BABANCA BABUZA KULI
Bibele Ikona Kunitusa Cwañi?—Kalulo 1: Kuziba Zeñata Mwa Bibele Yamina
“Nalikanga kuli nibale Bibele, kono nisabiswanga ki taba ya kuli Bibele ki buka yenani litaba zeñata hahulu!”—Briana, wa lilimo ze 15.
Kana ni mina kona momuikutwela cwalo? Taba ye yakona kumitusa!
Ki kabakalañi haniswanela kubala Bibele?
Kana kumibelanga taata kubala Bibele? Haiba ki cwalo, musike mwabilaela. Mwendi muunga kuli Bibele ki buka yenani makepe amañata-ñata ili yesina maswaniso, ili kushutana ni zemubuhanga fa TV kamba mwa mavidio!
Kono puzo ki ye: Hane mukafumana mukotana onani maluwo akale, kana nemusike mwabata kuziba zeinzi mwahali?
Bibele ni yona iswana sina mukotana onani maluwo akale. Mwa Bibele kunani litaba za butokwa zekona kumitusa kuba ni butali bwa kuziba
Mwakuezeza likatulo zende
Mwakupilisanela hande ni bashemi bamina
Mwakufumanela balikani babande
Mwakuitiiseza hamukatezi mwa munahano
Kono ki kabakalañi buka yakale hahulu cwalo haisa lutusa ni kacenu? Libaka ki la kuli “Liñolo kamukana liñozwi ka kususumezwa ki moya wa Mulimu.” (2 Timotea 3:16) Taba yeo italusa kuli kelezo yelufumana mwa Bibele izwa ku Mulimu yomunde hahulu.
Bibele ki mukotana onani maluwo abutokwa hahulu
Nikona kubala Bibele ka nzila yecwañi?
Nzila yeñwi ki kubala Bibele kuzwa kwa makalelo kuisa kwa mafelelezo. Kueza cwalo kukamitusa kuziba litaba ze mwa Bibele. Mwakona kubala Bibele ka linzila zeñata. Munyakisise mitala yemibeli:
Mwakona kubala libuka ze 66 za mwa Bibele ka kuya ka molitatamanela, ili kuzwa kwa Genese kuya kwa Sinulo.
Mwakona kubala Bibele ka kuya ka molitatamanela likezahalo zebulezwi mwateñi.
Tuso: Litaba zeekelizwe A7 za mwa Bibele ya Toloko ya Lifasi Lelinca libonisa mukoloko wa mone litatamanela litaba zeama bupilo bwa Jesu fa lifasi.
Nzila yabubeli ya momukona kubalela ka yona Bibele ki kuketa taba yelumelelana ni muinelo otaata omukopana ni ona. Ka mutala:
Kana mwatabela kufumana balikani babasepeha? Mubale likande la Jonatani ni Davida. (1 Samuele, likauhanyo 18-20) Hamunze mubala likande leo, mulemuhe mikwa yeminde yanaanani yona Davida ili yene tahisize atabelwe hahulu ki Jonatani.
Kana mwatabela kuziba zekona kumitusa kutula miliko? Mubale likande lelibonisa mo Josefa naatulezi muliko. (Genese, kauhanyo 39) Hamunze mubala likande leo, mulemuhe zenetusize Josefa kutula muliko.
Kana mwatabela kuziba moikona kumituseza tapelo? Mubale zeneezahezi ku Nehemia. (Nehemia, kauhanyo 2) Hamunze mubala likande leo, mubone mo kulapela nekutuselize Nehemia.
Tuso: Hamubala Bibele, mubone teñi kuli mu mwa sibaka sesikuzize ilikuli mukone kuisa mamelelo ku zemubala.
Nzila yabulaalu ya momukona kubalela ka yona Bibele ki kuketa taba kamba samu yeñwi, kuibala, mi kihona mukanyakisisa moimituseza. Hamulaho wa kubala, muipuze lipuzo zecwale ka zelatelela:
Ki kabakalañi Jehova hanaatahisize kuli taba ye iñolwe mwa Bibele?
Taba ye ibonisañi ka za mwainezi Jehova ni mwaezezanga lika?
Nikona kusebelisa cwañi litaba ze, mwa bupilo bwaka?
Tuso: Kuli mukone kubala Bibele kaufelaa yona, muñole lizazi lemubata kukalisa kubalanga Bibele kakuitusisa “Tomahanyo ya Kubala Bibele” yefumaneha fa webusaiti yaluna ya jw.org®.