“Ha Ku Lu Taluseze, Lika Zeo Li Ka Ezahala Lili?”

“Sisupo sa ku ba teñi kwa hao ni sa maungulelo a muinelo wa lifasi si ka ba sifi?”—MAT. 24:3.

MU KONA KU ALABA CWAÑI?

Ku talelezwa kwa bupolofita bwa Jesu bwa za ñalelwa ye tuna kwamulaho, ku swana cwañi ni mo bu ka talelelezwa kwapili?

Nguli ya lingu ni lipuli i lu tusa ku nga cwañi musebezi wa luna wa ku kutaza?

Kwa likauhanyo 24 ni 25 za buka ya Mateu, Jesu naa talusa nako ifi ha naa bulela za ku taha kwa hae?

 1. Ka ku swana ni baapositola, lu nyolelwa ku zibañi?

JESU naa tuha a feza bukombwa bwa hae bwa fa lifasi, mi balutiwa ba hae ne ba batisisa ku ziba ze ne ka ezahala kwapili. Ha ne ku siyezi feela mazazi a sikai kuli Jesu a bulaiwe, baapositola ba hae ba bane ne ba mu buzize kuli: “Ha ku lu taluseze, lika zeo li ka ezahala lili, mi sisupo sa ku ba teñi kwa hao ni sa maungulelo a muinelo wa lifasi si ka ba sifi?” (Mat. 24:3; Mare. 13:3) Jesu naa ba alabile ka ku ba bulelela bupolofita bo bu talusa litaba ze ñata bo bu ñozwi kwa likauhanyo 24 ni 25 za buka ya Mateu. Mwa bupolofita bo, Jesu naa polofitile lika ze ñata ze ne ka ezahala kwapili. Kalabo ya Jesu ya kona ku lu tusa hahulu kakuli ni luna lu nyolelwa ku ziba ze ka ezahala kwapili.

 2. (a) Ki lika mañi ze lu zwezipili ku ituta ka lilimo ze ñata? (b) Ki lifi lipuzo ze taalu ze lu ka nyakisisa?

² Ka lilimo ze ñata, batanga ba Jehova ba zwezipili ku ituta ka tokomelo bupolofita bwa naa bulezi Jesu bwa mazazi a maungulelo. Mulelo wa bona ki wa ku utwisisa hande nako fo bu ka talelelezwa bupolofita bwa naa bulezi Jesu. Kuli lu utwisise hande libaka ha ku bile ni licinceho ze ama bupolofita bo, ha lu nyakisiseñi lipuzo ze taalu ze bonisa nako fo ne bu ka talelelezwa. “Ñalelwa ye tuna” i ka kalisa lili? Jesu u ka atula lili batu kuli ki “lingu” kamba “lipuli”? Jesu u ka “taha” lili?—Mat. 24:21; 25:31-33.

ÑALELWA YE TUNA I KA KALISA LILI?

 3. Mwa linako za kwamulaho, ne lu utwisisanga cwañi nako ya fo ne i ka tela ñalelwa ye tuna?

³ Mwa lilimo za kwamulaho, ne lu utwisisanga kuli ñalelwa ye tuna ne i kalile ka silimo sa 1914 ha ne ku tumbukile Ndwa ya Lifasi ya Pili ni kuli Jehova naa ‘fukulize mazazi a’ ndwa yeo ka silimo sa 1918 ha ne i felile ilikuli bo masiyaleti ba be ni kolo ya ku kutaza taba ye nde kwa macaba kaufela. (Mat. 24:21, 22) Mi hape ne lu utwisisanga kuli musebezi wo wa ku kutaza taba ye nde ha se u felile, puso ya Satani ne i ka feliswa. Bakeñisa kutwisiso yeo, ne lu nga kuli ñalelwa ye tuna ne i ka ba mwa likalulo ze taalu: Ne ku ka ba ni makalelo a ñalelwa ye tuna (ku zwa ka silimo sa 1914 ku isa ka 1918), ñalelwa ye tuna ne i ka kaulezwa (ku zwa ka silimo sa 1918 ku isa kwapili), mi ñalelwa ye tuna ne i ka fela fa Armagedoni.

 4. Ki nto mañi ye ne tahisize kuli lu utwisise hande bupolofita bwa Jesu bwa mazazi a maungulelo?

⁴ Kono hasamulaho wa ku nyakisisa hape bupolofita bwa Jesu, ne lu lemuhile kuli kalulo ye ñwi ya bupolofita bo bu talusa za mazazi a maungulelo ne i ka talelezwa mwa likalulo ze peli. (Mat. 24:4-22) Kalulo ya pili ya bupolofita bo, ne i ka talelezwa mwa Judea ili mwa linako za baapositola, mi kalulo ya bubeli ne i ka talelezwa mwa lifasi kaufela ili mwa linako za luna. Kamukwaocwalo, ne lu tokwa ku cinca mo ne lu utwisiseza likalulo ze ñwi za bupolofita bo.a

 5. (a) Ki nako mañi ye taata ye ne kalile ka silimo sa 1914? (b) Nako ya makalelo a manyando i swana ni nako ifi ya mwa linako za baapositola?

⁵ Hape ne lu lemuhile kuli kalulo ya pili ya ñalelwa ye tuna ne i si ka kalisa ka silimo sa 1914. Ki kabakalañi ha lu bulela cwalo? Libaka ki la kuli bupolofita bwa mwa Bibele bu patulula kuli ñalelwa ye tuna ha i na ku kalisa ka ku itwanisa kwa macaba, kono i ka kalisa ka nako ye bu ka lwaniswa bulapeli bwa buhata. Kabakaleo, likezahalo ze ne bile teñi ka silimo sa 1914, ne li si makalelo a ñalelwa ye tuna, kono ne li li “makalelo a manyando.” (Mat. 24:8) Ze ne ezahezi mwa Jerusalema ni Judea ku zwa ka silimo sa 33 C.E. ku isa ka 66 C.E., li swana ni ze ne ezahezi mwa nako yeo ya “makalelo a manyando.”

 6. Ñalelwa ye tuna i ka kalisa cwañi?

⁶ Ñalelwa ye tuna i ka kalisa cwañi? Jesu naa polofitile kuli: “Ha mu ka bona nto ye nyenyisa ye tahisa sinyeho, i yemi mwa sibaka se si kenile sina mo ku taluselizwe ki mupolofita Daniele (mubali a lemuhe), ba ba li mwa Judea ba kale ku sabela kwa malundu.” (Mat. 24:15, 16) Mwa kalulo ya pili ya bupolofita bwa mazazi a maungulelo, taba ya ku ‘yema mwa sibaka se si kenile’ ne i ezahezi mwa silimo sa 66 C.E. muta mpi ya Roma (yona “nto ye nyenyisa”) ne i lwanisize Jerusalema ni tempele ya mwateñi (sona sibaka se ne ba nga Majuda kuli ki sibaka se si kenile). Mwa linako za luna, taba ya ku ‘yema mwa sibaka se si kenile’ i ka ezahala muta Katengo ka Silikani sa Linaha za Lifasi, ka UN, (yona “nto ye nyenyisa” ya mwa linako za luna) ka ka lwanisa bulapeli kaufela bo bu twi ki bwa Sikreste (bona bulapeli bo ba nga batu ba ba twi ki Bakreste kuli bu kenile) ni bulapeli kaufela bo bu siyezi bwa Babilona yo Mutuna. Taba ya ku lwanisa bulapeli bwa buhata i bulezwi hape kwa liñolo la Sinulo 17:16-18. Ku lwaniswa kwa bulapeli bwa buhata ki ona a ka ba makalelo a ñalelwa ye tuna.

 7. (a) Bakreste ba mwa Jerusalema ni mwa Judea ne ba ‘pilisize’ cwañi bupilo bwa bona? (b) Ki lika mañi ze lu libelela kuli li ka ezahala kwapili?

⁷ Jesu hape naa polofitile kuli: “Mazazi ao a ka fukuzwa.” Mwa kalulo ya pili ya bupolofita bo, taba ya ‘ku fukuzwa kwa mazazi’ ne i ezahezi ka silimo sa 66 C.E. muta mpi ya Roma ne i tuhezi ku lwanisa Jerusalema ni tempele ya mwateñi. Hamulaho wa fo, Bakreste ba mwa Jerusalema ni mwa Judea ba baleha ilikuli ba ‘pilise bupilo bwa bona.’ (Mu bale Mateu 24:22; Mala. 3:17) Ki lika mañi ze lu libelela kuli li ka ezahala ka nako ya ñalelwa ye tuna ye taha? Jehova u ka ‘fukuza’ kamba ku kauleza twaniso ya Katengo ka Silikani sa Linaha za Lifasi ya ku lwanisa bulapeli bwa buhata, ilikuli katengo kao ka si ke ka yundisa bulapeli bwa niti sina mo ka ka yundiseza bulapeli bwa buhata. Nto yeo i ka tahisa kuli batu ba Mulimu ba silelezwe.

 8. (a) Ki lika mañi ze ka ezahala hamulaho wa ku kaulezwa kwa ñalelwa ye tuna? (b) Ki lili fo mwendi wa mafelelezo ku ba 144,000 a ka amuhela mupuzo wa hae wa kwa lihalimu? (Mu bone litaluso za kwa mafelelezo.)

⁸ Ki lika mañi ze ka ezahala hamulaho wa ku kaulezwa kwa ñalelwa ye tuna? Za naa bulezi Jesu li bonisa kuli ku zwa ka nako yeo, ku ka fita nakonyana pili Armagedoni i si ka kalisa kale. Ku ka ezahalañi mwahalaa yona nakonyana yeo? Kalabo i fumaneha kwa Ezekiele 38:14-16 ni kwa Mateu 24:29-31. (Mu bale.)b Hamulaho wa nakonyana yeo, lu ka iponela Armagedoni, ona mafelelezo a ñalelwa ye tuna, ili muinelo o swana ni muinelo o ne u bile teñi ka nako ye ne i sinyizwe Jerusalema ka silimo sa 70 C.E. (Mala. 4:1) Armagedoni i ka ba kezahalo “ye si ka bonwa kale ku zwa kwa simuluho ya lifasi.” (Mat. 24:21) Hamulaho wa Armagedoni, Puso ya Kreste ya Lilimo ze 1,000 i ka kalisa.

 9. Batu ba Jehova ba amiwa cwañi ki bupolofita bwa Jesu bo bu bulela za ñalelwa ye tuna?

⁹ Bupolofita bo, bo bu bulela za ñalelwa ye tuna bwa lu omba-omba. Kabakalañi? Kakuli bu lu kolwisa kuli ku si na taba ni miinelo ye taata ye lu kana lwa kopana ni yona, batu ba Jehova, ba ka punyuha ñalelwa ye tuna sina sikwata. (Sin. 7:9, 14) Ku zwa fo, lu ka ba ni tabo bakeñisa kuli fa Armagedoni, Jehova u ka bonisa kuli puso ya hae ki yona ye nde mi u ka kenisa libizo la hae le li kenile.—Samu 83:18; Ezek. 38:23.

JESU U KA ATULA LILI BATU KULI KI LINGU KAMBA LIPULI?

10. Mwa linako za kwamulaho, ne lu utwisisanga kuli ku atulwa kwa batu kuli ki lingu kamba lipuli ne ku ka ezahala mwa nako ifi?

¹⁰ Ha lu nyakisiseñi kalulo ye ñwi ya bupolofita bwa Jesu, ili nguli ya ku atula batu kuli ki lingu kamba lipuli. (Mat. 25:31-46) Mwa linako za kwamulaho, ne lu utwisisanga kuli ku atulwa kwa batu kuli ki lingu kamba lipuli ne ku ka ezahala mwahalaa nako kaufela ya mazazi a maungulelo ili ku zwa ka silimo sa 1914 ku isa kwapili. Hape ne lu utwisisanga kuli batu ba ne ba hanile lushango lwa Mubuso ili ba ne ba shwile pili ñalelwa ye tuna i si ka fita kale, ne ba atuzwi kale kuli ki lipuli ili ku talusa kuli ne ba si na sepo ya zuho.

11. Ki kabakalañi ha lu kona ku bulela kuli Jesu naa si ka kalisa ku atula batu kuli ki lingu kamba lipuli ka silimo sa 1914?

¹¹ Ka silimo sa 1995, mwa magazini ya Tora ya ku Libelela, liñolo la Mateu 25:31 ne li nyakisisizwe hape. Liñolo leo li bulela kuli: “Mwanaa mutu ha ka taha mwa kanya ya hae ni mangeloi kaufela, u ka ina mwa lubona lwa hae lwa kanya.” Hamulaho wa ku nyakisisa liñolo leo, ne ku fumanwi kuli Jesu naa bile Mulena wa Mubuso wa Mulimu mwa silimo sa 1914, kono naa si ka “ina mwa lubona lwa hae lwa kanya” sina Muatuli wa “macaba kaufela.” (Mat. 25:32; mu bapanye Daniele 7:13.) Nihakulicwalo, nguli ya lingu ni lipuli i bonisa kuli musebezi o mutuna wa Jesu ki wa ku ba Muatuli. (Mu bale Mat. 25:31-34, 41, 46.) Bakeñisa kuli Jesu naa si ka kalisa kale musebezi wa hae wa ku atula macaba kaufela ka silimo sa 1914, lwa kona ku bulela kuli Jesu naa si ka kalisa musebezi wa hae wa ku atula batu kuli ki lingu kamba lipuli ka silimo seo.c Kono cwale Jesu u ka atula lili batu kuli ki lingu kamba lipuli?

12. (a) Jesu u ka kala lili ku atula batu ba macaba kaufela? (b) Ki likezahalo mañi ze bulezwi kwa Mateu 24:30, 31 ni Mateu 25:31-33, 46?

¹² Bupolofita bwa Jesu bo bu bulela za mazazi a maungulelo bu patulula kuli hamulaho wa ku sinyiwa kwa bulapeli bwa buhata, Jesu kihona a ka kalisa ku atula macaba kaufela. Sina mo lu itutezi mwa paragilafu 8, lika ze ñwi ze ka ezahala hamulaho wa ku sinyiwa kwa bulapeli bwa buhata, li ñozwi kwa liñolo la Mateu 24:30, 31. Ha mu ka nyakisisa litimana zeo, mu ka lemuha kuli Jesu naa polofitile likezahalo ze swana ni za naa bulezi mwa nguli ya lingu ni lipuli. Ka mutala, Mwanaa mutu u taha mwa kanya ni mangeloi; mishobo kaufela ni macaba ba kubukanyiwa; ba ba atuzwi kuli ki lingu ba ‘nangusa litoho za bona’ bakeñisa kuli ba libelela “bupilo bo bu sa feli.”d Batu ba ba atuzwi kuli ki lipuli ba “inata fa lifuba kabakala ku lila,” ka ku ziba kuli ba libelela “sinyeho ya ku ya ku ile.”—Mat. 25:31-33, 46.

13. (a) Jesu u ka atula lili batu kuli ki lingu kamba lipuli? (b) Ku ziba taba yeo ku lu tusa ku nga cwañi bukombwa bwa luna?

¹³ Ku zwelela ku ze lu nyakisisize, Jesu u ka atula lili batu kuli ki lingu kamba lipuli? Jesu u ka atula batu ba macaba kaufela kuli ki lingu kamba lipuli ha ka taha ka nako ya ñalelwa ye tuna. Mi hamulaho, fa Armagedoni, ona mafelelezo a ñalelwa ye tuna, batu ba ba swana sina lipuli ba ka ‘sinyiwa’ ku ya ku ile. Ku ziba taba yeo ku lu tusa ku nga cwañi bukombwa bwa luna? Ku lu tusa ku lemuha kuli bukombwa bwa luna ki bwa butokwa hahulu. Ku zwa ka nako ye, ku isa fo i ka tela ñalelwa ye tuna, batu ba sa na ni nako ya ku cinca mikwa ya bona ye maswe ni ku kalisa ku zamaya mwa mukwakwa o kumbani ‘o libisa kwa bupilo.’ (Mat. 7:13, 14) Nihaike kuli batu kacenu ba kana ba bonisa butu bwa ngu kamba bwa puli, lu swanela ku hupula kuli katulo ya mafelelezo ya ku atula batu kuli ki lingu kamba lipuli i ka ezahala ka nako ya ñalelwa ye tuna. Kabakaleo, lu swanela ku zwelapili ku tusa batu ba bañata kuli ba teeleze ni ku amuhela lushango lwa Mubuso.

JESU U KA TAHA LILI?

14, 15. Ki mañolo afi a mane a bulela za ku taha kwa Kreste sina Muatuli?

¹⁴ Kana ze lu nyakisisize ka za bupolofita bwa Jesu li tahisa kuli lu cince kutwisiso ya luna ya fo li ka ezahalela lika ze ñwi za butokwa za bupolofita bo? Lu ka fumana kalabo ka ku nyakisisa litaba ze ñwi ze ne bulezwi mwa bupolofita bo. Ha lu nyakisiseñi litaba zeo.

¹⁵ Mwa bupolofita bo buñwi bwa Jesu bo bu ñozwi kwa Mateu 24:29–25:46, Jesu sihulu u talusa lika ze ka ezahala mwa mazazi a maungulelo a, ni ze ka ezahala fa ñalelwa ye tuna ye taha. Kwa liñolo leo, Jesu u bulela ha 8 ka za ku “taha” kwa hae.e Ha naa bulela za ñalelwa ye tuna, naa ize: “Ba ka bona Mwanaa mutu ha taha fa malu.” “Ha mu zibi lizazi la taha Mulenaa mina.” “Kakuli Mwanaa mutu u taha ka nako ye mu sa hupuli ku ba yona.” Mi mwa nguli ya hae ya lingu ni lipuli, Jesu u bulela kuli: ‘Mwanaa mutu u ka taha mwa kanya ya hae.’ (Mat. 24:30, 42, 44; 25:31) Litaba zee ne zeo li ama ku Kreste ka nako ya ka taha sina Muatuli. Litaba ze ñwi zee ne ze siyezi li fumaneha kai mwa bupolofita bwa Jesu?

16. Ki mwa mañolo afi a mañwi mo ku bulezwi za ku taha kwa Jesu?

¹⁶ Jesu u bulela cwana ka za mutanga ya sepahala ya na ni kutwisiso: “U ka ba ni tabo mutanga yo haiba Mulenaa hae a mu fumana a eza cwalo ka nako yaa fita!” Mwa nguli ya basizana, Jesu u bulela kuli: “Ha ne ba sa ya kwa ku yo leka mafula, munyali a punya.” Mwa nguli ya litalenta, Jesu u bulela kuli: “Hamulaho wa nako ye telele, mulenaa batanga bao a kuta.” Mwa nguli ye swana yeo, mulena yo naa ize: “Ha ni kutile ne ni ka amuhela se si li sa ka.” (Mat. 24:46; 25:10, 19, 27) Litaba zee ne zeo ze bulela za ku taha kwa Jesu li ka ezahala lili?

17. Ne lu bulelanga cwañi taba ya ku fita ye bulezwi kwa Mateu 24:46?

¹⁷ Mwa lihatiso za luna kwamulaho, ne lu bulezi kuli litaba zee ne zeo ze bulezwi mwa paragilafu 16, li ama kwa nako ya fita Jesu kamba ya taha, ka silimo sa 1918. Ka mutala, ha mu nyakisise za naa bulezi Jesu ka za “mutanga ya sepahala ya na ni kutwisiso.” (Mu bale Mateu 24:45-47.) Ne lu utwisisanga kuli ku “fita” ko ku bulezwi mwa timana 46, ne ku ama kwa nako ya naa tile Jesu ka silimo sa 1918 ku to tatuba mo ne ba ezeza kwa moya Bakreste ba ba tozizwe, ni kuli ku ketiwa kwa mutanga yo kuli a babalele liluwo la Mulenaa hae kaufela ne ku bile teñi mwa silimo sa 1919. (Mala. 3:1) Kono lu tokwa ku cinca kutwisiso ya luna ya fo li ka ezahalela lika ze ñwi za naa polofitile Jesu. Kabakalañi?

18. Ku nyakisisa bupolofita bwa Jesu kaufela ku lu tusa ku utwisisañi ka za ku taha kwa hae?

¹⁸ Mwa litimana ze fumaneha kwamulaho pili mu si ka fita kale kwa Mateu 24:46, linzwi la ku “taha” li kuta-kutezwi ku itusiswa ili ku talusa nako ya taha Jesu ku to atula ka nako ya ñalelwa ye tuna. (Mat. 24:30, 42, 44) Hape, sina mo lu itutezi mwa paragilafu 12, ku “taha” kwa Jesu ko ku bulezwi kwa Mateu 25:31, ku ka ezahala kwapili ka nako ya ka atula batu. Kamukwaocwalo, lwa kona ku bulela kuli ku fita kwa Jesu, kamba ku taha kwa hae, ko ku bulezwi kwa Mateu 24:46, 47, kuli a to keta mutanga ya sepahala ya ka babalela liluwo la hae kaufela, ku ka ezahala ka nako ya kwapili ha ka taha ka nako ya ñalelwa ye tuna.f Bupolofita bwa Jesu kaufela bu bonisa hande kuli litaba ze 8 za mwa mañolo za ku taha kwa Jesu, li ka ezahala ka nako ya kwapili ya ka to atula batu ka nako ya ñalelwa ye tuna.

19. Ki licinceho mañi ze lu itutile mwa taba ye, mi ki lipuzo lifi ze lu ka nyakisisa mwa litaba ze tatama?

¹⁹ Lu itutileñi mwa taba ye? Kwa makalelo a taba ye, ne lu buzize lipuzo ze taalu ze bonisa fo bu ka talelelezwa bupolofita bwa ku taha kwa Jesu. Ne lu kalile ka ku nyakisisa kuli ñalelwa ye tuna ne i si ka kalisa ka silimo sa 1914, kono i ka kalisa muta Katengo ka Silikani sa Linaha za Lifasi ka lwanisa Babilona yo Mutuna. Hape lu itutile kuli Jesu naa si ka kalisa ka 1914 ku atula batu kuli ki lingu kamba lipuli, kono u ka kalisa ku eza cwalo ka nako ya ñalelwa ye tuna. Mi kwa mafelelezo, lu nyakisisize kuli ku fita kwa Jesu ku to keta mutanga ya sepahala kuli a babalele liluwo la Mulenaa hae kaufela ne ku si ka ezahala ka silimo sa 1919, kono ku ka ezahala ka nako ya ñalelwa ye tuna. Ka ku ya ka ze lu itutile, litaba ze bulezwi mwa lipuzo ze taalu ze ama bupolofita bwa Jesu, li ka ezahala kwapili ka nako ya ñalelwa ye tuna. Licinceho zeo li lu tusa cwañi ku utwisisa lipuzo ze latelela. Mutanga ya sepahala ki mañi? Lu kona ku utwisisa cwañi linguli ze ñwi, kamba liswanisezo za Jesu ze sweli ku talelezwa mwa linako ze za maungulelo? Lu ka nyakisisa lipuzo za butokwa zeo mwa litaba ze tatama.

LITALUSO ZA KWA MAFELELEZO: (Ha mu fita fa paragilafu fo ku inzi litaluso zeo, mu li bale sina mo mu balelanga litaluso za kwatasi.)

[Litaluso za kwatasi]

[Chati fa likepe 4, 5]

NAKO YA ÑALELWA YE TUNA NI HAMULAHO

MO BU KA TALELELEZWA BUPOLOFITA MWA LINAKO ZA LUNA

MAZAZI A MAUNGULELO

MO NE BU TALELELIZWE BUPOLOFITA MWA LINAKO ZA BAAPOSITOLA

Katengo ka UN (“nto ye nyenyisa”) ka ka lwanisa bulapeli bo bu twi ki bwa Sikreste (“sibaka se si kenile”) ni bulapeli bo buñwi kaufela bwa buhata (Sin. 17:16-18)

KU YUNDISWA KWA BULAPELI BWA BUHATA

Mpi ya Roma (“nto ye nyenyisa”) ne i lwanisize Jerusalema ni tempele ya mwateñi (“sibaka se si kenile”)

“Nto ye nyenyisa . . . i yemi mwa sibaka se si kenile” (Mat. 24:15, 16)

(Mu bone paragilafu 6)

Jehova u ka “fukuza” kamba ku kauleza twaniso ya ku lwanisa bulapeli bwa buhata;

Mulimu u ka sileleza batu ba hae

Mpi ya Roma ne i fukulize kamba ku kauleza twaniso ya yona; Bakreste ba mwa Jerusalema ni Judea ne ba balehile

“Kabakala baketiwa, mazazi ao a ka fukuzwa” (Mat. 24:22)

(Mu bone paragilafu 7)

BUTELELE BWA NAKO HA BU ZIBAHALI

Jesu u ka atula batu ba macaba kaufela kuli ki lingu kamba lipuli (Mat. 25:31-46)

(Mu bone maparagilafu 12 ni 13)

NAKONYANA YE KA FITA

“Hamulaho feela wa ñalelwa ya mazazi ao . . .” (Mat. 24:29-31)

(Mu bone paragilafu 8)

Jesu u ka keta mutanga ya sepahala kuli a babalele “liluwo la hae kaufela” (Mat. 24:46, 47)

(Mu bone paragilafu 18)

Ku sinyiwa kwa macaba (Sin. 16:16)

ARMAGEDONI

Ku sinyiwa kwa Jerusalema

PUSO YA KRESTE YA LILIMO ZE 1,000 YA KALISA

[Siswaniso se si fa likepe 7]

Ku zwa ka nako ye, ku isa fo i ka tela ñalelwa ye tuna, batu ba sa na ni nako ya ku cinca mikwa ya bona ye maswe

(Mu bone paragilafu 13)