‘U Ni Tatubisise Mulimu’

“U ni [tatubisise, NW] Mulimu, mi u zibe pilu ya ka; . . . U ni zamaise mwa nzila ya bupilo bo bu sa feli.”—SAMU 139:23, 24.

 1. Jehova u sebelisana cwañi ni batanga ba hae?

KAUFEL’A luna lu lata mutu ya sebelisana ni luna ku ba y’a utwisisa lika, y’a beya miinelo ya luna mwa munahano, y’a tusa ha lu eza mafosisa, ili mutu ya s’a bati ku luna nto ye fita ye lu kona ku eza. Jehova Mulimu u sebelisana ni batanga ba hae ka nzila ye cwalo. Samu 103:14 i bulela kuli: “Kakuli u ziba se lu bupilwe ka sona, u nz’a hupula kuli lu liluli fela.” Mi Jesu Kreste, y’o a swana Ndat’ahe ka ku petahala, u fa memo ye silikani ye: “Mu tahe ku na mina kamukana ba ba katezi, ba ba imezwi, mi ni ka mi imulula. Mu itwese coko ya ka [kamba, “Mu panwe hamoho ni na kwa coko ya ka,” litaluso za kwatasi], mi mu itute ku na; kakuli ni na ni musa ni pilu ye bunolo, mi mu ka fumanela mioya ya mina pumulo. Kakuli coko ya ka i bubebe, mi mulwalo wa ka ha u na bukiti.”—Mateu 11:28-30.

 2. Mu bonise fapahano ye mwa mubonelo wa Jehova ni wa batu ka ku ama ku (a) Jesu Kreste, ni kwa (b) balateleli ba Kreste.

² Mubonelo wa Jehova kwa batanga ba hae hañata ki o’ fapahana hahulu ku wa batu. U bona litaba ka mubonelo u sili mi u beya mwa munahano miinelo yeo ba bañwi ba s’a zibi se siñwi ka za yona. Jesu Kreste ha n’a li fa lifasi-mubu, n’a “nyazizwe, a fulalelwa ki batu.” Ba ne ba sa lumeli kuli ki yena Mesiya ne ba “si ka hupula se siñwi ka yena.” (Isaya 53:3; Luka 23:18-21) Niteñi, mwa meto a Mulimu, n’a li “Mwan’a [Mulimu] ya latwa,” ili ku y’o Ndat’ahe n’a bulezi kuli: ‘N’a ku katelwa.’ (Luka 3:22; 1 Pitrosi 2:4) Mwahal’a balateleli ba Jesu Kreste ku na ni batu ba ba nyazisezwa bakeñisa kuli ki babotana kwa lika za kwa mubili mi ba tiyela manyando a mañata. Niteñi, mwa meto a Jehova ni Mwan’a hae, ba ba cwalo ba kana ba fumile. (Maroma 8:35-39; Sinulo 2:9) Ki kabakalañi ha ku na ni fapahano ye cwalo mwa mubonelo?

 3. (a) Ki kabakalañi mubonelo wa Jehova kwa batu ba bañwi hañata ha u li o fapahana hahulu ku wa batu ka nañungelele? (b) Ki kabakalañi ha ku li kwa butokwa hahulu kwa neku la luna ku tatubisisa mutu y’o lu li yena mwahali?

³ Jeremia 11:20 i alaba kuli: ‘Jehova u tatuba lipio ni pilu.’ U bona se lu li sona mwahali, mane ni miinelo ya butu bwa luna ye patilwe kwa meto a ba bañwi. Mwa ku tatuba kwa hae, u koñomeka ka mutomo tulemeno ni miinelo ye butokwa kwa swalisano ye nde ni yena, ili ye na ni tuso ye inelela ku luna. Ku ziba seo kwa luna ki ko ku tisa hahulu buikolwiso; mi hape ku tahisa nahanisiso. Bakeñisa kuli Jehova u fa mamelelo ku seo lu li sona mwahali, ki kwa butokwa ku luna ku tatuba seo lu li sona mwahali kuli lu fumanehe ku ba batu bao a bata mwa lifasi la hae le linca. Linzwi la hae li lu tusa ku eza tatubisiso ye cwalo.—Maheberu 4:12, 13.

Mihupulo ya Mulimu ki Ye Minde Hakalo!

 4. (a) Ki sika mañi se ne si susuelize walisamu ku zibahaza kuli mihupulo ya Mulimu ne li ye minde ku yena? (b) Ki kabakalañi ha i swanela ku ba ye minde ku luna?

⁴ Hamulaho wa ku fa nahanisiso ye tuna fa butuna ni butungi bwa zibo ya Mulimu ya ku ziba batanga ba hae, hamohocwalo ni buikoneli bwa Mulimu bo bu zwile mubano bwa ku fa tuso ifi kamba ifi ye ne ba kana ba tokwa, walisamu Davida n’a ñozi kuli: “Mihupulo ya hao Mulimu, hasi mo i ni fitela!” (Samu 139:17a) Mihupulo yeo, ili ye sinuzwi mwa Linzwi la hae le li ñozwi, ki ye pahami hahulu ku fita nto ifi kamba ifi ye zwelela kwa batu, ku si na taba ni kuli mihupulo ya bona neikana ya bonahala ku ba ni zibo ye cwañi. (Isaya 55:8, 9) Mihupulo ya Mulimu i lu tusa ku buluka mamelelo ya luna i tomile fa lika ze butokwa luli mwa bupilo ni ku ba ni tukufalelo mwa sebelezo ya hae. (Mafilipi 1:9-11) I lu bonisa ka mwa ku bonela litaba ka nzila yeo Mulimu a li bona ka yona. I lu tusa ku italima ka ku sepahala, ku itumelela ka za mutu y’o lu li yena luli mwa pilu. Kana mwa tabela ku eza seo?

 5. (a) Ki nto mañi yeo Linzwi la Mulimu li lu susueza ku i babalela “ku fita lika kaufela”? (b) Taba ya mwa Bibele ye ama Kaine i kona ku lu tusa cwañi? (c) Nihailikuli ha lu mwatas’a Mulao wa Mushe, u lu tusa cwañi ku utwisisa se si tabisa Jehova?

⁵ Batu ba na ni tengamo ya ku koñomeka hahulu za kwande, kono Mañolo a lu eleza kuli: “Babalela pilu ya hao ku fita lika kaufela.” (Liproverbia 4:23) Ka liketelelo ze mutomo hamohocwalo ni mitala, Bibele i lu tusa ku eza seo. I lu bulelela kuli Kaine n’a ezize kezo kaufela ya ku fa sitabelo ku Mulimu hailif’o mwa pilu ya hae n’a tezi bunyemi, mi hamulaho ni sitoyo, kwa neku la munyan’a hae Abele. Mi i lu susueza ku s’a swana sina yena. (Genese 4:3-5; 1 Joani 3:11, 12) Ku yona ku ñozwi tokwahalo ya ku ipeya ku utwa ya mwa Mulao wa Mushe. Kono hape i koñomeka kuli tokwahalo ye tuna ka ku fitisisa ya Mulao ne li ya kuli ba ba lapela Jehova ba lukela ku mu lata ka pilu ya bona kaufela, munahano, moyo, ni m’ata; mi i bulela kuli ye tatama yeo kwa butokwa ki taelo ya kuli ba late muyahwa ni bona sina mo ba itatela.—Deuteronoma 5:32, 33; Mareka 12:28-31.

 6. Mwa ku sebelisa Liproverbia 3:1, ki lipuzo mañi ze lu swanela ku ipuza?

⁶ Kwa Liproverbia 3:1, ha lu susuezwi fela ku buluka litaelo za Mulimu kono ni ku ikolwisa kuli ku ipeya ku utwa k’o ki nto ye bonisa seo lu li sona luli mwa pilu. Lu tokwa ku ipuza ka buñwi kuli, ‘Kana ku cwalo kwa neku la ku ipeya ku utwa litaelo za Mulimu kwa ka?’ Haiba lu lemuha kuli mwa litaba ze ñwi susuezo kamba munahano wa luna w’a fokola—mi ha ku na ku luna ya kona ku bulela kuli h’a na koli—cwalo he lu tokwa ku buza kuli, ‘Ki sifi se ni eza kuli ni kondise muinelo w’o?’—Liproverbia 20:9; 1 Joani 1:8.

 7. (a) Nyazo ya Jesu kwa Bafalisi ya fa patalaza kwa Mateu 15:3-9 i lu tusa cwañi mwa ku babalela pilu ya luna? (b) Ki miinelo mañi ye neikana ya lu tokwa k’u nga mihato ye tiile ya ku twaeza hande munahano ni pilu ya luna?

⁷ Muta Bafalisi ba Sijuda ne ba ipumisize ku kuteka Mulimu kono ka nako ye swana ba nze ba hulisa kezo ye ne i susuezwa ki buitati, Jesu n’a ba nyazize hahulu sina baipi mi a bonisa kuli bulapeli bwa bona ne li bwa mbwashula. (Mateu 15:3-9) Jesu hape n’a lemusize kuli kwa neku la ku tabisa Mulimu, y’a bona pilu, haki ko ku likani ku pila bupilo bo bu bonahala fela kwande ku ba bwa muzamao o munde hailif’o, ka mulelo wa ku fumana munyaka wa za tobali, hape lu pihelela ku ikenya mwa minahano ye si ya muzamao o munde. Ne lu kana lwa tokwa k’u nga mihato ye mituna ilikuli lu twaeze hande munahano ni pilu ya luna. (Liproverbia 23:12; Mateu 5:27-29) Ku twaezwa hande ko ku cwalo kwa tokwahala hape haiba bakeñisa mubeleko wa luna wa silifasi, likonkwani za luna mwa tuto, kamba keto ya luna ya za ku itabisa, lu ba balikanyisi ba lifasi, ili ku li lumeleza ku lu tahiseza ku ba ni lipimo za lona. Ni kamuta lu si ke lwa libala kuli mulutiwa Jakobo u biza sina “babuki” bao ba ba ikunga kuli ki ba Mulimu kono ili ba ba bata ku ba balikani ba lifasi. Kabakalañi? Bakeñisa kuli “lifasi kamukana li lapalezi mwatas’a ya maswe.”—Jakobo 4:4; 1 Joani 2:15-17; 5:19.

 8. Kuli lu fumane tuso ka ku tala kwa mihupulo ye minde ya Mulimu, lu tokwa ku eza nto mañi?

⁸ Kwa neku la kuli lu fumane tuso ye tezi kwa mihupulo ya Mulimu fa litaba ze ni ku ze ñwi, lu tokwa ku buluka nako ya ku li bala kamba ku li utwa. Fahalimu a seo, lu tokwa ku ituta zona, ku bulela ka za zona, ni ku li fa nahanisiso ye tuna. Babali ba bañata ba Tora ya ku Libelela ba fumaneha kwa mikopano ya puteho ya Lipaki za Jehova kamita, ili k’o Bibele i buhisanwa. Ba yolisa nako ya lindongwamo ze ñwi ilikuli ba eze seo. (Maefese 5:15-17) Mi se ba fumana se si zwa ku zeo ki nto ye fita hahulu bufumu bwa kwa mubili. Kana ha mu ikutwi cwalo?

 9. Ki kabakalañi ba bañwi ba ba fumaneh’anga kwa mikopano ya Sikreste ha ba ez’anga zwelopili ya ka bubebe hahulu ku fita ba bañwi?

⁹ Nihakulicwalo, ba bañwi ba ba fumaneha kwa mikopano yeo ba eza zwelopili ya kwa moya ka bubebe hahulu ku fita mo ba ezeza ba bañwi. Ba sebelisa niti mwa bupilo bwa bona ka ku tala ni ku fita. Ki nto mañi ye tahisa seo? Hañata, muinelo o mutuna o tisa seo ki buikatazo bwa bona mwa tuto ya ka butu. Ba utwisisa kuli ha lu pili fela ka sico sa kwa mubili; sico sa kwa moya ka zazi ki sa butokwa ka ku swana fela ni ku ca sico sa kwa mubili kamita. (Mateu 4:4; Maheberu 5:14) Kacwalo ba lika ka t’ata ku sebelisa nihaiba nakonyana fela ye ñwi ka lizazi le liñwi ni le liñwi ba nze ba bala Bibele kamba lihatiso z’e i talusa. Ba itukiseza mikopano ya puteho, ku itutela cimo lituto ni ku bala mañolo. Ba eza nto ye fita ku bala fela taba; ba i fa nahanisiso ye tuna. Muitutelo wa bona u kopanyeleza ku nahana hahulu ka za ku ama k’o se ba ituta si swanela ku ba ni kona fa bupilo bwa bona luli. Mayemo a bona a kwa moya h’a nze a hula, ba fita fa ku ikutwa ka mwa n’a ikutwezi walisamu ya n’a ñozi kuli: “Hasi mo ni latela mulao wa hao! . . . Likelezo za hao za komokisa.”—Samu 1:1-3; 119:97, 129.

10. (a) Ki ka butelele bwa nako ye kuma kai ku zwelapili ku ituta Linzwi la Mulimu ha ku li ko ku tahisa se siñwi? (b) Mañolo a bonisa cwañi seo?

¹⁰ Ku si na taba ni kuli lu itutile Linzwi la Mulimu ka silimo si li siñwi, ze 5, kamba ze 50, ni kamuta ku eza cwalo ha ku fiti fa ku ba nto ye kuta-kutelwa ka bunolo fela—ha ku bi cwalo haiba mihupulo ya Mulimu ki ye minde hahulu ku luna. Ku si na taba ni buñata bwa zeo ufi kamba ufi wa luna a itutile mwa Mañolo, ku na ni ze ñata ze lu s’a zibi. “Mwa buñata bwa yona i eza palo ye kuma kai!” ki mwa n’a bulelezi Davida. “Ha ni ka lata ku i bala fo i kuma, i fita lishabati kwa buñata.” Ha lu koni ku bala mihupulo ya Mulimu. Ha ne lu ka bulela mihupulo ya Mulimu ka buñwi musihali kaufela mi lwa fita fa ku lobala lu nze lu eza cwalo, ha ne lu ka zuha kakusasana, ne ku ka fumaneha kuli ku sa na ni ze ñata za ku nahana teñi. Kacwalo, Davida n’a ñozi kuli: “Niha ni zuha fa buloko, ni sa li ni Wena.” (Samu 139:17, 18) Mwa nako kaufela ya ku ya ku ile ku ka ba ni ze ñata hahulu ze lu ka ba ni ku ituta ka za Jehova ni linzila za hae. Ni kamuta ha lu na ku fita fa sipimo sa ku ziba lika kaufela.—Maroma 11:33.

Ku Toya Seo Jehova a Toile

11. Ki kabakalañi ha ku li kwa butokwa ku s’a ziba fela mihupulo ya Mulimu kono hape ni ku abana maikuto a hae?

¹¹ Ku ituta Linzwi la Mulimu kwa luna haki kwa ka mulelo wa ku taza fela litoho za luna ka litaba za luli. Ha lu nze lu li tuhelela ku kena mwa lipilu za luna, hape lu kalisa ku abana maikuto a Mulimu. Seo ki sa butokwa hakalo! Haiba lu s’a tahisi maikuto a’ cwalo, ki sika mañi se ne si ka zwa mwateñi? Nihailikuli ne lu kana lwa kona ku bulela seo Bibele i bulela, niteñi, ne lu kana lw’a nga se si haniswa ku ba se si lakazeha, kamba ne lu kana lwa ikutwa kuli se si tokwahala ki mulwalo o mutuna hahulu. Ki taba ya niti kuli mane ni haiba lu toile se si fosahezi, ne lu kana lwa ba ni ndwa bakeñisa ku s’a petahala kwa butu. (Maroma 7:15) Kono haiba lu s’a ezi ka buikatazo bo bu buniti kuli lu tise seo lu li sona mwahali ka ku lumelelana ni se si lukile, kana lu kona ku libelela ku tabisa Jehova, “ya lika lipilu”?—Liproverbia 17:3.

12. Lilato la mayemo a bumulimu ni sitoyo sa mayemo a bumulimu ki za butokwa cwañi?

¹² Sitoyo se si na ni mayemo a bumulimu ki silelezo ye tiile hahulu kwa ku eza bufosi, sina fela ka m’o lilato le li na ni mayemo a bumulimu ha li tahisa ku eza se si lukile ku ba ko ku nyakalalisa. (1 Joani 5:3) Ka ku kuta-kutela Mañolo a lu susueza ku tahisa lilato hamohocwalo ni sitoyo. “Mina ba ba lata [Jehova, NW], mu toye bumaswe.” (Samu 97:10) “Mu toye bumaswe, mu kumalele bunde.” (Maroma 12:9) Kana lwa eza seo?

13. (a) Ki tapelo mañi ya Davida ye ama ku sinyiwa kwa ba ba maswe yeo lu lumelelana ni yona ka ku tala? (b) Sina ka mo ku boniselizwe mwa tapelo ya Davida, ki bomañi ba ba maswe bao n’a lapezi kuli Mulimu a ba sinye?

¹³ Jehova u bonisize hande-nde mulelo wa hae wa ku sinya ba ba maswe fa lifasi-mubu ni ku tisa lifasi le linca m’o ku k’a ina ku luka. (Samu 37:10, 11; 2 Pitrosi 3:13) Balati ba ku luka ba nyolelwa ku taha kwa nako yeo. Ba lumelelana ka ku tala ni walisamu Davida, ya n’a lapezi kuli: “Mulimu, kabe u ka bulaya ba ba maswe! A mu zwe ku na mina batu ba ba sulula mali. Kakuli ba ku bulela maswe, mi lila za hao li puma ka Libizo la hao.” (Samu 139:19, 20) Davida yena ka butu n’a si ka nyolelwa ku bulaya ba ba maswe ba ba cwalo. N’a lapezi kuli ku lifiswa misuha kwa bona ku tiswe ki Jehova. (Deuteronoma 32:35; Maheberu 10:30) Bao haki batu ba ne ba foselize Davida yena ka butu ka nzila ye ñwi. Ne ba bulezi maswe ka za Mulimu, ili ku bapalisa libizo la hae. (Exoda 20:7) Ka ku s’a sepahala, ne ba ipapatile ku mu sebeleza, kono ne ba itusisa libizo la hae mwa ku hulisa milelo ya bona. Davida n’a sa lati ba ne ba ketile ku ba lila za Mulimu.

14. Kana ku na ni batu ba ba maswe ba ba konwa ku tusiwa? Haiba ba teñi, ki kamukwaufi?

¹⁴ Ku na ni bolule b’a likiti-kiti ba batu ba ba s’a zibi Jehova. Ba bañata ba bona ka ku s’a ziba se siñwi ba eza lika zeo Linzwi la Mulimu li bonisa ku ba ze maswe. Haiba ba pihelela mwa nzila yeo, ba ka ba mwahal’a bao ba ba ka sinyeha mwahal’a ñalelwa ye tuna. Niteñi, Jehova h’a tabeli lifu la ya maswe, mi ni luna ha lu swaneli ku li tabela. (Ezekiele 33:11) Kamita ha ku na ni nako, lu lika ka t’ata ku tusa batu ba ba cwalo ku ituta linzila za Jehova ni ku li sebelisa. Kono ku cwañi haiba batu ba bañwi ba bonisa sitoyo se situna ku Jehova?

15. (a) Ki bomañi bao walisamu n’a talima kuli ki “lila”? (b) Luna kacenu lu kona ku bonisa cwañi kuli lu “toile” ba ba ikuhumuseza Jehova?

¹⁵ Ka ku ama ku bona bao, walisamu n’a bulezi kuli: “[Wena Jehova, NW], hasi mo ni ba toyezi ba ba ku toile! Hasi mo ni swabezi ka ba ba ikuhumuseza Wena! Ni ba toile ka sitoyo luli sa ku feleleza, ni ba talima kuli ki lila ku na.” (Samu 139:21, 22) Ki ka libaka la kuli ne ba toile hahulu Jehova Davida ha n’a b’a nga ka sitoyo se situna. Bakwenuheli ba mwahal’a bao ba ba bonisa sitoyo sa bona ku Jehova ka ku ikuhumuseza yena. Bukwenuheli, ka buniti fela, ki ku ikuhumuseza Jehova. Bakwenuheli ba bañwi ba ipapata ku ziba Mulimu ni ku mu sebeleza, kono ba hana lituto ni litokwahalo ze bonisizwe mwa Linzwi la hae. Ba bañwi ba ipapata ku lumela Bibele, kono ba hana kopano ya Jehova mi b’a nga muhato wa ku lika ku kwalela musebezi wa yona. Ha ba iketela ka bomu bumaswe bo bu cwalo hamulaho wa ku ziba se si lukile, bumaswe ha se bu tomile hahulu ku bona kuli mane bu ba muinelo o s’a konwi ku kauhanyiwa ku bona, f’o he Mukreste u lukela ku toya (ka ku ya ka kutwisiso ya mwa Bibele ya linzwi leo) ba ba ikenyize mwa bumaswe b’o ka mukwa wa ku s’a konwa ku zwisiwa teñi. Bakreste ba niti ba na ni maikuto a Jehova kwa neku la bakwenuheli ba ba cwalo; ha ba bati ku ziba ze ñata ka za mihupulo ya bakwenuheli. Ka ku fapahana, ba “swabezi” ba ba ikezize lila za Mulimu, kono ba siyela Jehova kuli a tise silomboti.—Jobo 13:16; Maroma 12:19; 2 Joani 9, 10.

Mulimu H’a Lu Tatubisisa

16. (a) Ki kabakalañi Davida ha n’a bata kuli Jehova a mu tatubisise? (b) Ki sika mañi se si li teñi ka za pilu ya luna seo lu swanela ku kupa Mulimu ku lu tusa ku si lemuha?

¹⁶ Davida n’a s’a bati ku swana ba ba maswe ka nzila ifi kamba ifi. Batu ba bañata ba lika ku pata seo ba li sona mwahali, kono Davida ka buikokobezo n’a lapezi kuli: “U ni tatubisise Mulimu, mi u zibe pilu ya ka; U ni like, mi u zibe mihupulo ya ka. U bone haiba ku na ni mukwa o muñwi o maswe ku na, mi u ni zamaise mwa nzila ya bupilo bo bu sa feli.” (Samu 139:23, 24) Ha n’a ama kwa pilu ya hae, Davida n’a s’a talusi silama sa mubili. Ka ku lumelelana ni taluso ya swanisezo ya pulelo yeo, n’a amile ku sa n’a li sona mwahali, mutu wa mwahali. Ni luna lu swanela ku bata kuli Mulimu a lu tatubisise mwa lipilu za luna ni ku lemuha haiba lu na ni litakazo, litato, maikuto, milelo, mihupulo, kamba lisusuezo lifi kamba lifi ze s’a swaneli. (Samu 26:2) Jehova u lu mema kuli: “Mwan’aka, ni fe pilu ya hao, mi meto a hao a tabele linzila za ka.”—Liproverbia 23:26.

17. (a) Mwa sibaka sa ku pata mihupulo ye bilaeza, ki sika mañi se lu swanela ku eza? (b) Kana kwa swanela ku lu komokisa ku fumana litengamo ze fosahezi mwa pilu ya luna, mi ki sika mañi se lu swanela ku eza ka za zona?

¹⁷ Haiba ku luna ku na ni mihupulo ifi kamba ifi ye butuku, ye bilaeza bakeñisa litakazo ze fosahezi kamba milelo ye fosahezi kamba kabakala muzamao o muñwi o maswe kwa neku la luna, f’o ka buniti fela lu bata kuli Jehova a lu tuse ku lukisa hande taba yeo. Mwa sibaka sa ku ñola kuli “mukwa o muñwi o maswe,” toloko ya Moffatt i itusisa pulelo ye li “nzila ye fosahezi”; The New English Bible i bulela kuli: “Nzila ifi kamba ifi ye wena swabisa [f’o kikuli, Mulimu].” Luna ka sibili ne lu si ke lwa utwisisa hande mihupulo ya luna ye bilaeza mi kacwalo ha lu zibi mwa ku bulelela but’ata bwa luna ku Mulimu, kono w’a utwisisa muinelo wa luna. (Maroma 8:26, 27) Ha ku swaneli ku lu komokisa haiba ku ba ni litengamo lifi kamba lifi ze maswe mwa pilu ya luna; niteñi, ha lu swaneli ku li lumeleza. (Genese 8:21) Lu swanela ku bata tuso ya Mulimu ya ku li yundisa ka ku tala. Haiba ka niti luli lu lata Jehova ni linzila za hae, lwa kona ku mu atumela kwa neku la tuso yeo lu na ni buikolwiso bwa kuli “Mulimu ki yo muhulu kwa lipilu za luna, mi u ziba litaba kamukana.”—1 Joani 3:19-21.

18. (a) Jehova u lu zamaisa cwañi mwa nzila ya bupilo bo bu s’a feli? (b) Haiba lu zwelapili ku latelela ketelelo ya Jehova, ki pabazo ifi ye nde ye lu kona ku libelela ku amuhela?

¹⁸ Ka ku lumelelana ni tapelo ya walisamu ya kuli Jehova a mu ise mwa nzila ya bupilo bo bu s’a feli, ka mo ku inezi fela, Jehova u etelela batanga ba hae ba ba ikokobeza, ba ba ipeya ku utwa. H’a ba eteleli fela mwa nzila ye kona ku talusa bupilo bwa nako ye telele kabakala kuli ha ba bulaiwi nako ya bona i si ka fita kale bakeñisa ku eza bumaswe kono hape ka nzila ye isa kwa bupilo bwa kamita. U lu bonisa hande ka za ku tokwa kwa luna muinelo o’ lifa libi wa sitabelo sa Jesu. Ka Linzwi la hae ni kopano ya hae, u lu fa litaelo ze butokwa hahulu kuli lu kone ku eza tato ya hae. U koñomeka ku luna butokwa bwa k’u nga muhato kwa tuso ya hae ilikuli mwahali lu fite fa ku ba batu bao lu ipala ku ba bona kwande. (Samu 86:11) Mi u lu susueza ka tibelelo ya buikangulo bo bu petehile, mwa lifasi le linca la ku luka hamohocwalo ni bupilo bo bu s’a feli ili zeo lu ka itusisa mwa ku mu sebeleza, yena Mulimu a nosi wa niti. Haiba lu zwelapili k’u nga muhato kwa ketelelo ya hae ka busepahali, yena, kacwalo, u ka lu bulelela mwa n’a bulelezi Mwan’a hae, kuli: ‘N’a ku katelwa.’—Luka 3:22; Joani 6:27; Jakobo 1:12.

Maikuto a Mina ki Afi?

◻ Ki kabakalañi mubonelo wa Jehova kwa batanga ba hae hañata ha u li o’ fapahana ku wa batu?

◻ Ki sika mañi se si kona ku lu tusa ku lemuha seo Mulimu a si bona h’a tatuba pilu ya luna?

◻ Ki mufuta mañi wa tuto ye lu tusa ku ituta litaba za luli ni ku babalela pilu ya luna?

◻ Ki kabakalañi ku ziba Mulimu ha ku li kwa butokwa mi sihulu ni ku abana maikuto a hae?

◻ Ki kabakalañi luna ka butu ha lu swanela ku lapela kuli: “U ni tatubisise Mulimu, mi u zibe pilu ya ka”?