Kana Bunde bwa Mulimu bwa ku Hoha?

KANA u na ni mulikani y’o lata hahulu? Haiba ku cwalo, kana ne u kile wa nahanisisa ka za se ne si ku hohezi ku yena mutu y’o? Kana ne li mibonahalelo ya hae? Kana ne li ka libaka la kuli mu tabela lika ze swana? Kamba kana ne li tulemeno to tu tungile, to tu cwale ka sishemo kamba butali? Haiba kalemeno ka ne ka tiisize bulikani bwa mina ne li ka bunde, kacwalohe mu na ni silikani se sinde luli. Bunde bo bu buniti ha bu ipumanelwi fela kacenu kakuli, mwa miinelo ye miñata, batu “ba toya batu ba bande.”—2 Timotea 3:3.

Ku Mukreste, silikani se si butokwa ni ku fita mwa bupilo haki se si iswelwi ni mutu yo muñwi kono ni Mulimu. Kacwalo ha mu hupula ka za silikani seo, kana mu se mu nahanisisize ka za kuli: ‘Ki kafi mwahal’a tulemeno twa Mulimu ka ka ni hohezi hahulu ku Mulimu?’

Tulemeno twa Mulimu to tu Tuna

Ka buniti fela, Bibele i talusa tulemeno twa Mulimu to tu ñata to tu zwile mubano. Hañata to tune to tu koñomekilwe ki lilato la hae, katulo ya hae ye lukile, butali bwa hae, ni m’ata a hae a si na maciñekelo. (Deuteronoma 32:4; Jobo 12:13; Lisamu 147:5; 1 Joani 4:8) Haiba ne lu na ni ku keta mwahal’a tona tulemeno to tune t’o to tu zwile mubano, mwendi ne lu ka bulela kuli lilato la Mulimu ne li lu hohezi hahulu ku yena ni ku fita. Nto ye swalisani hahulu ni lilato la hae, nihakulicwalo, ki bunde bwa hae bo bu fitisisa. Bañoli ba Bibele ne ba ñozi ka nzila ye kwangukile ka za seo, mi bunde bwa mufuta o cwalo bu kona ku hohela batu ba fa lifasi mwa silikani se sinde, ni se si tabisa ni Mubupi wa bona.

Sina ka mutala, kwa mafelelezo a mwanda wa busilela B.C.E., mupolofita Zakaria n’a makalile ka za Jehova kuli: “Ki bo butuna hakalo bunde bwa hae, ki ko ku tuna hakalo ku buheha kwa hae!” (Zakaria 9:17, NW) Lilimo ze ñata pili ku Zakaria, Isaya n’a lumbekile Mulimu ha n’a ñozi kuli: “Ni ka bulela lituto za lilato la [Jehova], . . . ni ze nde ze tuna z’a ezelize ba ndu ya Isilaele.”—Isaya 63:7.

Myanda ye milalu kwamulaho, Mulena Davida n’a ñozi ka nzila ye nyangumuna ka za bunde bwa Mulimu. Davida n’a ñozi ka ku zwelela ku zeo n’a ipumani ku zona, ka ku ikola ona bunde b’o mwa bupilo bwa hae kamukana. Mulimu n’a li yo munde hahulu-hulu ku Davida, sihulu hamulaho a sibi sa hae se situna ka ku ama ku Bati-Sheba ni munn’a hae Uria, Mulimu ha n’a bonisize mukekecima ku yena. (2 Samuele 12:9, 13) Kwa Lisamu 31:19, Davida a zibahaza ka buitebuho kuli: “Sishemo sa hao ki se situna cwañi, s’o bulukezi ba ba ku saba!”

Kana mu ba b’a nga bunde bwa Mulimu ka butuna sina mo ne ba ezelize balapeli bao ba kwaikale? Haiba ku cwalo, mu ka fumana luli “kozo ya Mulimu ye fita kutwisiso kaufela,” hamohocwalo ni ku susuezwa ka butungi mwa ku eza tato ya Mulimu ka nako kaufela. (Mafilipi 4:7) Ha lu nahanisiseñi cwale ka mizuzu i sikai ka za seo bunde bwa Mulimu bu si kopanyeleza ni ka mo si makaleza sipimo sa bona. Se ka niti luli si ka ezisa buitebuho bwa luna ku Ndat’a luna wa lihalimu ku ba bo bu tungile.