Mu Zwelepili ku Zamaya mwa Muzamao o Lukile

¹ Muapositola Paulusi n’a na ni lilato le li ipitezi kwa puteho ya mwa Filipi, ili yeo n’a bile ni kalulo ye tuna mwa ku tomiwa kwa yona. N’a itebuhile lituso za bona za kwa mubili ili ze sishemo mi n’a bulezi ka za bona sina mutala o munde.—2 Makor. 8:1-6.

² Liñolo la Paulusi ku ba mwa Filipi ne li tile ka maikuto a lilato le li tungile. Buka ya Insight, Volyumu 2, likepe 631, i biha kuli: “Mwa liñolo mukatumbi u susueza puteho ya mwa Filipi ku zwelapili mwa nzila ya bona ye nde—ku bata kutwisiso ye tungile ye tuna ni ku fita ni ku ndondwela fa Linzwi la bupilo, tumelo ye tiile ni ku fita, ni sepo ya mupuzo o sa taha.” Ne ba amuhezi seo ka mufutumala, ili ku tahisa tamo ye lilato mwahal’a bona ni muapositola. Manzwi a Paulusi a na ni taluso ye ipitezi ku luna kacenu, ili nto ye lu fa libaka le linde mwa ku nahanisisa ka tokomelo ka za kelezo ya hae, sihulu ka ku ama ku se si bulezwi kwa Mafilipi 3:15-17.

³ Mubonelo wa Munahano o Tiile Ki wa Butokwa Hahulu: Kwa Mafilipi 3:15, Paulusi n’a ñozi sina mutu wa yeloseli ya mwa lilimo-limo. N’a lumezi ka za zwelopili ya ba mwa Filipi ya kwa moya, a ba kupa sina Bakreste ba ba tiile ba ba na ni mubonelo o lukile. Haiba mubonelo wa bona ne u ka zwelapili ku bonisa buikokobezo ni buitebuho bo ne bu bonisizwe ki Jesu, ne ba ka zwelapili ku ba “ba ba sa nyazahali, ba ba si na bumaswe, bana ba Mulimu ba ba si na litiba . . . inze [ba] tiisa Linzwi la bupilo.” (Mafili. 2:15, 16) Ha lu bala manzwi a Paulusi, lu swanela ku ikutwa kuli u bulela ku luna. Kacwalo lu lakaza hahulu ku ba ni mubonelo w’o Jesu n’a na ni ona ni ku bonisa buitebuho bwa buikokobezo kwa neku la matohonolo a luna. Lu zwelapili ku kupa Jehova mwa tapelo, ku kupa tuso ku yona taba ye ni ku ze ñwi cwalo.—Mafil. 4:6, 7.

⁴ Sina Bafilipi 3:16 (Bibele ye Kenile, hatiso ya 1984) ha i bonisa, kaufel’a luna lu swanela ku lika ku eza zwelopili. Linzwi la “lu zweleñi pili” li talusa “ku ya fapili, ku eza zwelopili.” Batu ba ba zwelapili ba “cisehela mwa mihupulo ye minca, ze fumanwi ze nca, kamba ku ba ni sibaka se sinca sa ku eza lika.” Paulusi n’a bata ba mwa Filipi ku utwisisa kuli Bukreste ni kamuta haki bo bu yemi sikankuka mi bao ba ba inzi ku bona ba lukela ku zwelapili ku ya fapili. Moya wa bona wa ku zwelapili ne u ka boniswa ki buitateli bwa ku itatuba ili bona, ku itumelela bufokoli bwa bona, ni ku ikungela sibaka sa ku eza ze ñata ni ku kondolokisa sipimo sa ze ne ba sweli ku eza. Kacenu kopano ya Jehova ya fa lifasi-mubu i zwelapili ku ya fapili, kamita i yandulula sipimo sa musebezi wa yona ni kutwisiso ya yona ya Linzwi la Mulimu. Yo muñwi ni yo muñwi wa luna u lukela ku hatela hamoho ni yona, ku swalisana ni litukiso za yona kamukana ni ku abana ka ku tala mwa musebezi wa yona.

⁵ Zwelopili I Tokwa Muzamao o Lukile: Paulusi n’a zwezipili ka ku susueza mizwale ba hae kuli “lu zweleñi pili mwa nzila ye lu zamaile ku yona ku fitela cwale.” (Bafilipi 3:16, Bibele ye Kenile, hatiso ya 1984) Ku zamaya ka ku luka ku tokwa kuli lu beye batu kamba lika mwa libaka za zona ze swanela se siñwi ku se siñwi ni ku ba ni buipuluko bo bunde. Bakreste mwa Filipi ne ba ipulukile mwa sibaka sa bona se si swanela, ku tiyela kwa kopano ya Jehova ni yo muñwi ku yo muñwi. Bupilo bwa bona ne bu zamaiswa ki mulao wa lilato. (Joani 15:17; Mafil. 2:1, 2) Paulusi a ba susueza kuli ba “zamaye ka mukwa o swanela Evangeli.” (Mafil. 1:27) Tokwahalo ya muzamao o munde ni buipuluko bo bunde isali ya butokwa ni kwa Bakreste kacenu.

⁶ Muzamao ki kezo ye twaezwi ku eziwa ya mukwa o tomilwe. Kacwalo ki nto ye swalisani ka ku tala ni nzila ya ka sizo ya ku eza lika ka yona. Ku ba ni muzamao kwa kona ku lu tusa bakeñisa kuli ha lu tokwi ku yema kamba ku buhisana lika ha lu eza likatulo ka za muhato wa luna o tatama—se lu tomile kale mihato ye lu latelela ka m’ata a ku twaela.

⁷ Muzamao o lukile wa teokratiki u na ni mikwa ni lizo ze nde, ze tusa, za bumulimu—ka mulelo wa ku icaha ili luna kwa moya, ku tusa ba bañwi, ni, haiba kwa konahala, ku eza ze ñata ni ku fita mwa sebelezo ya Jehova. Ku kondisa lika mwa ku taleleza zona likonkwani zeo ku tokwa ku toma ni ku buluka muzamao o kopanyeleza cwalo tuto ya ka butu, ku fumaneha kwa mikopano kamita, ni ku abana mwa musebezi wa ku kutaza.

⁸ Za Butokwa Ze mwa Muzamao o Lukile: Nto ye ñwi ya butokwa ki “zibo ni . . . kutwisiso kaufela.” (Mafil. 1:9) Tuto ya ka butu i tungisa tumelo ya luna, i tiisa buitebuho bwa luna kwa neku la niti, ni ku lu susueza mwa misebezi ye minde. Nihakulicwalo, ba bañwi se ba fumani kuli ku t’ata ku tiyela mwa mikwa ya bona ya tuto. Libaka le liñwi le lituna mwahal’a a mañwi le li fiwa ki la ku tokwa nako.

⁹ Lituso ze zwelela mwa ku bala Bibele ka zazi ha li konwi ku koñomekwa ka nzila ye fitelezi. Taelo ya yona i na ni “tuso” mwa linzila kamukana. (2 Tim. 3:16, 17) Lu kona ku fumana cwañi nako ya tuto ya Bibele mwa muzamao wa luna wa ka zazi ni zazi? Ba bañwi ba fumani kuli b’a kona ku zuha ka mapakela mizuzu i sikainyana kakusasana ni kakusana, munahano wa bona ha u sa tiile. Ba bañwi ba fumana kuli ba kona ku eza hande ni ku fita ha ba bala se siñwi mizuzu i sikai pili ba si ka lobala kale busihu. Bafumahali ba ba fa lapa mwahal’a lizazi ne ba kana ba kona ku beya kwatuko nakonyana lizazi ha se li sikuluhile pili ba bañwi ba si ka fita kale kwa ndu ku zwa kwa mubeleko kamba kwa sikolo. Fahalimw’a ku bala Bibele kwa kamita, ba bañwi se ba kopanyize teñi ku bala buka ya Proclaimers mwa muzamao wa bona wa tuto ya ka viki ni viki.

¹⁰ Ha lu fita fa ku toma mikwa ye minca, ki nto ye kona ku ezahala luli kuli i k’a lwanisana ni mikwa ya luna ya kwamulaho. Kwamulaho ne lu kana lu tengamezi kwa ku tuhelela lika ze si za butokwa k’u nga nako ye ne i li teñi. Ku ikayutula kwa muinelo o cwalo haki nto ye bunolo. Ha ku na mutu ya ka lu sineneketa mwa mikwa ya luna ya tuto; mi ha lu tokwiwi kuli lu ikalabele ka za se lu eza kwa neku la seo. Ku zwelapili mwa mikwa ya luna ya tuto ku itingile ka butuna fa buitebuho bwa luna bwa “linto ze nde ku fita” ni buitateli bwa luna mwa ku ‘yolisa linako’ kuli lu fumane tuso ku zona.—Mafil. 1:10; Maef. 5:16.

¹¹ Mikopano ya Sikreste i peta kalulo ya butokwa mwa zwelopili ya luna ya kwa moya, i lu fa taelo ni susuezo ye tokwahala. Kacwalo, ku fumaneha kwa mikopano ki kalulo ye ñwi ye butokwa ya muzamao wa luna o lukile. Paulusi n’a koñomekile butokwa bwa seo. Haki nto ye lu iketela fela ka ku lata.—Maheb. 10:24, 25.

¹² Muzamao o lukile u konwa ku boniswa cwañi ha lu eza tomahanyo ya musebezi wa luna wa ka viki ni viki? Ba bañwi ba toma linako za ku babalela lindongwamo za ka butu mi cwale ba lika ku hapeleza mikopano mwa lipakana ze li teñi, kono f’o ki ku fetula masina. Mikopano ya luna ya ka viki ni viki i swanelwa ku fiwa sibaka sa pili, mi misebezi ye miñwi i eziwe hamulaho.

¹³ Ku fumaneha kwa mikopano kamita ku tokwa buitukisezo bo bunde ni swalisano ya lubasi. Mwa mazazi a mwahal’a viki buñata bwa luna lu na ni misebezi ye miñata ya ku eza ili yeo hañata i lu siya lu si na nako ye likani. Seo si talusa kuli, haiba ku konahala, mulalelo wa lubasi u swanelwa ku lukiswa ka ku itahanela kuli lubasi lu be ni nako ye likani ya ku ca, ku itukiseza, ni ku fita kwa mukopano pili u si ka kalisa kale. Kwa neku la seo, lilama za lubasi b’a kona ku swalisana mwa linzila ze ñata.

¹⁴ Sebelezo ya mwa simu ya kamita ki nto ye s’a konwi ku siiwa kuli lu zamaye ka zwelopili mwa muzamao o lukile. Kaufel’a luna lwa itemuhela hande buikalabelo bo butuna bwa ku kutaza lushango lwa Mubuso. Seo ki sona se si lu bisa Lipaki za Jehova. (Is. 43:10) Bakeñisa kuli ki ona musebezi wa ka putako ni o tusa ka ku fitisisa o swelwi ku eziwa kacenu, ha ku na nzila ni ye kana yeo lu kona ku u’ nga hande haiba lu u bona sina kalulo ya ka ku tand’alelwa fela ya muzamao wa luna wa ka zazi ni zazi. Paulusi n’a elelize kuli: “Lu tiseze Mulimu sitabelo sa milumbeko, kikuli bupaki bo bu zwa mwa milomo ye lumba Libizo la hae.”—Maheb. 13:15.

¹⁵ Ha lu eza tukiso ya misebezi ya luna ka viki ni viki, lu swanela ku toma linako tota za sebelezo ya mwa simu. Ka mo ku swanehela, puteho i lukisize mikopano ya ku zwela mwa simu ka mazazi a sikai ka viki ni viki, mi ka bunolo fela ki taba ya ku iketela kuli ki ufi o lu kona ku fumaneha teñi. Neikaba ko ku nde ku lika ku abana mwa kalulo ye ñwi ni ye ñwi ya sebelezo, ye cwale ka ku eza musebezi wa fa ndu ni ndu ka limagazini ni lihatiso ze ñwi, ku eza misipili ya makutisezo, ni ku zamaisa lituto za Bibele. Mane ne lu kana lwa itukiseza ku fa bupaki bwa ka ku tand’alelwa ka ku shimba lihatiso ni ku tonela linako za ku kalisa lipuhisano. Bakeñisa kuli hañata lu y’a nga ni ba bañwi, lu tokwa ku buza ka za tukiso ya bona ilikuli lu kone ku eza litukiso ze k’a ba ze nde ku luna hamoho.

¹⁶ Muzamao wa luna wa ku kutaza u swanelwa ku bulukiwa ku si na taba ni ku s’a tabela kwa batu mwa kalulo. Lwa ziba isali kwa makalelo kuli ki ba sikai fela ba ba k’a nga muhato ka nzila ye nde. (Mat. 13:15; 24:9) Ezekiele n’a filwe musebezi wa ku kutaza kwa batu ba ‘baikuhumusi, ba kashwau, ni ba lipilu ze t’ata.’ Jehova n’a sepisize ku tusa Ezekiele ka ku tahisa kuli ‘sifateho sa hae si be se si t’ata, inge mo ba tatafalelize za bona,’ f’o kikuli, “sina daimani ye fita muhotolo kwa tata.” (Ezek. 2:3, 4; 3:7-9) Muzamao wa kamita kwa neku la sebelezo kacwalo u tokwa tundamo.

¹⁷ Mitala ye Minde ya ku Likanyisa: Buñata bwa luna lu eza hande mwa sebelezo ya mwa simu muta ku ba ni mutu yo muñwi y’a nga ketelelo. Paulusi ni balikani ba hae ne ba tomile mutala o munde, mi n’a susuelize ba bañwi kuli ba mu likanyise. (Mafil. 3:17) Muzamao wa hae ne u kopanyeleza likalulo kamukana ze tokwahala mwa ku ipuluka inze a tiile kwa moya.

¹⁸ Kacenu, hape, lu fuy’ozwi ka mitala ye minde. Kwa Maheberu 13:7, Paulusi n’a susuelize kuli: “Mu hupule ba ba mi zamaisa, . . . mu likanyise tumelo ya bona, mi mu lemuhe mafelelezo a bupilo bwa bona.” Ka mo ku inezi fela, Kreste ki yena Mutala wa luna, kono lwa kona ku likanyisa tumelo ya bao ba ba fa ketelelo. Ka ku swana ni Paulusi, maeluda ba lukela ku beya mwa munahano tokwahalo ya ku ba mitala ye minde ku ba bañwi. Hailif’o miinelo ya bona ya ka butu neikana ya fitana-fitana, yo muñwi ni yo muñwi u swanela ku kona ku bonisa kuli w’a buluka muzamao o lukile mwa ku beya licisehelo za Mubuso mwa sibaka sa pili. Niha ne ba kana ba ba ni buikalabelo bwa kwa mubeleko ni bwa lubasi, maeluda ba swanela ku ba ni mikwa ye tiile hande mwa tuto ya ka butu, ku fumaneha kwa mikopano, ku fa ketelelo mwa sebelezo ya mwa simu. Maeluda, ka ku fa bupaki bwa kuli ‘ba busa b’a ndu ya bona hande,’ ba mwa puteho kamukana ba ka susuezwa ku zamaya ka muzamao o lukile.—1 Tim. 3:4, 5.

¹⁹ Likonkwani za Silimo sa Sebelezo se Sinca: Makalelo a silimo sa sebelezo se sinca ki nako ye swanela ya ku iheta ka za muzamao wa luna wa ka butu. Ki sifi seo lundululo ya musebezi wa luna wa silimo se si felile i si bonisa? Kana ne lu konile ku buluka, kamba mwendi ku kondolokisa, sipimo sa musebezi wa luna? Ne lu kana lu bile ba ba ezize hande ni ku fita mwa tuto ya luna ya ka butu. Ne lu kana lu fumanehile kwa mikopano hañata ni ku fita kamba ne lu kana lu ekelize sebelezo ya luna ya mwa simu ka ku iñolisa sina mapaina ba ku tusa. Mwendi lwa kona ku supa kwa likezo tota za sishemo sa Sikreste ze se lu ezize kwa neku la ba bañwi mwa puteho ya luna kamba mwa lubasi. Haiba ku cwalo, lu kona ku ba ni tabo kuli se lu zamaile ka nzila ye tabisa Mulimu, mi lu na ni libaka le linde la kuli lu “ekeze kwateñi ka nako ni nako.”—1 Mates. 4:1.

²⁰ Ku cwañi haiba muzamao wa luna ne li o bat’o ba wa ku cinca-nca kamba wa ka matomo? Mayemo a luna a kwa moya n’a amilwe cwañi? Kana zwelopili ya luna ne i tibezwi ka libaka le liñwi? Ku kondolokisa lika ku kalisa ka kupo ya tuso ku Jehova. (Mafil. 4:6, 13) Mu buhisane butokwi bwa mina ni lubasi kaufela, ku kupa tuso ya bona mwa ku cinca likalulo za muzamao wa mina. Haiba mu na ni but’ata, mu kupe tuso ya maeluda. Haiba lu eza buikatazo bo bu tiile ni k’u nga muhato fa ketelelo ya Jehova, lwa kona ku ba ni buniti bwa kuli lu ka pima “buzwa ni ku palelwa.”—2 Pit. 1:5-8.

²¹ Ku zamaya ka muzamao o lukile ku tahisa limbuyoti ze tisa kuli buikatazo bwa mina bu be bo bu lukela. Ha mu nze mu keta ku zamaya ka ku eza zwelopili mwa muzamao o lukile, “mu si ke mwa fokola; mu be ni ku tukufalelwa mwa moya; mu sebeleze Mulena.” (Maro. 12:11)—Kwa neku la tatubisiso ye tungile fa taba ye, mu bone Tora ya ku Libelela ya August 1, 1986, makepe 13-17.