Ki Kabakalañi Mulimu Ha s’a Bile ni Pilu-Telele Cwalo?

MU TALIME pata ye swabile ya mwanana y’a lapile. A mu bone mubili wa hae o ñwañulukile ni mba ya hae ye bululuhile. Mu nahane ka za butokwi bwa hae bo butuna bwa sico, mi mu lemuhe mukekana o mukungulu wa shimbile. Mwendi bom’ahe ba talimela fela ka meto a’ tungile, p’ata ya bona i bonahala ku tala ku s’a ba ni sepo. Cwalehe mu like ku felisa ku tomoha pilu kwa mina—ee, mu itiise mu si ke mwa lila.

Pono yeo ki ye kutelwa linako ze eza bolule-lule mwa sibaka se si na ni lukupwe se si zibahala ka libizo la Sahel. Ki sa butuna bo bu eza bolule ba libima ze silezi square kilometer. Si lapami bupala bo bu eza libima ze 4,800 kilometers mwa Africa kwa mboela wa lihalaupa la Sahara, ku zwa Senegal kwa likamba la liwate la Atlantic ku ya Ethiopia ye kwa Liwate le li Fubelu. Ka mo ku inezi fela, lukupwe hape lu sweli ku beya mwa kozi batu ba bañata mwa libaka ze ñwi. World Health Organization i biha kuli batu ba ba eza bolule ba likiti ze 1.1 ku potoloha lifasi ba kula hahulu kamba ha ba fumani sico se si likani.

Lukupwe, ka mo ku inezi fela, ki lineku li li liñwi fela la manyando a mutu. Mutu u silafaza lifasi, mi kaufel’a luna lwa yambukelwa ki seo. Miinelo ya mañañazwana i tuhelela ku s’a luka ni lindwa ze tisa manyando ni lifu ku ba ba ñata. Ki kabakalañi Mulimu ha tuhelezi lika ze cwalo? Kana u na ni pabalelo kwa neku la luna?

Mulimu wa Babalela!

Mubupi wa luna ki ya na ni pabalelo kwa neku la luna. Ku na ni bupaki bo buñata bwa seo ni bwa buikoneli bwa hae bwa ku ezisa lika ku sebelisana ili ku tahisa bunde ku luna, ni ku tahisa swalisano mwa pupo ya hae kamukana. Sina ka mutala, a mu bone siswaniso se si bonisa seo sa muka ye tile fa palisa ya fa kota ye beya miselo. Muka yeo i itingile fa palisa mwa ku fumana mulo o’ i tokwa kwa neku la ku fepeha. Hape, kota ye bonahala fa i itingile fa bupi bwa lipalisa bo bu zwa kwa kota ye swana ni yona bo bu shimbilwe ki mubili wa muka. Mwa nzila ye cwalo, palisa ya nunisiwa ka bupi kuli muselo u be teñi. Haki likota kamukana ze beya miselo ze nuniswa mwa nzila ye, kono kaniti luli Mulimu u lukisize swalisano ye ipitezi mwa muinelo wo. Mi bunde bwa hae bu tisa muselo o ne lu kana lwa ca ka ku ba ni munyaka ni ku fumana tuso.

Muka yona ki silama sa sishañata se si kopanyizwe hande sa limuka ze fitelela 30,000. Ze ñwi li mamela ngoma, hailif’o ze ñwi za tanyela kamba ku uncafaza moya wa mwa teñi. Ze ñwi hape li buluka mulo ni bupi, ku fepa twana, kamba ku bata lisimuluho ze nca za mulo. Mulimu yena ka sibili u lukisize lika cwalo kuli lu tusehe muta limuka ze patehile cwalo li panga linosi le li munati ni le li fepehisa hande ili le li tabisa buikoneli bwa luna bwa ku utwa ku tabusa.

Makazo ya swalisano mwahal’a limuka ni limela ni mwahal’a likokwani zona ka sibili ki bupaki bu li buñwi fela mwahal’a bo buñata bo bu bonisa kuli Mubupi ki ya kona ka ku petahala ku ezisa lika ze pila ku swalisana hamoho. Kwa neku la taba yeo, “Mulimu hasi Mulimu wa mifilifili, kono ki wa kozo.” (1 Makorinte 14:33) Ki kabakalañi, cwalehe, ha tuhelezi mufuta wa mutu ku fumaneha mwa ku tokwa kutwano ko ku cwalo, ni bumai bwa ba bañata bo bu tiswa ki seo? Haiba Mulimu ki ya na ni pabalelo kwa neku la luna, ki kabakalañi h’a litezi nako ye telele cwalo mwa ku lukisa muinelo wo? Ee luli, ki kabakalañi Mulimu ha s’a bile ni pilu-telele cwalo?

Linzwi la Mulimu, Bibele, li alaba lipuzo ze cwalo. Buka ye ye ipitezi i lu bulelela kuli Jehova Mulimu s’a bile ni pilu-telele ka libaka le li nde. Ki lifi libaka leo? Mi ki butelele bwa nako ye kuma kai bo i ka tanda pilu-telele ya Mulimu?