‘Mu Tise Lika Kaufela za Bulishumi mwa Ndu ya Pulukelo’

“Mu ni like ka seo, . . . nji ni si ke na mi tibululela mahaulo a kwa lihalimu.”—MALAKI 3:10.

 1. (a) Mwa lilimo za mwanda wa buketalizoho B.C.E., ki memo ifi ya n’a file Jehova kwa batu ba hae? (b) Mwa lilimo za mwanda wa pili C.E., ki sifi se ne si zwile mwa ku taha kwa Jehova kwa tempele ku t’o fa katulo?

MWA lilimo za mwanda wa buketalizoho B.C.E., Maisilaele ne ba bile ba ba s’a sepahali ku Jehova. Ne ba tuhezi ku fa lika za bulishumi mi ne ba tisize lifolofolo ze sa swaneli kwa tempele sina matabelo. Nihakulicwalo, Jehova n’a sepisize kuli haiba ne ba ka tisa lika kamukana za bulishumi mwa ndu ya pulukelo, n’a ka ba sululela mbuyoti ku fitela sibaka si taela. (Malaki 3:8-10) Ka lilimo ze bat’o ba ze 500 hamulaho wa f’o, Jehova, ka ku yemelwa ki Jesu sina yena numwana ya Hae ya bulikani, na tile kwa tempele mwa Jerusalema ku t’o fa katulo. (Malaki 3:1) Isilaele ka ku ba sicaba ne si fumanehile ku ba ni bufokoli, kono batu bao ka buñwi ba ne ba kutile ku Jehova ne ba fuy’ozwi ka butuna luli. (Malaki 3:7) Ne ba tozizwe kuli ba be bana ba kwa moya ba Jehova, pupo ye nca, “Isilaele wa Mulimu.”—Magalata 6:16; Maroma 3:25, 26.

 2. Malaki 3:1-10 ne i swanela ku ba ni ku talelezwa kwa yona kwa bubeli l’ili, mi ka ku swalisana ni seo lu memiwa ku eza nto mañi?

² Ha se ku fitile lilimo ze bat’o eza 1,900 hamulaho wa seo, ka 1914, Jesu na beilwe fa bulena sina Mulena wa Mubuso wa Mulimu wa mwa lihalimu, mi manzwi a’ buyelezwi a bumulimu a’ kwa Malaki 3:1-10 n’a se a li bukaufi ni ku talelezwa lwa bubeli. Ka ku ama ku yona kezahalo yeo ye nyangumuna, Bakreste kacenu ba memiwa ku tisa lika kamukana za bulishumi mwa ndu ya pulukelo. Haiba lu eza cwalo, ni luna hape lu ka ikola limbuyoti ku fitela sibaka si taela.

 3. Ki mañi ya n’a li numwana ya n’a lukisa nzila fapil’a Jehova (a) mwa lilimo za mwanda wa pili? (b) pili ndwa ya lifasi ya pili i si ka ezahala kale?

³ Ka ku ama ka za ku taha kwa hae kwa tempele, Jehova n’a bulezi kuli: “A mu bone, ni luma numwana wa ka, mi u ka lukisa nzila fapil’a ka.” (Malaki 3:1) Ka ku ba talelezo ya sona seo ya mwa lilimo za mwanda wa pili, Joani Mukolobezi na tile mwa Isilaele a kutaza ka za ku bakela libi. (Mareka 1:2, 3) Kana ne ku na ni musebezi wa ku lukisa lika kwa neku la ku taha kwa Jehova lwa bubeli kwa tempele ya hae? Ee. Ka mashumi-shumi a lilimo ndwa ya lifasi ya pili i si ka ezahala kale, Baituti ba Bibele ne ba bile teñi fa lifasi ba nze ba luta tuto ya niti ye mwa Bibele ni ku tisa fa ngandaleza buhata bo bu sa tisi likute ku Mulimu, bo bu cwale ka lituto za Silalu ni lihele. Hape ne ba file temuso ka za ku fela kwa Linako za Bamacaba ka 1914. Ba bañata ne b’a ngile muhato wa cisehelo ku bona balwali bao ba liseli la niti.—Samu 43:3; Mateu 5:14, 16.

 4. Ki puzo mañi ye ne na ni ku talimwa mwahal’a lizazi la Mulena?

⁴ Silimo sa 1914 ne si kalisize seo Bibele i biza “lizazi la Mulena.” (Sinulo 1:10) Likezahalo ze tuna hahulu ne li na ni ku ezahala mwahal’a lona lizazi leo, ku kopanyeleza cwalo ni ku zibahazwa kwa “mutanga ya sepahala, ya na ni kutwisiso” ni ku ketiwa kwa hae ku “mu beya fa bukombwa bwa z’a luwile [Mulena] kaufela.” (Mateu 24:45-47) Kwamulaho k’o ka 1914, likiti-kiti za likeleke ne li ipapata ku ba za Sikreste. Ki sikwata sifi se ne si ka lumelwa ki Mulena, Jesu Kreste, ku ba mutang’a hae ya sepahala ni ya na ni kutwisiso? Puzo yeo ne i na ni ku tatululwa muta Jehova n’a ka taha kwa tempele.

Ku Taha kwa Tempele ya kwa Moya

 5, 6. (a) Ki kwa tempele ifi k’o Jehova na til’o fa katulo? (b) Ki katulo ifi ya n’a amuhezi Krestendomu ku zwelela ku Jehova?

⁵ Ki kwa tempele ifi, nihakulicwalo, kwa n’a tile? Ka ku utwahala hande ne i si kwa tempele tenyene ya mwa Jerusalema. Tempele ya mafelelezo kwa litempele zeo ne i sinyizwe kwamulaho k’o ka 70 C.E. Niteñi, Jehova u na ni tempele ye tuna ni ku fita ye ne swanisezwa ki yeo ye ne li mwa Jerusalema. Paulusi na bulezi ka za tempele yeo ye tuna ni ku fita mi na bonisize butuna bwa yona luli, kakuli i na ni sibaka se si kenile kwa lihalimu ni lapa fa lifasi-mubu. (Maheberu 9:11, 12, 24; 10:19, 20) Ki ku yona tempele yeo ye tuna ya kwa moya kwa na tile Jehova kwa neku la musebezi wa katulo.—Mu bapanye Sinulo 11:1; 15:8.

⁶ Seo ne si ezahezi l’ili? Ka ku ya ka bupaki bwa niti bo ne bu li teñi, ne li ka 1918.a Ki sifi se ne si zwile mwateñi? Haili kwa neku la Krestendomu, Jehova n’a boni kopano yeo mazoho a yona n’a lota mali, muinelo wa bulapeli bo bu silafalizwe bo bu ikezize lihule kwa lifasi le, ka ku ikeza mulikani wa bafumi ni ku hatelela babotana, ku luta lituto za buhedeni mwa sibaka sa ku eza bulapeli bo bu kenile. (Jakobo 1:27; 4:4) Jehova na file temuso ka Malaki, kuli: “Ni akufele ku ba paki ye lwanisa baloi ni babuki, ni ba ba itama ka buhata, ni ba ba tima mubeleki mali a hae, ni ba ba putelela musali wa mbelwa ni lindiala.” (Malaki 3:5) Krestendomu na s’a ezize zeo kaufela mane ni ze maswe ku fita zeo. Ku t’o fita ka 1919 ne li nto ye iponelwa hande kuli Jehova na mu atulezi sinyeho hamohocwalo ni Babilona yo Mutuna, sona sibaka se situna sa lifasi kaufela sa bulapeli bwa buhata. Ku zwa f’o ni ku ya cwalo kwapili, pizo ne i ezizwe kwa batu ba lipilu ze lukile kuli: “A mu zwe ku yena mina sicaba sa ka.”—Sinulo 18:1, 4.

 7. Ki bomañi bao ba na lumezi Jesu sina mutang’a hae ya sepahala ni ya na ni kutwisiso?

⁷ Ki mañi, cwale he, ya n’a li mutanga ya sepahala ni ya na ni kutwisiso? Mwa lilimo za mwanda wa pili, n’a kalisize ka sikwatanyana sa bao ba ne b’a ngile muhato kwa musebezi wa ku fa bupaki wa Joani Mukolobezi ni wa Jesu, yena numwana wa bulikani. Mwa lilimo za mwanda wa luna, ne li bao ba ne ba eza likiti-kiti ze sikai ba ne b’a ngile muhato kwa musebezi wa ku lukisa lika wa Baituti ba Bibele mwahal’a lilimo za fapilinyana a 1914. Bona bao ne ba tiyezi litiko ze tuna mwahal’a ndwa ya lifasi ya pili, kono ne ba bonisize kuli pilu ya bona ne i inzi ni Jehova.

Musebezi wa ku Kenisa

 8, 9. Kwamulaho k’o ka 1918, mutanga ya sepahala ni ya na ni kutwisiso n’a tokwa ku keniswa mwa linzila lifi, mi Jehova na file sepiso mañi kwa neku la seo?

⁸ Nihakulicwalo, nihaiba sona sikwata seo ne si tokwa ku keniswa. Ba bañwi ba ne ba swalisani ni bona ne ba fumanehile ku ba lila za tumelo mi ne ba na ni ku zwisiwa teñi. (Mafilipi 3:18) Ba bañwi ne ba sa itateli ku lwala likalulo za buikalabelo bo bu amiwa mwa ku sebeleza Jehova mi ba yenduka. (Maheberu 2:1) Kwand’a seo, ne ku na ni likezo za Sibabilona ze ne tokwa ku feliswa. Hape ni kwa neku la tukiso ya kopano mutanga ya sepahala ni ya na ni kutwisiso n’a na ni ku keniswa. Mayemo a’ swanela a buikambuso kwa neku la lifasi le ne a na ni ku itutiwa ni ku sebeliswa. Mi lifasi ha ne li nze li ekezeha kwa ku silafala, ne ba tokwa ku eza ka t’ata ku buluka bukeni bwa muzamao ni bwa kwa moya mwa liputeho.—Mu bapanye Juda 3, 4.

⁹ Ee, ku keniswa ne ku tokwahala, kono Jehova ka lilato n’a sepisize ka za Jesu ya beilwe fa bulena kuli: “U ka ina inz’a shengunukisa ni ku kenisa silivera; u ka kenisa bana ba Livi, a ba kenise mo ku kenisezwa gauda ni silivera; mi ba ka tahiseza [Jehova, NW] matabelo ka mukwa o lukela.” (Malaki 3:3) Ku kalisa ka 1918, Jehova, ka numwana y’o wa bulikani, s’a talelelize sepiso ya hae ni ku kenisa batu ba hae.

10. Ki litabelo za mufuta mañi ze ne ba tisa batu ba Mulimu, mi ki memo ifi ya na ba file Jehova?

¹⁰ Banyani ba ba tozizwe ba Kreste ni buñata bo butuna bo ne bu fitile fa ku swalisana ni bona mwa sebelezo ya Jehova ne ba fumani tuso kaufel’a bona ka ku sebeza kwa Jehova sina mushengunukisi ni mukenisi wa silivera. (Sinulo 7:9, 14, 15) Ne ba zwezipili sina kopano, mi ba sa zwelapili, ku tahisa matabelo a’ mpo ka mukwa o lukela. Mi matabelo a bona a’ “tabisa [Jehova, NW], sina ka linako za kale, ni sina ka myaha ya baikale.” (Malaki 3:4) Ne li li bona bao Jehova na memile ka bupolofita kuli: “A mu tise mwa ndu ya pulukelo, nto i li ñwi ku ze lishumi za ze mu luwile kaufela, lico li be teñi mwa Ndu ya ka, ku bulela [Jehova, NW] wa limpi; mu ni like ka seo, ku bulela [Jehova, NW] wa limpi, mi mu ka bona nji ni si ke na mi tibululela mahaulo a kwa lihalimu, na mi sululela mbuyoti, mane sibaka mo mu ka i amuhelela si taele.”—Malaki 3:10.

Matabelo ni Lika za Bulishumi

11. Ki kabakalañi matabelo ka ku ya ka tukiso ya Mulao wa Mushe h’a s’a tokwahali hape?

¹¹ Mwa lizazi la ku ba teñi kwa Malaki batu ba Mulimu ne ba tisize matabelo ni lika za bulishumi tota, ze cwale ka bubeke, litolwana, ni limunanu. Nihaiba mwa lizazi la ku ba teñi kwa Jesu, Maisilaele ba ne ba sepahala ne ba file matabelo tota kwa tempele. Niteñi, zeo kaufela za cinceha hamulaho wa lifu la Jesu. Mulao ne u felisizwe, ku kopanyeleza cwalo ni taelo ya ku tahisa matabelo a kwa mubili ni lika za bulishumi ze talusizwe. (Maefese 2:15) Jesu na talelelize mufuta wa bupolofita wa limpo mwatas’a Mulao. (Maefese 5:2; Maheberu 10:1, 2, 10) Ki ka nzila ifi, kacwalo, Bakreste ba kona ku tisa matabelo ni lika za bulishumi?

12. Bakreste ba fa mufuta mañi wa limpo ni matabelo a kwa moya?

¹² Kwa neku la bona, matabelo ka mukwa o ipitezi ki a mufuta wa lika za kwa moya. (Mu bapanye Mafilipi 2:17; 2 Timotea 4:6.) Sina ka mutala, Paulusi n’a bulezi ka za musebezi wa ku kutaza sina sitabelo muta na ize: “Cwale, ka Jesu, lu tiseze Mulimu sitabelo sa milumbeko, kikuli bupaki bo bu zwa mwa milomo ye lumba Libizo la hae.” N’a supile kwa mufuta o muñwi wa sitabelo sa kwa moya ha na susuelize kuli: “Mu si ke mwa libala ku eza ba bañwi hande, ni ku fana; kakuli Mulimu u tabela matabelo a cwalo.” (Maheberu 13:15, 16) Bashemi ha ba susueza bana ba bona ku kena mwa sebelezo ya bupaina, ne ba kana ba bulelwa kuli ba ba fa ku Jehova, sina fela Jefita ha n’a file mwan’a hae wa musali ku ba “sitabelo sa ku cisa” ku Mulimu, ili y’o ya na mu file tulo.—Baatuli 11:30, 31, 39.

13. Ki kabakalañi Bakreste ha ba sa tokwi ku fa kalulo tota ya bulishumi ya tuelo ya bona?

¹³ Niteñi, ku cwañi ka za lika za bulishumi? Kana Bakreste ba mwa tamo ya ku beya kwatuko kalulo ya bulishumi ya tuelo ya bona ya lika za kwa mubili ni ku i fa kwa kopano ya Jehova, ka ku bapanya ni se si eziwa mwa likeleke ze ñwi za Krestendomu? Batili, seo hasi tokwahali. Ha ku na liñolo le li talusa taelo ye cwalo kwa Bakreste. Paulusi ha n’a nga linubu za bao ba ne ba li mwa butokwi mwa Judea, na si ka bulela ka za buñata bwa kalulo ye swanelwa ku fiwa. Ka ku fapahana, na bulezi kuli: “Mutu ni mutu a zwise mw’a hupulezi mwa pilu ya hae, isi ka ku bilaela, kamba ka ku hapelezwa; kakuli Mulimu u lata ya fana a tabile.” (2 Makorinte 9:7) Ka ku ama ku bao ba ba li mwa bukombwa bo bu ipitezi, Paulusi na bonisize kuli hailif’o ba bañwi ne ba fiwa kemelo ye swanela luli ka linubu za ku itatela, yena n’a itukiselize ku sebeza ni ku ipilisa ili yena. (Likezo 18:3, 4; 1 Makorinte 9:13-15) Ne ku si na lika za bulishumi ze ne tomilwe kwa neku la mulelo wo.

14. (a) Ki kabakalañi ku tisiwa kwa nto ya bulishumi ha ku sa yemeli ku fa kwa luna lika kaufela ku Jehova? (b) Ki sika mañi se si yemelwa ki nto ya bulishumi?

¹⁴ Ka ku utwahala luli, nto ya bulishumi kwa Bakreste i swaniseza, kamba i yemela, nto ye ñwi. Bakeñisa kuli ki ya bulishumi mi hañata nombolo ya lishumi i swaniseza lika ze tezi za fa lifasi mwa Bibele, kana nto ya bulishumi i swaniseza ku fa kwa luna lika kaufela ku Jehova? Batili. Muta lu ineela ku Jehova ni ku swaniseza seo ka kolobezo ya mwa mezi, ki f’o lu fa za luna kaufela ku yena. Ku zwa ka nako ya buineelo bwa luna, ha ku na se lu na ni sona se si si sa Jehova. Niteñi, Jehova u lumeleza batu ka buñwi ku aba ze ba na ni zona. Kacwalo nto ya bulishumi i yemela kalulo ya z’e li za luna zeo lu tisa ku Jehova, kamba ze lu itusisa mwa sebelezo ya Jehova, sina poniso ya lilato la luna ku yena ni ku itemuhela kwa luna buniti bwa kuli lu itingile ku yena. Nto ya bulishumi ya mwa lizazi la cwale ha i tokwi ku ba fela kalulo ya bulishumi. Mwa miinelo ye miñwi i kona ku ba ye nyinyani. Ku ye miñwi i kona ku ba ye ñata. Mutu ni mutu ka buñwi u tisa seo pilu ya hae i mu susueza ku tisa ni seo miinelo ya hae i mu lumeleza.

15, 16. Ki lifi ze kopanyelezwa mwa nto ya luna ya kwa moya ya bulishumi?

¹⁵ Ki sika mañi se si kopanyelezwa mwa nto yeo ya bulishumi ya kwa moya? Ka muinelo o muñwi, lu fa Jehova nako ni m’ata a luna. Nako ye lu itusisa kwa mikopano, mwa ku fumaneha kwa mikopano ye minyinyani ni ye mituna, mwa sebelezo ya mwa simu, zeo kaufela ki lika ze ñwi ze fiwa ku Jehova—kalulo ya nto ya luna ya bulishumi. Nako ni m’ata ze lu itusisa mwa ku lekula bakuli ni ku tusa ba bañwi—zeo hape, ki kalulo ya nto ya bulishumi ya luna. Ku tusa mwa ku yaha Mandu a Mubuso ni ku abana mwa musebezi wa ku babalela ni ku kenisa yona ndu yeo ni zona hape li ba kalulo yeo.

¹⁶ Nto ya luna ya bulishumi hape i kopanyeleza ni linubu za luna za mali. Ka ku ekezeha ka butuna kwa kopano ya Jehova mwa lilimo za cwanoñu fa, litamo za mali ni zona li ekezehile. Mandu a Mubuso a manca a tokwahala, hamohocwalo ni lisebeliso ze nca za mutai ni Mandu a manca a Mukopano, hamohocwalo ni ku keniswa kwa ao a s’a yahilwe kale. Ku taleleza lisinyehelo za bao ba ba ifanile kwa sebelezo ye ipitezi—ili bao hañata ba eza buitomboli bwa ka butu bo butuna mwa ku ifana k’o—hape ku ama likulutendano le li t’ata luli. Ka 1991 lisinyehelo za mali mwa ku babalela fela balumiwa, baokameli ba maeto, ni mapaina ba ba ipitezi ne li fitelezi madola a’ eza bolule ba 40, zeo kaufela ne li fumanehile ka linubu za ku itatela.

17. Ki sifi fela se lu swanela ku tisa sina nto ya luna ya kwa moya ya bulishumi?

¹⁷ Ki sifi luli se lu swanela ku fa sina nto ya luna ya bulishumi ya kwa moya? Jehova h’a tomi butuna bwa kalulo. Nihakulicwalo, maikuto a buineelo, lilato le li buniti ku Jehova ni kwa mizwale, hamohocwalo ni mubonelo wa ka putako ka ku lemuha kuli ku na ni bupilo bo bu na ni ku piliswa, li lu susueza ku tisa nto ya bulishumi kamukana ya luna ya kwa moya. Lu ikutwa ku susuezwa ku sebeleza Jehova fa sipimo se situna ka ku fitisisa se si konahala. Haiba ne lu ka ifana ili luna kamba ku fana liitusiso za luna ka ku nyinyafaza kamba ka lipilu ze peli, seo ne si ka likana ni ku putelela Mulimu.—Mu bapanye Luka 21:1-4.

Ku Fuy’olwa Ku Fitela Ku Taela

18, 19. Batu ba Jehova se ba fuy’ozwi cwañi kabakala ku tisa nto kamukana ya bona ya bulishumi?

¹⁸ Haisali ku zwiwa ka 1919, batu ba Jehova ba ngile muhato o’ sishemo wa ku fana nako, m’ata, ni liitusiso za bona za ka mali kwa butokwi bwa musebezi wa ku kutaza. Kaniti luli ba tisize nto kamukana ya bulishumi mwa ndu ya pulukelo. Ka seo, Jehova u talelelize sepiso ya hae mi u suluzi mbuyoti ku fitela ku taela. Seo si bile se si iponezwi ka mukwa o komokisa ka ku ekezeha kwa lipalo za bona. Ku zwa ku ba ba eza likiti ze sikai za bao fela ba ne ba sebeleza Jehova ha n’a tile kwa tempele ya hae ka 1918, se ba ekezehile ku t’o fita ni kacenu ba ba tozizwe hamohocwalo ni balikani ba bona, lingu ze ñwi, ba fitelezi palo ya bolule ba bane mwa linaha ze fitana-fitana ze 211. (Isaya 60:22) Bona bao hape ba fuyauzwi ka ku ekezeha ko ku zwelapili kwa ku utwisisa niti. Linzwi la bupolofita li bile le li tiile ni ku fita ku bona. Buikolwiso bwa bona mwa ku peta milelo ya Jehova bu bile bo bu tomilwe hande luli. (2 Pitrosi 1:19) Kaniti luli ki batu “ba ba lutilwe ki [Jehova, NW].”—Isaya 54:13.

¹⁹ Ka Malaki, Jehova n’a bulezi cimo za ku fuyaulwa ko kuñwi kuli: “Cwale ba ba saba [Jehova, NW] ba bulelisana hamoho, mutu ni mutu ni wahabo; mi [Jehova, NW] a teeleza ka zebe, mi a utwa. Mi buka ya kupuzo ya ñolwa fapil’a hae, ya ñolelwa ba ba saba [Jehova, NW], ni ba ba tokomela Libizo la hae.” (Malaki 3:16) Kwa likopano kaufela ze ipapata ku ba za Sikreste, ki Lipaki za Jehova fela ba ba nahana fa libizo la hae ni ku li zibahaza mwahal’a macaba. (Samu 34:3) Ki ba ba tabile hakalo ku ba ni sepiso ye tiile ya kuli Jehova w’a hupula busepahali bwa bona!

20, 21. (a) Bakreste ba niti ba ikola swalisano mañi ye fuy’ozwi? (b) Ka za Bukreste, ki fapahano mañi ye fita fa ku iponelwa hande ni ku fita?

²⁰ Bomasiyaleti ba ba tozizwe ki batu ba ba ipitezi ba Jehova, mi buñata bo butuna, bo bu selehana mwa ku swalisana ni bona, bu fumana limbuyoti hamoho ni bona za bulapeli bo bu kenile. (Zakaria 8:23) Ka Malaki, Jehova u sepisa kuli: “Ba ka ba ba ka mwa lizazi le ni tomile: e, ba be bufumu bwa ka tota; mi ni ka ba shwela makeke sina mutu h’a shwela mwan’a hae makeke ya mu sebeleza.” (Malaki 3:17) Ki mbuyoti hakalo kuli Jehova u na ni lilato le lituna cwalo ku bona!

²¹ Ka buniti fela, fapahano ye mwahal’a Bakreste ba niti ni ba buhata i fita fa ku bonahala hande ni ku fita. Batu ba Jehova ha ba nze ba lika ku buluka lipimo za hae, Krestendomu u zwelapili ku yongobela hahulu ni ku fita mwa muinelo o silafezi wa lifasi ili w’o a sa koni ku itukulula ku ona. Kaniti luli, manzwi a Jehova a bile a niti a’ li: “Mu lemuhe fo ku fapanezi ya lukile ni ya si ka luka, ya sebeleza Mulimu, ni ya sa mu sebelezi.”—Malaki 3:18.

22. Ki limbuyoti lifi zeo lu kona ku ba ni buikolwiso bwa ku ikola zona haiba lu zwelapili ku tisa nto kamukana ya bulishumi?

²² Hañi-hañi, lizazi la katulo li ka taha kwa neku la Bakreste ba buhata. “A mu bone, lizazi la taha, le li cisa sina mulilo wa ondo; mi baikuhumusi kaufela ni nyangela ye eza bumaswe, ba ka ba sina matakala; lizazi le li taha, li ka ba ciseleza, ku bulela [Jehova, NW] wa limpi.” (Malaki 4:1) Batu ba Jehova ba ziba kuli u ka ba sileleza ka yona nako yeo, sina h’a ki le a sileleza sicaba sa hae sa kwa moya kwamulaho k’o ka 70 C.E. (Malaki 4:2) Ki ba ba tabile hakalo ku ba ni buniti b’o! Kacwalo, ku fitela ka yona nako yeo haike ufi ni ufi wa luna a bonise buitebuho ni lilato la ku lata Jehova ka ku tisa kamukana nto ya bulishumi mwa ndu ya pulukelo. F’o lu kona ku ba ni buikolwiso bwa kuli u ka zwelapili ku lu fuyaula ku fitela ku taela.

[Litaluso za kwatasi]

Kana Mwa Kona ku Talusa?

◻ Mwa linako za cwale, Jehova n’a tile l’ili kwa tempele ni numwana wa hae wa bulikani?

◻ Mutanga ya sepahala ni ya na ni kutwisiso ki mañi, mi ki ku keniswa kufi ko ne ba tokwa hamulaho wa 1918?

◻ Bakreste ba niti ba tisa mufuta mañi wa matabelo a kwa moya ku Jehova?

◻ Ki nto ifi ya bulishumi yeo Bakreste ba memiwa ku tisa kwa ndu ya pulukelo?

◻ Ki limbuyoti lifi ze ba ikola batu ba Mulimu ka ku fa lika za bulishumi za kwa moya?

[Siswaniso se si fa likepe 15]

Za bulishumi za luna za kwa moya li kopanyeleza ku fa m’ata a luna ni liitusiso kwa ku yaha Mandu a Mubuso

[Siswaniso se si fa likepe 16]

Bakeñisa mbuyoti ya Jehova kwa batu ba hae, ku yaha ko ku ekezehile ku bile ko ku tokwahala, ku kopanyeleza cwalo ni Mandu a Mubuso ni Mandu a Mukopano