Jehova—Mulimu Y’a Fa Tuto

“Kamukana ba ka lutwa ki [Jehova, NW].”—JOANI 6:45.

 1. Ki sifi seo Jesu a eza cwale mwa Kapernauma?

JESU KRESTE kihona ha sa z’o eza limakazo mi cwale u sweli ku luta mwa sinagoge ya mwa Kapernauma, bukaufi ni Liwate la Galilea. (Joani 6:1-21, 59) Ba bañata ba bonisa ku sa lumela ha bulela kuli: “Ni zwile kwa lihalimu.” Ba bilaela kuli: “Kikuli hasi yena Jesu, mwan’a Josefa, ye lu ziba ndat’ahe ni m’ahe? A ka bulela cwañi, a li: Ni zwile kwa lihalimu?” (Joani 6:38, 42) Ka ku ba nyaza, Jesu u zibahaza kuli: “Ha ku na mutu ya ka ta ku na, konji h’a ka hohiwa ki Ndate ya ni lumile; mi na, ni ka mu zusa ka lizazi la mafelelezo.”—Joani 6:44.

 2. Ki mutomo ufi o li teñi wa ku lumela sepiso ya Jesu ka za zuho?

² Ki sepiso kwa ku makalisa—ku zusiwa ka lizazi la mafelelezo, muta Mubuso wa Mulimu u busa! Lwa kona ku lumela sepiso yeo kakuli i koñomekilwe ki Ndate, Jehova Mulimu. (Jobo 14:13-15; Isaya 26:19) Ka buniti fela, Jehova, y’a luta kuli bafu ba ka zuha, ki yena “muluti yo mutuna hahulu ya fita b’ote.” (Jobo 36:22, Today’s English Version) Ka ku toma mamelelo fa tuto ya Ndate, Jesu ka ku tatama u bulela kuli: “Mwa Bapolofita ku ñozwi kuli: Kamukana ba ka lutwa ki Jehova.”—Joani 6:45.

 3. Ki lipuzo lifi ze lu ka nyakisisa?

³ Ka buniti fela, neikaba tohonolo ku ba mwahal’a bao mupolofita Isaya n’a ñozi ka za bona kuli: “Bana ba hao kaufela ikaba ba ba lutilwe ki [Jehova, NW].” (Isaya 54:13) Kana lwa kona ku ba mwahal’a bona? Ki bomañi ba se ba bile sina bana ku yena mi se ba amuhezi tuto ya hae? Ki lifi lituto za butokwa hahulu za Jehova zeo lu lukela ku ziba ni ku nga muhato ku zona ilikuli lu amuhele mbuyoti ya hae? Jehova n’a lutile cwañi mwa linako za kwamulaho, mi kana u luta ka nzila ye swana kacenu? Zeo ki lipuzo ze lu ka nyakisisa.

Ndate, Muluti, Munna

 4. Ki bafi ba ne ba li ba pili kwa bana ba Jehova ku amuhela tuto ya hae?

⁴ Jehova n’a fitile fa ku ba Ndate hamohocwalo ni Muluti ha n’a bupile Mwan’a hae wa libanda, Jesu ya na si ka ba kale mutu wa fa lifasi-mubu. Yena y’o u bizwa “Linzwi” kakuli ki yena Mubuleli yo Mutuna wa Jehova. (Joani 1:1, 14; 3:16) Linzwi n’a sebelize a ‘inzi ku [Ndate] inze a mu sebeleza,’ mi n’a itutile hande ku zwelela kwa tuto ya Ndat’ahe. (Liproverbia 8:22, 30) Ka buniti fela, n’a fitile fa ku ba Sisebeliso, y’o ka yena Ndate n’a bupile linto ze ñwi kamukana, ku kopanyeleza cwalo ni “bana ba Mulimu” ba kwa moya. Ku lukela ku ba kuli ne ba wabezwi hakalo ka ku lutiwa ki Mulimu! (Jobo 1:6; 2:1; 38:7; Makolose 1:15-17) Hamulaho, mutu wa pili, Adama, n’a bupilwe. Ni yena n’a li “mwan’a Mulimu,” mi Bibele i patulula kuli Jehova n’a mu file taelo.—Luka 3:38; Genese 2:7, 16, 17.

 5. Ki tohonolo ifi ya butokwa hahulu yeo Adama n’a latehezwi ki yona, niteñi ki bomañi ba n’a lutile Jehova, mi ki kabakalañi?

⁵ Ka bumai, Adama, ka ku sa ipeya ku utwa kwa hae kwa ka ku itatela, n’a latehezwi ki tohonolo ya ku zwelapili ku ba mwan’a Mulimu. Kacwalo, ba ba simuluha ku yena, ne ba sa koni ku fumana swalisano ya ku ba bana ba Mulimu ka mutomo fela wa sipepo. Niteñi, Jehova n’a lutile batu ba ba si ka petahala ba ne ba bata ketelelo ku yena. Sina ka mutala, Nuwe, n’a fumanehile ku ba “mutu ya lukile” ya “n’a zamaya ni Mulimu,” mi kacwalo Jehova n’a laezi Nuwe. (Genese 6:9, 13–Ge 7:5) Ka ku ipeya ku utwa kwa hae, Abrahama n’a fumanehile ku ba “mulatiwa wa [Jehova, NW],” mi kacwalo ni yena n’a lutilwe ki Jehova.—Jakobo 2:23; Genese 12:1-4; 15:1-8; 22:1, 2.

 6. Ki bomañi bao Jehova n’a fitile fa k’u nga sina “mwan’a” hae, mi n’a li muluti ya cwañi ku bona?

⁶ Ha ku fitile nako ye telele, mwahal’a lizazi la Mushe, Jehova n’a keni mwa swalisano ya bulikani ni sicaba sa Isilaele. Ka seo, sicaba seo ne si bile batu ba hae ba ba ketilwe mi ne si bonwi sina “mwan’a” hae. Mulimu n’a bulezi kuli: “Isilaele ki mwan’a ka.” (Exoda 4:22, 23; 19:3-6; Deuteronoma 14:1, 2) Ka ku toma fa swalisano ya bulikani b’o, Maisilaele ne ba kona ku bulela, ka mo ku ñolezwi ki mupolofita Isaya kuli: “Wena, [Jehova, NW], ki Wena ndat’a luna.” (Isaya 63:16) Jehova n’a ngile buikalabelo bwa hae bwa bundate mi ka lilato a luta bana ba hae, Isilaele. (Samu 71:17; Isaya 48:17, 18) Ka buniti fela, ha ne ba fitile fa ku sa sepahala, n’a ba kupile ka mufelañeke kuli: “Mu kute mina bana ba ba kwenuhile.”—Jeremia 3:14.

 7. Ki swalisano ifi yeo Isilaele n’a na ni yona ni Jehova?

⁷ Ka ku ba se ne si zwile mwa swalisano ya bulikani ni Isilaele, Jehova hape ka swanisezo n’a fitile fa ku ba Munn’a sicaba seo, mi sona ne si bile musal’a hae wa swanisezo. Ka za musali y’o mupolofita Isaya n’a ñozi kuli: “Mubupi wa hao ki Yena ya ku nyezi, mi Libizo la hae ki [Jehova, NW] wa limpi.” (Isaya 54:5; Jeremia 31:32) Nihaike kuli Jehova n’a talelelize ka ku kutekeha kalulo ya hae sina Munna, sicaba sa Isilaele ne si bile musali ya sa sepahali. “Sina musali ya zwile ku munn’a hae ka ku puma,” ki mwa n’a bulelezi Jehova, “ki mo mu ni ezelize, cwalo, ka buhata, mina ba ndu ya Isilaele.” (Jeremia 3:20) Jehova n’a zwezipili ku kupa bana ba musal’a hae ya sa sepahali; n’a zwezipili ku ba “Muluti [wa bona] ya Makaza.”—Isaya 30:20, NW; 2 Makolonika 36:15.

 8. Nihaike kuli Isilaele sina sicaba n’a hanilwe ki Jehova, ki musali ufi wa swanisezo ili ya si na s’a yemela y’o a sa na ni yena?

⁸ Isilaele ha n’a hanile ni ku bulaya Mwan’a Hae, Jesu Kreste, Mulimu kwa nalulelule n’a hanile sicaba seo. Kacwalo sicaba seo sa Majuda ne si tuhezi ku ba musal’a hae wa swanisezo, mi hape yena n’a tuhezi ku ba Ndate ni Muluti wa bana ba sicaba seo ba ba li baipanguli. (Mateu 23:37, 38) Nihakulicwalo, Isilaele n’a li fela musali wa swanisezo. Muapositola Paulusi n’a amile kwa Isaya 54:1, ye bulela ka za “mumba” ya fapahana mi ili ya sa swani ni “ya nyezwi,” ili sicaba sa Isilaele wa ka sipepo. Paulusi u patulula kuli Bakreste ba ba tozizwe ki bana ba “mumba,” y’o a biza “Jerusalema wa kwahalimu.” Yena musali wa swanisezo y’o ya si na s’a yemela u kopanyeleza kopano ya Mulimu ya kwa lihalimu ya libupiwa za kwa moya.—Magalata 4:26, 27.

 9. (a) Jesu n’a ama ku bomañi ha n’a bulezi ka za ‘bana ba hao ku lutiwa ki Jehova’? (b) Ki fa mutomo ufi batu ba fita fa ku ba bana ba Mulimu ba kwa moya?

⁹ Kacwalo, mwa sinagoge ya kwa Kapernauma, Jesu ha n’a amile kwa bupolofita bwa Isaya bo bu li: “Bana ba hao kaufela ikaba ba ba lutilwe ki Jehova,” n’a bulela ka za bao ba ba ka ba “bana” ba “Jerusalema wa kwahalimu,” kopano ya Mulimu ya kwa lihalimu ye swana sina musali. Ka ku amuhela lituto za muyemeli wa Mulimu ya n’a zwa kwa lihalimu, yena Jesu Kreste, bona bateelezi ba Majuda bao ne ba kona ku fita fa ku ba bana ba musali wa Mulimu ya n’a li mumba mi ni ku ba “mushobo o kenile,” “Isilaele wa Mulimu” wa kwa moya. (1 Pitrosi 2:9, 10; Magalata 6:16) Ka ku talusa tohonolo ye tuna yeo Jesu n’a tahisize kwa neku la ku ba bana ba Mulimu ba kwa moya, muapositola Joani n’a ñozi kuli: “U tile habo, mi bahabo ha ba si ka mu amuhela. Kono bona ba ba mu amuhezi, u ba file mata a ku fetuha bana ba Mulimu, bona ba ba lumela libizo la hae.”—Joani 1:11, 12.

Lituto ze Butokwa Hahulu za Jehova

10. Kwenuhelo ya mwa Edeni i sa ezahala fela, ki sifi sa n’a lutile Jehova ka ku ama kwa “peu,” mi yona Peu yeo ne i fumanehile ku ba mañi?

¹⁰ Jehova, ka ku ba Ndate ya lilato, u zibisa bana ba hae ka za milelo ya hae. Kacwalo muta lingeloi la bukwenuheli ne li susuelize batu ba pili ba babeli kuli ba si ke ba ipeya ku utwa, Jehova onaf’o a zibahaza seo n’a ka eza mwa ku taleleza mulelo wa hae wa ku tahisa kuli lifasi-mubu li be paradaisi. N’a bulezi kuli n’a ka beya toyano mwahal’a “noha ya kale,” ye li Satani Diabulosi, “ni musali.” Cwale a talusa kuli “peu [kamba, “lusika”]” ya musali ne i ka pyata “toho” ya Satani ka ku mu bulaya. (Genese 3:1-6, 15; Sinulo 12:9; 20:9, 10) Sina ha se lu lemuhile, musali—y’o hamulaho n’a zibahalile ku ba “Jerusalema wa kwahalimu”—ki kopano ya Mulimu ya kwa lihalimu ili ya libupiwa za kwa moya. Kono “peu” ya hae ki mañi? Ki Mwan’a Mulimu, Jesu Kreste, ya lumilwe ku zwa kwa lihalimu mi ili y’o kwa nalulelule u ka timeza Satani.—Magalata 4:4; Maheberu 2:14; 1 Joani 3:8.

11, 12. Jehova n’a hulisize cwañi tuto ya hae ya butokwa hahulu ye ama “peu”?

¹¹ Jehova n’a hulisize tuto ya butokwa hahulu yeo ye ama “peu” ha n’a sepisize Abrahama kuli: “Kwa ku fuyola, ni ka ku fuyola, mi kwa ku atisa ni ka atisa lusika lwa hao, lu be sina linaleli za lihalimu . . . Macaba kamukana a lifasi a ka fiwa mbuyoti ka lusika lwa hao.” (Genese 22:17, 18) Jehova n’a itusisize muapositola Paulusi mwa ku talusa kuli Jesu Kreste ki yena Lusika lwa Abrahama lo lu sepisizwe kono ni kuli ba bañwi hape ne ba ka fita fa ku ba kalulo ya “peu” yeo. “Ha mu li ba Kreste,” ki mwa n’a ñolezi Paulusi, “fohe mu ba lusika lwa Abrahama, mi mu ka ca sanda sa sepiso.”—Magalata 3:16, 29.

¹² Jehova hape n’a patuluzi kuli Kreste, yena Peu, n’a ka zwa mwa lusika lwa silena lwa Juda mi ni kuli ‘macaba a ka mu utwa.’ (Genese 49:10) Ka ku ama ku Mulena Davida wa mwa lusika lwa Juda, Jehova n’a sepisize kuli: “Ni ka eza kuli lusika lwa hae lu si ke lwa fela, Lubona lwa hae lu tiye ka mazazi, sina mahalimu. Lusika lwa hae lu ka ina ku ya ku ile; Lubona lwa hae lu ka na lu ba teñi sina lizazi fapil’a ka.” (Samu 89:3, 4, 29, 36) Muta lingeloi, Gabriele n’a zibahalize ka za ku pepwa kwa Jesu, n’a talusize kuli mwanana ne li Mubusi wa Mulimu ya ketilwe, Peu ya Davida. “Yena u ka ba yo mutuna, a bizwe mwana wa Muambakani-ya-Pahami,” ki mwa n’a bulelezi Gabriele, “mi Mulena u ka mu fa situlo sa bulena sa Davida, ndat’ahe . . . mi bulena bwa hae ha bu na ku fela.”—Luka 1:32, 33; Isaya 9:6, 7; Daniele 7:13, 14.

13. Kuli lu amuhele mbuyoti ya Jehova, lu lukela ku nga cwañi muhato kwa tuto ya hae?

¹³ Kuli lu fumane mbuyoti ya Jehova, lu lukela ku ziba ni ku nga muhato fa tuto ya butokwa hahulu yeo ka za Mubuso wa Mulimu. Lu lukela ku lumela kuli Jesu n’a shetumukile ku zwa kwa lihalimu, kuli ki yena Mulena wa Mulimu ya ketilwe—Peu ya silena ye ka okamela ku kutiswa sinca kwa Paradaisi fa lifasi-mubu—ni kuli u ka zusa bafu. (Luka 23:42, 43; Joani 18:33-37) Kwa Kapernauma Jesu ha n’a bulezi ka za ku zusa bafu, ku swanela ku ba ko ne ku iponahaza kwa Majuda kuli n’a bulela niti. Ee, liviki ze sikai fela pili, mwendi ili ona m’o mwa Kapernauma, n’a zusize musizana wa lilimo za buhulu ze 12 y’a li mwan’a mubusisi wa sinagoge! (Luka 8:49-56) Ka buniti fela ni luna lu na ni mabaka a mañata a ku lumela ni ku nga muhato ka ku lumelelana ni tuto ya Jehova ye fa sepo ka ku ama ku za Mubuso wa hae!

14, 15. (a) Mubuso wa Jehova ki wa butokwa cwañi ku Jesu? (b) Ki sifi se lu tokwa ku utwisisa ni ku kona ku talusa ka za Mubuso wa Jehova?

¹⁴ Jesu n’a neezi bupilo bwa hae bwa fa lifasi-mubu kwa ku luta ka za Mubuso wa Jehova. N’a u bisize taba ye tuna ya bukombwa bwa hae, mi mane n’a laezi balateleli ba hae kuli ba u lapelele. (Mateu 6:9, 10; Luka 4:43) Majuda ba ka sipepo ne ba li mwa mayemo a ku kona ku ba “bana ba mubuso,” kono kabakala ku tokwa tumelo, buñata bwa bona ne ba palezwi ku fumana tohonolo yeo. (Mateu 8:12; 21:43) Jesu n’a patuluzi kuli ki “mutapinyana” fela ba ba fumana tohonolo ya ku ba “bana ba mubuso.” Bona “bana” bao ba fita fa ku ba ‘ba ba ca sanda ni Kreste’ mwa Mubuso wa hae wa kwa lihalimu.—Luka 12:32; Mateu 13:38; Maroma 8:14-17; Jakobo 2:5.

¹⁵ Ki ba bakai ba ba ca sanda sa Mubuso bao Kreste a ka isa kwa lihalimu ku y’o busa ni yena fahalimu a lifasi-mubu? Ki ba 144,000 fela, ka ku ya ka Bibele. (Joani 14:2, 3; 2 Timotea 2:12; Sinulo 5:10; 14:1-3; 20:4) Kono Jesu n’a bulezi kuli n’a na ni “lingu ze ñwi,” ba ba ka ba babusiwa ba puso yeo ya Mubuso. Bona bao ba ka ikola buikangulo bo bu petehile ni kozo ku ya ku ile fa lifasi-mubu le li li paradaisi. (Joani 10:16; Samu 37:29; Sinulo 21:3, 4) Lu tokwa ku utwisisa ni ku kona ku talusa tuto ya Jehova ka za Mubuso.

16. Ki tuto ifi ya butokwa hahulu ya Jehova yeo lu tokwa ku ituta yona ni ku i sebelisa?

¹⁶ Muapositola Paulusi n’a bonisize tuto ye ñwi ya butokwa hahulu ya Jehova. N’a bulezi kuli: “Mina mu lutwa ki Mulimu ku latana.” (1 Matesalonika 4:9) Kuli lu tabise Jehova, lu tokwa ku bonisa lilato le li cwalo. “Mulimu u lilato,” ki mo i bulelela Bibele, mi lu lukela ku likanyisa mutala wa hae wa ku bonisa lilato. (1 Joani 4:8; Maefese 5:1, 2) Ka bumai, buñata bwa batu ba palezwi ka butuna ku ituta ku lata batu sina bona sina mw’a lu lutela Mulimu kuli lu eze. Luna bo? Kana se l’u ngile muhato kwa tuto yeo ya Jehova?

17. Ki mubonelo wa bomañi o lu swanela ku likanyisa?

¹⁷ Ki kwa butokwa kuli lu amuhele lituto za Jehova kaufela. Haike mubonelo wa luna u be w’ani wa balisamu ba mwa Bibele ba ne ba ñozi kuli: “[Jehova, NW], u ni bonise linzila za hao; U ni lemuse sikuka sa hao. U ni zamaise mwa niti ya hao, mi u ni lute.” “U ni lute milao ya hao. U ni lute kutwisiso ye nde ni zibo . . . U ni lute likatulo za hao.” (Samu 25:4, 5; 119:12, 66, 108) Haiba maikuto a mina a swana ni a’ni a balisamu, mwa kona ku ba mwahal’a buñata bo butuna ba ba lutiwa ki Jehova.

Buñata bo Butuna bwa Ba Ba Lutiwa

18. Ki sifi seo mupolofita Isaya n’a bulezi cimo kuli ne si ka ezahala mwa nako ya luna?

¹⁸ Mupolofita Isaya n’a bulezi cimo se ne si ka ezahala mwa nako ya luna: “Kwa mazazi a kwapili, lilundu la [Jehova, NW] li ka tomwa fa ngo ya malundu, li ka umbuka tulundu; mi macaba kaufela a ka ya kwateñi. Macaba a mañata a ka ya, inz’a li: A mu te, lu kambamele fa lilundu la [Jehova, NW], kwa Ndu ya Mulimu wa Jakobo; u ka lu luta linzila za hae.” (Isaya 2:2, 3; Mika 4:2) Ki bomañi batu bao ba ba lutiwa ki Jehova?

19. Ki bomañi kacenu ba ba kopanyelezwa ku bao ba ba lutiwa ki Jehova?

¹⁹ Ba kopanyeleza ni ba bañwi kwand’a bao ba ba ka busa mwa lihalimu ni Kreste. Sina ha ne ku bonwi kwa makalelo, Jesu n’a bulezi kuli n’a na ni “lingu ze ñwi”—ili babusiwa ba Mubuso ba fa lifasi-mubu—fahalimu a “mutapinyana” wa bayoli ba Mubuso. (Joani 10:16; Luka 12:32) “Buñata bo butuna,” ba ba punyuha “ñalelwa ye tuna,” ki ba sitopa sa lingu ze ñwi, mi ba ikola mayemo a tumelezo fapil’a Jehova ka mutomo wa tumelo ya bona mwa mali a Jesu a’ suluzwi. (Sinulo 7:9, 14) Nihaike kuli lingu ze ñwi ha ba si ka kopanyelezwa tota mwahal’a “bana” ba ba bulezwi kwa Isaya 54:13, ba fuyauzwi ka ku lutiwa ki Jehova. Kacwalo, ka swanelo ba biza Mulimu sina ‘Ndate’ kakuli, ka mo ku inezi, u ka ba Kukw’a bona ka “Ndate wa kamita,” Jesu Kreste.—Mateu 6:9; Isaya 9:6.

Ka M’o Jehova a Fela Tuto

20. Jehova u luta ka linzila lifi?

²⁰ Jehova u luta ka linzila ze ñata. Sina ka mutala, u eza cwalo ka misebezi ya hae ya pupo, ili yeo i fa bupaki ka za ku ba teñi kwa hae hamohocwalo ni butali bwa hae bo butuna. (Jobo 12:7-9; Samu 19:1, 2; Maroma 1:20) Fahalimu a seo, u luta ka ku ambolisana tota, sina mwa n’a ezelize mwa ku luta Jesu ya n’a si ka ba kale mutu wa fa lifasi-mubu. Ka ku swana, ka linako ze talu ze ñozwi, n’a bulezi luli ku zwelela mwa lihalimu kwa batu fa lifasi-mubu.—Mateu 3:17; 17:5; Joani 12:28.

21. Ki lingeloi lifi sihulu leo Jehova n’a itusisize sina muyemeli wa hae, kono lu ziba cwañi kuli a mañwi hape ne a itusisizwe?

²¹ Jehova hape u itusisa kemelo ya mangeloi mwa ku luta, ku kopanyeleza cwalo ni Mweli wa hae, “Linzwi.” (Joani 1:1-3) Nihaike kuli Jehova tota n’a kabe a bulezi ku mwan’a hae ya petehile wa mutu, Adama, mwa simu ya Edeni, ku kana kwa ba kuli n’a itusisize Jesu ya n’a si ka ba kale mutu wa fa lifasi-mubu mwa ku bulela ku Yena. (Genese 2:16, 17) N’a kana a bile yena “lingeloi la Mulimu le ne li zamaile limpi za Isilaele kwapili” mi ili leo Jehova n’a file taelo ka za lona kuli: “U utwe linzwi la lona.” (Exoda 14:19; 23:20, 21) Ku si na kakanyo Jesu ya n’a si ka ba kale mutu wa fa lifasi-mubu ne li yena “Muzamaisi wa limpi za [Jehova, NW]” ya n’a bonahezi ku Joshua kuli a mu tiise. (Joshua 5:14, 15) Jehova hape u itusisa mangeloi a mañwi mwa ku fa lituto za hae, a cwale ka ao n’a itusisize mwa ku fitisa Mulao wa hae ku Mushe.—Exoda 20:1; Magalata 3:19; Maheberu 2:2, 3.

22. (a) Fa lifasi-mubu Jehova u itusisize bomañi mwa ku luta? (b) Sihulu ki siitusiso sifi seo Jehova a luta batu ka sona kacenu?

²² Fahalimu a seo, Jehova Mulimu u itusisa bayemeli ba batu mwa ku luta. Bashemi mwa Isilaele ne ba na ni ku luta bana ba bona; bapolofita, baprisita, ni Malivi ne ba lutile Mulao wa Jehova kwa sicaba. (Deuteronoma 11:18-21; 1 Samuele 12:20-25; 2 Makolonika 17:7-9) Jesu n’a li yena Mubuleli yo mutuna wa Mulimu fa lifasi-mubu. (Maheberu 1:1, 2) Jesu hañata n’a bulezi kuli sa n’a luta ne li sa n’a itutile luli ku Ndate, kacwalo bateelezi ba hae, ka seo, ne ba lutiwa ki Jehova. (Joani 7:16; 8:28; 12:49; 14:9, 10) Jehova u tahisize kuli lipulelo za hae li ñolwe, mi mwa lizazi la luna u luta batu sihulu ka Mañolo ao a’ buyelezwi.—Maroma 15:4; 2 Timotea 3:16.

23. Ki lipuzo lifi ze ka nyakisiswa mwa taba ye tatama?

²³ Lu pila mwa linako za butokwa, kakuli Mañolo a sepisa kuli ‘mwa mazazi a kwapili [mo lu pila] batu ba bañata ba ka lutiwa linzila za Jehova.’ (Isaya 2:2, 3) Tuto yeo i fiwa cwañi? Lu lukela ku ezañi kuli lu fumane tuso, hamohocwalo ni ku abana, mwa tukiso ye tuna ya Jehova ya ku luta ili yeo i sweli ku ezahala cwale? Lu ka nyakisisa lipuzo ze cwalo mwa taba ye tatama.

Ne Mu ka Alaba Cwañi?

◻ Jehova n’a fitile cwañi fa ku ba Ndate, Muluti, ni Munna?

◻ Ki sifi seo Jehova a luta ka za “peu”?

◻ Ki tuto ifi ya butokwa hahulu ye fiwa ki Mulimu yeo lu lukela ku mamela?

◻ Jehova u fa tuto ka mukwa ufi?

[Siswaniso se si fa likepe 8]

Ku zusa mwan’a Jairusi ne ku file mutomo wa ku lumela sepiso ya Jesu ka za zuho