Litibelelo za Paradaisi Li Sa Li Ze Buniti Ku Si Na Taba Ni Bukwenuheli Bwa Mutu

 1. Ka ku fita kwa nako, munna ni musali ba pili ba bonahala kai mi ki mwa sibaka sa muinelo o cwañi?

KU SE ku fitile nako. Munna ni musali ba pili ha ba s’a li mapunu ka nzila ye si na ñolamenyi. Ba apesizwe—liapalo ze telele za matalo a lifolofolo. Ba inzi kwa nde bukaufi ni munyako wa simu ye petehile ya Edeni. Mikokoto ya bona i fulalezi kwa simu. Ba talima kalulo ye fapil’a bona. Se ba bona fela ki mubu o si ka limiwa. Ka buniti luli fahalimw’a ona ha ku na mbuyoti ya Mulimu. Fapil’a bona ku konwa ku bonwa liseto ni miutwa. Kana le haki lona lifasi-mubu le ne ba filwe kuli ba li buse? Ee, kono munna ni musali ba pili cwale ha ba fumanehi kwande ka mulelo wa ku yandululela simu ya Edeni fahalimw’a kalulo ya mufuta o cwalo ye si ka babalelwa.

 2. Ki kabakalañi munna ni musali ha ba sa liki ku kena sinca mwa simu ya Paradaisi?

² Ka ku ba fa kalulo ya muinelo o cwalo o fapahana, ki kabakalañi ha ba sa fetuhi ni ku kena hape mwa simu ya Paradaisi? Ki akalezo ye bunolo, kono ha mu bone se si inzi kwamulaho wa bona kwa munyako wa simu. Libupiwa ze ne ba si ka bona ni kamuta kwa makalelo, nihaiba mwahal’a simu, likerubimi, ni mukwale o tuka mulilo o’ nze u izukuza ili ona ku si na ku yema. Munna ni musali ne ba si ke ba kona ni kamuta ku boloka zona zeo inze ba pila ni ku kena mwa simu!—Genese 3:24.

 3. Ki sifi se ne si ezahalile se si cincize ka butuna cwalo miinelo ya bo sinyalana ba pili?

³ Ki sifi se ne si ezahalile? Haki nto ya kunutu ili ye tatezani hahulu kuli mane ne i ka kakamalisa sayensi ka lilimo ze likiti-kiti. I talusizwe ka bunolo. Munna ni musali ba pili ne ba na ni ku iponela talelezo ya litibelelo ze makaza zeo musebezi wa Mulimu ne u beile fapil’a bona fa lizazi la linyalo la bona kono ili ka ku toma fa muinelo wa kuli ba utwe Ndat’a bona wa lihalimu mwa taba ye nyinyani ka ku fitisisa. Ku ipeya ku utwa kwa bona ka nzila ye petehile ne ku na ni ku beiwa fa tiko ka mulao u li muñwi wa kaniso ya sico: Ne ba sa lukeli ku ca muselo wa “kota ya ku ziba bunde ni bumaswe.” (Genese 2:16, 17) Haiba ne ba ka eza cwalo ka ku tula litaelo za Mulimu, ne ba ka shwa luli. Seo ki sona Adama, ka ku ba mupolofita wa Mulimu, na si bulelezi musal’a hae, sibupiwa sa butu se ne si li se sinyinyani kwa buhulu. Kono ka ku komokisa, yona na·chashʹ yeo, noha yeo, ne i hanile buniti bwa seo Mulimu na si bulelezi Adama mwa temuso ya Hae kuli kwa “kota ya ku ziba bunde ni bumaswe” ku si ke kwa ciwa. Noha ya kwasheka musali mwa ku lumela kuli ku loba mulao wa Mulimu ni ku ca kwa muselo o ne u hanisizwe ku ka mu tahiseza kuli a be sina Mulimu ni ku mu lukulula ku Mulimu mwa ku iketela se si nde ni se si maswe.—Genese 3:1-5.

Haki Taba Ye Li Litangu

 4, 5. Muapositola Paulusi u bonisa cwañi kuli taba ya kuli noha ne i pumile musali wa pili ne si litangu?

⁴ Ambwe? Kana i utwahala hahulu sina litangu, taba ya kwaikale ye si ka toma fa lisupo ze buniti mi kacwalo haki ye amuheleha mwa minahano ya batu ba ba hulile ba mwa lizazi la cwale? Batili, isiñi ka ku ya ka muñoli ili y’o za hae li sa balwa ka butuna, muñoli ya sepahala, muapositola ya n’a ketilwe ka nzila ye ipitezi, ya n’a zibile buniti bwa seo na si ñozi. Kwa puteho ya Bakreste ba ne ba hulile mwa muleneñi o ne u na ni butali bwa silifasi wa Korinte, yena muapositola y’o Paulusi na ñozi kuli: “Kono na saba kuli, sina noha ha i n’e pumile Eva ka mano a maswe a yona, mwendi maikuto a mina ni ona a ka sinyeha, a latehelwe ki niti ye ku Kreste.”—2 Makorinte 11:3.

⁵ Paulusi ni hanyinyani n’a si ke a supa kwa litangu, taba ya mbwashula, ni ku itusisa nto ya ku ikupulela ya mufuta o cwalo mwa ku koñomeka sisupo sa hae ku ba mwa Korinte, ili bao ne ba izibela hande hahulu matangu a bulapeli bwa sihedeni bwa Sigerike. Ka ku talusa ili ku zwelela mwa Mañolo a Siheberu, ili a n’a zibahalize sina “linzwi la Mulimu,” muapositola Paulusi a koñomeka kuli “noha . . . n’e pumile Eva ka mano a maswe a yona.” (1 Matesalonika 2:13) Ka ku zwelapili, ha n’a ñolezi muokameli wa Sikreste ili ya n’a filwe buikalabelo bwa ku “[swala] ka mata mutala wa litaba ze pilisa,” muapositola Paulusi n’a bulezi kuli: “Adama u bupilwe pili, Eva mwamulaho. Hape Adama hasi yena ya pumilwe; kono musali a man’o pumiwa a tahisa foso.”—2 Timotea 1:13; 1 Timotea 2:13, 14.

 6. (a) Bufosi bwa Adama ku Mulimu bu fapahana cwañi ni bwa le bwa musali? (b) Ki kabakalañi ha lu kona ku ba ni buniti bwa kuli musali na si ka ipupela litaba ka za noha?

⁶ Ku pumiwa kwa musali ki noha ki taba ye buniti, isiñi litangu, sina mane ze zwile mwa ku sa utwa kwa hae ka ku ca kwa kota ye ne i hanisizwe ha li li litaba ze buniti luli mwa maino a mufuta wa mutu. Hamulaho a ku foseza Mulimu, a coweza munn’a hae kuli a abane ni yena mwa ku ca, kono munna ha n’a cile haki ka libaka la kuli n’a pumilwe ka ku tala. (Genese 3:6) Piho ya ku fa kwa bona buikalabelo ku Mulimu hamulaho i talusa kuli: “Adama a li: ‘Musali y’o ni file kuli a ine ni na, ki yena ya ni file kwa kota, mi ni cile.’ [Jehova Mulimu] a li ku musali: ‘Kiñi s’o ezize?’ Musali a li: ‘Noha i ni pumile, mi ni cile.’” (Genese 3:12, 13) Musali n’a sa ipupeli litaba ka za na·chashʹ yeo, noha yeo, mi Jehova Mulimu na si ka nga kalabo ya musali kuli ki buhata, kamba litangu. N’a boni noha sina nto ye ne ili s’itusiso mwa ku puma musali kuli a fite fa ku Mu foseza, yena Mulimu ni Mubupi wa hae. Ne i ka ba nto ye li kashwau ku Mulimu kuli a bulele kwa neku la noha ye ne ili litangu fela.

 7. (a) Taba ye mwa Bibele i talusa cwañi muhato wa Mulimu wa katulo fahalimw’a noha? (b) Noha ye ne i pumile musali wa pili i kona ku puma nihaiba luna kamukwaufi? (Mu kopanyeleze cwalo ni taba ye bonisizwe fa litaluso za kwatasi.)

⁷ Ka ku talusa muhato wa katulo w’o Mulimu n’a u ngile kwa neku la noha yeo mwa simu ya Edeni, taba i li: “[Jehova Mulimu] a li ku noha: ‘Kakuli u ezize se, u kutilwe mwahal’a makomu kaufela, ni mwahal’a lifolofolo kaufela za mwa naha; u ka zamaya ka mba, mi u ka ca liluli ka mazazi kaufela a ku pila kwa hao. Ni ka beya toyano mwahal’a mina, ni wena ni musali, ni mwahal’a peu ya hao ni peu ya musali; peu yeo i ka ku pyata toho, wena u i lume fa lisito.’” (Genese 3:14, 15) Kuta ifi kamba ifi ye lukile i talimana ni litaba ze buniti luli ni ku tatuba bupaki ka sibili, isiñi matangu. Jehova Mulimu n’a sa ikezi siloshwe, kamba sitoto, ka ku isa katulo ya hae fahalimw’a noha ya ku ikupulela kono n’a fa katulo fahalimwa sibupiwa ka sibili, se ne si li teñi ili se ne si na ni mulatu. Ne i ka ba nto, ye sa sehisi, kono ye swabisa hahulu haiba noha ye swana yeo ne i ka lu puma ka ku ba ni muhupulo wa kuli ne ku si na noha ni ye kana, kuli ne li litangu fela, kuli ne i si na mulatu ni o mukana kwa neku la nto ifi kamba ifi ye fosahalile fa lifasi-mubu.a

 8. Ki katulo ifi yeo Mulimu na i file fahalimw’a musali, mi ki miinelo mañi ye fita fa ku ba teñi kwa bana ba hae ba basizana ni baikulu ba hae ba basizana?

⁸ Ka ku nga bupaki bwa musali bo bu ama noha sina taba ya niti, se si ñozwi se si ama musal’a munna si talusa kuli: “A li ku musali: ‘Mwa ku itwala kwa hao ni ka ekeza kwa butuku bwa hao hahulu-hulu, u ka pepa bana ka tata; litakazo za hao li ka ba ku munn’a hao, mi u ka buswa ki yena.’” (Genese 3:16) Ha ku na nto ni ye kana ya mufuta o cwalo ye ne i kopanyizwe kwa mbuyoti ya Mulimu fa linyalo la hae ku Adama, Mulimu ha n’a bulezi kuli: “Mu tahise lusika, mu ate, mu tale mwa lifasi.” (Genese 1:28) Musebezi o ne u fuy’ozwi ku bo sinyalana ba ne ba petehile ne u bonisa ku itwala hañata-ñata kwa neku la musali kono inze ku si na butata ni butuku bo butuna mwa ku indukwa mi ili ka ku tokwa ku hatelelwa ki munn’a hae. Katulo yeo ye ne i filwe fahalimw’a mulobi wa mulao yena musali ne i na ni ku ama bana ba hae ba basizana ni baikulu ba hae ba basizana mwa masika ni masika.

Mulao Wa Mulimu U Tunafazwa ki Katulo Fahalimw’a Adama

 9, 10. (a) Ki temuso ifi yeo Mulimu na i file ku Adama ka sibili, mi ki lifi ze ne li ka zwa teñi haiba Mulimu na k’a nga muhato wa ku taleleza katulo yeo? (b) Ki katulo ifi yeo Mulimu na i file fahalimw’a Adama?

⁹ Ki miinelo mañi, nihakulicwalo, yeo musali n’a na ni ku ipumana ku yona ni munna hae y’o n’a cowelize mwa ku eza bufosi? Ku yena munna yo, Mulimu ka ku nonga ku yena ka sibili na bulezi kuli: “Kono kota ya ku ziba bunde ni bumaswe, yona u si ke wa i ca; kakuli nako y’o i ca, u ka shwa luli.” (Genese 2:17) Kana Mulimu, Muatuli, n’a ka swala ka tata fa katulo ya ngambu ya mafelelezo a cwalo haiba Adama n’a ka ca fela siemba sa muselo? A mu hupule ka za se ne si ka taluswa ki muhato wa ku taleleza katulo yeo! Ne ku ka talusa ku kaulwa kwa tibelelo ye tabisa moyo yeo Adama ni Eva ne ba bile ni yona fa lizazi la linyalo la bona, tibelelo ya ku taza lifasi-mubu kamukana ka bana ba bona, ka mufuta wa mutu o petehile o yahile mwa paradaisi ya lifasi-mubu ku ya ku ile mwa buikangulo bwa bunca, mwa silikani sa kozo ni Mulimu wa bona ni Ndat’a bona wa lihalimu! Kaniti luli, Mulimu n’a si ke a paleliswa mulelo wa hae o makaza kwa neku la mufuta wa mutu ni kwa neku la lihae la mutu la lifasi-mubu ka ku nga muhato wa lifu la ka putako fahalimw’a bashemi ba butu ba pili ba mufuta wa mutu kaufela! Kono a mu teeleze kwa katulo ya bumulimu sina ha i bonisizwe fo ku sweu mwa taba ya Bibele:

¹⁰ “Ku Adama a li: ‘Kakuli u utwile linzwi la musal’a hao, mi wa ca kwa kota ye ne ni ku laezi, na li, “U si ke wa i ca,” kabakaleo lifasi li kutilwe kabakala hao; u ka ca za lona ka tata, ka mazazi kaufela a ku pila kwa hao. Li ka ku meliseza seto ni miutwa, mi u ka ca bucwañi bwa mwa naheñi. U ka ca buhobe ka mifufuzo ya pata ya hao, mane u kutele mwa mubu wo u zwisizwe ku ona; kakuli u liluli, mi u ka kutela mwa liluli.’”—Genese 3:17-19.

11. Ki lisupo mañi ze ama ku ipeya ku utwa ze fa mutala ka za ku swanela kwa katulo ya Mulimu ye ne i filwe fahalimw’a Adama?

¹¹ Katulo yeo ne i talusa ku atulelwa lifu kwa mutu ku si na taba ni ka mo ne i ka amela mulelo wa Mulimu wa ku ba ni paradaisi ya lifasi-mubu ye talizwe ka banna ni basali ba ba pila hamoho ka lilato ni mwa kozo mi ni ku lima ni ku babalela simu ya Paradaisi ya lifasi kamukana ku ya ku ile. Munna n’a teelelize kwa linzwi la musali mwa sibaka sa ku teeleza kwa linzwi la Mulimu le ne li mu taluselize kuli a si ke a ca kwa “kota ya ku ziba bunde ni bumaswe.” Mi haiba yena ka sibili na si ka ipeya ku utwa linzwi la Mulimu ni Mubupi wa hae, kana yena n’a ka zwelapili ku luta bana ba hae ku eza cwalo ku si na ku zwa mwa sikuka? Kana mutala wa hae ka sibili ne u ka ba yona taba ya ku ambolisana teñi mwa ku ba luta kuli ba ipeye ku utwa Jehova Mulimu?—Mu bapanye 1 Samuele 15:22.

12, 13. (a) Sibi sa Adama ne si ka ama cwañi bana ba hae? (b) Ki kabakalañi Adama ha n’a sa swaneli ku pila ku ya ku ile mwa Paradaisi kamba nihaiba fa lifasi-mubu ka sibili?

¹² Kana bana ba Adama ne ba ka kona ku buluka mulao wa Mulimu ka nzila ye petehile, sina yena ha n’a sa li mwa bupetehi bwa butu ha n’a konile ku eza cwalo? Bakeñisa musebelezo wa milao ya sihozo, kana yena n’a si ke a hozisa bana ba hae bufokoli ni tengamo ya ku sa teeleza kwa linzwi la Mulimu ni ku teeleza kwa linzwi la u sili? Litaba ze buniti za kwaikale li fa likalabo kwa lipuzo ze.—Maroma 5:12.

¹³ Mutu wa mufuta o cwalo ili y’o, bakeñisa sibupiwa sa butu, n’a fulalezi ku ipeya ku utwa Mulimu mwa ku bonisa lilato le li petehile ku Mulimu kana n’a na ni tukelo ya ku pila ku ya ku ile mwa Paradaisi kamba nihaiba fa lifasi-mubu ka sibili? Kana luli ne i ka ba nto ye si na kozi ku mu tuhelela kuli a pile ku ya ku ile fa lifasi-mubu? Kana ku tuhelelwa kwa hae kuli a pile ku ya ku ile fa lifasi-mubu mwa bufosi bwa hae ne ku ka tunafaza mulao wa Mulimu ni ku bonisa katulo ya Hae ye lukile ka ku fitisisa, kamba kana ne i ka luta kashwau kwa mulao wa Mulimu ni ku talusa kuli linzwi la Mulimu ha li sepahali?

Ku Lelekwa Mwa Simu ya Edeni

14. Taba ye mwa Bibele i talusa cwañi muhato wa Mulimu fahalimw’a Adama ni musal’a hae?

¹⁴ Taba ye mwa Bibele i lu taluseza nzila yeo ka yona Mulimu n’a zamaisize litaba ze: “[Jehova] Mulimu a ezeza Adama ni musal’a hae likubo za matalo, mi a ba apesa zona. [Jehova] Mulimu a li: ‘A mu bone, mutu s’a fetuhile sina yo muñwi wa luna bakeñisa ku ziba bunde ni bumaswe; mi cwale a ka swana a isa lizoho la hae, a koyola kwa kota ya bupilo, a ca mi a pila kamita.’ Kabakaleo [Jehova] a mu leleka mwa simu ya Edeni, kuli a y’o lima mubu w’a zwisizwe ku ona. A leleka mutu cwalo mi, kwa neku la upa la simu ya Edeni, a beya likerubimi ze na ni lilumo le li benya, le li zukuziwa kwa maneku kaufela, ku tiba nzila ye ya kwa kota ya bupilo.”—Genese 3:21-24.

15. (a) Mulimu na bonisize cwañi mamelelo kwa neku la maikuto a maswabi ao Adama ni musal’a hae ne ba bile ni ona bakeñisa ku ba mwa mapunu? (b) Bo sinyalana ba butu ba pili ne ba lelekilwe kamukwaufi mwa simu ya Edeni? (c) Ki miinelo mañi ye fapahana yeo Adama ni musal’a hae ne ba talimani ni yona kwa nde a simu ya Edeni?

¹⁵ Muatuli wa bumulimu n’a bonisize mamelelo fa maikuto a maswabi ao baezalibi bo Adama ni musal’a hae cwale ne ba bile ni ona bakeñisa ku ba mwa mapunu. Ka nzila ye si ka taluswa, n’a ba ezelize liapalo ze telele za matalo mwa sibaka sa litino za matali a feiga ze ne ba ikezelize ka ku a ngungahanya ni ku itama mwa liteka. (Genese 3:7) Liapalo za matalo ne li k’a nga nako ye telele mi ne li ka ba sileleza hahulu kwa liseto ni miutwa ni lika ze ñwi ze holofaza kwa nde a simu ya Edeni. Bakeñisa ku ba ni lizwalo le li maswe hamulaho a ku eza sibi, ne ba likile ku ipata mwahal’a likota za simu ya Edeni kuli ba si ke ba bonwa ki Mulimu. (Genese 3:8) Cwale, hamulaho a ku atulwa, ne ba ikutwile ku ba ni mufuta wa sineneketo ya bumulimu mwa ku lelekiwa mwa simu ki Mulimu. Ne ba lelekezwi kwa neku la upa, mi hañi-hañi ba ipumana kwande a simu, ba lunduzwi ku yona ku ya ku ile. Cwale ne ba si ke ba sebeza mwa ku yandulula yona simu yeo ni ku yandululela miinelo ya yona ya Paradaisi kwa mafelelezo a lifasi-mubu. Ku zwa cwale ni ku ya cwalo kwapili, ne ba ka ca sico se si zwelela kwa likota za mwa naheñi, kono ne si si ke sa ba konisa ku pila ku ya ku ile mwa bupilo bwa butu. Ne ba kauzwi kwa “kota ya bupilo.” Hamulaho a ku fita kwa nako—ya butelele bo bu fita kai?—ne ba lukela ku shwa!

Mulelo Wa Jehova Wa Kwa Makalelo Ha U Tulwi

16. Ki sifi seo Mulimu na si ka lela ku si eza, mi ki kabakalañi?

¹⁶ Kana Mulimu cwale n’a lelile ku felisa lifasi-mubu, hamohocwalo ni kweli ni lizazi ni linaleli, mwa timezo ya nañungelele bakeñisa kuli zona libupiwa ze peli ze za liluli li ezize sibi ku yena? Haiba n’a ka eza nto ya mufuta o cwalo, kana se ne si si ke sa talusa kuli u tuzwi mwa mulelo wa hae o benya, ka libaka fela la se ne si kalisizwe ki na·chashʹ? Kana noh’a-noha fela ya kona ku loba mulelo wa Mulimu kaufel’a ona? N’a tomile mulelo wa hae ku Adama ni Eva fa lizazi la linyalo la bona ha n’a ba fuy’ozi ni ku ba taluseza seo mulelo wa hae ne u li sona kwa neku la bona: ku taza lifasi-mubu kamukana ka mufuta wa mutu o petehile, lifasi-mubu kaufel’a lona inze li busiwa ka bupetehi bwa simu ya Edeni, mi mufuta wa mutu kaufela inze u busa ka kozo fahalimw’a bupilo bwa libupiwa ze kwatasi fa lifasi-mubu ni mwa mezi a lona. Pono ye ngwelukile ya mulelo wa Mulimu o petilwe, ili nto ya n’a lelile ka ku eza tukiso ya musebezi wa mazazi a silezi a pupo mwahal’a nako ya lilimo ze likiti-kiti! Kana ona mulelo w’o o swanelwa ki tumbo cwale u siyala inze u si ka talelezwa ka libaka fela la noha ni bulikangate bwa bo sinyalana ba butu ba pili? Batili ni hanyinyani!—Mu bapanye Isaya 46:9-11.

17. Ki sifi seo Mulimu n’a tundamezi ku si eza ka ku ama kwa lizazi la busupa, mi kacwalo lizazi le li ka fela kamukwaufi?

¹⁷ Ne li sa li lizazi la pumulo, lizazi la busupa, la Jehova Mulimu. Na tundamezi ku fuy’ola lona lizazi leo mi n’a li ezize le li kenile. Na si ka tuhelela nto ifi kamba ifi kuli i li ezise ku ba lizazi le li kutilwe, mi sikuto sifi kamba sifi se ne si ka lelwa ki mutu ufi kamba ufi kuli si be fahalimw’a lizazi leo la pumulo ya hae n’a ka nga muhato ni ku si fetula mbuyoti, ku ezisa lizazi kuli li fele ka ku fuy’olwa. Ne li ka siya lifasi-mubu kamukana sina sibaka se si kenile, ka ku eziwa kwa tato ya Mulimu fona fa fa lifasi-mubu sina mo i ezezwa kwa lihalimu, mi sona seo si ka ezwa ka lusika lwa batu ba ba petehile.—Mu bapanye Mateu 6:10.

18, 19. (a) Ki kabakalañi bana ba ba nyanda ba bo sinyalana ba butu ba pili ili baezalibi ha ba kona ku ba ni tabo? (b) Ki sifi seo likalulo ze taha za Tora ya ku Libelela li ka buhisana teñi?

¹⁸ Mulimu na si ka ikutwa ku zwafa. Na si ka tuhela mulelo wa hae. U tundamezi ku iponahaza ili yena sina Yena ya sepahala ka ku tala ya kona ku lela hamohocwalo ni ku taleleza ka ku tala seo a si lelile, ili ka ku ba ni tumbo ye swanela ku ili yena. (Isaya 45:18) Bana ba ba si ka petahala, ili ba ba mwa manyando ba bo sinyalana ba pili ba butu ba babeli ili ba baezalibi ba kona ku ba ni tabo ni ku talimela kwapili mwa ku talelezwa ka busepahali kwa mulelo wa Mulimu wa kwa makalelo ili ka ku ba ni tuso ya ku ya ku ile ku bona. Cwale, ku se ku fitile likiti-kiti za lilimo mwa lizazi la hae la pumulo, mi kalulo ya mafelelezo ya lizazi la hae ye ka ba ni mbuyoti ya hae ye ipitezi i lukela ku ba fakaufi. “Manzibwana” a lizazi la hae la pumulo a zamaya inze a fela, mi sina ka mo ne ku inezi mwa mazazi kaufela a silezi a pupo a’ felile, “musihali” u lukela ku taha. Mi “musihali” ha se u fitile fa masetela ni ku bonisa ka ku tala kwa bashalimeli ku petahala ko ku makaza kwa mulelo o sa cinci wa Mulimu, ku ka ba ko ku konahala ku beya ku ze ñolwa kuli: ‘Mi kwa ba manzibwana mi kwa ba kakusasana, ki lona lizazi la busupa.’ Ki tibelelo ye makaza luli!

¹⁹ Ze kaufela ki ze mbwetukisa ku li hupula! Mi mwa likalulo ze taha za Tora ya ku Libelela, ze ñata li ka bulelwa ka za litibelelo ze wabelisa za Paradaisi ze fapil’a batu ba ba ipeya ku utwa, ba ba lata mulao wa Mulimu.

[Litaluso za kwatasi]

Ki Sifi Se Ne Mu Ka Bulela?

◻ Ki kabakalañi bo sinyalana ba butu ba pili ha ne ba latehezwi ki lihae la bona la Paradaisi?

◻ Ki kabakalañi ha lu ziba kuli ku kwashekiwa kwa Eva ki noha ne si litangu?

◻ Ki katulo ifi yeo Mulimu n’a i bulezi fahalimw’a musali?

◻ Ki katulo ifi yeo Mulimu n’a i bulezi fahalimw’a Adama, mi seo ne si tunafalize cwañi mulao wa Mulimu?

◻ Ki kabakalañi Mulimu ha na si ka ikutwa ku zwafa ka ku ama kwa mulelo wa hae wa ku ba ni lifasi-mubu le li tezi ka batu ba ba petehile mwa Paradaisi?