.

¹⁰ Mwa litaba ze, kana Mulimu n’a bulela kuli yena ka sibili ki yena mwan’a hae, kuli n’a itumile ili yena, ni kuli n’a ikatelwa ili yena? Batili, Mulimu Ndate, Mubupi, n’a bulela kuli n’a lumile Mwan’a hae Jesu, mutu ka buñwi y’a fapahana, ku to eza musebezi wa Mulimu. Ka lona libaka le, mwa Mañolo a Sigerike kamukana pulelo ya “Mwan’a Mulimu” i itusisizwe ili ku supa ku Jesu. Kono pulelo ya ‘Mulimu Mwana’ ha i fumanehi nihaiba hañwi, kakuli Jesu n’a si Mulimu ya m’ata ote. N’a li Mwan’a Mulimu. Ki batu ba babeli ba ba fapahana, mi ha ku na “kunutu” ya bulapeli ye kona ku cinca niti yeo.

Ndate ki Yo Mutuna ku Mwana

11. Jesu n’a bonisize kamukwaufi kuli Mulimu n’a li yo mutuna ku yena?

¹¹ Jesu n’a zibile kuli n’a s’a likani ni Ndat’ahe kono mwa linzila kaufela n’a li mwa sibaka se si kwat’asi. N’a ziba kuli n’a li Mwana ya latiwa ya n’a na ni lilato le li tungile ku Ndat’ahe. Ki lona libaka, Jesu, kamita ha n’a ezize lipulelo ze cwale ka ze latelela: “Mwana h’a koni ku eza se siñwi ili yena, haisi s’a boni Ndate a si eza.” (Joani 5:19) “Ni zwile kwa lihalimu ku eza, isi se si latwa ki na, kono se si latwa ki ya ni lumile.” (Joani 6:38) “Tuto ya ka ha i zwi ku na, kono i zwa ku ya ni lumile.” (Joani 7:16) “Na, na mu ziba [Mulimu]; kakuli ni zwa ku yena mi ki yena ya ni lumile.” (Joani 7:29) Mutu ya luma yo muñwi ki yena yo mutuna. Y’a lumiwa ki yo munyinyani, mutanga. Mulimu ki yena mulumi. Jesu ki yena y’a lumilwe. Ha ba swani. Sina Jesu ha n’a talusize taba kuli: “Mutanga h’a fiti mulen’a hae; mi ya lumilwe h’a fiti ya mu lumile.”—Joani 13:16.

12. Ki swanisezo mañi ye bonisa sibaka sa Jesu se si kwat’asi ha bapanywa ni Ndat’ahe?

¹² Se hape si talusizwe ka ku utwahala mwa swanisezo ya n’a file Jesu. N’a swaniselize Ndat’ahe, Jehova Mulimu, ku muñ’a simu ya veine ya n’a ile kwa naha ya kwahule ni ku siya simu mwa pabalelo ya balimi—ili bao ka mo ku inezi fela ne ba yemela bahulu ba bulapeli ba Sijuda. Nako ha ne inze i ya, muñ’a simu a luma mutanga ku y’o nga kwa miselo ya simu ya veine, kono balimi ba nata mutanga ni ku mu kutisa mazoho-zoho fela. Cwale muñ’a simu a luma mutanga wa bubeli, mi kwa ezahala nto ye swana. A luma mutanga wa bulalu, ni yena a ipumana mwa muinelo o swana. Cwale muñ’a simu (Mulimu) a li: “Ni ka luma mwan’a ka [Jesu] ye ni lata; mwendi ba ka mu kuteka.” Kono balimi bao ba ba maswe ba li: “‘Ki yo shwana, lu mu bulaye kuli sanda i be sa luna.’ Kiha ba mu nepela kwand’a simu ya veine, ba mu bulaya.” (Luka 20:9-16) Hape, seo si utwahaza hande kuli Jesu u kwatas’a Ndat’ahe, n’a lumilwe ki Ndat’ahe ku to eza tato ya Ndat’ahe.

13. Ki lifi litaba ze mwa Bibele ze utwahala ze bonisa kuli Mulimu n’a li yo mutuna ku Jesu?

¹³ Jesu yena ka sibili n’a bulezi kuli: “Ndate ki yo muhulu ku na.” (Joani 14:28) Lu swanela ku lumela sa bulela Jesu, kakuli kaniti luli n’a zibile niti ka za mayemo a hae kwa neku la Ndat’ahe. Muapositola Paulusi ni yena n’a zibile kuli Mulimu ki yo mutuna ku Jesu, mi n’a bulezi kuli: “Mwana [Jesu] u ka beiwa mwa mata a . . . Mulimu.” (1 Makorinte 15:28) Se ka ku zwelapili si bonwa mwa manzwi a Paulusi kwa 1 Makorinte 11:3 a’ li: “Mulimu ki toho ya Kreste.” Jesu n’a lumezi kuli n’a na ni Mulimu yo mutuna ha n’a bulezi kwa balutiwa ba hae kuli: “Ni sa kambamela ku Ndate, yena ndat’a mina; ku Mulimu wa ka, yena Mulimu wa mina.”—Joani 20:17.

14. Ki afi mañolo a mañwi a bonisa kuli Jesu n’a si Mulimu Ya M’ata Ote?

¹⁴ Jesu n’a bonisize butuna bwa Mulimu muta mahe balutiwa ba babeli ha n’a kupile kuli bana ba hae ba te ba ine yo ku la bulyo mi ya ni ku la nzohoto la Jesu ha ka kena mwa Mubuso wa hae. N’a alabile kuli: “Ku ni ina ku la bulyo, kamba ku la nzohoto, hasi na, ni ka fa mutu.” (Mateu 20:23) Haiba Jesu n’a li Mulimu ya m’ata ote, n’a ka kona ku fa mutu seo. Kono ne ku si cwalo. Ne li Ndat’ahe ya n’a kona ku fa mutu seo. Ka ku swana, ha n’a talusa bupolofita bwa ka za mafelelezo a muinelo wo wa linto, Jesu n’a talusize kuli: “Haili ka za lizazi leo, ni nako ya lona, ha ku na ya li ziba, nihaiba mangeloi a kwa lihalimu, nihaiba Mwana, konji Ndate fela.” (Mareka 13:32) Kambe Jesu n’a li Mulimu Ya M’ata Ote, n’a ka be a zibile lizazi leo ni nako ya lona. Kono n’a s’a zibi kakuli n’a si Mulimu Muzibi wa linto-kamukana. N’a li mwan’a Mulimu mi n’a s’a zibi nto kamukana yeo Ndat’ahe na zibile.

15. Jesu ha n’a li fakaufi ni ku shwa, n’a bonisize ku ipeya kwatas’a Mulimu kamukwaufi?

¹⁵ Jesu ha n’a li fakaufi ni ku shwa, n’a bonisize ku ipeya kwatas’a Ndat’ahe mwa ku lapela kuli: “Ndate, kabe u ka lata ku sutisa sinwiso seo ku na, kono ku si ke kwa ezwa se si latwa ki na, ku ezwe se si latwa ki wena.” (Luka 22:42) Jesu n’a lapela ku mañi? Ku ili yena? Batili, n’a lapela ku Ndat’ahe wa kwa lihalimu. Se si bonisizwe fo ku sweu ki ku bulela kwa hae kuli: “Kono ku si ke kwa ezwa se si latwa ki na, ku ezwe se si latwa ki wena.” Mi cwale, fa lifu la hae, Jesu a huwa a li: “Mulimu wa ka, Mulimu wa ka, u ni tuheleziñi?” (Mareka 15:34) Jesu n’a huweleza ku mañi? Ku ili yena? Batili, n’a huweleza ku Ndat’ahe ya n’a li kwa lihalimu.

16. Lifu ni zuho ya Jesu li bonisa kamukwaufi kuli n’a si ke a kona ku ba yena Mulimu ya m’ata ote ka sibili?

¹⁶ Hamulaho a ku shwa kwa Jesu, n’a inzi mwa libita i bata i ba ka mazazi a malalu. Ki mañi ya n’a mu zusize? Bakeñisa kuli n’a shwile, n’a sa koni ku izusa ili yena. Mi kambe n’a si ka shwa luli, n’a si ke a kona ku lifa tiululo fa sibi sa Adama. Kono n’a shwile, mi n’a si ya pila ka mazazi a bat’o ba a malalu. Muapositola Pitrosi u lu taluseza ya n’a zusize Jesu: “Mulimu u mu zusize kwa bafu, a mu lukulula ku ze sabisa za lifu.” (Likezo 2:24) Yo mutuna, Mulimu Ya M’ata Ote, n’a zusize yo munyinyani, Mwan’a hae ya latiwa, Jesu, ku zwa kwa bafu. Ka ku fa mutala: Jesu ha n’a zusize Lazaro ku zwa kwa bafu, ki mañi ya n’a li yo mutuna? Jesu n’a li yo mutuna, bakeñisa kuli n’a kona ku zusa Lazaro ku zwa kwa bafu. (Joani 11:41-44) Ne li nto ye swana Mulimu ha n’a zusize Jesu. Mulimu n’a li yo mutuna, kakuli n’a kona ku kutisa Jesu ka ku mu zusa kwa bafu.

17. Ki bufi bupaki bo buñwi bo bu bonisa kuli Jesu n’a si Mulimu?

¹⁷ Ha ku konahali kuli Jesu a be Mulimu yena ka sibili, kakuli Jesu n’a bupilwe ki Mulimu. A mu lemuhe ka m’o toloko ya Benjamin Wilson Emphatic Diaglott i boniseza Apocalypse (Sinulo) kauhanyo 3, timana 14: “Linto ze ku bulela y’a li Amen, paki ya sepahala ni y’a na ni niti [Jesu], makalelo a pupo ya Mulimu.” Ka ku swana, Makolose 1:15, 16 i bulela ka za Jesu kuli: “Ki siswaniso sa Mulimu ya sa bonwi, mweli ku ze bupilwe kamukana. Kakuli linto kamukana li ezizwe ka yena, ze kwa lihalimu, ni ze mwa lifasi . . . kaufela li ezizwe ka yena, mi li ezelizwe yena.” Kacwalo mwa lihalimu Mulimu ya m’ata ote n’a bupile Mwan’a hae ka sibili mi cwale “ka yena,” kamba “ka ku itusisa yena,” a eza lika ze ñwi, sina mupangi y’a li caziba h’a kona ku itusisa mubeleki ya filwe tuto kuli a mu ezeze musebezi. Lika zeo ze bupilwe “ka yena” ne li sa kopanyelezi cwalo ni Jesu yena ka sibili, kakuli Mulimu na s’a mu bupile kale. Ka lona libaka le, u bizwa “mweli,” “wa libanda.” Haiba mwana ki mweli, wa libanda, seo ni kamuta ha si talusi kuli mwana u swana sina ndat’ahe. Kamita ku talusa kuli ku na ni batu ba babeli ba ba na ni mayemo a fapahana, ndate ni mwana.

Moya o Kenile—Ki Mutu kamba M’ata a Sebeza?

18. Ki sifi seo Bibele i si luta ka za moya o kenile?

¹⁸ Ku cwañi ka za y’a twi ki mutu wa bulalu wa mwa Silalu, moya o kenile, o’ taluswa kuli wa likana ni Ndate ni Mwana kwa m’ata, mwa muinelo, ni mwa ku pila ku ya ku ile? Ha ku na ni ko ku kana mwa Bibele k’o moya o kenile u talusizwe kuli wa likana ni Mulimu ni Kreste. Sina ka mutala, fa nako ya kolobezo ya Jesu, Mareka 1:10 i bonisa kuli moya o kenile ne u tile fahalimw’a Jesu ka ku “swana inge liiba,” isiñi mwa sibupeho sa mutu. Moya o kenile ne si mutu yo muñwi ya n’a taha fahalimw’a Jesu kono ne li m’ata a sebeza a Mulimu. Ona m’ata ao a n’a zwelela ku Mulimu n’a konisize Jesu ku folisa bakuli ni ku zusa ba ba shwile. Sina Luka 5:17 ka mo i taluseza mwa Diaglott: “M’ata a Matuna a Mulena [Mulimu] n’a li fahalimw’a hae [Jesu] a ku folisa.” Hamulaho, fa Pentekonta, baapositola ni bona ne ba filwe m’ata a zwelela ku Mulimu a ku folisa bakuli ni ku zusa ba ne ba shwile. Kana seo ne si ba fitisize fa ku ba kalulo ye twi “mulimu-wa-namunganga”? Batili, ka bunolo fela ne ba filwe m’ata a n’a zwelela ku Mulimu, ka Kreste, kuli ba kone ku eza seo batu ka taho ne ba sa koni ku si eza.

19. Ki kabakalañi ha ku sa konahali kuli moya o kenile u be mutu wa bulalu wa mwa Silalu?

¹⁹ Ona m’ata a sebeza a’ swana ao n’a talusizwe kwa Maefese 5:18, k’o Paulusi n’a elelize kuli: “Mu tale moya.” Ka ku swana, Likezo 7:55 i talusa kuli Setefani n’a “tezi moya o kenile.” Mi fa Pentekonta, balateleli ba Jesu “kamukan’a bona ba tala moya o kenile.” (Likezo 2:4) Kana mutu wa kona ku tala ka mutu yo muñwi? Batili, kono w’a kona ku tala m’ata a’ zwelela ku Mulimu. Ona moya o kenile w’o ki m’ata a swana ao Mulimu n’a itusisize mwa ku bupa pupo kaufela. Sina Genese 1:2 ha i talusa kuli: “Moya wa Mulimu n’o ambalala fahalimw’a mezi.”

20. Ki pono mañi ya n’a boni Setefani ye ekeza ku bonisa kuli Silalu haki nto ya niti?

²⁰ Hamulaho a ku zusiwa kwa Jesu, Setefani n’a na ni pono ya kwa lihalimu mi “a bona kanya ya Mulimu, ni Jesu a yemi ku la bulyo la Mulimu.” (Likezo 7:55) Kacwalo, batu ba babeli ba ba fapahana ne ba bonwi mwa lihalimu: (1) Mulimu ni (2) Jesu Kreste ya n’a zusizwe. Moya o kenile ha u si ka taluswa mwa pono ye bakeñisa kuli haki mutu wa bulalu wa mwa Silalu. Moya o kenile, ka ku ba m’ata a sebeza a Mulimu, u zwelela ku Mulimu kono isi ka ku ba mutu ya ikemezi. Ki lona libaka Setefani ha n’a boni batu ba babeli fela, isiñi ba balalu.

21, 22. (a) Ki ku lumela ku fi k’o encyclopedia ya bulapeli i se i ezize ka za moya o kenile? (b) Ki lisupo lifi ze ka kopanyiwa mwa taba ya luna ye latelela?

²¹ Ka ku ama fa moya o kenile, New Catholic Encyclopedia i lumela kuli: “T[estamente] ya K[ale] fo ku sweu ha i bonisi moya wa Mulimu o kenile sina mutu, nihaiba ka ku toma luli fa kutwisiso ya tuto, kamba ka ku ya ka kutwisiso ya Puo ya masika a kwa upa. Moya wa Mulimu ka bunolo fela ki m’ata a Mulimu. Haiba ka linako ze ñwi u bonisizwe sina o fapahana ku Mulimu, ki ka libaka la kuli moya wa Yahweh ha u ezi lika ka ili ona fela.” Hape i talusa kuli: “Buñata bwa mañolo a T[estamente] ye N[ca] a sinula moya wa Mulimu sina nto ye ñwi, isiñi mutu yo muñwi; se si kona ku bonahala hande hahulu mwa libapanyo ze mwahal’a moya ni m’ata a Mulimu.”

²² Ka ku beya lisupo ze kaufela mwa munahano, yona tuto ye ya Silalu “fo ku tomile tumelo” ya Krestendomu ha i koni ku ba ya niti. Linzwi la Mulimu ka sibili li bonisa mafosisa a yona. Li bonisa fo ku sweu kuli Jehova Mulimu ki Ndate ya lilato ni kuli Jesu Kreste ki Mwan’a hae ya latiwa, Mwana y’a na ni lilato le lituna ku Ndat’ahe kuli mane n’a itatela ku mu utwa ka ku fita ni fa lifu. Niteñi, ba bañwi b’a kanana ka ku bulela kuli ku na ni mañolo a bonahala ku fa kemelo kwa Silalu, kacwalo mwa taba ya luna ye latelela, lu ka tatubisisa a mañwi a ku ona. Hape, lu ka buisana libaka tuto ye ha i fitile fa ku ba kalulo ye tuna cwalo ya Krestendomu ni ko i simuluhile.

Ne Mu Ka Alaba Cwañi?

◻ Ki sifi seo Bibele i si luta ka za Mulimu ni ka za Jesu?

◻ Mañolo a bonisa cwañi swalisano ya Ndate ni Mwana?

◻ Ki afi mañolo a mañwi a bonisa kuli Mulimu ki yo muhulu ku Jesu?

◻ Ki kabakalañi moya o kenile ha u sa koni ku ba kalulo ya Silalu?

[Siswaniso se si fa likepe 24]

Jesu n’a zibahalize kuli: “Ndate ki yo muhulu ku na”