Jehova “Uka Mitiisa” Cwañi?

 1. Mulimu naatiisize cwañi batanga bahae babasepahala ba kwamulaho?

LINZWI la Mulimu hañata litalusanga baana bane banani tumelo kuli nebanani maata hahulu. Kono nihaiba baana bane batiile hahulu kamita nebasa ikutwangi cwalo. Ka mutala, Mulena Davida fokuñwi naaikutwanga kuli ‘naatiile sina lilundu,’ kono fokuñwi ‘naasabanga hahulu.’ (Samu 30:7) Nihaike kuli moya wa Mulimu neutusanga Samisoni kuba hahulu ni maata, naaziba kuli hanaasike atusiwa ki Mulimu, “[naakafokola] ni kuba inge batu babañwi kaufela.” (Baat. 14:​5, 6; 16:17) Jehova ki yena yanaafile baana babasepahala bao maata.

 2. Ki kabakalañi muapositola Paulusi hanaabulezi kuli naafokola mi hape naanani maata? (2 Makorinte 12:​9, 10)

² Muapositola Paulusi ni yena naalemuhile kuli naatokwa kufiwa maata ki Jehova. (Mubale 2 Makorinte 12:​9, 10.) Ka kuswana ni buñata bwaluna, Paulusi ni yena naakatazwanga ki makulanu. (Magal. 4:​13, 14) Fokuñwi ni yena neku mubelanga taata kueza zelukile. (Maro. 7:​18, 19) Mi fokuñwi naabanga ni lipilaelo mi naaikalelwanga ka za lika zeneka ezahala ku yena. (2 Makor. 1:​8, 9) Niteñi, Paulusi hanaaikutwanga kufokola, naabanga ni maata. Ka mukwa ufi? Jehova naafanga Paulusi maata anaatokwa kuli azwelepili kuitiisa.

 3. Ki lipuzo mañi zeluka alaba mwa taba ye?

³ Jehova usepisa kuli ni luna uka lutiisa. (1 Pit. 5:10) Kono lutokwa kuikataza kuli Jehova alufe maata. Ka mutala, injini ya mota yakona kutusa mota kuzamaya. Nihakulicwalo, mumatisi wa mota uswanela kueza sesiñwi kuli mota yeo izamaye. Ka kuswana, Jehova uitukiselize kulufa maata elutokwa, kono luswanela kuunga mihato yemiñwi kuli lutusiwe. Ki lika mañi zalufile Jehova zekona kulutiisa? Mi lutokwa kuezañi kuli lufiwe maata ao? Kuli lualabe lipuzo zeo, lukanyakisisa mo Jehova naatiiselize batu babalaalu bababulezwi mwa Bibele, ili mupolofita Jonasi, Maria mahe Jesu, ni muapositola Paulusi. Hape lukanyakisisa mo Jehova azwelapili kutiiseza batanga bahae kacenu ka linzila zeswana.

 4. Ki lika mañi zeluswanela kueza kuli Jehova alufe maata?

⁴ Nzila yeñwi yakona kulufa ka yona maata Jehova ki ka kulapela ku yena. Jehova ukona kualaba litapelo zaluna ka kulufa “maata afita a butu.” (2 Makor. 4:7) Hape lwakona kutiiswa halubala Linzwi lahae ni kunahanisisa zelubala. (Samu 86:11) Lushango lwa Jehova lolu mwa Bibele ‘lunani maata.’ (Maheb. 4:12) Haiba mulapela ku Jehova ni kubala Linzwi lahae, mukaba ni maata emutokwa kuli muitiise, kuzwelapili kuba ni tabo, kamba kupeta musebezi otaata. Halunyakisiseñi mo Jehova naatiiselize mupolofita Jonasi.

 5. Ki kabakalañi mupolofita Jonasi hanaatokwa kutiiswa?

⁵ Mupolofita Jonasi naatokwa kutiiswa. Naasabile kuyo eza musebezi otaata wanaa mufile Jehova. Kabakaleo, yena ni banaali ni bona mwa sisepe nebabatile kubulaiwa ki liñungwa lelituna. Hase bamunepezi mwa liwate, ayo ipumana mwa mba ya tapi yetuna mone kunani lififi. Munahana kuli Jonasi naaikutwile cwañi? Kana naanahana kuli naakashwela mwateñi? Kana naaikutwa kuli Jehova naamuyubekile? Kubonahala kuli Jonasi naaikalezwi hahulu.

 6. Ka kuya ka Jonasi 2:​1, 2, 7, ki lika mañi zenetiisize Jonasi hanaali mwa mba ya tapi?

⁶ Ki lika mañi zanaaezize Jonasi kuli abe ni maata hanaali anosi mwa mba ya tapi? Naalapezi ku Jehova. (Mubale Jonasi 2:​1, 2, 7.) Nihaike kuli Jonasi naasika utwa Jehova, naanani buikolwiso bwa kuli Jehova naakateeleza kwa tapelo yahae yenebonisa kuli naaikokobeza mi naabakile. Jonasi hape naanahanisisize ka tokomelo litaba za mwa Mañolo. Ki kabakalañi halubulela cwalo? Mwa tapelo yanaalapezi, yeñozwi mwa buka ya Jonasi kauhanyo 2, naaitusisize manzwi amañata ni lipulelo zeswana ni ze mwa buka ya Samu. (Ka mutala, Mubapanye Jonasi 2:​2, 5 ni Samu 69:1; 86:7.) Taba yeo ibonisa kuli Jonasi naaziba hande Mañolo. Mi kunahanisisa Mañolo ao ka nako yanaali mwa butata, neku mutusize kukolwa kuli Jehova naaka mutusa. Hasamulaho, tapi yatazeza Jonasi fa likamba, mi naaitukiselize kueza musebezi wanaa mufile Jehova.—Jona. 2:10–3:4.

7-8. Ki lika mañi zetusize muzwale yomuñwi yapila kwa Taiwan kuba ni maata a kutiyela miinelo yetaata?

⁷ Mutala wa Jonasi wakona kulutusa halukopana ni miinelo yetaata. Ka mutala, muzwale yabizwa Zhimingb wa kwa Taiwan, ukatazwa ki mapongo. Kuzwa fo, utiiyela butata bwa kulwaniswa hahulu ki ba lubasi kabakala tumelo yahae ku Jehova. Kulapela ni kuituta kumutusa kuba ni maata azwa ku Jehova. Utalusa kuli: “Ka linako zeñwi hakuzuha butata, niikalelwanga hahulu kuli mane napalelwanga kueza tuto ya ka butu.” Kono haazwafangi. Ubulela kuli: “Nto yapili yeniezanga ki kulapela ku Jehova. Kihona nikateeleza kwa lipina za Mubuso ka kuitusisa maheadphone. Fokuñwi mane naopelanga lipina zeo ka kusatumusa kufitela niikutwa kuwa pilu. Hasamulaho, nakalisanga kuituta.”

⁸ Kueza tuto ya ka butu nekutusize Muzwale Zhiming kuba ni maata akutiyela miinelo yetaata. Ka mutala, hamulaho wa kupazulwa, nasi yomuñwi naamutaluselize kuli naatokwa kupompelwa mali bakeñisa kuli naanani mali amanyinyani mwa mubili. Busihu bone butatamiwa ki lizazi lanaapazuzwi, Muzwale Zhiming naabalile za kaizeli yomuñwi yanaapazuzwi ka nzila yeswana. Kaizeli yo naanani mali amanyinyani hahulu kufita ahae, kono naasika lumela kupompelwa mali mi naafolile. Zeneezahezi ku kaizeli yo nelitusize Muzwale Zhiming kuzwelapili kusepahala.

 9. Ki lika mañi zemuswanela kueza haiba muikalezwi hahulu kabakala muinelo otaata omukopana ni ona? (Mubone ni maswaniso.)

⁹ Hamukopana ni butata bobuñwi, kana mwaikalelwanga hahulu kuli mane hamulapela mwapalelwanga kutalusa hande momuikutwela? Kamba kana muikutwanga hahulu kukatala kuli mane mwapalelwanga kuituta? Muhupule kuli Jehova wautwisisa hande muinelo omuli ku ona. Kacwalo, nihaikaba kuli tapelo yamina ki yekuswani, mwakona kuba ni buikolwiso bwa kuli uka mifa zemutokwa luli. (Maef. 3:20) Haiba mukatezi hahulu kwa mubili kamba mwa munahano kuli mane kumibela taata kubala kamba kuituta, muteeleze kwa litaba zebalilwe za mwa Bibele kamba lihatiso zetomile fa Bibele. Hape mwendi kuteeleza ku yeñwi ya lipina zaluna kamba kubuha vidio fa jw.org kwakona kumitusa. Jehova ubata kumitiisa mi ukaeza cwalo haiba mulapela ku yena ni kulemuha mwaalabezi tapelo yamina ka kuitusisa Bibele ni lika zeñwi kaufela zalufile.

10. Mizwale ni likaizeli baluna balutiisanga cwañi?

¹⁰ Jehova wakona kulutiisa ka kuitusisa mizwale ni likaizeli baluna. Bakona ‘kuluomba-omba hahulu’ halukopana ni muinelo otaata kamba halupalelwa kupeta hande musebezi otaata olufilwe. (Makolo. 4:​10, 11) Lutokwa kuba ni balikani sihulu “mwa linako za ziyezi.” (Liprov. 17:17) Haluziyelehile, mizwale baluna bakona kulutusa kufumana zelutokwa, kuluomba-omba, ni kulususueza kuli luzwelapili kusebeleza Jehova ka busepahali. Halunyakisiseñi mo Maria mahe Jesu naatiiselizwe ki babañwi.

11. Ki kabakalañi Maria hanaatokwa kutiiswa?

¹¹ Maria naatokwa kutiiswa. Munahane feela mwanaaikutwezi hanaataluselizwe ki lingeloi lelibizwa Gabriele za buikalabelo bobutuna bwanaafilwe. Nihaike kuli naasika nyalwa, naakaitwala. Kusina taba kuli naasika hulisa kale fateñi bana, naakaba ni buikalabelo bwa kubabalela mwana yanaakaba Mesia. Mi bakeñisa kuli Maria naasika lobala kale ni muuna, nekuka mubela hahulu taata kutaluseza Josefa yanaa mubeelelize kuli uitwezi.—Luka 1:​26-33.

12. Ka kuya ka Luka 1:​39-45, Maria naafumani cwañi maata anaatokwa?

¹² Maria naafumani cwañi maata anaatokwa kuli apete hande buikalabelo bobutuna bwanaafilwe? Naakupile tuso ku babañwi. Ka mutala, naakupile lingeloi lene litile ku yena kuli limutaluseze litaba zeñwi ka za buikalabelo bo. (Luka 1:34) Nakonyana kuzwa fo, atama musipili kuliba kwa “naha ya malundu” ya Juda kuyo potela Elizabeta muhabo yena. Kueza cwalo neku mutusize luli. Elizabeta naababalize Maria mi naasusumelizwe ki Jehova kutalusa bupolofita bobususueza ka za mwanaa Maria yanaasika pepwa kale. (Mubale Luka 1:​39-45.) Maria naabulezi kuli Jehova “[naaezize] zemaata ka lizoho lahae.” (Luka 1:​46-51) Jehova naaitusisize lingeloi ni Elizabeta kutiisa Maria.

13. Kaizeli yomuñwi wa kwa Bolivia naatusizwe cwañi kabakala kukupa tuso kwa mizwale ni likaizeli bahae?

¹³ Ka kuswana ni Maria, ni mina mwakona kutiiswa ki mizwale bamina. Kaizeli yabizwa Dasuri wa kwa Bolivia, ni yena naatokwa kutiiswa. Bo ndatahe Kaizeli Dasuri hane baswelwi mwa sipatela kabakala kukula butuku bobuñwi bobusa foli, kaizeli yo naaikatulezi kuba babalela. (1 Tim. 5:4) Nesi nto yebunolo kueza cwalo. Utalusa kuli: “Hañata neniikutwanga kuzwafa.” Kana naakupile tuso ku babañwi? Kwa makalelo, naasika eza cwalo. Ubulela kuli: “Nenisa lati kukataza mizwale. Neniipulelisanga kuli, ‘Jehova ki yena yaka nifa tuso yenitokwa.’ Kono hasamulaho, nalemuha kuli kuikauhanya ku babañwi nekubonisa kuli nenibata kutatulula butata ninosi.” (Liprov. 18:1) Kaizeli Dasuri aikatulela kuñolela balikani bahae basikai ni kubataluseza muinelo wanaali ku ona. Utalusa kuli: “Mizwale ni likaizeli baka neba nitiisize hahulu luli. Neba luisezanga lico kwa sipatela mi neba nibalelanga litimana zeñwi za mwa Bibele zeomba-omba. Kwatabisa luli kuziba kuli haluyo lunosi. Lu mwa lubasi lolutuna lwa Jehova mokunani batu babaitukiselize kulutusa, kuluutwela butuku, ni kulutusa kuzwelapili kusebeleza Jehova.”

14. Ki kabakalañi haluswanela kuamuhela tuso yeba lufa baana-bahulu?

¹⁴ Nzila yeñwi yalufanga ka yona maata Jehova ki ka kuitusisa baana-bahulu. Jehova uitusisanga baana babali limpo bao kuli alutiise ni kulukatulusa. (Isa. 32:​1, 2) Kacwalo, hamubilaezwa ki lika zeñwi mutaluseze baana-bahulu. Musike mwa zina-zina kuamuhela tuso yeba mifa. Jehova wakona kumitiisa ka kuitusisa bona.

15. Ki ifi sepo ya butokwa hahulu kwa Bakreste kaufela?

¹⁵ Sepo yaluna yetomile fa Bibele yakona kulutiisa. (Maro. 4:​3, 18-20) Ka kuba Bakreste, lunani sepo yende hahulu ya kupila kuya kuile, ibe kwa lihalimu kamba mwa paradaisi yekaba teñi fa lifasi. Sepo yaluna ilutusanga kuitiisa halukopana ni miinelo yetaata, kukutaza taba yende, ni kueza misebezi yeshutana-shutana mwa puteho. (1 Mates. 1:3) Sepo yeswana yeo neitiisize muapositola Paulusi.

16. Ki kabakalañi muapositola Paulusi hanaatokwa kutiiswa?

¹⁶ Paulusi naatokwa kutiiswa. Mwa liñolo lanaañolezi Bakreste ba kwa Korinte, naaibapanyize kwa piza ya lizupa yekona kupwaceha ka bunolo. Naali “mwa butata,” ‘naazingehile,’ ‘naanyandisizwe,’ ni ‘kunepelwa fafasi.’ Mane bupilo bwahae nebuli mwa lubeta. (2 Makor. 4:​8-10) Paulusi naañozi manzwi ao ka nako ya musipili wahae wa bulumiwa wabulaalu. Mi hamulaho wa kuñola manzwi ao, naakopani ni miinelo yetaata hahulu nikufita. Naataselizwe ki sikwata sa batu, kutamiwa, kuipumana mwa kozi ya kusinyeha kwa sisepe, ni kulengiwa mwa tolongo.

17. Ka kuya ka 2 Makorinte 4:​16-18, ki lika mañi zenetusize Paulusi kutiyela miinelo yetaata?

¹⁷ Paulusi naabile ni maata anaa mutusize kuitiisa kabakala kuli naaisize pilu kwa sepo yahae. (Mubale 2 Makorinte 4:​16-18.) Naabulelezi Bakreste ba kwa Korinte kuli nihaike kuli mubili wahae ‘neusinyeha’ naasika lumeleza taba yeo kumuzwafisa. Paulusi naaisize pilu kwa sepo yahae ya za kwapili. Sepo yahae ya kupila kuya kuile kwa lihalimu neli ya butokwa hahulu, kuli mane naakona kutiyela ñalelwa ifi kamba ifi yanaakopani ni yona. Paulusi naanahanisisanga za sepo yeo, mi kueza cwalo neku mutusize kuikutwa kuli ‘naauncafazwa zazi ni zazi.’

18. Sepo ya za kwapili itiisize cwañi Muzwale Tihomir ni lubasi lwahae?

¹⁸ Muzwale yabizwa Tihomir wa kwa Bulgaria, utiiswanga ki sepo yahae ya za kwapili. Lilimonyana kwamulaho, munyanaa hae wamushimani yabizwa Zidravko, naashwezi mwa kozi ya fa mukwakwa. Kabakaleo, Muzwale Tihomir naaikutwile hahulu butuku kwa pilu ka nako yetelele. Kuli batiyele muinelo wo, yena ni lubasi lwahae banahanisisanga mokuka bela ka nako ya zuho. Utalusa kuli: “Ka mutala, lunyakisisanga koluka kopanela ni munyanaaka Zidravko, lico zeluka mulukiseza, batu babaka memiwa kwa mukiti wa kumuamuhela, ni zeluka mubulelela ka za mazazi a mafelelezo.” Muzwale Tihomir utalusa kuli kuisa pilu kwa sepo yabona ya za kwapili kutusanga lubasi lwahae kuzwelapili kuitiisa ni kulibelela nako yeo Jehova akazusa munyanaa hae.

19. Mukona kutiisa cwañi sepo yamina? (Mubone ni siswaniso.)

¹⁹ Mukona kuitiisa cwañi sepo yamina? Ka mutala, haiba sepo yamina ki ya kuto pila kuya kuile fa lifasi, mubale litaba za mwa Bibele zebulela za paradaisi ni kulinahanisisa. (Isa. 25:8; 32:​16-18) Munahanisise mobuka bela bupilo mwa lifasi lelinca. Muipone inze muli mwa lifasi leo. Munahane ka za batu bemuka bona, milumo yemuka utwa, ni momuka ikutwela. Kuli mutusiwe hahulu, mubone maswaniso mwa lihatiso zaluna abonisa mobuka bela bupilo mwa paradaisi kamba mubuhe vidio ya pina yeli, Lifasi Lelinca, Lifakaufi Luli, kamba yeli, Muipone Mwa Paradaisi. Kunahanisisanga kamita za sepo yaluna ya kuto pila mwa lifasi lelinca kuka lutusa kuunga miinelo yetaata yelukopana ni yona kuli ki ya “nakonyana feela mi ibubebe.” (2 Makor. 4:17) Sepo yamifile Jehova yakona kumitusa kutiyela miinelo yetaata.

20. Lukona kufumana cwañi maata, nihaikaba kuli luikutwa kutokwa maata?

²⁰ Nihaikaba kuli luikutwa kutokwa maata, “lukafumana maata ka Mulimu.” (Samu 108:13) Jehova umifile lika zemutokwa kuli amitiise. Kacwalo, hamutokwa tuso kuli mupete musebezi omufilwe, kutiyela muinelo otaata, kamba kuzwelapili kuba ni tabo, mulapele ku Jehova ka taata ni kukupa ketelelo yahae ka kueza tuto ya ka butu. Muamuhele tuso yeba mifa mizwale ni likaizeli bamina. Kamita munahanisisange za sepo yamina ya za kwapili. Haiba mueza cwalo ‘mukatiiswa ka maata kaufela kulikana ni maata a Mulimu akanya kuli mukone kuitiisa ka kutala ka pilu-telele ni tabo.’—Makolo. 1:11.