Mutabe Kabakala Buikalabelo Bomufilwe

 1. Mizwale ni likaizeli babañata baikataza kuezañi mwa sebelezo yabona ku Jehova?

LIFASI le halinze lifita kwa mafelelezo, lunani musebezi omuñata olutokwa kueza. (Mat. 24:14; Luka 10:2; 1 Pit. 5:2) Kaufelaa luna lubata kusebeleza Jehova ka molukonela kaufela. Babañata basweli kueza zeñata mwa bukombwa bwabona. Babañwi babata kuba mapaina ba kamita. Babañwi bona bababata kuyo sebeleza fa Betele kamba kutusa mwa musebezi wa kuyaha miyaho ya kopano. Mi mizwale babañata baeza ka taata kuli bafite ku zekonisa za kuba likombwa za puteho kamba baana-bahulu. (1 Tim. 3:1, 8) Kaniti luli, Jehova watabanga kubona batanga bahae habaitatela kumusebeleza!—Samu 110:3; Isa. 6:8.

 2. Lukona kuikutwa cwañi haiba lupalelwa kupeta likonkwani zeñwi za kwa moya zene luitomezi?

² Nihakulicwalo, haiba kufita nako yetelele mi lupalelwa kupeta likonkwani zeñwi za kwa moya zene luitomezi, lwakona kuzwafa. Mi mwendi lwakona kuzwafa haiba lusafiwi buikalabelo bobuñwi kabakala lilimo zaluna kamba miinelo yemiñwi. (Liprov. 13:12) Ki ona muinelo wali ku ona kaizeli yabizwa Melissa.b Kaizeli yo ubata kusebeleza fa Betele kamba kukena Sikolo sa Bakutazi ba Mubuso, kono utalusa kuli: “Nifitelezi lilimo zebatokwa kuba ni zona batu kuli baeze cwalo. Kikale nisupala, hanisa kona kuba ni matohonolo ao. Fokuñwi, nazwafanga.”

 3. Ki lika mañi zebaswanela kueza babañwi kuli bafiwe buikalabelo?

³ Bahasanyi babañwi babasali babanca ni babasa mata mali basatokwa kueza zwelopili ya kwa moya ni kubonisa tulemeno totuñwi pili basika fiwa kale buikalabelo. Ka mutala, babañwi banani zibo, baezanga likatulo kapili, mi balata kueza misebezi; kono mwendi basatokwa kuba ni pilu-telele, kueza musebezi obafilwe ka tokomelo, ni kukuteka babañwi. Haiba muikataza kuba ni tulemeno totutokwahala to, mukafiwa buikalabelo ka nako yemusika libelela. Halunyakisiseñi zeneezahezi ku bo Nick. Hane banani lilimo ze 20, nebaikutwile hahulu bumaswe bakeñisa kuli nebasika ketiwa kuba sikombwa sa puteho. Batalusa kuli: “Neninahanile kuli kunani lika zeñwi zene nisaezi hande.” Kono bo Nick nebasika zwafa. Nebaezize mone bakonela kaufela kupeta hande misebezi yene bafilwe mwa puteho ni kukutaza. Kacenu, bo Nick ba mwa Katengo ka Mutai.

 4. Lukanyakisisañi mwa taba ye?

⁴ Kana muzwafile kabakala kuli hamusika kwanisa sikonkwani sesiñwi sa kwa moya sene muitomezi? Haiba ki cwalo, muzibise Jehova taba yeo. (Samu 37:5-7) Kuzwa fo, mukupe mizwale babanani yeloseli kuli bamituse kuziba zwelopili yemutokwa kueza mwa sebelezo yamina ku Mulimu, mi mueze momukonela kaufela kusebelisa kelezo yebaka mifa. Haiba mueza cwalo, mwakona kufiwa buikalabelo bomutabela kamba kukwanisa sikonkwani samina. Kono mukona kueza cwañi haiba hakukonahali kuli mufiwe buikalabelo bomutabela kueza ka nako ya cwale sina mone kubezi ku bo Melissa bababulezwi kwamulaho? Ki lika mañi zekona kumitusa kuzwelapili kuba ni tabo? Kuli lualabe lipuzo zeo, halunyakisiseñi (1) zekona kumitusa kuba tabo, (2) zemukona kueza kuli muzwelepili kuba ni tabo, ni (3) likonkwani zemukona kuitomela kuli muzwelepili kuba ni tabo.

 5. Ki lika mañi zeluswanela kuisa pilu ku zona kuli lube ni tabo? (Muekelesia 6:9)

⁵ Liñolo la Muekelesia 6:9 libonisa zekona kulutusa kuba ni tabo. (Mubale.) Mutu yaikola “zaabona meeto” ahae ukolwa ka lika zanani zona mi wautwisisa miinelo yali ku yona ka nako yeo. Kono mutu yalatelela litakazo zanani zona uzwelapili kuikumbuta nto yasakoni feela kuba ni yona. Taba yeo ilulutañi? Kuli lube ni tabo, luswanela kuisa pilu kwa lika zelunani zona kufita kuisa pilu kwa lika zelusa koni kuba ni zona.

 6. Ki swanisezo ifi yeluka nyakisisa cwale, mi ika lutusa cwañi?

⁶ Kana luli kwakonahala kukolwa ka lika zelunani zona? Batu babañata baikutwa kuli hakukonahali bakeñisa kuli luna batu hañata lutabela kuziba mwakuezeza lika zenca. Kono mane kwakonahala. Lwakona kuikola lika zelunani zona kufita kuisa feela pilu kwa lika “zaabona meeto” aluna. Taba yeo ikonahala cwañi? Kuli luzibe mokukona kubela cwalo, halunyakisiseñi swanisezo ya litalenta yanaafile Jesu yeñozwi kwa Mateu 25:14-30. Swanisezo yeo ika lutusa kuziba molukona kubela ni tabo ni kuzwelapili kukolwa ka lika zelunani zona ka nako ya cwale.

 7. Mutaluse ka bukuswani swanisezo ya litalenta yanaafile Jesu.

⁷ Mwa swanisezo yanaafile Jesu, mutu yomuñwi naatuha atama musipili wa kuya kwa naha ya kwahule. Pili asika afunduka kale, abiza batanga bahae mi abafa litalenta kuli baeze pisinisi.c Afa yomuñwi ni yomuñwi kulikana ni buikoneli bwahae, yomuñwi amufa litalenta zeketalizoho, yomuñwi zepeli, mi yomuñwi yena amufa iliñwi. Batanga bahae bababeli bapili nebasebelize ka taata mi bafumanela mulenaa bona masheleñi amañwi. Kono mutanga wabulaalu yena naasika itusisa masheleñi anaafilwe, mi mulenaa hae amuzwisa musebezi.

 8. Ki kabakalañi mutanga wapili yabulezwi mwa swanisezo ya Jesu hanaatabile?

⁸ Mutanga wapili ulukela kuba yanaatabile hahulu bakeñisa kuli naafilwe litalenta zeketalizoho ki mulenaa hae. Ao neli masheleñi amañata luli, mi taba yeo ibonisa kuli mulenaa hae naamusepile hahulu! Mutangaa wabubeli yena bo? Naakona kuzwafa bakeñisa kuli naasika fiwa litalenta zeñata sina feela mutanga wapili. Kono naaezize cwañi?

 9. Ki lika mañi zanaasika bulela Jesu ka za mutanga wabubeli? (Mateu 25:22, 23)

⁹ Mubale Mateu 25:22, 23. Jesu naasika bulela kuli mutanga wabubeli naafilikani mi naanyemezi mulenaa hae kabakala kuli naafilwe feela litalenta zepeli. Hape Jesu naasika bonisa kuli mutanga yo naabilaezi ka kubulela kuli: ‘Ona ze ki zona feela zenifilwe! Ni na nisebeza ka taata sina feela mutanga yo yafilwe litalenta zeketalizoho! Haiba mulenaaka haitebuhi zeni muezeza, ki hande kupumbeka litalenta zepeli ze mwa mubu ni kuisebeleza na muñi kufita kumusebeleza.’

10. Mutanga wabubeli naaitusisize cwañi litalenta zanaafilwe?

¹⁰ Ka kuswana ni mutanga wapili, mutanga wabubeli ni yena naalemuhile kuli naafilwe buikalabelo bobutuna mi naaezize mwanaakonela kaufela kusebeleza mulenaa hae. Kabakaleo, afumanela mulenaa hae litalenta zeñwi zepeli. Mulenaa hae naamufile mupuzo omutuna kabakala kusebeza ka taata. Naatabile hahulu mi hape amufa buikalabelo bobuñwi!

11. Ki lika mañi zekona kulutusa kuba ni tabo yetuna?

¹¹ Ka mukwa oswana, ni luna lukaba ni tabo haiba lueza ka tukufalelo musebezi ufi kamba ufi olufiwa mwa sebelezo yaluna ku Jehova. ‘Mutukufalelwe hahulu’ mwa musebezi wa kukutaza, mi mutuse momukonela kaufela mwa misebezi ya puteho. (Lik. 18:5; Maheb. 10:24, 25) Muitukisezange hande mikopano ilikuli mukone kufa likalabo zesusueza. Hamufilwe ngambolo ya muituti mwa mukopano wa mwahalaa sunda, muitukisezange hande ni kutaleleza buikalabelo bwamina. Haiba mukupiwa kueza musebezi omuñwi mwa puteho, musike mwaliyeha kuueza mi mubonise kuli mwaitingwa. Musike mwaikutwa kuli musebezi omufilwe haki wa butokwa mi hamuswaneli kuueza. Mueze ka taata kuli muekeze kwa buikoneli bwamina. (Liprov. 22:29) Haiba mupateha kueza misebezi ya kwa moya mi mutaleleza buikalabelo bomufilwe, mukaeza zwelopili kapili mi mukaba ni tabo yetuna. (Magal. 6:4) Hape kueza cwalo kuka mitusa kuli mutabe ni babañwi habafiwa buikalabelo bone mutabela kuba ni bona.—Maro. 12:15; Magal. 5:26.

12. Ki lika mañi zenetusize Lipaki za Jehova bababeli kuzwelapili kuba ni tabo?

¹² Halunyakisiseñi hape mutala wa bo Melissa, bane batabela kusebeleza fa Betele kamba kukena Sikolo sa Bakutazi ba Mubuso. Nihaike kuli nebasa koni kueza cwalo, batalusa kuli: “Ka kuba paina, niezanga monikonela kaufela kupeta bukombwa bwaka ka kutala, mi nilikanga mikutalezo yeshutana-shutana. Kueza cwalo kunitusize kuba ni tabo yetuna.” Mi ki nto mañi yenetusize bo Nick kuitiisa hane basika ketiwa kuba sikombwa sa puteho? Bo Nick batalusa kuli: “Neniisanga pilu kwa lika zene nikona kueza inge cwalo kukutaza ni kufa likalabo zesusueza kwa mikopano. Hape nenikupile kuyo sebeleza fa Betele mi neniamuhezwi mwa silimo sene sitatami.”

13. Mukatusiwa cwañi haiba mueza momukonela kaufela mwa musebezi omufilwe ka nako ya cwale? (Muekelesia 2:24)

¹³ Haiba mueza musebezi omufilwe ka nako ya cwale ka tukufalelo, kana mukafiwa buikalabelo bobuñwi kwapili? Kwakona kuba cwalo, sina feela mone kubezi ku bo Nick. Kono haiba musafiwi buikalabelo bo, sina feela mone kubezi ku bo Melissa, musakona kuba ni tabo yetuna, hamunze musebeleza Jehova. (Mubale Muekelesia 2:24.) Hape mukaba ni tabo yetuna kakuli mwaziba kuli zemueza litabisa Mulenaa luna, Jesu Kreste.

14. Ki lika mañi zeluswanela kuhupulanga haluitomela likonkwani za kwa moya?

¹⁴ Haiba lusweli kueza molukonela kaufela kupeta misebezi yelufilwe ka nako ya cwale, kana fo kutalusa kuli haluswaneli kuikataza kueza zeñwi mwa sebelezo yaluna ku Jehova? Kutokwa! Luswanela kuitomela likonkwani za kwa moya zeka lutusa kuzwelapili kueza zeñata mwa bukombwa ni kutusa mizwale ni likaizeli baluna. Lukakondisa haiba luitomela likonkwani zende zeka lutusa kuisa pilu kwa kusebeleza babañwi kufita kueza lika zekatusa feela luna.—Liprov. 11:2; Lik. 20:35.

15. Ki likonkwani zecwañi zemukona kuitomela zekona kumitusa kuzwelapili kuba ni tabo?

¹⁵ Ki likonkwani zecwañi zemukona kuitomela? Mukupe Jehova kuli amituse kuziba likonkwani zemukona kukwanisa. (Liprov. 16:3; Jak. 1:5) Mwendi mwakona kuitomela sesiñwi sa likonkwani zetalusizwe mwa paragilafu 1 ya taba ye, inge cwalo kueza bupaina bwa kutusa, bupaina bwa kamita, kusebeleza fa Betele, kamba kutusa mwa musebezi wa kuyaha miyaho ya kopano. Kamba mwendi mwakona kuituta puo isili ilikuli mukone kukutaza kwa batu bababulela puo yeo kamba kuyo kutaleza mwa naha isili. Kuli muzibe zeñata ka za momukona kuezeza cwalo, mubale kauhanyo 10 ya buka ya Moluswalisanezi Kueza Tato ya Jehova mi muikambote ni baana-bahulu mwa puteho yamina.d Hamunze mulika kupeta likonkwani zeo, zwelopili yamina ikalemuhiwa ki batu mi mukaba ni tabo yetuna.

16. Ki sika mañi semuswanela kueza haiba mupalelwa kukwanisa sikonkwani sesiñwi sene muitomezi?

¹⁶ Kono kucwañi haiba mupalelwa kukwanisa sesiñwi sa likonkwani zebulezwi mwa taba ye? Mulike kuitomela sikonkwani sesiñwi semukona kukwanisa. Halunyakisiseñi likonkwani zelatelela.

17. Ka kuya ka 1 Timotea 4:13, 15, muzwale utokwa kuezañi kuli abe muluti yomunde?

¹⁷ Mubale 1 Timotea 4:13, 15. Haiba mu muzwale yakolobelizwe, mwendi mwakona kuitomela sikonkwani sa kuba mubuleli kamba muluti yomunde. Kabakalañi? Kabakala kuli haiba mueza momukonela kaufela kuba mubali yomunde, mubuleli yomunde, ni kuba muluti yomunde, mukatusa hahulu babateeleza ku mina. Mulike kuitomela sikonkwani sa kubalanga ni kusebelisa tuto ni tuto yenyakisisizwe mwa broshuwa ya Muikataze Kubala ni Kuluta. Muitute tuto iliñwi ka iliñwi, musebelise tuto yeo inze musali kwa ndu yamina, mi hasamulaho, muitusise litaba zeo hamufa ngambolo kwa Ndu ya Mubuso. Mukupe tuso ku muelezi wa mutusi kamba kwa baana-bahulu babañwi “babasebeza ka taata mwakubulela ni kuluta.”e (1 Tim. 5:17) Musike mwabata feela kuziba mwakusebeliseza litaba zebulezwi mwa broshuwa yeo, kono hape munahane momukona kutuseza bateelezi bamina kutiisa tumelo yabona ni momukona kubasusueleza kusebelisa zebaituta. Haiba mueza cwalo, mukazwelapili kuba ni tabo, mi ni bona bakaba ni tabo.

18. Ki lika mañi zekona kulutusa kuekeza kwa buikoneli bwaluna mwa bukombwa?

¹⁸ Kaufelaa luna lufilwe musebezi wa kukutaza ni kuluta batu kuba balutiwa. (Mat. 28:19, 20; Maro. 10:14) Kana mwatabela kuekeza kwa buikoneli bwamina ka za mwakupetela hande musebezi wa butokwa hahulu wo? Muitomele sikonkwani sa kubala ni kusebelisa lituto zemuituta mwa broshuwa ya Kuluta. Mwakona kufumana liakalezo zeñwi mwa Buka ya Mukopano wa Bupilo Bwaluna Bwa Sikreste ni Bukombwa ni mwa mavidio a liakalezo za mwakuambolisanela ni batu abuhiswanga kwa mukopano wa mwahalaa sunda. Mulike kuitusisa liakalezo zeshutana-shutana kuli muzibe mukutalezo okona kutusa hahulu batu mwa sibaka semukutaleza ku sona. Haiba musebelisa liakalezo ze, mukaba bakutazi babande mi mukaba ni tabo yetuna.—2 Tim. 4:5.

19. Ki lika mañi zekona kumitusa kuba ni tulemeno totutabisa Mulimu?

¹⁹ Hamubata kuitomela likonkwani, musike mwalibala kuli sesiñwi sa likonkwani za butokwa hahulu semukona kuitomela ki kuzwelapili kuba ni tulemeno totutabisa Mulimu. (Magal. 5:22, 23; Makolo. 3:12; 2 Pit. 1:5-8) Mutokwa kuezañi kuli mukwanise sikonkwani seo? Ka mutala, luungeñi kuli mubata kuba ni tumelo yetiile. Mwakona kubala litaba za mwa lihatiso zaluna zebonisa momukona kutiiseza tumelo yamina. Mukatusiwa hahulu haiba mubuha mavidio a fa JW Broadcasting^® abonisa mo mizwale ni likaizeli baluna bakonezi kutiyela miinelo yetaata yeshutana-shutana. Mi munyakisise momukona kulikanyiseza tumelo yabona.

20. Ki nto mañi yekona kulutusa kuzwelapili kuba ni tabo halusa fiwi buikalabelo bobuñwi?

²⁰ Kusina kukakanya, kaufelaa luna lubata kueza zeñata mwa sebelezo yaluna ku Jehova kufita moluezeza cwale. Mwa lifasi lelinca la Mulimu, luka musebeleza ka kutala. Niteñi, haiba luikataza kueza musebezi ufi kamba ufi olufilwe, lukaba ni tabo, mi haluna kuikutwa hahulu bumaswe haiba lusafiwi buikalabelo bobuñwi. Sa butokwa nikufita kikuli, lukakutekehisa ni kulumbeka Jehova, yena “Mulimu yatabile.” (1 Tim. 1:11) Kacwalo, haike lutabe kabakala buikalabelo bolufilwe!