Ku Punyusezwa mwa Lifasi Le Linca Le Li Lukile

“Ba ka ikola kozo ye tuna.”—SAMU 37:11.

 1, 2. (a) Ku punyusa kwa Jehova kwa mwa nako ya luna ku ka shutana cwani ni ku punyusa kwa mwa linako za kwaikale? (b) Ki mwa lifasi la mufuta mañi m’o Jehova a ka tisa batu ba hae?

JEHOVA ki Mulimu ya punyusa. Mwa linako za kwamulaho, n’a punyusize batu ba hae mwa likezahalo ze ñata. Lipunyuho zeo ne li za ka swalelele, kakuli mwa miinelo yeo kaufela Jehova n’a si ka tahisa katulo ya hae ye inelela fahalimw’a lifasi kamukana la Satani. Kono mwa lizazi la luna, Jehova u ka tuha a eza punyuso ye tuna ka ku fitisisa kwa batanga ba hae kaufela. Nako ye u ka sinya katowati kaufela ka muinelo wa Satani mwa lifasi kamukana, mi u ka tisa batanga ba hae mwa lifasi le linca la ku ya ku ile, le li lukile.—2 Pitrosi 2:9; 3:10-13.

² Jehova u sepisa kuli: “Ku sa na ni nakonyana ye nyinyani, mi ya maswe h’a sa na ku ba teñi . . . Kono ba ba ishuwa ba ka luwa naha, ba ka ikola kozo ye tuna.” (Samu 37:10, 11) Ka butelele bwa nako ye kuma kai? “Ba ba na ni niti ba ka yola sanda sa naha, ni ku yaha mwateñi ku ya ku ile.” (Samu 37:29; Mateu 5:5) Nihakulicwalo, pili seo si si ka ezahala kale, lifasi le li ka ba mwa nako ye tuna ka ku fitisisa ya butata bo li si ka ziba haisali.

“Ñalelwa ye Tuna”

 3. Jesu n’a talusize cwañi “ñalelwa ye tuna”?

³ Ka 1914 lifasi le ne li keni mwa nako ya lona ya “mazazi a maungulelo.” (2 Timotea 3:1-5, 13) Cwale se lu na ni lilimo ze 83 mwa silengo seo sa nako mi se lu atumela mafelelezo a sona ili f’o, sina Jesu ha n’a bulezi cimo, ze latelela li ka ezahala: “Ñalelwa ikaba ye tuna; la li ku simuluha lifasi, ku tisa cwale, ha ku si ka bonwa ñalelwa ye tuna cwalo, mane ni kwapili.” (Mateu 24:21) Ee, ku fita mane nihaiba Ndwa ya Lifasi ya Bubeli, ili f’o batu ba ba bat’o eza bolule ba 50 ne ba bulailwe. Ki nako ye zikinyehisa lifasi cwañi ye sweli ku atumela ka lubilo!

 4. Ki kabakalañi katulo ya Mulimu ha i taha fahalimw’a “Babilona yo Mutuna”?

⁴ “Ñalelwa ye tuna” i ka taha ka sipundumukela se si mbwetukisa, “ka nako i liñwi.” (Sinulo 18:10) Ku taseza kwa yona ku ka bonahazwa ki ku tahiswa kwa katulo ya Mulimu fa bulapeli kaufela bwa buhata, ili b’o Linzwi la Mulimu li bu biza “Babilona yo mutuna.” (Sinulo 17:1-6, 15) Kalulo ye tuna ya Babilona wa kwaikale ne li bulapeli bwa buhata. Babilona wa cwale u swana sina mulikan’a hae wa kwaikale mi u yemela kopano ya lifasi kamukana ya bulapeli bwa buhata. U bile lihule ka ku eza tumelelano ya fa sihali-hali ni likalulo za bupolitiki. U yemezi lindwa za bona mi sa fuyauzi limpi ze itwanisa, ili ku tahisa kuli batu ba bulapeli bo bu swana ba bulayane. (Mateu 26:51, 52; 1 Joani 4:20, 21) Sa keshebisize likezo ze fosahezi za balateleli ba hae mi sa nyandisize Bakreste ba niti.—Sinulo 18:5, 24.

 5. “Ñalelwa ye tuna” i kalisa cwañi?

⁵ “Ñalelwa ye tuna” i kalisa muta likopano za bupolitiki li kwenuhela “Babilona yo mutuna” ka sipundumukela. Ba “ka toya lihule, ba li amuhe za lona, ba li tubulise, ba ce nama ya lilama za lona, mi ba li ciseleze mwa mulilo.” (Sinulo 17:16) Ku zwa f’o, ba ne ba li bayemeli ba hae “ba ka mu lila, ba tumuse sililo sa hae.” (Sinulo 18:9-19) Kono batanga ba Jehova se ba libelezi seo ka nako ye telele, mi ba ka huweleza ka tabo ba li: “Alleluya! . . . kakuli u atuzi lihule le lituna, le ne li sinya lifasi ka buhule bwa lona, mi u li lifisize mali a batanga ba hae, a n’a suluzwi ka lizoho la lona.”—Sinulo 19:1, 2.

Ku Tasezwa kwa Batanga ba Mulimu

 6, 7. Ki kabakalañi batanga ba Jehova ha ba kona ku ba ni sepo ye tiile muta ba tasezwa fa “ñalelwa ye tuna”?

⁶ Ha se li sinyize bulapeli bwa buhata, likopano za bupolitiki li ka shatukela batanga ba Jehova. Satani “Gogo, kwa naha ya Magogo” mwa bupolofita, u bulela kuli: “Ni ka y’o kambamela mwa naha ya minzi ye si na makwakwa, ni tulukele batu ba ba iketile.” Ka ku nahana kuli ba swasiwa ka bunolo, u ba taseza ka “kopano ye tuna, mpi ye mata . . . , u [kwahela] naha sina lilu.” (Ezekiele 38:2, 10-16) Batu ba Jehova ba ziba kuli tasezo yeo i ka pala bakeñisa kuli ba sepile Jehova.

⁷ Faro ni limpi za hae ha ne ba ikutwile kuli ne ba swasize batanga ba Mulimu kwa Liwate le li Fubelu, ka makazo Jehova n’a punyusize batu ba hae mi n’a sinyize limpi za Egepita. (Exoda 14:26-28) Fa “ñalelwa ye tuna,” muta macaba a ka ikutwa kuli a swasize batu ba Jehova, yena hape ka makazo u taha ku to ba yangwela: “Zazi [leo] buhali bwa ka bu ka pahama mwa lingo za ka. Ni bulela cwalo mwa lifufa la ka, ni mwa buhali bwa ka.” (Ezekiele 38:18, 19) Kaungu-ungu ka “ñalelwa ye tuna” ka ka ba fakaufi!

 8. Ki likezahalo lifi ze si za ka taho ze ka ezahala pili Jehova a si ka atula kale ba ba maswe, mi ki ka ku ama kufi?

⁸ Ka nako ye ñwi hamulaho wa ku kalisa kwa “ñalelwa ye tuna,” kono pili Jehova a si ka tahisa kale katulo ya hae fahalimw’a lifasi le kaufela, likezahalo ze si za ka taho li ka ezahala. Mu lemuhe ku ama ko li ka ba ni kona. “Kiha ku ka taha kwa lihalimu sisupo sa Mwan’a mutu [Kreste]; mi macaba kaufela a lifasi a ka ikalelwa, mi a ka bona Mwan’a mutu a taha ka malu a lihalimu, ka mata a matuna ni ka kanya ye tuna.” (Mateu 24:29, 30) “Lisupo li ka bonahala fa lizazi ni kweli ni linaleli; . . . batu ba ka omelela kabakala ku saba ni ku libelela ze ka ta mwa lifasi.”—Luka 21:25, 26.

“Ku Liululwa kwa Mina   ku Se ku Li Fakaufi.”

 9. Ki kabakalañi batanga ba Jehova ha ba kona ku ‘inula litoho za bona’ muta likezahalo ze si za ka taho li ezahala?

⁹ Ka yona nako yeo, bupolofita bwa Luka 21:28 bu ka sebeza. Jesu n’a bulezi kuli: “Zeo ha li ka kala ku taha, mu talimise meto kwahalimu, mi mu inuke; kakuli ku liululwa kwa mina ku se ku li fakaufi.” Lila za Mulimu li k’a ngangama ka sabo kakuli ba ka ziba kuli likezahalo ze si za ka taho ze ezahala li zwa ku Jehova. Kono batanga ba Jehova ba ka wabelwa bakeñisa kuli ba ka ziba kuli ku punyuha kwa bona se ku li fakaufi.

10. Linzwi la Mulimu li talusa cwañi mafelelezo a “ñalelwa ye tuna”?

¹⁰ Jehova cwale u tahisa muhato wa ku feza muinelo wa Satani: “Ni ka zekisa Gogo ka lifu la ncwa ye yambukela, ni ka mali; ni neliseze Gogo ni limpi za hae . . . ñundupula, ni simbwewewe, ni mulilo, ni sulufula. . . . Mi [ba] ka ziba kuli Ki Na [Jehova, NW].” (Ezekiele 38:22, 23) Tutowati kamukana twa muinelo wa Satani twa sinyiwa. Nyangela ya mufuta wa mutu kamukana ya batu ba ba keshebisa Mulimu ya timezwa. Ao ki masetela a “ñalelwa ye tuna” a’ li Armagedoni.—Jeremia 25:31-33; 2 Matesalonika 1:6-8; Sinulo 16:14, 16; 19:11-21.

11. Ki kabakalañi batanga ba Jehova ha ba punyuswa mwa “ñalelwa ye tuna”?

¹¹ Ba ba ka punyuswa mwa “ñalelwa ye tuna” ikaba bolule-lule ba balapeli ba Jehova mwa lifasi kamukana. Bona bao ba eza “buñata bo butuna” ba ba zwile mwa “macaba kaufela, ni mwa mishobo, ni mwa masika, ni mwa lipuo kaufela.” Ki kabakalañi ha ba punyuswa ka nzila ye sabisa hahulu cwalo? Bakeñisa kuli ba fa Jehova ‘sebelezo ye kenile musihali ni busihu.’ Kacwalo ba punyuha mafelelezo a lifasi le mi ba kenywa mwa lifasi le linca le li lukile. (Sinulo 7:9-15) Kacwalo, ba iponela talelezo ya sepiso ya Jehova ye li: “U sepe [Jehova, NW] mi u tiyele mwa nzila ya hae, mi u ka kambamiswa, ku y’o luwa naha; u ka bona ba ba maswe ha ba yundiswa.”—Samu 37:34.

Lifasi Le Linca

12. Bapunyuhi ba Armagedoni ba kona ku libelela nto mañi?

¹² Yeo ikaba nako ye nyangumuna hakalo—ku feliswa kwa bumaswe ni ku kalisa kwa nako ye makaza ka ku fitisisa mwa litaba kaufela za butu! (Sinulo 20:1-4) Bapunyuhi ba Armagedoni ba ka itumela hakalo ku Jehova ka ku kena mwa muinelo o munde, o kenile o ezizwe ki Mulimu, ili lifasi le linca, fa lifasi-mubu le li ka fetulwa ku ba paradaisi! (Luka 23:43) Ha ba na ku tokwa ku shwa ni kamuta! (Joani 11:26) Ee luli, ku zwa nako yeo ku ya cwalo kwapili, ba ka ba ni tibelelo ye makaza ya ku pila Jehova ha nze a zwelapili ku pila!

13. Jesu u ka kalisa sinca cwañi musebezi wa ku folisa wa n’a kalisize fa lifasi-mubu?

¹³ Jesu, ili y’o Jehova a ketile sina Mulena wa lihalimu, u ka okamela limbuyoti za limakazo zeo ba ba punyusizwe ba ka ikola. Ha n’a li fa lifasi-mubu, n’a kwaluzi meto a libofu ni lizebe za bosatambi ni ku folisa “matuku kaufela ni buanga kaufela.” (Mateu 9:35; 15:30, 31) Mwa lifasi le linca, u ka kalisa sinca musebezi wo wa ku folisa ka butuna kono ili fa sipimo sa mwa lifasi kamukana. Ka ku ba Muyemeli wa Mulimu, u ka taleleza sepiso ye li: “[Mulimu] u ka takula miyoko kaufela kwa meto a bona; mi lifu ha li sa na ku ba teñi; nihaiba ku tahelwa ki maswabi ni ku lila, ni ku utwa butuku; kakuli za pili li felile.” (Sinulo 21:4) Ni kamuta ha ku sa na ku ba ni tokwahalo ya baalafi kamba bapumbeki!—Isaya 25:8; 33:24.

14. Ki punyuho mañi ye ka taha kwa batanga ba Jehova ba ba shwile kale?

¹⁴ Ba ba ka punyuswa hape ikaba batanga ba Mulimu kaufela ba ba sepahala ba ne ba shwile mwa nako ya kwamulaho. Mwa lifasi le linca, ba ka yangwelwa kwa ku tamwa ki libita. Jehova u sepisa kuli: “Ku zuha kwa bafu ku ka ba teñi, kwa ba ba lukile ni ba ba si ka luka.” (Likezo 24:15) Ka mo ku bonahalela fela, “ba ba lukile” ba ka zusiwa pili ni ku abana mwa ku to yandulula Paradaisi. I ka ba ko ku tabisa hakalo kwa bapunyuhi ba Armagedoni ku utwa ze ne ipumanwi ku zona za bao ba ba shwile ba ba sepahala ba kwaikale, ba ba kutezi cwale kwa bupilo!—Joani 5:28, 29.

15. Ha mu kandeke miinelo ye miñwi ye ka ipumanwa ku yona mwa lifasi le linca.

¹⁵ Ba ba pila kaufela ba ka iponela seo walisamu n’a bulezi ka za Jehova kuli: “U fumbutulula sata sa hao, mi ze pila kaufela za kula.” (Samu 145:16) Ha ku sa na ku ba ni tala: Lifasi-mubu li ka kutiswa sinca kwa muinelo o itikanelelezi mi li ka tahisa ka ku ata. (Samu 72:16) Ha ku sa na batu ba ba si na mandu: “Ba ka yaha mandu, ba pile ku ona,” mi mutu ni mutu u ka ina “mwa kota ya hae ya veine ni mwa kota ya hae ya feiga, ku si na ya ba sabisa.” (Isaya 65:21, 22; Mika 4:4) Ha ku sa na ku ba ni sabo: Ha ku na ku ba ni ndwa, mifilifili, kamba bukebenga. (Samu 46:8, 9; Liproverbia 2:22) “Lifasi kaufela li pumuzi, li na ni kozo; ku tabelezwa lipina za tabo.”—Isaya 14:7.

16. Ki kabakalañi ku luka ha ku ka ambakana mwa lifasi le linca?

¹⁶ Mwa lifasi le linca, linzila za Satani za ku hasanya ka zona mihupulo li ka be li felisizwe. Mwa sibaka sa seo, “batu ba lifasi ba [ka] ituta ku luka.” (Isaya 26:9; 54:13) Ka ku ba ni taelo ye nde ya kwa moya ka silimo ni silimo, “lifasi li ka tala zibo ya [Jehova, NW], sina mezi mw’a kwahelezi liwate.” (Isaya 11:9) Mihupulo ni likezo ze yahisa li ka ambeka mufuta wa mutu. (Mafilipi 4:8) Ha mu nahane fela, nyangela ya mwa lifasi kamukana ya batu ba ba lukuluhile kwa bukebenga, buikuhumuso, muna—ili swalisano ya mizwale ili m’o miselo ya moya wa Mulimu i tahiswa ki mañi ni mañi. Kaniti, mane nihaiba cwale tulemeno to tu cwalo tu swelwi ku huliswa ki buñata bo butuna.—Magalata 5:22, 23.

Ki Kabakalañi Ha ku Ngile Nako ye Telele Cwana?

17. Ki kabakalañi Jehova h’a litezi ka nako ye telele cwalo pili a si ka feza kale bumaswe?

¹⁷ Nihakulicwalo, ki kabakalañi Jehova h’a litezi ka nako ye telele cwana ku felisa bumaswe ni ku punyuseza batu ba hae mwa lifasi le linca? Ha mu nyakisise se ne si na ni ku petiwa. Sa butokwa hahulu ni ku fita ki ku bubaniswa kwa bubusi bwa Jehova, ili tukelo ya hae ya ku busa. Ka ku tuhelela nako ye likani ku fita, s’a bonisize hande fo ku sweu kuli puso ya butu ye siyo mwa bubusi bwa hae i fitile fa ku palelwa ko kutuna. (Jeremia 10:23) Cwale Jehova u na ni libaka le li lukile la ku yolisa puso ya butu ka puso ya Mubuso wa hae wa kwa lihalimu mwatas’a Kreste.—Daniele 2:44; Mateu 6:9, 10.

18. Neikaba lili f’o bana ba Abrahama ne ba ka luwa naha ya Kanana?

¹⁸ Se si ezahezi mwahal’a zona lilimo ze ze myanda ki se si swana ni se ne si ezahezi mwa nako ya Abrahama. Jehova n’a bulelezi Abrahama kuli bana ba hae ne ba ka luwa naha ya Kanana—kono ne ba na ni ku litela ka lilimo ze myanda ye mine “kakuli bumaswe bwa Maamori [ne] bu si ka tala kale.” (Genese 12:1-5; 15:13-16) Linzwi la “Maamori” le li itusisizwe fa (mushobo o mutuna) ka mo ku bonahalela li yemela batu ba mwa Kanana kaufela. Kacwalo lilimo ze bat’o ba myanda ye mine ne li ka fita pili Jehova a si ka konisa kale batu ba hae ku hapa Kanana. Ka nako yeo Jehova n’a tuhelezi macaba a mwa Kanana ku zwisezapili miinelo ya bona. Ki lifi ze ne zwile mwateñi?

19, 20. Ki miinelo ya mufuta mañi yeo Makanana ne ba hulisize?

¹⁹ Buka ya Bible Handbook, ye ñozwi ki Henry H. Halley, i talusa kuli kwa Megiddo, bapumbuli ba lika za kwaikale ne ba fumani matota a tempele ya Ashitaroti, mulimu wa musali wa Baale. U ñola kuli: “Ku zamaya fela matengo a sikai ku zwa fa tempele ne ku na ni mabita, ili fo ne ku fumanwi lipiza ze ñata, ze ne na ni masapo a banana ba ne ba fiwa sina litabelo mwa tempele yeo . . . Bapolofita ba Baale ni Ashitaroti ne ba li babulai ba ba tuna ba banana ba banyinyani.” “Kezo ye ñwi ye maswe hahulu ne li [ye ne] ba biza ‘litabelo za mutomo.’ Ha ne ku yahiwa ndu, mwana n’a eziwa sitabelo, mi mubili wa hae ne u beiwa mwahal’a limota ha li yahiwa.”

²⁰ Halley u talusa kuli: “Bulapeli bwa Baale, Ashitaroti, ni milimu ye miñwi ya Kanana ne bu ama mikiti ya butahwa mo ku si na buiswalo ni hanyinyani; litempele za bona ne li libaka za bumaswe bo butuna bwa muzamao. . . . Makanana ne ba lapela, ka buikezezi mwa muzamao, . . . mi hape, ni ka ku bulaya bana ba bona ba baeli, sina sitabelo ku yona milimu ye swana yeo. Ku bonahala kuli, ka sipimo se situna, naha ya Kanana ne se i bile mufuta wa Sodoma ni Gomora fa sipimo sa naha kaufela. . . . Kana muinelo wa masila ni situhu ze swabisa cwalo ne u sa na ni tukelo ya ku zwelapili ka ku ba teñi? . . . Bapumbuli ba lika za kwaikale ba ba yepa mwa matota a mileneñi ya Kanana ba komoka kuli Mulimu n’a si ka ba sinya kale-kale kwamulaho wa nako ya N’a tilo ba sinya ka yona.”—Mu bapanye 1 Malena 21:25, 26.

21. Ki ku swana kufi ko ku li teñi mwahal’a muinelo wa Makanana ni wa mwa lizazi la luna?

²¹ Bumaswe bwa Maamori ne bu ‘fitile fa ku tala.’ Kacwalo Jehova n’a na ni libaka le li utwahala la ku ba tanyela. Ki nto ye swana ni kacenu. Lifasi le, li tezi mifilifili, buhule, ni ku loba milao ya Mulimu. Mi bakeñisa kuli lu mwa mayemo a mande a ku sa tabiswa ki litabelo za bana ze swabisa za mwa Kanana wa kwaikale, ku cwañi ka za litabelo za bolule b’a mashumi-shumi za ba banca mwa lindwa za lifasi le, ili ze maswe hahulu ku fita lifi kamba lifi za mwa Kanana? Kaniti luli, Jehova ki ya na ni libaka le li utwahala hande mwa ku tisa muinelo wo o maswe kwa mafelelezo.

Ku Peta Nto ye Ñwi Hape

22. Ki sifi se si petiwa ki pilu-telele ya Jehova mwa nako ya luna?

²² Pilu-telele ya Jehova mwa mazazi a a maungulelo i sweli ku peta nto ye ñwi hape. U sweli ku lumeleza nako ya ku kubukanya ni ku luta buñata bo butuna, ili bao cwale se ba fita fa palo ye fitelela bolule baketalizoho. Mwatas’a ketelelo ya Jehova, se ba ezizwe kopano ye zwelapili ka bubebe. Banna, basali, ni ba banca ba twaezwa ku luta ba bañwi liniti za Bibele. Ka mikopano ni lihatiso za bona za Bibele, ba ituta linzila ze lilato za Mulimu. (Joani 13:34, 35; Makolose 3:14; Maheberu 10:24, 25) Fahalimu a seo, ba hulisa bucaziba mwa buyahi, ku za magesi, ku hatisa, ni miinelo ye miñwi ilikuli ba kone ku yemela ku kutazwa kwa “Evangeli.” (Mateu 24:14) Bucaziba bo bu cwalo bwa ku luta ni buyahi bu kana bwa itusiswa ka butuna mwa lifasi le linca.

23. Ki kabakalañi ha i li tohonolo ku pila mwa nako ye?

²³ Ee, kacenu Jehova u sweli ku bakanya batanga hae kuli ba fite mwa “ñalelwa ye tuna” ni ku kena mwa lifasi le linca la ku luka. Cwale ha ku sa na ku ba ni Satani ni lifasi la hae le li maswe la ku lwana ni lona, ha ku na matuku, maswabi, ni lifu. Ka cisehelo ni tabo ze tuna, batu ba Mulimu ba ka zwelapili ni musebezi o tabisa wa ku yaha paradaisi, ili m’o ka zazi ni zazi ku ka ba ni “tabo ye tuna.” Lu na ni tohonolo hakalo ku pila fa kaungu-ungu ka nako ye, ku ziba ni ku sebeleza Jehova, ni ku lemuha kuli ona cwale-cwale fa lu ka ‘inula litoho za luna kakuli ku punyuswa kwa luna ku se ku li fakaufi.’!—Luka 21:28; Samu 146:5.

Lipuzo za Lundululo

◻ “Ñalelwa ye tuna” ki nto mañi, mi i kalisa cwañi?

◻ Ki kabakalañi tasezo ya Gogo fa batanga ba Jehova ha i ka pala?

◻ “Ñalelwa ye tuna” i fela cwañi?

◻ Ki lituso lifi ze makaza zeo lifasi le linca li ka fa?

◻ Ki kabakalañi Jehova h’a litezi ka nako ye telele pili a si ka tahisa kale mafelelezo a muinelo wo?

[Siswaniso se si fa likepe 26]

Lifasi kamukana li ka fetulwa ku ba paradaisi