Mu Ba Butokwa Hahulu mwa Meto a Mulimu!

“Ni ku latile ka lilato le li sa feli; kabakaleo ni ku bulukela sishemo sa ka.”—JEREMIA 31:3.

 1. Mubonelo wa Jesu kwa neku la batu-tu fela ba mwa lizazi la hae ne u fapahana cwañi ni wa Bafalisi?

NE BA kona ku bona seo mwa meto a hae. Munna yo, Jesu, n’a fapahanela kwahule-hule ni baeteleli ba bona ba bulapeli; n’a na ni pabalelo. N’a ba utwela mañeke kakuli ne ba “katezi, ba hasani, inge lingu ze si na mulisana.” (Mateu 9:36) Baeteleli ba bona ba bulapeli ne ba swanela ku ba balisana ba ba lilato ba ba yemela Mulimu y’a lilato, y’a mufelañeke. Mwa sibaka sa seo, ne ba kenda batu-tu fela kuli ki bomalasambwa fela—batu ba ba kutilwe!a (Joani 7:47-49; mu bapanye Ezekiele 34:4.) Ka ku utwahala fela, mubonelo o’ cwalo o’ kopami, o’ si wa mwa mañolo ne u fapahanela kwahule-hule ni mubonelo wa Jehova wa batu ba hae. N’a kile a bulelela Isilaele, sicaba sa hae, kuli: “Ni ku latile ka lilato le li sa feli.”—Jeremia 31:3.

 2. Balikani ba Jobo ba bal’alu ne ba likile cwañi ku mu tahiseza ku lumela kuli n’a si wa butokwa mwa meto a Mulimu?

² Nihakulicwalo, Bafalisi ne ba si ba pili mwa ku lika ku tahisa kuli lingu za Jehova ze latiwa li lumele kuli ne li li ze si za butokwa. Mu nyakisise taba ya Jobo. Ku Jehova n’a li ya lukile ni ya sa nyazahali, kono “baomba-ombi” ba bal’alu ne ba akalelize kuli Jobo n’a li mukwenuheli wa muzamao o maswe, ya maswe luli ya n’a k’a shwa a si k’a siya ni se siñwi sa n’a ka hupulwa ka sona. Ne ba atuzi ka t’ata kuli Mulimu h’a na k’u nga ka butokwa ku luka kufi kamba kufi kwa neku la Jobo, kakuli Mulimu n’a si ka sepa nihaiba mangeloi a hae tota mi n’a nga lihalimu ka sibili ku ba le li si ka kena!—Jobo 1:8; 4:18; 15:15, 16; 18:17-19; 22:3.

 3. Ki sifi s’a itusisa Satani kacenu mwa ku lika ku tahiseza batu ku lumela kuli ha ba na butokwa mi ha ba konwi ku latiwa?

³ Kacenu, Satani u sa sebelisa ‘mano a bupumi’ ao a ku lika ku tahisa kuli batu ba lumele kuli ha ba latiwi mi ha ba na butokwa. (Maefese 6:11, NW, litaluso za kwatasi) Ki niti, hañata u lika ku yembulula batu ka ku landalala fa buikungo ni buikuhumuso bwa bona. (2 Makorinte 11:3) Kono hape u tabela ku shandaula maikuto a ku kutekeha a ba ba fokola. Seo si cwalo sihulu mwa “mazazi a maungulelo” a’ t’ata a. Ba bañata kacenu ba hulela mwa mabasi mo ku “si na lilato la taho”; ba bañata ka zazi ba na ni ku sebelisana ni ba ba na ni buhali, ba ba li baitati, ni matanya. (2 Timotea 3:1-5) Lilimo-limo za nyandiso, ketululo ya ka mushobo, sitoyo, kamba ku itusiswa maswe ne li kana li kolwisize ba ba cwalo kuli ha ba na tuso mi ha ba konwi ku latiwa. Munna yo muñwi n’a ñozi kuli: “Ha ni ikutwi ku lata kamba ku latiwa ki mutu ufi kamba ufi. Ni fumana kuli ku t’ata hahulu ku lumela kuli Mulimu w’a ni isa pilu ka nzila ifi kamba ifi.”

 4, 5. (a) Ki kabakalañi muhupulo wa ku tokwa butokwa kwa ka butu ha u s’a lumelelani ni Mañolo? (b) Ki sifi se siñwi se si maswe se si zwa mwa ku lumela kuli ha ku na ni bo bukana kwa buikatazo bwa luna bo bu na ni butokwa bufi kamba bufi?

⁴ Muhupulo wa ku tokwa butokwa kwa ka butu u lwanisa hahulu niti ya Linzwi la Mulimu, ili tuto ya tiululo. (Joani 3:16) Kuli Mulimu a kone ku lifa teko ye pahami cwalo—ili ya bupilo bo bu butokwa hahulu bwa Mwan’a hae tota—mwa ku lu lekela tohonolo ya ku pila ku ya ku ile, ka buniti fela U lukela ku ba ya lu lata; ka buniti fela lu lukela ku ba ni butokwa bo buñwi mwa meto a Hae!

⁵ Fahalimu a seo, ne ku ka ba ko ku zwafisa cwañi ku ikutwa kuli ha lu ba ba tabisa Mulimu, kuli buikatazo bwa luna ha bu na butokwa ni bo bukana! (Mu bapanye Liproverbia 24:10.) Ka mubonelo o maswe w’o, nihaiba susuezo ya ka mulelo o munde, ye lelezwi ku lu tusa ku hulisa sebelezo ya luna ku Mulimu mo ku konahala, ku ba bañwi ka ku fapahana neikana ya utwahala inge nyazo ye tuna. Neikana ya bonahala inge ye lumelelana ni maikuto a luna tota a mwahali ili a’ tiile a kuli se lu eza kaufela haki se si likani.

 6. Ki sifi se si tibela hande ka ku fitisisa mihupulo ye maswe hahulu ka za luna tota?

⁶ Haiba mu ikutwa ku ba ni maikuto a maswe cwalo mwahali ku mina, mu si ke mwa zwafa. Ba bañata ba ku luna ka linako ze ñwi lu inyaza hahulu ka mukwa o s’a utwahali. Mi mu hupule kuli, Linzwi la Mulimu li lukiselizwe “ku nyaza” ni “ku wisa makwakwa.” (2 Timotea 3:16; 2 Makorinte 10:4) Muapositola Joani n’a ñozi kuli: “Ki ka se, lu ka ziba kuli lu na ni niti, mi lu ka tiisa lipilu za luna fapil’a hae. Lipilu za luna niha li lu nyaza, Mulimu ki yo muhulu kwa lipilu za luna, mi u ziba litaba kamukana.” (1 Joani 3:19, 20) Cwalehe, ha lu buhisaneñi linzila ze t’alu zeo ka zona Bibele i lu luta kuli lu ba butokwa ku Jehova.

Jehova U Mi Bala ku Ba ba Butokwa

 7. Jesu n’a lutile cwañi Bakreste kaufela ka za butokwa bwa bona mwa meto a Mulimu?

⁷ Pili, Bibele i lu luta ka ku nonga kuli yo muñwi ni yo muñwi wa luna ki wa butokwa mwa meto a Mulimu. Jesu n’a bulezi kuli: “Litaha liketalizoho, ha ni li, li leka mapenny a mabeli? Nihakubacwalo Mulimu h’a libali i liñwi ya zona. Mane ni milili ya litoho za mina i balilwe kaufela. Mu si ke mwa saba: mu ba butokwa ku fita litaha ze ñata.” (Luka 12:6, 7) Mwa mazazi ao, taha ne li yona ye ne i cipile ka ku fitisisa kwa linyunywani ze n’e lekiswa sina sico, niteñi ne ku si na nihaike i liñwi ya zona ye ne i ile i s’a lemuhiwi ki Mubupi wa yona. Kacwalo mutomo w’a tomwa kwa neku la bapanyo ya fapahano ye mbwetukisa luli: Ha ku amiwa kwa batu—ba ba li ba butokwa hahulu, ili bo butuna ni ku fita—Mulimu u ziba miinelo kaufela ka butungi. Ku swana inge kuli milili luli ya litoho za luna ne i balilwe ka buñwi!

 8. Ki kabakalañi ha ku li ko ku utwahala ku nahana kuli Jehova u kona ku bala milili ya kwa litoho za luna?

⁸ Milili i balilwe? Haiba mu hupula kuli yona kalulo yeo ya swanisezo ya Jesu ki ye s’a ngi miinelo ka mo i inezi luli, mu nyakisise se: Mulimu u hupula batanga ba hae ba ba sepahala ka ku tala luli kuli mane wa kona ku ba zusa kwa bafu—ili ku ba bupa sinca ka miinelo kaufela ka butungi, ku kopanyeleza cwalo ni mutomo wa sibupeho sa bona o’ tatezani ni lilimo za bona kaufela za ze hupulwa ni yeloseli. Ku bala milili ya luna (ili yeo mwa toho ya butuna bwa fa sihali-hali ku mela ye bat’o ba 100,000) ne ku k’a ba kezo ye bunolo ka bapanyo!—Luka 20:37, 38.

Ki Sifi s’a Bona Jehova ku Luna?

 9. (a) Ki tulemeno tufi to tuñwi t’o Jehova a’ nga ku ba twa butokwa? (b) Ki kabakalañi ha mu nahana kuli tulemeno to tu cwalo ki twa butokwa ku yena?

⁹ Sa bubeli, Bibele i lu luta seo Jehova a’ nga ku ba sa butokwa ku luna. Ka bunolo fela, u tabela tulemeno twa luna to tu nde ni buikatazo bwa luna. Mulena Davida n’a bulelezi mwan’a hae Salumoni kuli: “Muñ’a Bupilo u tatuba lipilu, mi u ziba milelo ni mihupulo kaufela.” (1 Makolonika 28:9) Mulimu ha nze a tatuba lipilu za batu ze eza mabilioni a mañata-ñata mwa lifasi le le li mifilifili, le li tezi sitoyo, ku lukela ku ba kuli u taba hahulu hakalo muta a fumana pilu ye lata kozo, niti, ni ku luka! (Mu bapanye Joani 1:47; 1 Pitrosi 3:4.) Ki sifi se si ezahala muta Mulimu a fumana pilu ye yuyuluka ka lilato la ku mu lata, ye bata ku ituta ka za hae ni ku abana zibo ye cwalo ni ba bañwi? Kwa Malaki 3:16, Jehova u lu bulelela kuli u teeleza ku bao ba ba bulela ni ba bañwi ka za hae mi mane u na ni “buka ya kupuzo” kwa neku la bao kaufela “ba ba saba Muñ’a Bupilo, ni ba ba tokomela Libizo la hae.” Tulemeno to tu cwalo ki twa butokwa hahulu ku yena!

10, 11. (a) Ba bañwi ne ba kana ba lika ka mukwa ufi ku keshebisa bupaki bwa kuli Jehova u’ nga tulemeno twa bona to tunde ku ba twa butokwa? (b) Mutala wa Abija u bonisa cwañi kuli Jehova u’ nga ka butokwa tulemeno to tunde ka lipimo kaufela?

¹⁰ Nihakulicwalo, pilu ye inyaza neikana ya hana bupaki bo bu cwalo bwa butokwa bwa luna mwa meto a Mulimu. Neikana ya swalelela ku ipulelela kuli, ‘Kono ku na ni ba bañwi ba bañata ba ba ni fita mwa ku fa mutala o munde mwa tulemeno t’o. Ku lukela ku ba kuli Jehova u swaba hahulu muta a ni bapanya ni bona!’ Jehova h’a bapanyi batu, mi hape h’a nahani ka mukwa o s’a sikuluhi, wa ku lemuha fela ze tezi. (Magalata 6:4) U tatuba lipilu ka kutwisiso ye tuna, mi u’ nga tulemeno to tunde ka lipimo kaufela ku ba twa butokwa.

¹¹ Sina ka mutala, Jehova ha n’a atuzi kuli lusika kaufela lwa mulena wa mukwenuheli Jeroboami ne lu ka bulaiwa, ku ba huhula inge “ze maswe,” N’a laezi kuli a li muñwi fela wa bana ba mulena, Abija, a bulukiwe ka ku kutekeha. Kabakalañi? “Kakuli ki ku yena fela ko ku fumanwi se siñwi se sinde kwa neku la Muñ’a Bupilo Mulimu wa Isilaele.” (1 Malena 14:10, 13) Kana seo ne si talusa kuli Abija ne li mulapeli wa Jehova ya sepahala? Ha ku tokwi ku ba cwalo, kakuli n’a shwile sina mo ne ba shwezi ba bañwi kaufela b’a ndu ya habo ba ba maswe. (Deuteronoma 24:16) Niteñi, Jehova n’a ngile ka butuna “se siñwi se sinde” sa n’a boni mwa pilu ya Abija mi n’a ngile muhato ka ku swanela. Buka ya Matthew Henry’s Commentary on the Whole Bible i talusa kuli: “Mo ku na ni nto ye ñwi ye nde ya mufuta o cwalo, i k’a fumanwa: Mulimu y’a i bata, wa i bona, i be ye nyinyani cwañi, mi u tabiswa ki yona.” Mi mu si ke mwa libala kuli haiba Mulimu a fumana ku mina nihaiba sipimo se si sinyinyani fela sa kalemeno ka kañwi ka kande, wa kona ku ka hulisa haiba fela mu lika ka t’ata ku mu sebeleza ka ku sepahala.

12, 13. (a) Samu 139:3 i bonisa cwañi kuli Jehova u’ nga buikatazo bwa luna ku ba bwa butokwa? (b) Ki ka muhupulo mañi ha ne ku kana kwa bulelwa kuli Jehova w’a sefa likezo za luna?

¹² Jehova ka mukwa o swana u’ nga buikatazo bwa luna ku ba bwa butokwa. Kwa Samu 139:1-3, lu bala kuli: “Muñ’a Bupilo, u ni likile, mi u ni zibile. U ziba niha ni ina, niha ni zuha, U ziba muhupulo wa ka u sa li kwahule. Wa ni lekula niha ni zamaya, niha ni lobala, U zibelela linzila za ka kaufela.” Kacwalo Jehova wa ziba likezo za luna kaufela. Kono u eza se si fita hahulu ku ziba fela. Mwa Siheberu pulelo ya kuli “u zibelela linzila za ka kaufela” hape neikana ya ba ni taluso ya kuli “u tabela linzila za ka kaufela” kamba “u’ nga ka butokwa linzila za ka kaufela.” (Mu bapanye Mateu 6:19, 20) Nihakulicwalo, Jehova u kona cwañi k’u nga ka butokwa linzila za luna ha lu li ba ba si k’a petahala cwalo ni ba ba mwa sibi?

¹³ Ka ku hoha mamelelo, ka ku ya ka boc’aziba ba bañwi, Davida ha n’a ñozi kuli Jehova n’a “lekula” misipili ya hae ni linako za hae za ku pumula, pulelo ya Siheberu ka mo i inezi luli ne i talusa ku “sefa” kamba ku “ulusa.” Buka ye ñwi ya ku ama teñi ne i bulezi kuli: “Li talusa . . . ku ulusa muuku kaufela, ni ku siya bubeke kaufela—ku bukeleza ze butokwa kaufela. Kacwalo fa li talusa kuli Mulimu, ka mubulelelo o muñwi, n’a mu sefile. . . . N’a yumbile ze li muuku kaufela, kamba ze ne si za butokwa kaufela, ni ku bona ze ne li teñi ze ne li za luli ni za butokwa.” Pilu ye inyaza neikana ya sefa likezo za luna ka nzila ye fapahana ni yeo, ili ku lu kobangisa ka ku tokwa mufelañeke ka za lifoso za kwamulaho ni ku kenda ze lu petile sina ze si se siñwi. Kono Jehova u swalela libi za luna haiba lu baka ka mukwa o buniti ni ku lika ka t’ata kuli lu si ke lwa kutela mafosisa a luna. (Samu 103:10-14; Likezo 3:19, 20) W’a sefa ni ku hupula misebezi ya luna ye minde. Mane, u i hupula ku ya ku ile haiba fela lu siyala lu sepahala ku yena. U k’a nga ku i libala ku ba ku s’a luka, mi ni kamuta h’a ezi lika ka ku s’a luka!—Maheberu 6:10.

14. Ki sika mañi se si bonisa kuli Jehova u’ nga ka butokwa misebezi ya luna mwa bukombwa bwa Sikreste?

¹⁴ Ki ifi ye miñwi ya misebezi ye minde yeo Mulimu a’ nga ku ba ya butokwa? I bata i’ba nto ifi kamba ifi ye lu eza ka ku likanyisa Mwan’a hae, Jesu Kreste. (1 Pitrosi 2:21) Ka buniti fela musebezi o muñwi wa butokwa hahulu, kacwalo, ki wa ku hasanya taba ye nde ya Mubuso wa Mulimu. Kwa Maroma 10:15, lu bala kuli: “Ki a mande hahulu mautu a ba ba tisa Evangeli ya kozo, a ba ba tisa litaba ze nde”! Hailif’o kamita ne lu kana lu s’a nahani ka za mahutu a luna a’ si k’a ipitela sina “a mande,” linzwi la n’a itusisize Paulusi fa ne li lona le ne li itusisizwe mwa toloko ya Greek Septuagint mwa ku talusa Rebeka, Rahele, ni Josefa—ili bao mwa bul’alu bwa bona ne ba zibahala ku ba ba bande. (Genese 26:7; 29:17; 39:6) Kacwalo ku zamaya-zamaya kwa luna mwa sebelezo ya Mulimu wa luna, Jehova, ki ko kunde hahulu ni kwa butokwa hahulu mwa meto a hae.—Mateu 24:14; 28:19, 20.

15, 16. Ki kabakalañi Jehova a’ nga buitiiso bwa luna ku ba bwa butokwa, mi manzwi a Mulena Davida kwa Samu 56:8 a koñomeka cwañi sisupo seo?

¹⁵ Kalemeno ka kañwi kao Mulimu a’ nga ka butuna ki buitiiso bwa luna. (Mateu 24:13) Mu hupule kuli, Satani u bata kuli mu fulalele Jehova. Lizazi le liñwi ni le liñwi le mu siyala mu sepahala ku Jehova ki lizazi le liñwi le mu tusize mwa ku fumanehisa kalabo kwa linyazo za Satani. (Liproverbia 27:11) Ka linako ze ñwi buitiiso haki bo bu bunolo. Ku tokwa buikangulo hande, bumai ku za mali, maswenyeho a mwa maikuto, ni mikwalelo ye miñwi li kona ku ezisa lizazi le liñwi ni le liñwi le li fita ku ba tiko. Buitiiso ha ku talimanwa ni litiko ze cwalo ki bwa butokwa ka ku ipitela ku Jehova. Ki kabakaleo Mulena Davida ha n’a kupile Jehova ku buluka miyoko ya hae mwa “botolo” ya ka swanisezo, mi a buza ka buikolwiso kuli, “Ha ni li, i ñozwi kaufela mwa buka ya hao?” (Samu 56:8) Ee, Jehova u’ nga ka butokwa mi u hupula miyoko ni manyando kaufela ao lu tiyela mwa ku buluka busepahali bwa luna ku yena. Ni zona ki za butokwa hahulu mwa meto a hae.

¹⁶ Ka ku beya mwa munahano tulemeno twa luna to tunde hahulu ni buikatazo bwa luna, ki ko ku utwahala hakalo kuli Jehova u fumana ku yo muñwi ni yo muñwi wa luna z’e ñata z’a nga sina za butokwa! Ku si na taba ni m’o lifasi la Satani li l’u ngezi, Jehova u l’u nga ku ba ba butokwa ni ba ba li kalulo ya “bufumu bwa macaba kamukana.”—Hagai 2:7.

Seo Jehova A Si Ezize ili ku Bonisa Lilato la Hae

17. Ki kabakalañi sitabelo sa tiululo sa Kreste ha si swanela ku lu kolwisa kuli Jehova ni Jesu b’a lu lata sina batu ka buñwi?

¹⁷ Sa bul’alu, Jehova u eza ze ñata mwa ku fa buniti bwa lilato la hae ku luna. Ka buniti fela, sitabelo sa tiululo sa Kreste ki yona kalabo ye m’ata ka ku fitisisa kwa buhata bwa busatani bwa kuli ha lu na butokwa mi ha lu konwi ku latiwa. Ni kamuta ha lu swaneli ku libala kuli lifu le li tezi masitapilu leo Jesu n’a ipumani ku lona fa kota ya linyando mi mane ni masitapilu a matuna ni ku fita ao Jehova n’a tiyezi mwa ku bona lifu la Mwan’a hae y’a lata ne li li bupaki bwa lilato la bona ku luna. Fahalimu a seo, lilato leo li sebeza ku luna ka butu. Ki mona mwa n’a bonezi seo muapositola Paulusi, kakuli n’a ñozi kuli: “Mwan’a Mulimu [u] ni latile, mi a itobohile mwa sibaka sa ka.”—Magalata 2:20.

18. Ki ka muhupulo ufi Jehova a lu hohela ku Kreste?

¹⁸ Jehova u bonisize lilato la hae ku luna ka ku lu tusa ka buñwi ku ikungela lituso za sitabelo sa Kreste. Jesu n’a bulezi kwa Joani 6:44 kuli: “Ha ku na mutu ya ka ta ku na, konji h’a ka hohiwa ki Ndate ya ni lumile.” Ka musebezi wa ku kutaza, o’ fita ku luna ka buñwi, ni ka moya wa hae o kenile, ili w’o Jehova a itusisa mwa ku lu tusa ku utwisisa ni ku sebelisa liniti za kwa moya ku si na taba ni bufokoli ni ku s’a petahala kwa luna, Jehova yena ka butu u lu hohela ku Mwan’a hae ni kwa sepo ya bupilo bwa kamita. Kacwalo Jehova wa kona ku bulela ka za luna sina mwa n’a bulelezi ka za Isilaele kuli: “Ni ku latile ka lilato le li sa feli; kabakaleo ni ku bulukela sishemo sa ka.”—Jeremia 31:3.

19. Ki kabakalañi tohonolo ya tapelo ha i swanela ku lu kolwisa ka ku tiya ka za lilato la ka butu ku luna la Jehova?

¹⁹ Nihakulicwalo, mwendi ki ka tohonolo ya tapelo yeo ka yona lu ikutwela lilato la Jehova ka nzila ye bukaufi ka ku fitisisa. U mema yo muñwi ni yo muñwi wa luna kuli a “lapele [ku yena] ka ku sa lisela.” (1 Matesalonika 5:17) W’a teeleza! Mane u bizwa “ya utwa milapelo.” (Samu 65:2) Ha si k’a fa musebezi w’o ku yo muñwi, nihaiba ku Mwan’a hae tota. Ha mu nahane fela: Mubupi wa pupo kaufela u lu susueza ku mu atumela ka tapelo, ka ku lukuluha mwa ku bulela. Likupo za mina mane ne li kana za susueza Jehova ku eza seo n’a kana a si k’a si eza ha ne mu si ke mwa kupa.—Maheberu 4:16; Jakobo 5:16; mu bone Isaya 38:1-16.

20. Ki kabakalañi lilato la Mulimu ha li si libaka la buikaco kamba buitundumuni kwa neku la luna?

²⁰ Ha ku na Mukreste ya itikanelezi ya na k’a nga bupaki bo bu cwalo bwa lilato la Mulimu ni k’u ngiwa ka butuna sina libaka la ku ipona ku ba wa butokwa ku fita mw’a inezi luli. Paulusi n’a ñozi kuli: “Kabakala sishemo se ni filwe, ni bulelela mutu ni mutu ku mina, kuli a si ke a itikanya butuna bo bu fita ni s’a swanezi ku likanya. Kono a ikupule ka se si mu likana, mutu ni mutu ka tikanyo ya tumelo y’a mu file Mulimu.” (Maroma 12:3) Kacwalo ha lu nze lu ikola mufutumala wa lilato la Ndat’a luna wa kwa lihalimu, haike lu ikete mwa munahano ni ku hupula kuli sishemo sa Mulimu se si lilato ki se si si k’a libelelwa.—Mu bapanye Luka 17:10.

21. Ki buhata bufi bwa busatani b’o lu lukela ku zwelapili ku hana, mi ki niti mañi ya bumulimu ye lu lukela ku keng’ela teñi kamita?

²¹ Haike yo muñwi ni yo muñwi wa luna a eze seo a kona kaufela mwa ku hana mihupulo kaufela yeo Satani a hulisa mwa lifasi la kale le li shwa le. Seo si kopanyeleza ni ku hana muhupulo wa kuli ha lu na butokwa kamba ha lu latiwi. Haiba bupilo mwa muinelo wo bu mi lutile ku ipona sina mukwalelo o mutuna hahulu kuli mane nihaiba lilato le lituna la Mulimu ha li koni ku u tula, kamba kuli misebezi ya mina ye minde ki ye minyinyani hahulu kuli nihaiba meto a hae a’ bona z’ote h’a koni ku i lemuha, kamba kuli libi za mina ki z’e yandulukile hahulu kuli nihaiba lifu la Mwan’a hae ya butokwa hahulu ha li koni ku li kwahela, u zibe mu lutilwe buhata. Mu hane buhata bo bu cwalo ka lutimbo kaufela lo lu bu swanela! Haike kamita lu buluke mwa munahano manzwi a’ buyelezwi a muapositola Paulusi kwa Maroma 8:38, 39 a’ li: “Ni kozwi kuli nihaiba lifu, nihaiba bupilo, nihaiba mangeloi, nihaiba ze busa, nihaiba ze li teñi cwale, nihaiba ze sa ta, nihaiba ze mata, nihaiba bupahamo kamba butasi, nihaiba nto ye ñwi ye bupilwe, ha ku na se si kona ku lu kauhanya ni lilato la Mulimu, le li li teñi ku Jesu Kreste Mulen’a luna.”

[Litaluso za kwatasi]

Ki Sifi se Mu Nahana?

◻ Ki kabakalañi Satani h’a lika ku lu tahiseza ku lumela kuli ha lu ba butokwa mi ha lu latiwi?

◻ Jesu n’a lutile cwañi kuli Jehova u’ nga mañi ni mañi wa luna ku ba wa butokwa?

◻ Lu ziba cwañi kuli Jehova u’ nga ka butuna tulemeno twa luna to tunde?

◻ Lu kona ku ba cwañi ni buikolwiso bwa kuli Jehova u’ nga buikatazo bwa luna ku ba bwa butokwa?

◻ Jehova u file cwañi bupaki bwa lilato la hae ku luna sina batu ka buñwi?

[Siswaniso se si fa likepe 13]

Jehova w’a lemuha mi wa hupula bao kaufela ba ba nahana fa libizo la hae