Jehova atuha afelisa matata aluna kaufela ka kuitusisa Mubuso wahae. Taba yeo ki yende hahulu mi lutokwa kuitaluseza babañwi. Jesu ubata kuli balateleli bahae bataluseze batu kaufela taba yende! (Mateu 28:19, 20) Lipaki za Jehova balatelela cwañi taelo yeo?

1. Liñolo la Mateu 24:14 litalelezwa cwañi kacenu?

Jesu naapolofitile kuli: “Taba yende ye ya Mubuso ikakutazwa mwa lifasi kaufela.” (Mateu 24:14) Lipaki za Jehova bapatehile kueza musebezi wa butokwa wo. Bakutaza taba yende mwa lifasi kaufela mwa lipuo zefitelela 1,000! Lipaki za Jehova baswalisani mi baeza mobakonela kaufela kupeta musebezi wo. Jehova ki yena yabatusa kueza musebezi wa kukutaza.

2. Ki lika mañi zeluezanga kuli lukutaze ku babañwi?

Lukutazanga kobafumaneha batu kaufela. Sina Bakreste ba mwa linako za baapositola, lukutazanga “fa ndu ni ndu.” (Likezo 5:42) Kueza cwalo kulutusa kukutaza kwa batu babañata-ñata silimo ni silimo. Bakeñisa kuli batu habafumanehangi fa mandu, lukutazanga ni mwa libaka mokufumaneha batu babañata. Luezanga molukonela kaufela kutaluseza babañwi za Jehova ni milelo yahae.

3. Ki bo mañi babaswanela kukutaza taba yende?

Bakreste ba niti kaufela baswanela kutaluseza babañwi taba yende. Luunga buikalabelo bo kuba bwa butokwa hahulu. Lukutazanga molukonela kaufela kulikana ni miinelo yaluna bakeñisa kuli musebezi wo ukapilisa batu. (Mubale 1 Timotea 4:16.) Halufiwangi masheleñi kuli lueze musebezi wo, kakuli Bibele ili: “Mufilwe feela, ni mina mufane feela.” (Mateu 10:7, 8) Haki batu kaufela babaamuhelanga lushango lwaluna. Kono lwazwelapili kukutaza bakeñisa kuli halueza cwalo, luutwa Jehova mi lwamutabisa.

MUBATISISE

4. Luikatazanga kukutaza kwa batu kaufela

VIDIO: Kukutaleza “Kwa Libaka za Kwahule Hahulu za Lifasi” (7:33)

• Ki lika mañi zemitabisa ka za musebezi wa kukutaza obaezanga Lipaki za Jehova?

Mubale Mateu 22:39 ni Maroma 10:13-15, mi kihona mukanyakisisa lipuzo zelatelela:

• Musebezi oluezanga wa kukutaza ubonisa cwañi kuli lwalata batu?

• Jehova uikutwa cwañi ka za batu babakutaza taba yende?—Mubone timana 15.

5. Lusebeza hamoho ni Mulimu

Kunani lika zeñata zebonisa kuli Jehova uetelela musebezi waluna. Ka mutala, muzwale wa kwa New Zealand yabizwa Paul, naafumani musali yomuñwi hanaanzaa kutaza fa ndu ni ndu zazi leliñwi. Lizazi leo kakusasana, musali yo naalapezi ku Mulimu ka kuitusisa libizo la Jehova, kuli alume mutu yomuñwi kuto mukutaza. Bo Paul bali: “Hamulaho wa lihora zetaalu kuzwa fanaalapelezi musali yo, napunya fa ndu yahae.”

Mubale 1 Makorinte 3:9, mi kihona mukanyakisisa puzo yelatelela:

• Mutala olunyakisisize wa kwa New Zealand ubonisa cwañi kuli Jehova usweli waetelela musebezi wa kukutaza?

Mubale Likezo 1:8, mi kihona mukanyakisisa puzo yelatelela:

• Ki kabakalañi halutokwa kutusiwa ki Jehova kuli lueze hande musebezi wa kukutaza?

Kana mwaziba?

Kwa mikopano yaluna ya mwahalaa sunda, lulutiwanga mwakukutaleza. Haiba semufumanehile ku omuñwi wa mikopano yeo, ki lika mañi zene mulemuhile?

6. Luutwa Mulimu halukutaza

Mwa linako za baapositola, balwanisi nebalikile kutuhelisa balateleli ba Jesu kukutaza. Bakreste ba kwamulaho nebayemezi tukelo yabona ya kukutaza ka ‘kupaka taba yende ka mulao.’ (Mafilipi 1:7) Lipaki za Jehova ni bona baeza nto yeswana kacenu.a

VIDIO: Kuyemela Taba Yende ka Mulao (2:28)

Mubale Likezo 5:27-42, mi kihona mukanyakisisa puzo yelatelela:

• Ki kabakalañi haluzwelapili kukutaza? —Mubone litimana 29, 38, ni 39.

LITABA KA BUKUSWANI

Jesu naalaezi balateleli bahae kukutaza taba yende kwa macaba kaufela. Jehova utusa batu bahae kukutaza.

Mulundulule

• Taba yende ikutazwa cwañi mwa lifasi kaufela?

• Musebezi wa kukutaza olueza ubonisa cwañi kuli lwalata batu babañwi?

• Kana musebezi wa kukutaza wakona kulutahiseza tabo? Libaka?

MUBONE LITABA ZEÑWI

Mubone mobakutalezanga Lipaki za Jehova mwa litolopo zetuna.

Musebezi Oipitezi wa Kukutaza Mwa Libaka za Nyangela Mwa Paris (5:11)

Ki lika mañi zebaezize Lipaki za Jehova kuli bakutaze kwa babalehi?

Kukutaza Taba Yende Kwa Babalehi (5:59)

Muutwe zetusize musali yomuñwi kuba ni tabo kabakala kueza musebezi wa kukutaza mwa bupilo bwahae kaufela.

Nalata Musebezi wa Kukutaza (6:29)

Munyakisise litaba zeluwinile mwa likuta zelutusize kuzwelapili kukutaza taba yende.

“Bakutazi ba Mubuso Baisa Litaba Kwa Kuta” (Gods Kingdom Rules!, kauhanyo 13)

Jesu naabulezi kuli Bakreste batokwa kukolobezwa. (Mubale Mateu 28:19, 20.) Kono kolobezo ki nto mañi? Mi ki lika mañi zaswanela kueza mutu kuli akolobezwe?

1. Kolobezo ki nto mañi?

Linzwi la “kukolobeza” lizwa fa linzwi la Sigerike lelitalusa “kunwelisa” mwa mezi. Jesu hanaakolobezwa, naanwelisizwe mwa Nuka ya Jordani, mi hamulaho ‘aomboka mwa mezi.’ (Mareka 1:9, 10) Ka nzila yeswana, Bakreste ba niti ni bona bakolobezwanga ka kunweliswa mwa mezi.

2. Mutu hakolobezwa ubonisañi?

Mutu hakolobezwa, ubonisa kuli uineezi ku Jehova Mulimu. Kono ki lika mañi zaswanela kueza mutu kuli aineele ku Mulimu? Pili asika kolobezwa kale, uswanela kulapela ku Jehova kwa mukunda ni kumusepisa kuli uka musebeleza kuya kuile, ni kuli ukalapela feela Jehova anosi mi kueza tato ya Mulimu ikaba yona nto ya butokwa mwa bupilo bwahae kaufela. Uketa ‘kuitoboha ni . . . kuzwelapili kulatelela’ lituto ni mutala wa Jesu. (Mateu 16:24) Kuineela ku Jehova ni kukolobezwa kumukonisa kuba ni silikani sesinde ni Jehova ni balapeli babañwi.

3. Ki lika mañi zaswanela kueza mutu kuli akolobezwe?

Pili musika kolobezwa kale, muswanela kuituta ka za Jehova ni kuba ni tumelo ku yena. (Mubale Maheberu 11:6.) Hamunze muzwelapili kuziba Jehova ni kutiisa tumelo yamina ku yena, muka mulata hahulu. Mi mukabata kutaluseza babañwi ka za hae ni kupila ka kulumelelana ni likuka zahae. (2 Timotea 4:2; 1 Joani 5:3) Haiba mupila “ka mukwa oswanela Jehova kuli mumutabise ka kutala,” mwakona kuineela ku yena ni kukolobezwa.—Makolose 1:9, 10.a

MUBATISISE

4. Lwakona kuituta sesiñwi kwa kolobezo ya Jesu

Kuli muitute zeñata ka za kolobezo ya Jesu, mubale Mateu 3:13-17. Mi kihona mukanyakisisa lipuzo zelatelela:

• Kana Jesu naakolobelizwe inze asali mwanana?

• Naakolobelizwe cwañi? Kana naasasizwe feela mezi?

Jesu naakalile kueza musebezi wanaafilwe ki Mulimu hamulaho wa kukolobezwa. Mubale Luka 3:21-23 ni Joani 6:38, mi kihona mukanyakisisa puzo yelatelela:

• Jesu hasaakolobelizwe, ki musebezi mañi wanaaezanga hahulu mwa bupilo bwahae?

5. Mwakona kukolobezwa

Mwendi mwakona kuikalelwa hahulu hamunahana za kuineela ni kukolobezwa. Nihakulicwalo, hamunze muzwelapili kuituta, sabo yecwalo yakona kufela. Kuli mubone mo babañwi nebaezelize cwalo, mubuhe VIDIO.

VIDIO: Momukona Kubela Balikani ba Jehova (1:11)

Mubale Joani 17:3 ni Jakobo 1:5, mi kihona mukanyakisisa puzo yelatelela:

• Ki lika mañi zatokwa kueza mutu kuli akolobezwe?

1. Luineela ku Jehova ka kumusepisa kuli lukasebeleza feela yena anosi

2. Halukolobezwa, lubonisa batu kuli luineezi ku Mulimu

6. Hamukolobezwa muba mwa lubasi lwa Jehova

Hamukolobezwa, muba mwa lubasi loluswalisani lwa batanga ba Jehova ba mwa lifasi kaufela. Kusina taba ni kolusimuluha, lulumela litaba zeswana mi lulatelela likuka za Jehova zeswana. Mubale Samu 25:14 ni 1 Pitrosi 2:17, mi kihona mukanyakisisa puzo yelatelela:

• Kukolobezwa kukona kutusa cwañi mutu kuba ni silikani sesinde ni Jehova ni batu?

LITABA KA BUKUSWANI

Jesu naabulelezi Bakreste kuli baswanela kukolobezwa. Kuli mukone kukolobezwa, mutokwa kuba ni tumelo yetiile ku Jehova, kupila ka kulatelela likuka zahae, ni kuineela ku yena.

Mulundulule

• Kolobezo ki nto mañi, mi ki kabakalañi hamutokwa kukolobezwa?

• Kukolobezwa kubonisañi?

• Ki lika mañi zaswanela kueza mutu pili asika ineela kale ni kukolobezwa?

MUBONE LITABA ZEÑWI

Muitute zeitalusa kolobezo.

“Kolobezo ki Nto Mañi?” (Taba ya fa webusaiti)

Munyakisise lika zatokwa kueza mutu kuli akolobezwe.

“Kulata Jehova ni Kuitebuha Zamiezelize Kuka Mitusa Kuunga Muhato wa Kukolobezwa” (Tawala ya Mulibeleli, March 2020)

Mubale zenetusize muuna yomuñwi kuikatulela kukolobezwa.

“Nebabata Kuli Nifite fa Kuziba Ili na Zeibulela Bibele Luli” (Tawala ya Mulibeleli, February 1, 2013)

Munyakisise libaka kukolobezwa hakuli kwa butokwa ni momukona kuitukiseza kueza cwalo.

“Kana Naswanela Kukolobezwa?” (Questions Young People Ask—Answers That Work, Volyumu 2, kauhanyo 37)