Ku Swalisana ni Sitopa se si Busa Kacenu

“U ka mu beya fahalimw’a tutu ya hae kaufela.”—LUKA 12:44.

 1. Ki mwa mubuso mañi m’o Kreste n’a kalisize ku busa ka 33 C.E., mi ne li ka sikamañi?

FA PENTEKONTA ya 33 C.E, Jesu Kreste, Toho ya puteho, n’a kalisize ku busa mwa mubuso wa batanga ba hae ba ba tozizwe ka moya. Kamukwaufi? Ka moya o kenile, mangeloi, ni sitopa se si busa se si bonahala. Sina muapositola Paulusi mwa n’a boniselize, Mulimu ‘n’a lukuluzi ba ba tozizwe kwa m’ata a lififi ni ku ba tisa mwa mubuso wa Mwan’a hae ya latwa.’—Makolose 1:13-18; Likezo 2:33, 42; 15:2; Magalata 2:1, 2; Sinulo 22:16.

 2. Ki mwa Mubuso ufi o mutuna mwa n’a kalisize ku busa Kreste ka 1914?

² Kwa mafelelezo a “linako za bamacaba,” Jehova n’a ekelize m’ata a Kreste a tamaiso ya bulena, ku a yandululela kwa buse bwa puteho ya Sikreste. (Luka 21:24) Ee, mwa silimo sa 1914, Mulimu n’a file Mwan’a hae m’ata a tamaiso ya bulena fahalimw’a “macaba,” “mubuso wa lifasi,” mufuta wa mutu kaufela.—Lisamu 2:6-8; Sinulo 11:15.

U Ketezwi “Fahalimw’a Tutu ya Hae Kaufela”

 3, 4. (a) Mwa swanisezo ya Jesu ya lipondo, ki mañi ya n’a swanisezwa ki mutu wa lusika lwa bulena? (b) Ki lifi likezahalo za Mubuso ze ne li ezahalile ka 1918 ni 1919?

³ Nto ye swanela ku lemuhiwa fa ki swanisezo ya Jesu ya mutu wa lusika lwa bulena. (Luka 19:11-27) Pili a si ka funduka kale kuli a y’o yoliswa bulena, mutu y’o na file batanga ba hae mali (lipondo) kuli ba eze musebezi ka zona. Hamulaho wa ku kuta, yena mutu yo, ya swaniseza Kreste, a biza “batanga ba hae b’a n’a file mali, . . . kuli a zibe s’a fumani, mutu ni mutu, ka ku fundota.” (Luka 19:15) Seo ne si sebelize cwañi Jesu ha s’a filwe m’ata a bulena?

⁴ Ka 1918 Mulena Jesu Kreste ya n’a beilwe fa lubona n’a fumani sikwata se sinyinyani sa Bakreste ili bao kwa makalelo ne ba siile likeleke za Krestendomu mi ne ba patehile mwa ku babalela licisehelo za fa lifasi za Mulen’a bona. Hamulaho wa ku ba kenisa sina inge ka mulilo, Jesu n’a file batanga ba hae m’ata a tamaiso a ekelizwe ka 1919. (Malaki 3:1-4; Luka 19:16-19) N’a ba ketezi “fahalimw’a tutu ya hae kaufela.”—Luka 12:42-44.

“Lico ka Nako ya Teñi”

 5, 6. (a) Ki musebezi ufi o ne u ekelizwe wa n’a amuhezi sikombwa sa Kreste? (b) Ki bupolofita bufi bo ne bu na ni ku talelezwa hamulaho wa 1914, mi sitopa sa sikombwa ne si na ni ku abana ka tukufalelo kamukwaufi mwa ku talelezwa kwa bona?

⁵ Mulena ya busa Jesu Kreste n’a file musebezi o ekelizwe ku sikombwa sa hae, kamba muzamaisi wa ndu, fa lifasi-mubu. Bakreste ba ba tozizwe ne ba na ni ku ba “mandumeleti” a Mulimu mwa sibaka sa mulena ya filwe kuwani ya bulena ni m’ata a ku busa fahalimw’a batu kamukana ba fa lifasi-mubu. (2 Makorinte 5:20; Daniele 7:14) Buikalabelo bwa bona bwa ka nañungelele ne si fela bwa ku fa kwa sitopa sa Kreste sa batanga ba ba tozizwe “lico ka nako ya teñi.” (Luka 12:42) Cwale ne ba na ni ku nga muhato wa ka tukufalelo mwa ku petwa kwa bupolofita bo ne bu na ni ku talelezwa hamulaho wa ku tomiwa kwa Mubuso ka 1914.

⁶ Seo ne si talusa nto mañi mwa muinelo wa lika ka sibili? Ne si talusa ku yandululwa kwa ku kutaziwa kwa ‘taba ye nde ye ya mubuso mwa lifasi-mubu kamukana le li yahilwe.’ (Mateu 24:14) Fahalimw’a seo, ne si talusa ku hatisa litaba ze tiile za katulo fahalimw’a muinelo o maswe wa Satani ni bayemeli ba ona. Seo ne si tisize muinelo wa ku ‘nyanganyisa macaba.’ Kacwalo “bufumu bwa macaba,” “lingu ze ñwi” za Kreste, za kalisa ku taha. (Hagai 2:7; Joani 10:16) Ku zwa 1935 ni ku ya cwalo kwapili, “buñata bo butuna” bwa kalisa ku capukela kwa kopano ya Jehova lifasi kamukana. (Sinulo 7:9, 10) Seo ne si tahisize kuli ku be ni licinceho za zwelopili mwa kopano. Ka ku bulela ka swanisezo, macwe n’a na ni ku yoliswa ka sipi, kota ka kopa, sipi ka silivera, mi kopa ka gauda. (Isaya 60:17) Zona zeo kaufela se li ezahalile haisali ku zwiwa ka 1919 mwatas’a ketelelo ye mafulo-fulo ni ye tiile ya Jesu Kreste, ili y’o se a file licisehelo kamukana za Mubuso wa hae fa lifasi-mubu, kamba tutu, kwa sitopa sa mutanga ya sepahala ni Sitopa sa sona se si Busa.

 7. Buikalabelo bo bu ekelizwe bwa sikombwa ne bu ama nto mañi?

⁷ Lwa kona ku utwisisa ka bunolo kuli kekezeho ya mushimbo wa buikalabelo o inzi fahalimw’a mutanga wa Mulena, sikombwa, kamba muzamaisi wa ndu ne u ama ku ñola ni misebezi ya buñoli ye mituna. Sico sa kwa moya ne si na ni ku hatiswa kamita ka nako ye swanela mwa Tora ya ku Libelela. Ka 1919 The Golden Age (magazini ye zamaelela hamoho ili yeo hamulaho ya fita fa ku bizwa Consolation, mi cwale Awake!) ne i kalisizwe ku hatiswa ili ku zusulusa cisehelo ya nyangela, fahalimw’a ku yaha “batanga.” (Mateu 24:45) Buñata-ñata bwa libuka, libukanyana, ni matrakiti hape li se li hatisizwe mwahal’a lilimo.

Ku Bolosola ko ku Zwelapili

 8. Lilama za Sitopa se si Busa pili ne ba zibahala ni nto mañi, mi ki sifi se ne si bulezwi ki The Watchtower ya 1944?

⁸ Ka ku talimela kwamulaho mwa “nako ya maungulo” ye, ha lu komoki kuli lilama za Sitopa se si Busa ne ba zibahala ka butuna ni sikwata sa bañoli ba Watch Tower Society. (Daniele 12:4) Taba ye li “Ku Otololwa kwa Teokratiki Kacenu” ye ne i hatisizwe mwa The Watchtower ya November 1, 1944, ne i talusize kuli: “Ki nto ye utwahala, kuli bao ba ne ba filwe buikalabelo bwa ku hatiswa kwa liniti za Bibele ze sinuzwi ne ba bonwa sina sitopa se si busa se si ketilwe sa Mulena se si etelela bao kaufela ba ne ba lakaza ku lapela Mulimu ka moya ni ka niti ni ku mu sebeleza ka swalisano mwa ku hasanya zona liniti zeo ze sinuzwi ku ba bañwi ba ba shwile tala ni linyolwa.”

 9. Sitopa se si Busa hamulaho ne si fitile fa ku zibahala ni nto mañi ka butuna, mi ki kabakalañi?

⁹ Ne ku na ni litokwahalo za ka mulao ze ne li amiwa mwa ku hatisa limagazini ni libuka ze ñwi ze tusa mwa tuto ya Bibele. Kacwalo, Watch Tower Bible and Tract Society ne i tomilwe ni ku ñolwa ka mulao mwa sikiliti sa Pennsylvania, U.S.A. Ka lilimo, Sitopa se si Busa se si bonahala sa fita fa ku zibahala ni lilama ze supile za bazamaisi ba yona kopano ye ya ka mulao wa naha ye ne i tomilwe kuli i hatise libuka ze tusa mwa tuto ya Bibele ze ne li tokwiwa ni ku itusiswa ki batu ba Mulena lifasi kamukana.

10, 11. Ki ku bolosola kufi ko ne ku ezahalile ka 1944, mi ki sifi se ne si bulezwi ka za teñi mwa The Watchtower?

¹⁰ Bazamaisi ba Sosaiti b’a supile ne li Bakreste ba ba sepahala. Kono kalulo ya bona mwa kopano ya ka mulao wa naha ne i kana i akalelize kuli libaka za bona mwa Sitopa se si Busa ba li fumani bakeñisa kuli ne ba ketilwe ki lilama za ka mulao wa naha za Watch Tower Society. Fahalimw’a seo, ka mulao kuli mutu a be kalulo ya sikwata seo ni litukelo za sona za ku eza liketisa, kwa makalelo ne li fiwa fela ku ba bañwi ba ne ba ezize linubu kwa Sosaiti. Tukiso ye cwalo ne i tokwa ku cinciwa. Seo ne si ezizwe kwa mukopano wa ka silimo wa kopano ya ka mulao wa naha ya Pennsylvania ya Watch Tower Society o ne u ezizwe la October 2, 1944. Milao ya Sosaiti ne i lukisizwe hande ili kuli ku ba kalulo ya sikwata seo ku si ke kwa ba hape ka ku toma fa mali. Lilama ne li ka ketiwa ka ku zwelela mwahal’a batanga ba Jehova ba ba sepahala, mi bona bao se ba fitile fa ku kopanyeleza cwalo ni ba bañata ba ba sebeza ka nako ye tezi kwa sibaka se situna sa tamaiso sa Sosaiti kwa Brooklyn, New York, ni kwa mitai ya yona ku potoloha lifasi kamukana.

¹¹ Ka ku biha yona zwelopili yeo, The Watchtower ya November 1, 1944, ne i talusize kuli: “Mali, sina ha fiwa mwa linubu, h’a swaneli ku ba ni linzwi le li m’ata, ka buniti fela h’a swaneli ku ba ni mayemo ni a makana mwa ku taleleza sitopa se si Busa sa Lipaki za Jehova fa lifasi-mubu. . . . Moya o kenile, m’ata a sebeza a’ zwelela ku Jehova Mulimu ka Kreste Jesu, ki ona o swanela ku sebeza ni ku etelela mwa taba.”

Sa Fapahana ni Sikwata sa Bazamaisi

12. Ki sifi se si bonisa kuli Jehova n’a fuy’ozi licinceho za ku bolosola mwatas’a ketelelo ya Sitopa se si Busa?

¹² Ku zwelapili kwa musebezi wa ku kutaza mwahal’a mashumi-shumi a lilimo ze ne li latelela ku bonisa kuli Jehova n’a fuy’ozi licinceho za ku bolosola zeo mwa kutwisiso ya Sitopa se si Busa. (Liproverbia 10:22) Ee, palo ya bashaeli ba Mubuso lifasi-mubu kamukana ya yuyuluka ku zwa ku ba ba kwatas’a 130,000 ka 1944 ku taha ku ba ba fita fa 1,483,430 ka 1970! Kono mihato ya ku zwelapili ne i sa na ni ku taha.

13. (a) Konji ka 1971, ki ufi o ne u li muinelo ka ku ama kwa Sitopa se si Busa? (b) Ki sifi se ne si ezahalile kwa mukopano wa Sosaiti wa ka silimo ka 1971?

¹³ Konji ku to fita ka 1971 bao ba Sitopa se si Busa ne ba sa zibahala ni lilama ze supile za sikwata sa bazamaisi ba Watch Tower Society ya Pennsylvania. Prezidenti wa Sosaiti n’a lwezi mushimbo o mutuna wa buikalabelo bwa ku eza likatulo ze ama musebelezo wa mitai ya Sosaiti ku potoloha lifasi kamukana. Kono lingambolo ze m’ata ne li filwe kwa mukopano wa ka silimo o ne u ezizwe la October 1, 1971. Prezidenti wa Sosaiti n’a bulezi fa taba ye li “Ku Tisa Sibaka se si Kenile mwa Muinelo o Nepahezi,” mi y’a mu bakwela na bulezi fa taba ye li “Sitopa se si Busa Sina se si Fapahana kwa Kopano ya ka Mulao wa Naha.” Ki ifi fapahano ye mwahal’a Sitopa se si Busa ni kopano ya ka mulao wa naha?

14. Ki lifi lifapahano ze mwahal’a kopano ya ka mulao wa naha ni Sitopa se si Busa?

¹⁴ Sina ha se ku talusizwe kale, Watch Tower Bible and Tract Society ya Pennsylvania i na ni sikwata sa bazamaisi ba palo ye ciñekela fela fa lilama ze supile. Bona banna ba ba ineezi bao ba Sikreste ba ketiwa mwahal’a lilimo ze talu ki lilama za kopano ya ka mulao wa naha ba ba sa fiteleli 500, mi ba bañata ku bona haki Bakreste ba ba tozizwe. Fahalimw’a seo, bakeñisa kuli ku ba teñi kwa kopano yeo ku itingile fa mulao wa naha, ili ka ku ba ni sibaka sa tamaiso se si fa kalulo i liñwi, i kona ku kwalelwa ki Sesare, f’o kikuli, M’uso. (Mareka 12:17) Niteñi, Sitopa se si Busa haki s’itusiso sa ka mulao wa naha. Lilama za sona ha li si ka ba teñi ka liketisa. Ba ketilwe ka moya o kenile mwatas’a ketelelo ya Jehova Mulimu ni Jesu Kreste. (Mu bapanye Likezo 20:28.) Fahalimw’a seo, bao ba ba fita fa ku eza Sitopa se si Busa ki banna ba ba ketilwe ka moya mi ha ba na tamo ya ku ba fa sibaka si li siñwi kamba kalulo ya tamaiso.

15. Ki taba ifi ka za kopano ye ne i ezizwe mwa The Watchtower ya December 15, 1971, mi ki sifi se si konwa ku bulelwa ka za Sitopa se si Busa sa mwa lizazi la cwale?

¹⁵ Kwa neku la licinceho za ku bolosola ze cwalo mwa kutwisiso, The Watchtower ya December 15, 1971, ne i talusize kuli: “Ka buitumelo lipaki za Jehova za Sikreste ba ziba ni ku lumela kuli ye haki kopano ya bulapeli ya mutu a li muñwi, kono kuli i na ni sitopa se si busa sa Bakreste ba ba tozizwe ka moya.” Sitopa se si Busa sa sitopa sa mutanga ya tozizwe ni balikani ba bona ba ba fita ku bolule-lule mwahal’a lingu ze ñwi ka ku zwelapili se si fitile fa ku ba se si itukiselize ku babalela bukombwa bwa sona bwa okamelo.

16. Tutu ya Kreste ya fa lifasi-mubu se i ekezehile cwañi haisali ku zwiwa ka 1971, mi ki lifi ze ñwi za s’a beile mwa pabalelo ya mutanga ya sepahala ya na ni kutwisiso, ya yemelwa ki Sitopa se si Busa?

¹⁶ Tutu ya fa lifasi-mubu ya Mulena Jesu Kreste se i zwezipili ku hula. Haisali ku zwiwa ka 1971 palo ya Lipaki se i hulile ku zwa kwatas’a 1,600,000 ku fita fa palo ye tuna ye fitelela 3,700,000 ka 1989. Ki bupaki hakalo bwa mbuyoti ya Mulimu! (Isaya 60:22) Yona kulo yeo ne i tahisize kuli ku be ni kekezeho kwa miyaho ya sibaka sa tamaiso sa Sosaiti ni mitai ya yona, hamohocwalo ni ku zwisezapili mikwa ya ku hatisa ni ku hasanya ka yona. Se ku tahisize ku yahiwa kwa Mandu a Mubuso a mañata ni Libaka za Mikopano ye mituna ku potoloha lifasi kamukana. Ka nako ye swana, Sitopa se si Busa ni sona se si zwezipili ku taleleza buikalabelo bwa ku okamela musebezi wa ku kutaza, ku tahisa libuka ze itusiswa mwa tuto ya Bibele, ni ku keta baokameli mwa mitai, likiliti, mipotoloho, ni mwa liputeho. Zeo ki zona licisehelo za Mubuso za beile Kreste mwa pabalelo ya mutanga ya sepahala ya na ni kutwisiso, ya yemelwa ki Sitopa se si Busa.

17. Ki lizwelopili lifi ze ñwi ze ne li ezizwe kwa neku la okamelo ka 1971, 1974, ni 1976?

¹⁷ Sitopa se si busa sa mwa lilimo za mwanda wa pili ne si ekelizwe ka ku fitelela baapositola ba Jesu. Muta taba ya mupato ne i talimilwe, sitopa ka ku ya ka bupaki ne si kopanyeleza cwalo ni “baapositola ni ba bahulu ba [puteho]” mwa Jerusalema. (Likezo 15:1, 2) Ka ku swana, Sitopa se si Busa ne si ekelizwe ka 1971 mi hape ni ka 1974. Mwa ku tiisa musebezi wa bona wa okamelo, Sitopa se si Busa ne si lukisize kuli tutengo to tu ketalizoho tu kalise ku sebeza ka January 1, 1976. Katengo ni katengo ka na ni lilama ze talu ku isa ku ze silezi, kaufel’a bona ba na ni linzwi le li swana fa litaba ze buhisanwa. Muina-situlo wa katengo ni katengo u sebeza mwa kalulo yeo ka silimo si li siñwi, mi lilama ka buñwi za Sitopa se si Busa ba sebeza ku i liñwi kamba ku fitelela ya tona tutengo t’o. Ka kañwi ni ka kañwi ka tona tutengo to tu ketalizoho t’o ka fa mamelelo ye ipitezi kwa kalulo ye ñwi ya tutu ya Kreste ya fa lifasi-mubu. Katengo ka busilela—Katengo ka Muina-situlo, ili kao lilama za kona z’a shobana-shobana ka silimo ni silimo, ka talima butata bwa ka sipundumukela.

Swalisano ye Tiile ni Sitopa se si Busa

18. Sitopa se si Busa si sebeza kamukwaufi, mi ki ifi nzila ye ñwi yeo lu kona ku bonisa swalisano ya luna ni sona?

¹⁸ Tutengo twa Sitopa se si Busa tu ba ni mikopano ya ka viki ni viki ili ku tatubisisa litaba za butokwa, ku eza likatulo hamulaho wa lipuhisano za ka tapelo, ni ku eza litukiso za musebezi wa teokratiki wa kwapili. Sina ha se ku lemuhilwe kwa makalelo, Likezo kauhanyo 15 i bonisa kuli puzo ye buima ye ne i tokwa katulo ne i tahisizwe kwa mamelelo ya sitopa se si busa sa mwa lilimo za mwanda wa pili. Ka ku swana kacenu, lipuzo za butokwa li tahiswa kwa Sitopa se si Busa kamukan’a sona, ili se si kopana hamoho ka viki ni viki kamba hañata haiba ku tokwahala. Lilama za Sitopa se si Busa, ili bao ka nako ye ba fita fa 12, ba bata ketelelo ya Jehova Mulimu ka Mañolo ni ka tapelo. Nzila i liñwi ye lu bonisa swalisano ya luna ni Sitopa se si Busa ki ku ba hupula bona bao ba ba ketilwe ka nzila ye ipitezi mwa litapelo za luna za ka zazi ni zazi.—Maroma 12:12.

19. Litaelo za Sitopa se si Busa li fita cwañi kwa liputeho?

¹⁹ Litaelo ni likatulo za Sitopa se si Busa li fita cwañi kwa liputeho? Lilama za sitopa se si busa sa mwa lilimo za mwa mwanda wa pili ha se li fitile fa katulo ya bona ka tuso ya moya wa Mulimu, ne ba lumezi liñolo kwa liputeho. (Likezo 15:22-29) Niteñi, nzila ye tuna kacenu ki ka lihatiso za Sikreste.

20. (a) Ki cinceho ifi ye ñwi ya ku bolosola ye ne i ezizwe ka 1976? (b) Tutengo twa Mitai tu swalisana cwañi ni Sitopa se si Busa?

²⁰ Haisali ku zwiwa ka February 1, 1976, mutai ni mutai wa Watch Tower Society se u bile ni Katengo ka Mutai ka ka ezizwe ka banna ba ba na ni buikoneli ba ba ketilwe ki Sitopa se si Busa. Ka ku ba bayemeli ba Sitopa se si Busa mwa naha kamba linaha ze mwatas’a ketelelo ya mutai wa bona, bona mizwale bao ba lukela ku ba ba ba sepahala, banna ba ba itingwa. Seo si lu hupuza ka za banna ba ba kona, ba ba saba Mulimu, ba ba sepahala ba ne ba tusa Mushe mwa ku atula batu mwa Isilaele wa kwaikale. (Exoda 18:17-26) Lilama za Katengo ka Mutai ba sebelisa litaelo ze amuhezwi ku zwelela mwa libuka ni limagazini za Sosaiti ni Bukombwa Bwa Luna Bwa Mubuso, hamohocwalo ni mañolo a ka nañungelele a ama fa butata bwa fa sibaka. Tutengo twa Mitai tu zibisa Sitopa se si Busa ka za zwelopili ya musebezi mwa naha ni naha ni butata bo ne bu kana bwa zuha. Lipiho ze cwalo ku zwelela mwa lifasi kamukana li tusa Sitopa se si Busa mwa ku bona litaba ze swanela ku buhisanwa mwa lihatiso za Sosaiti.

21. Baokameli ba maeto ba ketiwa kamukwaufi, mi misebezi ya bona i kopanyeleza cwalo ni nto mañi?

²¹ Mwatas’a ketelelo ya moya o kenile, Tutengo twa Mitai tu babaza banna ba ba tiile kwa moya, kuli ba sebeze sina baokameli ba mupotoloho kamba ba sikiliti. Hamulaho wa ku ketiwa ki Sitopa se si Busa ka sibili, ba sebeza sina baokameli ba maeto. Bona mizwale bao ba potela mipotoloho ni liputeho ili ku li yaha kwa neku la kwa moya ni ku li tusa mwa ku sebelisa litaelo ze amuhezwi ku zwelela kwa Sitopa se si Busa. (Mu bapanye Likezo 16:4; Maroma 1:11, 12.) Baokameli ba maeto ba fitisa lipiho kwa ofisi ya mutai. Ka tuso ya moya o kenile ni Mañolo a buyelezwi, ba abana ni maeluda ba fa sibaka mwa ku babaza mizwale ba ba fitile ku ze konisa kuli ba ketwe sina batanga ba bukombwa ni maeluda ki Sitopa se si Busa kamba bayemeli ba sona.—Mafilipi 1:1; Tite 1:5; mu bapanye 1 Timotea 3:1-13; 4:14.

22. (a) Maeluda ba mwa puteho ba swalisana cwañi ni Sitopa se si Busa? (b) Ki sifi se si bonisa kuli Jehova u fuy’ola tukiso ye ya teokratiki?

²² Hape, bao ba ba eza litopa za maeluda ba ‘itibelela ni ku lisa mutapi kaufela o ba beilwe baokameli ba ona ki moya o kenile.’ (Likezo 20:28) Bona baokameli ba ka busepahali ba tundamena ku sebelisa litaelo ze amuhezwi ku zwelela ku Jehova Mulimu ni Jesu Kreste ka mutanga ya sepahala ya na ni kutwisiso ni Sitopa sa hae se si Busa. Jehova wa fuy’ola tukiso ye ya teokratiki, kakuli ‘liputeho li zwelapili ku tiya mwa tumelo ni ku ekezeha ka zazi ni zazi.’—Likezo 16:5.

23. Ka ku ama kwa Sitopa se si Busa, ki sifi se lu swanela ku itama ku eza?

²³ Ki ko ku nde hakalo kuli ka Sitopa se si Busa, Jehova Mulimu ni Mulena, Jesu Kreste, ba bonisa kemelo kwa batu ba Mulimu! (Lisamu 94:14) Sina kalulo ya kopano ya Jehova, luna ka buñwi lu fumana tuso ku zwelela kwa kemelo ye cwalo. (Lisamu 145:14) Seo si swanela ku tiisa keto ya luna ya ku swalisana ni litukiso za Mulimu. Ee luli, haike kamita lu fumanwe inze lu swalisana ni Sitopa se si Busa sa Lipaki za Jehova ha lu nze lu hatela fapili ku liba kwa nako yeo “lifasi li ka tala zibo ya [Jehova, NW], sina mezi mw’a kwahelezi liwate.”—Isaya 11:9.

Lisupo ze Tuna za ku Hupula

◻ Ki buikalabelo bufi bo bu ekelizwe bo ne si amuhezi sitopa sa sikombwa ka 1919?

◻ Ka lilimo ze ñata, Sitopa se si Busa ne si zibahala ni nto mañi?

◻ Ki lizwelopili lifi za ku bolosola ze ne li ezizwe mwa ku ketwa kwa lilama za Sitopa se si Busa?

◻ Ki lifi ze ñwi za tutu ya fa lifasi-mubu ya Kreste zeo s’a file kwa sitopa sa mutanga ni Sitopa sa sona se si Busa?

◻ Lu kona ku swalisana cwañi ni Sitopa se si Busa?

[Maswaniso a fa likepe 16, 17]

Ku zwelela kwa sibaka sa sona se situna sa tamaiso ya lifasi kamukana kwa Brooklyn, New York, Sitopa se si Busa si etelela musebezi wa ku hatisa ni ku kutaza wa Lipaki za Jehova mwa mitai ye 93 ya Watch Tower Society

Germany

Japan

South Africa

Brazil