Mu Zwelepili ku Hula kwa Neku la Zibo

“Kwa tumelo ya mina mu ekeze . . . zibo.”—2 PITROSI 1:5.

 1, 2. (a) Ki sifi se ne mu ka ituta ku zwelela kwa ku talima mwa mahalimu? (Maroma 1:20) (b) Ku ekezeha kwa zibo ya mutu ku fitile fa sipimo mañi luli?

KI SIFI se ne mu ka ituta ka ku zwela fande fa busihu bo bu ngwelukile, bo bu lififi ni ku talima kwa kweli ye benya ni kwa linaleli ze ñata-ñata? Ne mu ka ituta se siñwi ka za Y’a bupile lika zeo kaufela.—Samu 19:1-6; 69:34.

² Haiba ne mu bata ku ekeza kwa zibo yeo, kana ne mu ka pahama fa situwa sa ndu ya mina ni ku talima inze mu li f’o? Mwendi ne mu si ke mwa eza cwalo. Albert Einstein ka nako ye ñwi n’a itusisize swanisezo ye cwalo mwa ku koñomeka sisupo sa kuli basayansi kaniti luli ha ba si ka ziba ze ñata hahulu ka za pupo kamukana mi ka buniti fela ki ze nyinyani hahulu ze ba zibile ka za Yena ya n’a i bupile.a Dr. Lewis Thomas n’a ñozi kuli: “Nto i liñwi ye tuna ka ku fitisisa ye petilwe ki sayansi mwa lilimo za mwanda wo o’ tahisize ze ñata ka ku fitisisa za sayansi ki ku fita fa taba ye li ya niti ka ku tala ya kuli ha lu na zibo ni ye kana; lu ziba ze nyinyani hahulu ka za taho mi lu utwisisa ze nyinyani ni ku fita.”

 3. Ki ka muhupulo mañi ku ekezeha kwa zibo ku ekeza butuku?

³ Mane ni ha ne mu ka itusisa lilimo ze siyezi kaufela za butelele bwa bupilo bwa ka taho mu nze mu bata zibo ye cwalo, ne mu kana mwa fita fela fa ku lemuha hahulu ka m’o bupilo bu bezi bo bu kuswani ni ku utwisisa hande hahulu kuli ku sebelisa zibo kwa mutu ku kusufazwa ki ku s’a petahala ni ‘ku kopama’ kwa lifasi le. Salumoni n’a tahisize sisupo seo, ka ku ñola kuli: “Mwa butali bo butuna ku na ni ku swaba ko kuñata; mi ya ekeza kwa zibo ya hae, u ekeza ni kwa maswabi.” (Muekelesia 1:15, 18) Ee, ku fumana zibo ni butali ze si ka swalisana ka mukwa ufi kamba ufi ni milelo ya Mulimu hañata ku ama butuku ni ku zwafa.—Muekelesia 1:13, 14; 12:12; 1 Timotea 6:20.

 4. Ki zibo mañi ye lu swanela ku bata ku fumana?

⁴ Kana Bibele i babaza kuli lu si ke lwa cisehela mwa ku ekeza zibo ya luna? Muapositola Pitrosi n’a ñozi kuli: “Kono mu hule kwa neku la sishemo, ni kwa neku la zibo ya Jesu Kreste Mulena ni Mupilisi wa luna. Ku yena ku be kanya, cwale, ni mwa linako ni linako.” (2 Pitrosi 3:18) Lwa kona mi lu swanela ku amuhela kelezo yeo ku ba ye swanela ku sebeza ku luna, ye lu susueza ku hula kwa neku la zibo. Kono ki zibo ya mufuta mañi? Lu kona cwañi ku ba ni yona ka ku ekezeha? Mi kana luli lw’a eza cwalo?

 5, 6. Pitrosi n’a koñomekile cwañi kuli lu tokwa ku fumana zibo?

⁵ Ku ba ni zibo ye nepahezi ye ekezehile ya Mubupi wa pupo kamukana ni ya Jesu ne li ona muhupulo o mutuna mwa liñolo la bubeli la Pitrosi. Kwa makalelo a lona n’a ñozi kuli: “Mu atisezwe sishemo ni kozo mwa zibo ya ku ziba Mulimu, ni Jesu Kreste Mulen’a luna. Mata a hae a bumulimu, sina h’a lu file ze tokwahala kaufela za bupilo ni za bulumeli, kabakala ku mu ziba Yena ya lu bizize ka kanya ni ka mata a hae.” (2 Pitrosi 1:2, 3) Kacwalo u swalisanisa ku ba ni sishemo se si si ka libelelwa hamohocwalo ni kozo ni ku fumana zibo ya Mulimu ni ya Mwan’a hae. Seo sa utwahala, bakeñisa kuli Mubupi, yena Jehova, ki yena mutomo wa zibo luli. Y’a saba Mulimu wa kona ku bona litaba ka mubonelo o lukile ni ku fita fa likutwisiso ze swanela.—Liproverbia 1:7.

⁶ Cwale Pitrosi a susueza kuli: “Kwa tumelo ya mina mu ekeze mata; kwa mata mu ekeze zibo; Kwa zibo mu ekeze buiswalo; kwa buiswalo mu ekeze ku itiisa; kwa ku itiisa mu ekeze bulapeli; Kwa bulapeli mu ekeze ku latana, mane ku lata batu kaufela. Kakuli zeo ha li li teñi ku mina, mi ili ka buñata, li ka mi tokwisa buzwa ni ku palelwa, mwa ku beya miselo mwa zibo ya Mulen’a luna Jesu Kreste.” (2 Pitrosi 1:5-8)b Mwa kauhanyo ye tatama, lu bala kuli ku fumana zibo ku tusa batu ku baleha kwa silafazo ya lifasi. (2 Pitrosi 2:20) Pitrosi kacwalo n’a bonisize hande-nde kuli ba ba fita fa ku ba Bakreste ba tokwa zibo, sina fela mo ba i tokwela ba se ba sebeleza Jehova. Kana mu ku le liñwi la maluko ao?

Mu Itute, Mu Lundulule, Mu Itusise

 7. Ki ka nzila ifi ba bañata ba fumani zibo ye nepahezi, ya liniti ze mutomo za Bibele?

⁷ Ne mu kana mu ituta Bibele ni Lipaki za Jehova bakeñisa kuli mu lemuha bupaki bwa niti mwa lushango lwa bona. Hañwi ka viki ni viki, ka hora i liñwi kamba nako ye ñwi cwalo, mu nyakisisa tuto ye ñwi ya Bibele ka ku itusisa buka ye cwale ka Wa Kona Ku Pila Ku Ya Ku Ile mwa Paradaisi fa Lifasi-mubu. Mu eza hande hahulu! Ba bañata ba ba itutile cwalo ni Lipaki za Jehova ba fumani zibo ye nepahezi. Nihakulicwalo, ki sifi se mu kona ku eza ilikuli mu ekeze kwa buñata bwa seo mina ka butu mu ituta? Ki ze liakalezo ze ñwi.c

 8. Ha mu nze mu itukiseza tuto, ki sifi seo muituti a kona ku eza ilikuli a itute ze ñata ni ku fita?

⁸ Pili, ha mu nze mu itukiseza tuto ya mina, mu tatube litaba ze mu ka buhisana. Seo si ama ku talima toho ya taba ya kauhanyo, litohonyana za litaba, ni maswaniso afi kamba afi a’ itusisizwe mwa ku fa taluso ya litaba. Mi cwale, ha mu nze mu bala paragilafu kamba kalulo ye ñwi ya hatiso, mu bate mihupulo ye mituna ni mañolo a’ i yemela, mu nze mu lala zeo kamba ku li tunumeka ka mukwa o muñwi. Kwa neku la ku bona haiba mu itutile liniti ze buhisanwi, mu like ku alaba lipuzo ze fa maparagilafu a’ fitana-fitana. Ha mu eza cwalo, mu like ku tahisa likalabo ka ku itusisa manzwi a mina. Kwa mafelelezo, mu lundulule tuto, mu nze mu lika ku hupula lisupo ze tuna ni litaba zeo li yemelwa ka zona.

 9. Ku sebelisa liakalezo ka za ku ituta ku ka tusa cwañi mutu ku ituta?

⁹ Mu kona ku libelela ku ba ni zibo ye ekezehile haiba mu sebelisa liakalezo ze. Ki kabakalañi hakulicwalo? Libaka le liñwi ki la kuli mu ka atumela litaba zeo mu na ni takazo ye tiile ya ku ituta, ili ku lukisa mubu, ka mubulelelo wa swanisezo. Ka ku fumana mubonelo wa ka nañungelele mi cwale ni ku bata lisupo ze tuna ni likuka za kutwisiso, mu ka bona ka m’o litaba ka butungi li swalisana ni toho ya taba kamba kutwisiso ya mafelelezo. Lundululo ya mafelelezo i ka mi tusa ku hupula se mu itutile. Ku cwañi ka za hamulaho wa zeo, mwahal’a tuto ya mina ya Bibele?

10. (a) Ki kabakalañi ku kutela fela lisupo za niti kamba litaba ze ñwi ze nca ha ku na ni butokwa bwa makutelakaufi fela? (b) Ki sifi se si amiwa mwa “ku hupula kwa hamulaho wa nako ye tomilwe”? (c) Bana ba Maisilaele ne ba kana ba fumani cwañi tuso mwa ku lundulula lika?

¹⁰ Boc’aziba mwa liluko la tuto ba ziba butokwa bwa lundululo ya ka bunako ni ye na ni mulelo. K’o haki ku nguya fela manzwi ku si na nahanisiso, k’o ne mu kana mu likile kwa sikolo ha ne mu nze mu ituta libizo, taba, kamba muhupulo o muñwi ka ku u kuta-kutela fela kuli mu u hupule. Nihakulicwalo, kana ne mu fumani kuli hañi-hañi ne mu libezi se ne mu kuta-kutezi, kuli kapili-pili ne mu tuhezi ku si hupula? Ki kabakalañi? Ku nguya fela linzwi kamba taba ye nca ku kona ku ba ko ku nyikwisa, mi ze zwa mwateñi ha l’i ngi nako ye telele. Ki sika mañi se si kona ku cinca muinelo w’o? Ku bata ku ituta kwa mina ko ku buniti fela ku ka tusa. Sinotolo se siñwi ki ku lundulula lika ka mulelo. Mizuzunyana fela hamulaho wa ku ituta sisupo se siñwi, pili mu si ka si libala kale, mu like ku ikupulela se ne mu itutile. Seo si bizizwe “ku hupula kwa hamulaho wa nako ye tomilwe.” Ka ku uncafaza ku hupula kwa mina pili mu si ka libala kale, mu yandulula nako yeo mu kona ku li hupula. Mwa Isilaele, bondate ne ba na ni ku luta bana ba bona milao ya Mulimu. (Deuteronoma 6:6, 7) Ku “luta” ku talusa ku laela ka ku kuta-kutela. Ka mo ku kona fela ku bela, ba bañata ba bondate bao pili ne ba bulelezi bana ba bona milao ya Mulimu; mi hamulaho ne ba kutezi ku bulela litaba zeo; mi cwale ne ba buzize bana ba bona lipuzo ka za se ne si itutilwe.

11. Ki sifi se si konwa ku eziwa mwahal’a tuto ya Bibele kuli ku utwisisa ku ekezehe?

¹¹ Haiba Paki yo muñwi u zamaisa tuto ya Bibele ku mina, n’a kana a mi tusa ku ituta ka ku zwelapili ku b’a nga ni ku kusufaza litaba ka linako ze ñwi mwahal’a linako za tuto yeo. Yeo haki nto ya bwanana. Ki muezezo o’ zwisezapili kutwisiso, kacwalo mu abane ka tabo mwa lilundululo zeo za ka linako ze ñwi. Mi cwale, kwa mafelelezo a tuto, mu abane mwa lundululo ya mafelelezo m’o mu alaba ka ku hupula fela. Ka manzwi a mina, ne mu kana mwa talusa lisupo zeo ka mo ne mu ka li taluseza ha mu luta mutu yo muñwi. (1 Pitrosi 3:15) Seo si ka tusa ku tahisa kuli se mu itutile si be kalulo ya ze mu ka hupula ka nako ye telele.—Mu bapanye Samu 119:1, 2, 125; 2 Pitrosi 3:1.

12. Muituti yena ka sibili u kona ku eza nto mañi kuli a zwisezepili buikoneli bwa hae bwa ku hupula?

¹² Muhato o muñwi o tusa u ka ba wa kuli, ku si ka fita kale lizazi li li liñwi kamba a mabeli, mu bulelele mutu yo muñwi se mu itutile, mwendi ya li ye mu kena ni yena sikolo, ye mu beleka ni yena, kamba muyahwa ni mina. Mu kona ku bulela tuto yeo mi cwale ni ku bulela kuli mu bata fela ku bona haiba mwa kona ku hupula likuka ze tuna za puhisano kamba mañolo a mwa Bibele a’ yemela tuto yeo. Seo ne si kana sa zusulusa cisehelo ya mutu yo muñwi y’o. Mane nihaiba si sa ezi cwalo, kezo fela ya ku kutela kwa mina litaba ze nca hamulaho wa nako ya lizazi li li liñwi kamba a mabeli i ka li tiisa mwa munahano wa mina. Ha ku ba cwalo mu ka be mu itutile zona luli, ili ku eza seo 2 Pitrosi 3:18 i susueza.

Ku Ituta ka Cisehelo

13, 14. Ki kabakalañi ha lu swanela ku bata nto ye fitelela ku fumana ni ku hupula fela litaba?

¹³ Ku ituta ki nto ye fita ku ikungela fela lisupo kamba ku kona ku hupula litaba. Batu ba bulapeli ba mwa lizazi la Jesu ne ba ezize seo ka litapelo za bona za ku kuta-kutela. (Mateu 6:5-7) Kono litaba zeo ne li ba amile cwañi? Kana ne ba tahisa muselo o lukile? Ku tokwa. (Mateu 7:15-17; Luka 3:7, 8) Kalulo ya but’ata ne li ya kuli zibo ne i s’a keni ka butungi mwa lipilu za bona, ili ku ba ama ka ku ba tusa.

¹⁴ Ka ku ya ka Pitrosi, ku swanela ku ba ko ku fapahana kwa Bakreste, mwa linako za kwamulaho k’o ni za cwale. U lu susueza ku ekeza kwa tumelo ya luna zibo ye ka lu tusa ku pima ku s’a cisehela kamba ku s’a tahisa se siñwi. (2 Pitrosi 1:5, 8) Kuli seo si fite fa ku bonahala ku ba sa niti ku luna, lu lukela ku bata ku hula kwa neku la zibo yeo mi lu bata kuli i lu ame ka butungi, ili ku fita mwahali ku luna luli. Seo si kana sa s’a ezahala kamita.

15. Ki but’ata bufi bo ne bu tahile kwa Bakreste ba bañwi ba Maheberu?

¹⁵ Mwa lizazi la Paulusi Bakreste ba Siheberu ne ba na ni but’ata ka ku ama ku seo. Ka ku ba Majuda, ne ba na ni zibo ye ñwi ya Mañolo. Ne ba ziba ka za Jehova ni ze ñwi za n’a tokwa. Hamulaho ne ba ekelize zibo ka za Mesiya, ku bonisa tumelo, mi ne ba kolobelizwe sina Bakreste. (Likezo 2:22, 37-41; 8:26-36) Mwahal’a likweli ni lilimo, ku lukela ku ba kuli ne ba fumanehile kwa mikopano ya Sikreste, ili k’o ne ba kona ku abana mwa ku bala mañolo ni mwa ku fa maikuto. Niteñi, ba bañwi ne ba si ka hula kwa neku la zibo. Paulusi n’a ñozi kuli: “Kabesi cwalo kabe ki kale mu ba baluti. Kanti mu sa tokwa ku lutwa hape matatekelo a litaba za Mulimu; mane mu fetuhile ba ba tokwa mabisi, isi lico ze tiile.” (Maheberu 5:12) Seo ne si ka ezahala cwañi? Kana ne si kana sa ezahala ku luna hape?

16. Permafrost ki nto mañi, mi i ama cwañi limela?

¹⁶ Ka ku ba swanisezo, mu nyakisise muinelo o bizwa permafrost, ili mubu o kangezi ka nako kaufela wa kwa Arctic ni mwa libaka ze ñwi m’o avareji ya mufutumala i mwatas’a sipimo sa ku bata se si tahisa kuli mezi a kangele. Mubu, macwe, ni mezi a mwatas’a mubu z’a kangela ku ba siñomototuna se si tiile, ka linako ze ñwi si fita fa mukita o eza limita ze 900. Ka nako ya mbumbi, ku shengunuka ne ku kana kwa ezahala mwa mubu wa fahalimu (o bizwa kalulo ye sebeza). Nihakulicwalo, yona kalulo yeo ya mubu o shengunuka ye sisani yeo hañata ki ya njapatila bakeñisa kuli mukamo ha u koni ku zwetela mwa mubu o kangezi o mwatasi. Limela ze mela mwa mubu o musisani wa fahalimu hañata ki ze nyinyani kamba ze kokile; mibisi ya zona ha i koni ku kena mwa mubu o kangezi w’o wa permafrost. Ne mu ka komoka kuli, ‘Mubu o kangezi kamita w’o u ama cwañi taba ya za haiba n’a hula kwa neku la zibo ya niti ya Bibele?’

17, 18. Permafrost ni kalulo ya yona ye sebeza ne li kana za itusiswa cwañi mwa ku swaniseza se ne si ezahalile kwa Bakreste ba bañwi ba Maheberu?

¹⁷ Permafrost i swaniseza hande muinelo wa mutu y’o m’ata a hae a munahano a sa amiwi hahulu ka cisehelo mwa ku ikungela, ku hupula, ni ku itusisa zibo ye nepahezi. (Mu bapanye Mateu 13:5, 20, 21.) Mutu y’o ka mo ku kona fela ku bela u na ni buikoneli bwa ku ituta lituto ze sikai, ku kopanyeleza cwalo ni niti ya Bibele. N’a itutile “matatekelo a litaba za Mulimu” mi mane ne ku kana kwa ba kuli n’a fitile ku ze konisa za ku kolobezwa, sina ka mo ne ba ezelize Bakreste bao ba Maheberu. Nihakulicwalo, n’a kana a s’a ‘fiteli ku za ku petahala,’ kwa lika ze fita “litaba za makalelo a tuto ya Kreste.”—Maheberu 5:12; 6:1.

¹⁸ Mu like ku bona mwa munahano ba bañwi ba Bakreste bao ha ba li kwa mikopano kwamulaho k’o. Ne ba li teñi mi ne ba tona, kona kana minahano ya bona ne i amilwe mwa ku ituta? Kana ne ba hula ka cisehelo ni ka buniti kwa neku la zibo? Mwendi ne ku si cwalo. Ku ba ba si ka hula bao, ku amiwa kufi kamba kufi mwa mikopano ne ku ezahala mwa kalulo ye sebeza ye sisani, ka swanisezo, mi mwatasi ne ku inzi butungi bwa mubu o kangezi. Mibisi ya liniti ze tiile kamba ze tatezani ni ku fita ne i s’a koni ku kena kwa kalulo yeo ya permafrost ya mwa munahano.—Mu bapanye Isaya 40:24.

19. Ki ka nzila ifi Mukreste ya na ni yeloseli kacenu a kona ku ba sina Bakreste ba Maheberu?

¹⁹ I kona ku ba nto ye swana ni ku Mukreste kacenu. Hailif’o n’a ka ba teñi kwa mikopano n’a kana a s’a itusisa linako zeo kwa ku hula kwa neku la zibo. Ku cwañi ka za ku abana ku yona ka cisehelo? Ku yo munca kwa mubili kamba kwa moya ku ifana mwa ku bala litaba za liñolo kamba ku fa maikuto ka manzwi a mwa paragilafu ne ku kana kwa tokwa buikatazo bo butuna, ili nto ye bonisa ku sebelisa buikoneli bwa hae ko kunde ili ko ku babazeha. Kono Paulusi n’a bonisize kuli ku ba bañwi, ka ku beya mwa munahano nako ye se ba bile Bakreste, ba swanela ku fitelela muhato wa makalelo wa ku abana fela haiba ba bata ku zwelapili ba hula kwa neku la zibo.—Maheberu 5:14.

20. Ki ku itatubisisa kufi k’o yo muñwi ni yo muñwi wa luna a swanela ku eza?

²⁰ Haiba Mukreste ya na ni yeloseli ni kamuta a s’a ezi zwelopili ye fitelela ku bala fela timana ya Bibele kamba ku fa kalabo ye mutomo ye zwelela fela mwa paragilafu, ku kana kwa ba kuli ku abana kwa hae ku zwa fela mwa “kalulo ye sebeza” ya fahalimu ya munahano wa hae. Mikopano ni mikopano neikana ya eziwa mi mayemo a buikoneli bwa munahano wa hae inze a sa li mwa muinelo wa ku kangela, ha lu zwelapili mwa swanisezo ya luna ya permafrost. Lu swanela ku ipuza kuli: ‘Kana ni ku na ku cwalo? Kana ni tuhelezi mufuta o muñwi wa permafrost kuli u tahe ku na? Ni y’a mamela ni ku tabela cwañi se ni ituta mwa munahano?’ Mane nihaiba lu s’a tabeli hande likalabo za luna za ka busepahali, lwa kona ku kalisa cwale k’u nga mihato ya ku hula kwa neku la zibo.

21. Ki mihato ifi ye ne i buhisanwi kwa makalelo ye ne mu ka sebelisa mwa ku itukiseza kamba ku fumaneha kwa mikopano?

²¹ Ka buñwi lwa kona ku sebelisa liakalezo ze mwa paragilafu 8. Ku si na taba ni kuli se lu swalisani ni puteho ka butelele bwa nako ye kuma kai, lwa kona ku ikatulela ku fitela kwa buhulu ni kwa zibo ye tuna ni ku fita. Ku ba bañwi seo si ka talusa ku itukiseza mikopano ka mukwa wa buikatazo bo butuna ni ku fita, mwendi ili ku zusulusa miezezo ye ne i latelelwa lilimonyana kwamulaho k’o kono ili yeo ne i felile hanyinyani-hanyinyani. Ha mu nze mu itukiseza, mu like ku bona kuli lisupo ze tuna ki lifi ni ku utwisisa mañolo a sienyi a’ itusiswa mwa ku hulisa sikuka sa kutwisiso. Mu bate mubonelo kamba lineku lifi kamba lifi le linca mwa litaba ze itutiwa. Ka ku swana, mwahal’a mukopano, mu like ku sebelisa ku mina luli liakalezo ze bulezwi mwa liparagilafu 10 ni 11. Mu like ka t’ata ku ba ni mamelelo mwa munahano, inge ba ba buluka munahano wa mina u futumala. Seo si ka hanisa tengamo ifi kamba ifi ya ku kalisa kwa muinelo wa “permafrost”; bona buikatazo bwa ka ku ikatulela b’o hape bu ka shengununa muinelo ufi kamba ufi wa “ku kangela” o ne u ka be u tahile kwa makalelo.—Liproverbia 8:12, 32-34.

Zibo, ki Nto ye Tusa mwa ku Tahisa Siselo

22. Lu ka fumana cwañi tuso haiba lu sebeleza ku ekeza kwa zibo ya luna?

²² Lu ka tuseha cwañi luna ka butu haiba lu sebeleza muinelo w’o wa ku hula kwa neku la sishemo se si si ka libelelwa ni zibo ya ku ziba Mulena ni Mupilisi wa luna Jesu Kreste? Ka ku eza buikatazo bwa ka tokomelo bwa ku buluka m’ata a munahano wa luna a nze a na ni mamelelo, a itukisize ku ikungela zibo, lipeu za liniti za Bibele ze nca ni ze tatezani hahulu li ka toma mibisi ye tungile, mi kutwisiso ya luna i ka ekezeha ni ku fita fa ku ba ye inelela. I ka bapanyezwa ku sa n’a bulezi Jesu mwa swanisezo i sili ka za lipilu za luna. (Luka 8:5-12) Lipeu ze wela fa mubu o munde li kona ku tahisa mibisi ye tiile ya ku tiisa limela ze tahisa se siñwi ni ku beya muselo.—Mateu 13:8, 23.

23. Ki lifi ze zwa mwateñi ze kona ku taha haiba lu beya kwa pilu 2 Pitrosi 3:18? (Makolose 1:9-12)

²³ Swanisezo ya Jesu ne i bat’o ba ye fapahana, niteñi ze zwa mwateñi ze nde ne li swana ni zeo Pitrosi n’a sepisize: “Kabakala zeo, mina, mu ikataze hahulu kuli kwa tumelo ya mina mu ekeze mata; kwa mata mu ekeze zibo; . . . Kakuli zeo ha li li teñi ku mina, mi ili ka buñata, li ka mi tokwisa buzwa ni ku palelwa, mwa ku beya miselo mwa zibo ya Mulen’a luna Jesu Kreste.” (2 Pitrosi 1:5-8) Ee, ku hula kwa luna kwa neku la zibo ku ka lu tusa ku tahisa siselo. Lu ka fumana kuli ku ikungela zibo ye ñata ku ka ba ko ku nyakalalisa ni ku fita ka nako kaufela. (Liproverbia 2:2-5) Mu ka hupula ka bunolo ze mu ituta mi li ka ba ze na ni tuso ha mu nze mu luta ba bañwi kuli ba be balutiwa. Kacwalo ka nzila yeo hape, mu ka tahisa siselo ni ku fita mi mu ka tisa tumbo ku Mulimu ni ku Mwan’a hae. Pitrosi n’a felize liñolo la hae la bubeli ka ku bulela kuli: “Mu hule kwa neku la sishemo, ni kwa neku la zibo ya Jesu Kreste Mulena ni Mupilisi wa luna. Ku yena ku be kanya, cwale, ni mwa linako ni linako. Amen.”—2 Pitrosi 3:18.

[Litaluso za kwatasi]

Kana Mw’a Hupula?

◻ Ki kabakalañi ha mu swanela ku ba ni cisehelo ka za ku ekeza zibo ya mina?

◻ Muituti wa Bibele yo munca u kona ku fumana cwañi tuso ye tuna ni ku fita mwa tuto ya hae?

◻ Ki kozi mañi ye mu bata ku pima, ka mo i swanisezwa ka mubu o kangezi kamita?

◻ Ki kabakalañi ha mu swanela ku ikatulela ku zwisezapili buikoneli bwa mina bwa ku ekeza kwa zibo?