TUTO 16
Ki Lika Mañi Zanaaezize Jesu Hanaali fa Lifasi?
Batu babañata banahana kuli Jesu neli feela mbututu, mupolofita yabutali, kamba muuna yanaaatulezwi lifu. Kono kana lwakona kuituta zeñata ka za hae ka kunyakisisa zanaaezize hanaali fa lifasi? Mwa tuto ye, lukanyakisisa lika zeñwi za butokwa hahulu zanaaezize Jesu mi lukabona molikona kumituseza.
1. Ki ufi musebezi omutuna wanaaezanga Jesu?
Musebezi omutuna wanaaezanga Jesu neli ‘kushaela taba yende ya Mubuso wa Mulimu.’ (Mubale Luka 4:43.) Naakutalize taba yende ya kuli Mulimu naakatoma mubuso one ukafelisa miinelo kaufela yetaata yebakopana ni yona batu.a Ka lilimo zetaalu ni hafu, Jesu naasebelize ka taata kukutaza taba yende yeo.—Mateu 9:35.
2. Ki kabakalañi Jesu hanaaezanga limakazo?
Bibele italusa za ‘misebezi yemaata ni zekomokisa, ni lisupo zanaaezize Mulimu ka [Jesu].’ (Likezo 2:22) Mulimu naafile Jesu maata a kukuzisa mañungwa, kufepa batu babañata, kufolisa bakuli, mane ni kuzusa babashwile. (Mateu 8:23-27; 14:15-21; Mareka 6:56; Luka 7:11-17) Limakazo zanaaezize Jesu libonisa kuli naalumilwe ki Mulimu. Hape libonisa kuli Jehova unani maata a kufelisa miinelo kaufela yetaata yelukopana ni yona.
3. Lukona kuitutañi kwa mutala wa Jesu?
Jesu naaezize lika kaufela zanaabata Jehova kuli aeze. (Mubale Joani 8:29.) Kusina taba ni kulwaniswa, Jesu ka busepahali naaezize lika kaufela zanaa mulaezi Ndatahe kuli aeze mi naazwezipili kueza cwalo kufitela lifu lahae. Taba yeo ibonisa kuli batu bakona kusebeleza Mulimu niha bali mwa miinelo yetaata. Kacwalo Jesu ‘ulusiyezi mutala kuli luhate ka busepahali mwanaahatile.’—1 Pitrosi 2:21.
MUBATISISE
Munyakisise mo Jesu naatalusezanga babañwi taba yende ni mwanaaezezanga limakazo.
4. Jesu naatalusezanga babañwi taba yende
Jesu naazamayanga misipili yemitelele mwa mikwakwa ya maluli inzaa kutaza taba yende kwa batu babañata. Mubale Luka 8:1, mi kihona mukanyakisisa lipuzo zelatelela:
Kana Jesu naakutazanga feela kwa batu bane batahanga kuto teeleza ku yena?
Ki lika mañi zanaaezanga Jesu kuli afumane batu ba kukutaza ku bona?
Mulimu naabulezi cimo kuli Mesia naakataluseza batu taba yende. Mubale Isaya 61:1, 2, mi kihona mukanyakisisa lipuzo zelatelela:
Jesu naatalelelize cwañi bupolofita bo?
Mubona cwañi, kana batu kacenu batokwa kuutwa taba yende?
5. Jesu naalutanga batu lituto za butokwa
Kwandaa kukutaza taba yende ka za Mubuso wa Mulimu, Jesu hape naalutanga batu lituto zene batusa mwakupilela ni babañwi. Hamunyakisise mitala isikai mwa Ngambolo ya fa Lilundu yanaafile Jesu. Mubale Mateu 6:14, 34 ni 7:12, mi kihona mukanyakisisa lipuzo zelatelela:
Ki lituto mañi zetusa zanaafile Jesu mwa litimana ze?
Mubona cwañi, kana lituto zeo zakona kulutusa ni luna kacenu?
6. Jesu naaezanga limakazo
Jehova naafile Jesu maata a kueza limakazo zeñata. Kuli muzibe limakazo zeñwi zanaaezize, mubale Mareka 5:25-34 kamba mubuhe VIDIO. Kihona mukanyakisisa lipuzo zelatelela.
Ka kuya ka ze muboni mwa vidio, ki buikolwiso mañi bwanaanani bona musali yanaakula?
Ki lika mañi zemutabezi ka za makazo yemuboni mwa vidio?
Mubale Joani 5:36, mi kihona mukanyakisisa puzo yelatelela:
Limakazo zanaaezize Jesu nelifa ‘bupaki’ mañi ka za hae?
Kana mwaziba?
Litaba zeñata zeluziba ka za Jesu lizwa mwa libuka zeene za mwa Bibele ili Mateu, Mareka, Luka, ni Joani. Yeñwi ni yeñwi ya libuka zeo inani litaba zeshutana-shutana ka za Jesu. Kono litaba zeo kaufela libonisa lika zanaaezize Jesu hanaali fa lifasi.
Buka ya MATEU
ki yona yenekalile kuñolwa pili kwa libuka zeene zeo. Buka ye ilutaluseza hahulu lituto za Jesu sihulu zanaalutile batu ka za Mubuso wa Mulimu.
Buka ya MAREKA
yona inani feela litaba zenyinyani. Buka ye ilutaluseza lika zeñata zetabisa zanaaezize Jesu.
Buka ya LUKA
ibonisa mo Jesu naangela tapelo kuba ya butokwa ni kuli Jesu naakuteka basali.
Buka ya JOANI
yona ilutaluseza zeñata ka za Jesu ni mwanaaambolelanga ni balikani bahae babatuna ni batu babañwi.
BABAÑWI BABULELANGA KULI: “Jesu naali feela mutu yomunde, nesi yena Mesia.”
Mubona cwañi?
LITABA KA BUKUSWANI
Jesu naakutalize ka za Mubuso wa Mulimu, naaezize limakazo, mi naaezize lika kaufela zanaa mulaezi Jehova kuli aeze.
Mulundulule
Ki musebezi mañi wanaaezanga hahulu Jesu hanaali fa lifasi?
Limakazo zanaaezize Jesu libonisañi?
Ki lituto mañi za butokwa zanaalutanga Jesu?
MUBONE LITABA ZEÑWI
Ki taba mañi yanaakutazanga hahulu Jesu?
“Mubuso wa Mulimu—Libaka Hauli wa Butokwa ku Jesu” (Tawala ya Mulibeleli, October 1, 2014)
Munyakisise libaka haluswanela kulumela kuli Jesu naaezize limakazo hanaali fa lifasi.
“Limakazo za Jesu—Mukona Kuitutañi?” (Tawala ya Mulibeleli, July 15, 2004)
Mubale ka za mo mutu yomuñwi naacincelize bupilo bwahae hamulaho wa kuituta ka za mo Jesu naaisezanga babañwi pilu.
“Neninani Hahulu Buitati” (Tawala ya Mulibeleli, October 1, 2014)
Mubale lika zeñwi za butokwa zanaaezize Jesu ili zekolohanyizwe ka kuya ka mone liezahalezi.
a Mwa tuto 31 kuisa tuto 33, lukanyakisisa hahulu za Mubuso wa Mulimu.