Lipuzo Ze Zwa Kwa Babali

Kana manzwi a Jesu a kwa Mateu 19:10-12 a talusa kuli batu ba ba iketela ku zwelapili ku ba makwasha ba filwe mpo ya bukwasha ka makazo?

▪ Mu nyakisise mo ne ku tezi kuli Jesu a bulele mubonelo wa hae ka za bukwasha. Bafalisi ha ne ba tile ku Jesu ku to mu buza ka za telekano, Jesu naa talusize hande mubonelo wa Jehova ka za linyalo. Mulao ni ha ne u lumeleza muuna ku ñolela musalaa hae liñolo la telekano haiba “u fumani taba ye maswe” ku yena, lika haki mona mo ne li inezi kwa makalelo. (Deut. 24:1, 2) Jesu naa bulezi kuli: “Mutu kaufela ya leleka musalaa hae ni ku nyala u sili, wa buka, konji haiba musalaa hae u ezize buhule.”—Mat. 19:3-9.

Ha ne ba utwile taba yeo, balutiwa ne ba ize: “Haiba kona mo ku inezi cwalo ku mutu ni musalaa hae, u zibe ki hande ku sa nyala.” Jesu naa ba alabile kuli: “Haki baana kaufela ba ba kona ku eza cwalo, konji ba ba filwe mpo yeo. Kakuli ku na ni ba ba sa koni ku nyala ba ne ba pepilwe feela cwalo, mi ku na ni ba ba sa koni ku nyala ba ba fahuzwi ki batu, hape ku na ni ba ba sa lati ku nyala kabakala Mubuso wa kwa lihalimu. Ya kona ku sa nyala a eze cwalo.”—Mat. 19:10-12.

Linumbulwa tenyene ne li batu be ne ba pepilwe cwalo ili kabakala butata bo ne ba kopani ni bona ka nako ya ku pepwa kamba ne ba bile linumbulwa hamulaho wa kozi ye ñwi ye ne ba holofalize hahulu. Nihakulicwalo, ku na ni batu be ne ba itatezi ku ba linumbulwa. Nihaike kuli ne ba kona ku kena mwa linyalo, ne ba bonisize buiswalo ka ku zwelapili ku ba makwasha “kabakala mubuso wa kwa lihalimu.” Sina Jesu, ne ba iketezi ku ba makwasha ilikuli ba eze ze ñata mwa sebelezo ya za Mubuso. Batu bao ne ba si ka pepwa inze ba na ni mpo ya bukwasha mi ne ba si ka fiwa mpo yeo. Ne ba ikatulezi ku ba makwasha ili ku talusa kuli ne ba iketezi mpo ya bukwasha.

Ka ku koñomeka za naa bulezi Jesu, Paulusi naa talusize kuli Bakreste kaufela ibe kuli ki makwasha, kamba ba mwa linyalo, ba kona ku sebeleza hande Mulimu, kono ba ba ‘ikatulezi mwa lipilu za bona’ kuli ba be makwasha ka mulelo wa ku eza ze ñata mwa sebelezo ya Mulimu ba “eza hande” hahulu. Kamukwaufi? Batu ba ba mwa linyalo ba lukela ku aba nako ni maata a bona ilikuli ba tabise ni ku babalela mutu ye ba nyalani ni yena. Kono Bakreste ba makwasha bona ba kona ku ifana mwa sebelezo ya Mulena ku si na ku aba nako ni maata a bona. Ba nga muinelo wa bona wa bukwasha ku ba “mpo” ye zwa ku Mulimu.—1 Makor. 7:7, 32-38.

Kamukwaocwalo, Mañolo a lu bulelela kuli Bakreste ha ba fiwangi mpo ya bukwasha ka makazo. Kono mutu u iketelanga mpo ya bukwasha ka ku zwelapili mwa bukwasha ilikuli a zwisezepili za Mubuso ku si na ze mu yaulula. Batu ba bañata kacenu ba ikatulezi mwa pilu ya bona ku ba makwasha ka ku bata ku zwisezapili za Mubuso, mi ba bañwi ba swanela ku susuezanga batu ba ba cwalo.