Zemukona Kueza Kuli Mutusiwe Hahulu Hamunze Muituta Bibele

Kana mukile mwabata kueza musebezi omuñwi omutuna kono semuikutwa kuli utaata kuueza? Kuli mukone kueza musebezi wo, mwendi nemukalile kuueza hanyinyani-hanyinyani. Mwakona kueza nto yeswana niha mubata kukalisa kubala Bibele. Mwendi mwakona kuipuza kuli, ‘Nikakalela kai?’ Mwa tuto ye, lukanyakisisa lika zebunolo zemukona kueza ili zeka mitusa kuikola kubalanga Bibele ni kuituta yona.

1. Ki kabakalañi hamuswanela kubalanga Bibele zazi ni zazi?

Haiba mutu abala Bibele kamba “mulao wa Jehova” zazi ni zazi, ukaba ni tabo mi zaeza kaufela likakonda. (Mubale Samu 1:1-3.) Kuli kumibele bunolo kubalanga Bibele, mukale ka kuibalanga zazi ni zazi ka mizuzu isikai feela. Litaba zemuka ituta hamunze mubala Linzwi la Mulimu, likatahisa kuli mutabele hahulu kubalanga Bibele.

2. Kuli mutusiwe ki litaba zemubala mwa Bibele, ki lika mañi zemuswanela kueza?

Kuli mutusiwe ki litaba zemubala mwa Bibele, muswanela kukutumananga ni kunahanisisa zemusweli kubala. Kacwalo hamulaho wa kubala litaba mwa Bibele, muswanela “kukengeyela” zemubalile. (Joshua 1:8, litaluso ze kwatasi) Hamunze mubala, muipuze kuli: ‘Taba ye inilutañi ka za Jehova Mulimu? Niitutañi kwa taba ye? Nikona kuitusisa cwañi litimana ze kuli nituse babañwi?’

3. Mukona kufumana cwañi nako ya kubalanga Bibele?

Kana kumibelanga taata kufumana nako ya kubala Bibele? Buñata bwaluna kulubelanga taata kueza cwalo. Mueze momukonela kaufela ‘kuitusisa hande nako yamina.’ (Maefese 5:16) Mwakona kueza cwalo ka kutoma nako yemuka balanga Bibele zazi ni zazi. Babañwi bapakelanga kubala Bibele. Babañwi bona babalanga Bibele musihali, inge cwalo mwahalaa nako yebacanga batu lico za musihali. Mi babañwi bona babalanga Bibele manzibwana pili basika pumula kale. Mina mubona kuli ki nako ifi yende yemukona kubalanga Bibele?

MUBATISISE

4. Zekona kumitusa kuikola kubalanga Bibele

Kukona kumibela taata kukalisa kubalanga Bibele. Kono lwakona kukalisa kutabela kubalanga Bibele, sina mutu mwakona kukaliseza kutabela hahulu kuca lico zasika ca kale. Mubale 1 Pitrosi 2:2, mi kihona mukanyakisisa puzo yelatelela:

• Mubona cwañi, kana kubalanga Bibele zazi ni zazi kwakona kutahisa kuli mukale kuikolanga hahulu kuibala?

Mubuhe VIDIO kuli mubone zetusize babañwi kutabela kubalanga Bibele. Mi kihona mukanyakisisa lipuzo zelatelela.

VIDIO: Babanca Babatabela Hahulu Linzwi la Mulimu (5:33)

• Ki matata mañi ene bakopani ni ona babanca mwa vidio?

• Ki lika mañi zene batusize kubalanga Bibele?

• Nebaezizeñi kuli baikole kubalanga Bibele?

Zekona kumitusa kukalisa kubalanga Bibele:

• Muitusise Bibele yetolokilwe hande, ya mwa puo yemukona kuutwisisa hande. Mwakona kuitusisa Bibele ya Toloko ya Lifasi Lelinca haiba iteñi mwa puo yamina.

• Mukalise ka kubala litaba zemutabela hahulu. Mubone chati yeli “Mukalise Kubala Bibele.”

• Muñolange lisupo zemufumana mwa litaba zemubala. Muitusise chati yeli “Muñolange Lisupo” ye mwa hatiso ye.

• Muitusise JW Library^® app. Ka kuitusisa app yeo, mwakona kubala ni kuteeleza kwa litaba za mwa Bibele ka kuitusisa foni kamba lipangaliko zeñwi.

• Muitusise litaba zeekelizwe ze mwa Bibele ya Toloko ya Lifasi Lelinca. Likopanyeleza limapa, machati, ni litaluso za manzwi aitusisizwe mwa Bibele ili zeka mitusa kubala Bibele.

5. Muitukisezange tuto yamina ya Bibele

Mubale Samu 119:34, mi kihona mukaalaba puzo yelatelela:

• Ki kabakalañi hamutokwa kulapelanga pili musika bala kale Bibele kamba kuitukiseza tuto yamina ya Bibele?

Mukona kuezañi kuli mutusiwe hahulu ki tuto ya Bibele? Mwakona kuitukisezanga tuto yamina ka kuitusisa miezezo yelatelela:

1. Mubalange maparagilafu a makalelo a tuto.

2. Mubalange mañolo abonisizwe, ni kunyakisisa mwaswalisanela ni litaba ze mwa tuto.

3. Mulale manzwi kamba lipulelo zealaba puzo ni puzo; kueza cwalo kuka mitusa kutonyakisisa hande tuto yeo ni babaitutanga ni mina.

Kana mwaziba?

Lipaki za Jehova baitusisize Libibele zeshutana-shutana. Kono Bibele yeluitusisa hahulu ki Bibele ya Toloko ya Lifasi Lelinca bakeñisa kuli litaba ze mwateñi litolokilwe ka kunepahala, ka kuutwahala, mi libizo la Mulimu lifumaneha mwateñi hañata.—Mubone taba ya fa webusaiti yeli “Kana Lipaki za Jehova Banani Bibele Yabona?”

LITABA KA BUKUSWANI

Kuli mutusiwe hahulu ki Bibele, mutome nako yemuka ibalanga, mulapelange kuli muutwisise zemubala, mi muitukisezange tuto yamina ya Bibele.

Mulundulule

• Ki lika mañi zemutokwa kueza kuli mutusiwe hahulu ki Bibele?

• Ki nako mañi yende yemukona kubala ni kuituta Bibele?

• Ki kabakalañi hamutokwa kuitukisezanga tuto yamina ya Bibele?

MUBONE LITABA ZEÑWI

Mulundulule liakalezo zeñwi zekona kutahisa kuli mutusiwe hahulu hamunze mubala Bibele.

“Momukona Kutusezwa Hahulu ka Kubalanga Bibele” (Tawala ya Mulibeleli, No. 1 2017)

Munyakisise linzila zetaalu zekona kumitusa kubala hande Bibele.

“Bibele Ikona Kunitusa Cwañi?—Kalulo 1: Kuziba Zeñata Mwa Bibele Yamina” (Taba ya fa webusaiti)

Muitute zekona kumitusa kuikola kubala Bibele.

“Bibele Ikona Kunitusa Cwañi?—Kalulo 2: Muikole Kubala Bibele” (Taba ya fa webusaiti)

Mukupe batu bababalile Bibele ka nako yetelele kumifa liakalezo zeka mitusa kubala hande Bibele.

Tuto ya ka Butu Yetusa (2:06)

4. Muzwelepili kuambolanga ni Mulikanaa mina yomutuna

Lika zemitusize kuba mulikanaa Jehova ki kulapelanga ku yena ni kuituta Bibele. Lika zepeli zeo likona kumitusa cwañi kuli mane musutelele hahulu ku Jehova?

Mubale Samu 62:8, mi kihona mukanyakisisa puzo yelatelela:

• Ki licinceho mañi zemukona kueza ka za litapelo zemulapelanga kuli mutiise silikani samina ni Jehova?

Mubale Samu 1:2, mi kihona mukanyakisisa puzo yelatelela:

• Ki licinceho mañi zemukona kueza ka za momubalelanga Bibele kuli mutiise silikani samina ni Jehova?

Mukona kuezañi kuli mutusiwe hahulu ka nako yemueza tuto ya ka butu? Kuli mubone liakalezo zeñwi, mubuhe VIDIO, mi kihona mukanyakisisa lipuzo zelatelela.

VIDIO: Mukumalele ku Jehova ka Kuba ni Tuto ya ka Butu Yetusa (5:22)

• Kwa liakalezo zeluboni mwa vidio, ki liakalezo lifi zemukona kusebelisa?

• Ki litaba mañi zemutabela kuituta?