Ku Fumana Sinotolo kwa Lilato la ku Tabela Mizwale

“Kwa . . . [buipeyo bwa bumulimu, NW] mu ekeze ku latana.”—2 PITROSI 1:5-7.

 1. Ki lifi le liñwi la mabaka a matuna le li tahisa kuli mikopano ya batu ba Jehova ibe linako ze tabisa cwalo?

KA NAKO ye ñwi mualafi ya n’a si yo muñwi wa Lipaki za Jehova n’a fumanehile kwa mukiti wa ku feza sikolo sa Watch Tower Bible School of Gilead kwa mwan’a hae wa musizana, ili k’o n’a amuhezi tuto ya bulumiwa. N’a tabile hahulu ka za sikwata sa batu ba ba tabile kuli mane n’a nahanile kuli ku lukela ku ba ni makulanu a manyinyani hahulu mwahal’a batu ba. Ki sika mañi se ne si ezisa sikwata seo ku ba se si tabile cwalo? Kwa neku la seo, ki sika mañi se si ezisa kuli ku kopana hamoho kaufela kwa batu ba Jehova, mwa liputeho, kwa mikopano ya mupotoloho, ni kwa mikopano ya sikiliti, ku be linako ze tabisa? Kana haki ku latana kwa sizwale k’o ba bonisana yo muñwi ku yo muñwi? Ku si na kakanyo ni ye kana, ku latana kwa mizwale ki libaka le liñwi ha ku bulezwi kuli ha ku na sikwata se siñwi sa bulapeli se si ikola, ku fumana tabo, ni buikolwiso mwa bulapeli sina mo ba li fumanela Lipaki za Jehova.

 2, 3. Ki manzwi afi a Sigerike a mabeli a’ ama mo lu swanela ku ikutwela ka za yo muñwi ku yo muñwi, mi a na ni miinelo ifi ye fapahana?

² Lu swanela ku libelela ku bona lilato le li cwalo la ku tabela mizwale bakeñisa manzwi a Pitrosi kwa 1 Pitrosi 1:22, a’ li: “Cwale mioya ya mina ha i kenisizwe ka ku utwa niti, kuli mu latane ni banabahabo mina, mu si na buikeziso, mu bone kuli mu latane hahulu, ka pilu ye sweu.” O muñwi wa miinelo ye mutomo ya linzwi la Sigerike le li tolokilwe fa sina ‘ku latana ni banabahabo mina’ ki phi·liʹa (lilato). Taluso ya lona i bata ku swana ni taluso ya a·gaʹpe, ili linzwi leo kamita li tolokiwa sina “lilato.” (1 Joani 4:8) Hailif’o lilato la ku tabela mizwale ni lilato ka nañungelele hañata li itusiswa ka ku s’a fapahana, li na ni miinelo ye ipitezi. Ha lu swaneli ku li lyanganisa, sina mo ba ezeza batoloki ba bañata ba Bibele. (Mwa taba ye ni ye tatama, lu ka buhisana le liñwi ni le liñwi la ona manzwi ao.)

³ Ka ku ama kwa fapahano ye mwahal’a manzwi a mabeli ao a Sigerike, muituti yo muñwi n’a lemuhile kuli phi·liʹa “ku si na kakanyo ki linzwi la silikani ni ku utwana ni ku tabelana.” Kwa lineku le liñwi, a·gaʹpe li ama hahulu munahano. Kacwalo hailif’o lu bulelelwa ku lata (a·gaʹpe) lila za luna, ha lu ba fi lilato la ku ba tabela. Ki kabakalañi? Kabakala kuli “litwaelano ze maswe li sinya mikwa ye minde.” (1 Makorinte 15:33) Nto ye ñwi ye bonisa kuli ku na ni shutano ki manzwi a muapositola Pitrosi a’ li: ‘Kwa . . . ku lata mizwale kwa mina mu ekeze lilato.’—2 Pitrosi 1:5-7, NW; mu bapanye Joani 21:15-17.a

Mutala wa Lilato la ku Tabela Mizwale Le Li Ipitezi Hahulu

 4. Ki kabakalañi Jesu ni Joani ha ne ba tabelana ka mukwa o ipitezi?

⁴ Linzwi la Mulimu li lu fa mitala ye minde ye sikai ya lilato la ku tabela mizwale le li ipitezi hahulu. Kona ku tabelana ko ku ipitezi k’o haki ko ku tiswa ki maikuto a mañwi a ka sipundumukela kono ku tomile fa ku itebuha tulemeno to tu zwile mubano. Ku si na kakanyo mutala o zibwa hande ka ku fitisisa ki wa ku tabela k’o Jesu Kreste n’a na ni kona ku muapositola Joani. Ku si na kakanyo, Jesu Kreste n’a na ni lilato la ku lata mizwale kwa balutiwa ba hae ba ba sepahala kaufela, mi seo ne li ka libaka le linde. (Luka 22:28) Nzila ye ñwi ya n’a bonisize seo ne li ka ku tapisa mautu a bona, mi kacwalo ili ku ba fa tuto ya buikokobezo. (Joani 13:3-16) Kono Jesu n’a tabela Joani ka mukwa o ipitezi, ili ku tabela k’o Joani a talusa ka ku kuta-kutela. (Joani 13:23; 19:26; 20:2) Mane sina fela Jesu ha n’a na ni libaka la ku bonisa lilato la ku tabela balutiwa ba hae ni baapositola ba hae, Joani ka mo ku kona fela ku bela n’a file Jesu libaka la ku mu tabela ka mukwa o ipitezi bakeñisa ku itebuha Jesu kwa hae ko ne ku tungile ni ku fita. Lu kona ku bona seo ku ze ñozwi za Joani, ili Liñolo la hae la Evangeli hamohocwalo ni mañolo a hae a’ buyelezwi. Ki ka buñata cwañi a talusa lilato mwa mañolo ao! Ku itebuha ko kutuna hahulu kwa Joani kwa tulemeno twa kwa moya twa Jesu ku bonwa ku sa n’a ñozi kwa Joani likauhanyo 1 ni 13 ku isa 17, hamohocwalo ni ku ama ka ku kuta-kutela k’o a eza kwa ku ba teñi kwa Jesu pili a si ka t’o ba kale mutu wa fa lifasi-mubu.—Joani 1:1-3; 3:13; 6:38, 42, 58; 17:5; 18:37.

 5. Ki sifi se si konwa ku bulelwa ka za ku tabelana ko ku ipitezi k’o Paulusi ni Timotea ne ba na ni kona yo muñwi ku yo muñwi?

⁵ Ka ku swana, ne lu si ke lwa bata ku libala ku tabelana ko ku ipitezi k’o muapositola Paulusi ni mulikan’a hae wa Sikreste Timotea ne ba bile ni kona yo muñwi ku yo muñwi, ili k’o, ka buniti fela, ne ku tomile fa ku itebuha kwa yo muñwi tulemeno twa yo muñwi. Ze ñozwi za Paulusi li na ni litaba ze nde ka za Timotea, ze cwale ka ye: “Ha ni na wa bubeli, konji yena, wa pilu ye swana sina ya ka, ka ku tokomela za mina. . . . Mu ziba kuli ku sepahala kwa hae ku bonahalile ha n’a sebelize ni na za Evangeli, sina mwana ya tusana ni Ndat’ahe.” (Mafilipi 2:20-22) Ku ama kwa ka butu ko ku patulula mwa n’a tabelela Timotea ka mukwa o silikani ki ko ku fumaneha mwa mañolo a hae ku Timotea. Sina ka mutala, mu lemuhe 1 Timotea 6:20 ye li: “Wena Timotea, buluka he s’o beilwe mwa pabalelo ya sona.” (Mu bone hape 1 Timotea 4:12-16; 5:23; 2 Timotea 1:5; 3:14, 15.) Sihulu ku bapanyiwa kwa mañolo a Paulusi ku Timotea ni liñolo la hae ku Tite ku bonisa hande ku tabela ko ku ipitezi k’o Paulusi n’a na ni kona ku mutangana yo. Timotea ni yena u lukela ku ba ya n’a ikutwile ka nzila ye swana ka za silikani sa bona, sina ha ku konwa ku bonwa kwa manzwi a Paulusi kwa 2 Timotea 1:3, 4: “Ha ni liseli ku ku lapela mwa litapelo za ka, . . . ni shukezwi ku ku bona, ni nze ni hupula miyoko ya hao, ni li ni tale tabo.”

 6, 7. Ki maikuto mañi ao Davida ni Jonatani ne ba na ni ona yo muñwi ku yo muñwi, mi ki kabakalañi?

⁶ Mañolo a Siheberu ni ona a fa mitala ye minde, ye cwale ka w’ani wa Davida ni Jonatani. Lu bala kuli Davida ha s’a bulaile Goliati, “Pilu ya Jonatani ya kumalelana ni ya Davida, mi Jonatani a mu lata sina mw’a itatela i li yena” (1 Samuele 18:1) Ku si na kakanyo, buitebuho kwa mutala wa Davida wa ka cisehelo kwa neku la libizo la Jehova ni ku tokwa sabo kwa hae mwa ku ya kwa ku talimana ni sinata Goliati ne ku tahiselize Jonatani ku tabela Davida ka mukwa o ipitezi.

⁷ Jonatani n’a tabela hahulu Davida kuli mane n’a beile bupilo bwa hae mwa lubeta ka ku sileleza Davida ku Mulena Saule. Jonatani ni kamuta n’a si ka nyemiswa ki ku ketiwa ki Jehova kwa Davida kuli a be yena y’a ka ba mulena wa Isilaele ya tatama. (1 Samuele 23:17) Davida ni yena n’a tabela Jonatani ka butungi bo bu swana, mi ku tabela k’o ku iponelwa ku sa n’a bulezi ha n’a nze a lila fa lifu la Jonatani: “Ni mwa maswabi kabakala hao, Jonatani mwanesu; n’o ni tabisa hahulu; lilato la hao ku na, ne li le li komokisa, ne li fita lilato la basali.” Ka buniti fela, swalisano ya bona ne i na ni buitebuho bwa ka cisehelo.—2 Samuele 1:26.

 8. Ki basali bafi ba babeli ba ne ba bonisize ku tabelana ko ku ipitezi, mi ki kabakalañi?

⁸ Hape lu na ni mutala o muñwi o munde mwa Mañolo a Siheberu wa ku tabelana ko ku ipitezi kwa basali ba babeli, ili bo Naomi ni mukwenyan’a hae wa mbelwa yena Ruti. Mu hupule manzwi a Ruti ku Naomi a kuli: “U si ke wa ni pihelela kuli ni ku siye, mi ni tuhele ku ku latelela; kakuli ni ka ya k’o ka ya, ni ine m’o ka ina; sicaba sa hao ikaba sicaba sa ka, mi Mulimu wa hao ibe Yena Mulimu wa ka.” (Ruti 1:16) Kana ha lu lukeli ku fita fa kutwisiso ya kuli Naomi, ka muzamao wa hae ni ka ku bulela ka za Jehova kwa hae, n’a tusize ku tahisa kalabo ye na ni buitebuho yeo ya Ruti?—Mu bapanye Luka 6:40.

Mutala wa Muapositola Paulusi

 9. Ki sifi se si bonisa kuli Paulusi n’a fa mutala o munde ha ku amiwa kwa lilato la ku tabela mizwale?

⁹ Sina ha lu boni, muapositola Paulusi n’a tabela Timotea ka mukwa o ipitezi hahulu. Kono hape n’a tomile mutala o makalisa wa ku bonisa ku tabela mizwale ba hae ka mukwa o silikani ka nañungelele. N’a bulelezi maeluda ba kwa Efese kuli ‘n’a ngile myaha ye milalu a sa liseli ku eleza ka miyoko mutu ni mutu wa bona, busihu ni musihali.’ Kana k’o ki ku tabela mizwale ko ku silikani? Ku si na kakanyo ku cwalo luli! Mi ni bona ne ba na ni maikuto a’ swana ku Paulusi. Ha ba utwa kuli h’a ba s’a na ku mu bona hape, “ba swala ku lila kaufel’a bona, ba ikwiseza mwa mulala wa Paulusi, ba mu tubeta ka lilato.” (Likezo 20:31, 37) Kana leo ki lilato la ku tabela mizwale le li tomile fa buitebuho? Ee! Lilato la hae la ku tabela mizwale hape li bonwa mwa manzwi a hae a kwa 2 Makorinte 6:11-13 a’ li: “Mina Makorinte, mulomo wa luna u atami kabakala mina, pilu ya luna i atami. Ha mu si ka sinana ku luna, kono ko ku sinani ki mwa [lilato la, NW] mina. Mu lu kutiseze mo lu mi fezi,—ni bulela ni mina inge mu bana ba ka,—mu atame ni mina.”

10. Ki ku tokwa lilato la ku tabela mizwale kufi ko ne ku susuelize Paulusi ku talusa litiko za hae kwa 2 Makorinte kauhanyo 11?

¹⁰ Ka mo ku bonahalela fela, ba bañata ba mwa Korinte ne ba si na lilato la ku tabela mizwale ka buitebuho ku muapositola Paulusi. Kacwalo, ba bañwi ba bona ne ba bilaezi kuli: “Mañolo a hae a na ni buima ni mata; kono yena h’a li teñi ka mubili, ki mutu ya fokozi, mi ku bulela kwa hae ki nto ye nyazahala.” (2 Makorinte 10:10) Ki ka libaka leo Paulusi ha n’a amile kwa “baapositola [ba bona] ba batuna ku fita” mi n’a susuelizwe ku talusa ka za litiko zeo n’a tiyezi, sina ka mo li ñolezwi kwa 2 Makorinte 11:5, 22-33.

11. Ki bupaki mañi bo bu li teñi bo bu ama ku tabela kwa Paulusi kwa neku la Bakreste ba mwa Tesalonika?

¹¹ Lilato la ku tabela le li silikani la Paulusi ku bao n’a ezelize teñi bukombwa sihulu li bonahala mwa manzwi a hae kwa 1 Matesalonika 2:8 a’ li: “Ni luna cwalo, mwa ku mi shemuba, ne lu lakaza ku mi fa, isi Evangeli ya Mulimu fela, kono ni bona bupilo bwa luna; kakuli ki mina balatiwa ba luna luli.” Ka mo ku inezi fela, n’a na ni lilato le lituna hahulu kwa mizwale ba banca bao kuli mane ha n’a s’a koni ku libelela ka butelele bo bu ekezehile—n’a cisehezi hahulu ku ziba ka mo ne ba itiiseza mwa nyandiso—a luma Timotea, ili y’o n’a file piho ye nde yeo ne i tiisize hahulu Paulusi. (1 Matesalonika 3:1, 2, 6, 7) Insight on the Scriptures i bulela hande kuli: “Tamo ye silikani ya lilato la ku tabela mizwale ne i li teñi mwahal’a Paulusi ni ba n’a ezeza bukombwa.”

Buitebuho—Ki Sinotolo kwa Lilato la ku Tabela Mizwale

12. Ki mabaka mañi a’ li teñi a kuli lu bonise lilato la ku ba tabela le li silikani kwa mizwale ba luna?

¹² Ku si na kakanyo, sinotolo kwa lilato la ku tabela mizwale ki buitebuho. Kana batanga kaufela ba Jehova ba ba ineezi ha ba na tulemeno to lu itebuha, ili to tu zusulusa lilato la luna la ku tabela mizwale, ili ku lu ezisa ku ba tabela hahulu? Kaufel’a luna lu bata pili Mubuso wa Mulimu ni ku luka kwa hae. Kaufel’a luna lu sweli ku lwana ndwa-tuna ya ku lwanisa lila za luna ze talu: ili Satani ni badimona ba hae, lifasi le li maswe le li mwatas’a tamaiso ya Satani, ni litengamo za sihozo za buitati za nama ye mwa sibi. Kana ha lu swaneli k’u nga kamita mayemo a kuli mizwale ba luna ba sweli ku eza hande ka mo ba konela kaufela ka ku beya mwa munahano miinelo? Mañi ni mañi mwa lifasi u kwa lineku la Jehova kamba ku la Satani. Mizwale ni likaizeli ba luna ba ba ineezi ba kwa lineku la Jehova, ee, kwa lineku la luna, mi kacwalo ba swanelwa ki lilato la luna la ku ba tabela.

13. Ki kabakalañi ha lu swanela ku ba ni lilato le li silikani la ku tabela maeluda?

¹³ Ku cwañi ka za ku itebuha maeluda ba luna? Kana ha lu swaneli ku ba tabela hahulu mwa lipilu za luna ka ku beya mwa munahano nzila ye ba sebeza ka t’ata ka yona mwa licisehelo za puteho? Ka ku swana ni luna kaufela, ba na ni ku ipumanela ni ku fumanela mabasi a bona ze tokwahala. Ni bona ba na ni tamo ye lu na ni yona kaufel’a luna ya ku eza tuto ya ka butu, ku fumaneha kwa mikopano ya puteho, ni ku abana mwa bukombwa bwa mwa simu. Fahalimu a seo, ba na ni tamo ya ku itukiseza likalulo za tukiso ya mikopano, ku fa lingambolo za nyangela, ni ku talima but’ata bo bu taha mwa puteho, ili b’o ka linako ze ñwi bu ama lihora ze ñata za ku utwiwa kwa litaba za buatuli. Ka buniti fela, lu bata kuli lu “kuteke ba ba cwalo.”—Mafilipi 2:29.

Ku Bonisa Lilato la ku Tabela Mizwale

14. Ki mañolo afi a’ lu laela ku bonisa lilato la ku tabela mizwale?

¹⁴ Kuli lu tabise Jehova, lu lukela ku bonisa maikuto a’ silikani kwa balumeli sina luna, sina fela ka mwa n’a ezelize Jesu Kreste ni Paulusi. Lu bala kuli: “Mwa [lilato la ku tabela mizwale] mu tabelane hande yo muñwi ni yo muñwi.” (Maroma 12:10, Kingdom Interlinear) “Ka ku ama kwa [lilato la ku tabela mizwale], ha mu tokwi kuli lu mi ñolele, kakuli mina ka sibili mu lutilwe ki Mulimu kuli mu latane.” (1 Matesalonika 4:9, Int) “Haike [lilato la mina la ku tabela mizwale] li zwelepili.” (Maheberu 13:1, Int) Ka buniti fela Ndat’a luna wa kwa lihalimu w’a taba ha lu bonisa lilato la ku tabela mizwale kwa bana ba hae ba fa lifasi-mubu!

15. Ki lifi ze ñwi za linzila za ku bonisa ka zona lilato la ku tabela mizwale?

¹⁵ Mwa linako za baapositola Bakreste ne ba na ni mukwa wa ku lumelisana ka “ku itubeta ko ku kenile” kamba “ku itubeta ko ku na ni lilato.” (Maroma 16:16; 1 Pitrosi 5:14) Kaniti yeo ki poniso ya lilato la ku tabela mizwale! Kacenu, mwa likalulo ze ñata za lifasi-mubu, poniso ye swanela ni ku fita neikaba lumenyo lo lu silikani ka mukwa o buniti ni ku lumelisana mwa mazoho ka ku tiisa. Mwa linaha za Si-Latin, ze cwale ka Mexico, ku na ni ku lumelisa ko ku mwa muinelo wa ku kamatana, ili nto yeo ka buniti fela ili poniso ya lilato la ku tabelana. Lona lilato la ku tabelana le li silikani leo la mizwale bao ne li kana la ba le liñwi la mabaka ha ku na ni likekezeho ze tuna ze ezahala mwa linaha za habo bona.

16. Ki linako lifi ze nde ze lu na ni zona za ku bonisa lilato la ku tabela mizwale kwa Mandu a luna a Mubuso?

¹⁶ Ha lu kena mwa Ndu ya Mubuso, kana lw’a ez’anga buikatazo bo bu ipitezi bwa ku bonisa lilato la ku tabela mizwale? Seo si ka lu tiseza ku ba ni manzwi a’ susueza a ku bulela, sihulu ku ba ba bonahala ku shekesha lipilu. Lu bulelelwa kuli lu “tiise ba lipilu ze shekesha.” (1 Matesalonika 5:14) Ka buniti fela yeo ki ye ñwi ya linzila zeo lu kona ku bonisa ka zona silikani sa lilato la ku tabela mizwale. Nzila ye ñwi ye nde ki ya ku bonisa buitebuho kwa neku la ngambolo ye nde ya fa nyangela, kalulo ya tukiso ye zamaisizwe hande, buikatazo bo bunde bo bu ezizwe ki mubuleli wa muituti mwa Sikolo sa Bukombwa sa Teokratiki, ni ze ñwi cwalo.

17. Eluda yo muñwi n’a fumani cwañi lilato la ku tabelwa ki puteho?

¹⁷ Ku cwañi ka za ku mema ba bañwi ba ba fitana-fitana kwa mandu a luna kuli ba t’o ca lico kamba mwendi tuconyana fela hamulaho wa mukopano haiba ku sa li musihali? Kana ha lu swaneli ku tuhelela kelezo ya Jesu kwa Luka 14:12-14 kuli i lu zamaise? Ka nako ye ñwi muzwale ya n’a kile a’ ba mulumiwa n’a ketilwe ku ba muokameli ya zamaisa mwa puteho yeo ba bañwi kaufela ne li ba mushobo u sili. N’a lemuhile ku s’a fumaneha kwa lilato la ku tabela mizwale, kacwalo a eza litukiso za ku kondisa hande muinelo w’o. Kamukwaufi? La Sunda le liñwi ni le liñwi, n’a mema lubasi lu sili kwa sico. Silimo ha si yo fela, kaufel’a bona ne se ba mu bonisa lilato le li silikani la ku tabela mizwale.

18. Lu kona ku bonisa cwañi lilato la ku tabela mizwale kwa mizwale ni likaizeli za luna ba ba kula?

¹⁸ Haiba muzwale kamba kaizeli a kula, fa ndu kamba mwa sipatela, lilato la ku tabela mizwale li ka lu tahiseza ku zibisa ya kula y’o kuli lu na ni pabalelo. Kamba ku cwañi ka za ba ba pila mwa mandu a mo ku pila basupali? Ki kabakalañi ha ne lu si ke lwa eza ku pota kwa ka butu, ku ba ambolisa fa luwaile, kamba ku luma kadi ye bonisa maikuto a silikani?

19, 20. Lu kona ku bonisa cwañi kuli lilato la luna la ku tabela mizwale li atami?

¹⁹ Ha lu fa liponiso ze cwalo za lilato la ku tabela mizwale, lu kona ku ipuza kuli, ‘Kana lilato la ka la ku tabela mizwale ki le li na ni ketululo? Kana miinelo ye cwale ka mubala wa litalo, tuto, kamba liluwo la kwa mubili y’a susueza poniso ya ka ya lilato la ku tabela mizwale? Kana ni tokwa ku atama mwa lilato la ka la ku tabela mizwale, sina ka m’o muapositola Paulusi n’a susuelize Bakreste ba mwa Korinte kuli ba eze?’ Lilato la ku tabela mizwale li ka lu tahiseza ku bona mizwale ba luna ka nzila ye susueza, ili ku itebuha bona kwa neku la lisupo za bona ze nde. Lilato la ku tabela mizwale hape li ka lu tusa ku nyakalala ka zwelopili ya mizwale ba luna mwa sibaka sa ku i ñenehela.

²⁰ Lilato la ku tabela mizwale hape li swanela ku lu ezisa ba ba lemuha lika ka za ku tusa mizwale ba luna mwa bukombwa. Ku swanela ku ba sina mo i bulelela ye ñwi ya lipina za luna (Nombolo 51) kuli:

“Tusa ba ba fokola,

Kuli ka bundume ba bulele ni bona.

Mu si libali banana,

Mu ba tuse ba leleke bupyeha.”

21. Ki kalabo mañi ye lu kona ku libelela ha lu bonisa lilato la ku tabela mizwale?

²¹ Kacwalo lu si ke lwa libala kuli mwa ku bonisa lilato la ku tabela mizwale, sikuka seo Jesu n’a bulezi mwa Ngambolo ya hae ya fa Lilundu s’a sebeza: “Mu fane, mi mu ka fiwa; mu ka felwa mwa kubo ya mina, tikanyo ye nde, ye shetisizwe, ye katezwi, ye suluha. Kakuli tikanyo ye mu likanya ka yona, ki yona ye mu ka likanyezwa ni mina.” (Luka 6:38) Lu fumana tuso ha lu bonisa lilato la ku tabela mizwale, ili ku bonisa k’u nga hande ba ba li batanga ba Jehova sina luna. Kaniti luli tabo ki ya ba ba ikola ku bonisa lilato la ku tabela mizwale!

[Litaluso za kwatasi]

Ne Mu Ka Alaba Cwañi?

◻ Ki manzwi afi a Sigerike a’ ama maikuto a luna, mi a shutana cwañi?

◻ Ki sifi se si li sinotolo kwa lilato la ku tabela mizwale?

◻ Ki mitala ifi ya mwa Mañolo ye lu na ni yona ya lilato la ku tabela mizwale le li ipitezi?

◻ Ki kabakalañi ha lu swanela ku ba ni lilato le li silikani la ku tabela mizwale ba luna ni maeluda?

[Siswaniso se si fa likepe 23]

Muapositola Pitrosi n’a susuelize mizwale ba hae ku ekeza lilato la ku tabela mizwale kwa tumelo ya bona ni tulemeno to tuñwi twa Sikreste